Bijbel na a Wortu fu Gado. A de leki wan brifi fu wan lobi-ati papa (2 Timoteyus 3:16). Na ini Bijbel, Gado e fruteri wi fa wi kan meki a prisiri nanga wi, fu san ede a e gi pasi taki ogri de, èn san a o du gi libisma na ini a ten di e kon. Ma kerki leriman drai den leri fu Bijbel. A sani dati meki taki furu sma e denki taki den no o man frustan Bijbel noiti.—Tori fu den apostel 20:29, 30.

Yehovah Gado wani taki wi kon sabi den tru tori fu en. Fu dati ede a gi wi wan buku di wi man frustan.—Leisi 1 Timoteyus 2:3, 4.

Boiti taki Yehovah gi wi a Bijbel, a e yepi wi tu fu frustan en. A seni Yesus kon na grontapu fu gi wi leri (Lukas 4:16-21). Yesus yepi den arkiman fu en fu kon frustan den Buku fu Bijbel, èn a taki fu a wán vers baka a trawan.—Leisi Lukas 24:27, 32, 45.

Yesus seti a Kresten gemeente fu go doro nanga a wroko di a ben bigin (Mateyus 28:19, 20). Na ini a ten disi, den trutru bakaman fu Yesus e yepi sma fu kon frustan san Bijbel e leri wi fu Gado. Efu yu wani kon frustan Bijbel, dan Yehovah Kotoigi o breiti fu yepi yu.—Leisi Tori fu den apostel 8:30, 31.