Te fu kaba, mi bigin du gymnastiek èn mi bigin opo isri. Bakaten mi opo wan gym na San Leandro, na ini California, Amerkankondre, èn mi ben e wroko makandra nanga man-nengre di ben e opo isri. Wan fu den ben tron Mister Amerika. Aladi mi skin ben e kon moro bigi, toku mi ben e misi wan sani.

Wan mati di ben e kon na a gym fu mi ben sabi taki mi ben wani leri sabi Bijbel, èn a taigi mi taki a o meki mi miti nanga wan sma di a ben sabi. A tra mamanten, wan Yehovah Kotoigi kon na mi oso. Fo yuru langa a gebroiki Bijbel fu piki den aksi fu mi. Mi aksi en fu kon baka a srefi neti, èn wi taki moro fara fu Bijbel te mindrineti. Mi ben breiti nanga den sani di mi ben leri èn mi aksi en efu mi ben kan go nanga en a tra dei fu si fa a ben e preiki. Mi no ben man bribi di mi si fa a ben e gebroiki Bijbel fu piki den aksi fu sma. Na dati mi ben wani du tu!

Sobun, mi tapu nanga a bisnis fu mi èn mi ben e gebroiki mi ten fu preiki makandra nanga a pionier disi. Na so sma ben e kari Yehovah Kotoigi di ben e preiki 100 yuru wán mun, noso moro leki dati. Na ini mei 1948, mi teki dopu na wan kongres na ini Cow Palace Stadion na ini San Fransisco, California. A srefi yari dati, mi srefi tron wan pionier.

Na a srefi ten dati, mi aksi den Kotoigi fu go na mi mama. Mi mama arki a boskopu èn heri esi a tron wan Yehovah Kotoigi. Aladi en famiri ben e gens en, toku a tan dini Gado furu yari langa, te na a dede fu en. No wan tra sma fu mi famiri tron Kotoigi.

Na ini 1950 mi froisi go na Grand Junction, Colorado, pe mi miti Billie. A gebore na ini 1928 èn a gro kon bigi na a ten di bigi ekonomia problema ben de na heri grontapu. En mama, Minnie, ben e leisi Bijbel gi en ibri neti nanga kokolampu. Di Billie ben abi fo yari, dan a ben sabi furu Bijbel tori na ede. Na ini den yari syatu bifo 1949, en mama ben studeri Bijbel nanga Yehovah Kotoigi, èn a ben kon sabi taki hel a no wan presi pe sma e pina, ma taki a de a grebi fu libisma (Preikiman 9:5, 10). Minnie nanga en masra tron Kotoigi.

Na ini 1949, Billie komoto fu heiskoro na ini Boston èn a bigin studeri Bijbel seryusu. A no tron wan skorojufrow, ma a bosroiti fu gi en libi abra na Gado. A teki dopu na ini 1950, na a internationaal kongres fu Yehovah Kotoigi di hori na ini Yankee Stadion, na New York. Syatu baka dati, mi nanga  en miti, wi trow, èn wi bigin preiki moro leki 100 yuru wán mun.

Wi bigin dini na ini Eugene, na Oregon, èn wi kon sabi sma di de wi mati te now ete. Na ini 1953, wi froisi go na Grants Pass, na ini Oregon, fu yepi a pikin gemeente drape. A srefi yari dati wi kisi kari fu go na a di fu 23 klas fu Gilead, a skoro pe den Kotoigi e kisi leri fu tron zendeling. A skoro disi de krosibei fu South Lansing, na New York, sowan 400 kilometer go na a noordwest-sei fu New York City.

Na ini december 1954, feifi mun baka di wi klari Gileadskoro, mi nanga Billie go na Brasyonkondre nanga wan pikin opolani. Wi ben de na pasi wán yuru kaba di wan fu den masyin fu na opolani broko, ma toku wi saka bun na Bermuda. Wi ben musu saka ete wan leisi na Cuba fu di na opolani ben e gi problema. Wi ben de na pasi 36 yuru langa, fosi wi doro na a bijkantoro fu Yehovah Kotoigi na ini Rio de Janeiro, Brasyonkondre.

Wi tan drape syatu, ne mi, Billie, nanga ete tu zendeling teki pasi go na Bauru, na ini São Paulo, fu go tan na ini wan nyun zendeling-oso. Moro leki 50,000 sma ben e tan na ini a foto, èn wi ben de den fosi Kotoigi drape.

Wi bigin go na den sma oso fu preiki gi den, ma wantewante a Lomsu priester fu drape bigin gens a wroko fu wi. A ben e waka na wi baka èn a ben e warskow den sma fu no arki wi. Ma baka wan tu wiki, wan bigi osofamiri di wi ben e studeri nanga den, poti bribi na ini a Bijbel boskopu èn bakaten den teki dopu. Heri esi tra sma bigin studeri tu.

Na osofamiri di ben teki dopu ben abi wan famiriman di ben de fesiman fu wan grupu. Mi seti sani fu yuru a presi pe a grupu ben e kon makandra, fu di wi ben wani hori wan bigi konmakandra. Di a priester fu drape ben de nomonomo fu gens a tori, dan a fesiman miti nanga den memre fu a grupu èn a taigi den: „Efu unu no wani, dan mi no wani de fesiman moro!” Na so a konmakandra fu wi ben man go doro.

A yari baka dati, na ini 1956, wi kisi kari fu go na a distrikt kongres na Santos, na ini São Paulo. Pikinmoro 40 Kotoigi fu wi gemeente go drape nanga loko. Di wi drai go baka na Bauru, mi feni wan brifi di ben e sori taki mi ben kisi a frantwortu fu go luku den difrenti gemeente fu Yehovah Kotoigi. Dati ben de a bigin fu den pikinmoro 25 yari di mi dini na ini Brasyonkondre, èn mi dini na furu presi fu a bigi kondre dati.

Na ini a ten dati, a ben muilek fu teki waka na ini a kondre. Te fu kaba wi wroko na ini pikinmoro a heri kondre èn wi ben e go nanga bus, loko, asiwagi, baisigri, èn nanga futu. Wan fu den fosi foto pe wi go, na Jaú, São Paulo. Na drape a priester ben gens wi.

„Yu no mag preiki gi den sma fu mi kerki!’” na so a ben taki.

„Den sma a no fu yu”, na so wi piki en. „Na Gado abi den.”

Wi seti sani fu sori wan felem di ben abi fu du nanga a preikiwroko di e du na heri grontapu. A felem ben nen De Nieuwe-Wereldmaatschappij in actie. Ma a priester tyari sma kon na wán fu kon feti nanga wi. Wi go kari skowtu wantewante. Di a priester nanga den kerkiman fu en doro na a theater, dan den no ben man pasa fu di skowtu ben e tanapu drape e wakti den nanga gon. A bigi grupu  sma di ben kon luku a felem ben lobi a felem srefisrefi.

Pikinmoro na ala presi pe wi ben e go dini na a ten dati, kerki ben e gens wi. Fu eksempre, na ini Brusque, krosibei fu Blumenau, na ini Santa Catarina, wi miti tu pionier di ben e kisi hebi gens. Ma fu di den horidoro, meki den kisi bigi blesi. Now, sowan 50 yari moro fara, moro leki 60 gemeente de na ini a kontren dati èn sosrefi wan moi kongreshal na ini a foto Itajaí!

Mi e memre ete fa wi ben e prisiri fu wroko makandra nanga tra Kotoigi fu sreka sani gi den bigi kongres. Na ini a pisi ten fu 1975-1977, mi ben abi a grani fu dini leki kongres fesiman na ini a bigi Morumbi Stadion. Wi seni aksi den pikinmoro 100 gemeente na ini a kontren drape efu ibriwan fu den ben kan seni tin sma fu kon yepi krin a stadion a neti fosi a kongres.

Di den sma di ben e prei futubal ben e komoto na ini a stadion a neti dati, dan wi yere fa sonwan fu den ben e spotu: „Luku den uma nanga den sisibi nanga den dweiri. Den denki taki den o man kaba krin a heri stadion.” Ma na mindrineti a heri stadion ben krin! A man di ben abi a frantwortu fu a stadion taigi wi: „Mi nanga den man fu mi ben o abi wan heri wiki fanowdu fu du san unu du na ini wan tu yuru nomo!”

Na ini 1980, mi papa dede, èn syatu baka dati wi drai go baka na Amerkankondre fu sorgu gi mi mama, na ini Fremont, na California. Wi feni wroko fu krin gebow te neti aladi wi ben e pionier èn ben e yepi den Potigisisma na ini a kontren drape. Bakaten wi froisi go tan krosibei fu San Joaquin Valley. Drape wi ben e preiki na ini a bigi kontren fu Sacramento te go miti Bakersfield gi sma di ben e taki Potogisitongo. Now sowan tin Potogisi gemeente de na ini California.

Baka di mi mama dede na ini 1995, wi froisi go na Florida èn wi sorgu gi a papa fu Billie te na a dede fu en. Billie mama dede na ini 1975. Na ini a yari 2000, wi froisi go na a zuidwest-sei fu Colorado, wan hei sabana presi. Drape wi ben e preiki moro leki 100 yuru wán mun, na ini den kontren pe den Navajo-ingi nanga Ute-ingi e tan. A sari taki Billie dede na ini februari 2014.

Mi breiti taki moro leki 65 yari pasa, mi miti wan Yehovah Kotoigi di gebroiki Bijbel fu piki den someni aksi di mi ben abi! Ma mi breiti srefisrefi taki mi luku efu den sani di a ben e leri mi ben e kruderi nanga Bijbel. A sani disi meki taki mi kisi furu blesi na ini a wroko fu Gado.