Bijbel e kenki sma libi

SAN wan man fu Skotland ben feni moro prenspari leki fu abi wan bun bisnis? San yepi wan man na ini Brasyonkondre fu tapu nanga a yayolibi fu en èn fu no smoko koka moro? Fa wan man na ini Slofeinia ben man tapu nanga a gwenti di a ben abi fu dringi sopi pasa marki? Leisi san den sma disi abi fu taki.

„A ben gersi leki mi libi ben e waka bun.”​—JOHN RICKETTS

A GEBORE NA INI 1958

KONDRE: SKOTLAND

FOSI: A BEN ABI WAN BUN BISNIS

A LIBI FU MI FOSI: Mi ben abi wan switi libi di mi ben e gro kon bigi. Mi papa ben de wan ofsiri na ini a legre fu Ingrisikondre èn fu dati ede wi osofamiri ben e froisi furu. Boiti Skotland, wi libi tu na ini Ingrisikondre, Doisrikondre, Kenia, Malèisia, Ierland, nanga Siprus. Sensi mi abi aiti yari, mi go na internaat skoro na ini Skotland. Te fu kaba mi stuka komoto na Cambridge Universiteit.

Di mi ben abi 20 yari, mi go na ini na oli bisnis èn mi du a wroko dati aiti yari langa. Mi bigin wroko na ini Zuid-Amerika, baka dati na ini Afrika, èn te fu kaba na ini West-Australia. Baka di mi go na Australia, mi opo wan bisnis di ben e gi sma okasi fu meki moni na ini tra bisnis. Te fu kaba mi seri a bisnis dati.

A moni di mi ben meki di mi seri a bisnis, gi mi okasi fu go nanga pensyun di mi ben abi 40 yari. Now mi ben e gebroiki mi ten fu go na tra kondre. Tu leisi mi rèi motro go na ala sei fu Australia èn mi teki waka lontu heri grontapu. A ben gersi leki mi libi ben e waka bun.

A FASI FA BIJBEL KENKI MI LIBI: Fosi mi go nanga pensyun, mi ben e suku wan fasi kaba fu taki Gado tangi gi a libi di mi ben abi. Mi bigin go na a Anglikan Kerki pe mi ben gwenti go di mi ben yongu. Ma a kerki no leri mi furu sani fu Bijbel. Baka dati mi bigin studeri nanga den Mormoonsma, ma mi no ben wani go doro nanga a studie, fu di den no ben e frutrow na ini Bijbel.

Wan dei, Yehovah Kotoigi naki na mi doro. Mi ben kan si wantewante taki ala san den e leri sma e komoto fu Bijbel. Wan tekst di den leisi gi mi ben de 1 Timoteyus 2:3, 4. Den vers dati e sori taki Gado wani taki „ala sortu sma musu kisi frulusu èn taki den musu kon sabi a tru leri finifini”. A naki mi ati taki den Kotoigi sori mi krin taki wan sma no musu sabi wan tu sani fu Bijbel nomo, ma a musu sabi a tru leri fu Bijbel finifini.

Fu di mi studeri Bijbel nanga Yehovah Kotoigi, meki mi kon sabi den tru leri dati. Fu eksempre, mi leri taki a no tru taki Gado, Yesus,  nanga a santa yeye na wán sma, soleki fa sma e bribi. Na presi fu dati, Gado nanga Yesus na tu difrenti sma (Yohanes 14:28; 1 Korentesma 11:3). Mi ben breiti fu leri a tru tori dati di no muilek fu frustan. A ben hati mi taki mi ben meki so furu muiti fu frustan wan leri di sma no man frustan!

Heri esi, mi bigin go na den konmakandra fu Yehovah Kotoigi. A naki mi ati di mi si fa ala sma drape ben e sori switifasi èn fa den ben e hori densrefi na den bun leri fu Bijbel di e sori wi fa wi musu tyari wisrefi. Gi mi, den sma dati ben gersi santa sma. A trutru lobi di den sori, meki mi kon si taki mi ben feni a tru bribi.​—Yohanes 13:35.

DEN WINI DI MI KISI: Baka di mi teki dopu, mi miti wan bun uma di nen Diane. A ben kweki leki wan Kotoigi fu Yehovah, èn a ben abi furu moi fasi di mi ben lobi. Bakaten wi trow. Diane ben de wan trutru blesi fu Yehovah, fu di a ben de wan mati gi mi èn fu di a horibaka gi mi.

Te fu kaba mi nanga Diane ben angri fu froisi go tan na wan kontren pe moro preikiman fu a bun nyunsu fu Bijbel ben de fanowdu. Na ini 2010, wi froisi go tan na Belise, na Mindri-Amerika. Dyaso wi e preiki gi sma di lobi Gado èn di wani kon sabi moro fu Bijbel.

Mi e firi bun, now di mi kon sabi den tru tori fu Gado nanga en Wortu, Bijbel. Now mi e gebroiki mi ten fu preiki fu Gado èn mi breiti taki mi ben abi a grani fu gi furu sma leri fu Bijbel. Nowan enkri sani e gi moro prisiri leki fu si fa den tru tori fu Bijbel e kenki sma libi, neleki fa a ben kenki a di fu mi. Te fu kaba, mi feni a moro bun fasi fu taki Gado tangi gi a libi di mi abi.

„Den ben sori switifasi gi mi.”​—MAURÍCIO ARAÚJO

A GEBORE NA INI 1967

KONDRE: BRASYONKONDRE

FOSI: A BEN E LIBI WAN YAYO LIBI

A LIBI FU MI FOSI: Mi kweki na ini Avaré, wan pikin foto na ini a distrikt São Paolo. Furu fu den sma di e libi drape na pôti sma.

Mi papa dede di mi mama ben de nanga bere fu mi. Leki pikin boi, mi ben gwenti weri mi mama krosi te a no ben de na oso. Mi bigin du leki wan umasma èn sma ben e si mi leki wan homo. Bakaten, mi bigin abi seks nanga tra boi èn nanga bigibigi man.

Di mi ben abi sowan 20 yari, mi ben gwenti suku sma (mansma nanga umasma) fu abi seks nanga den. Mi ben e suku den na ala presi pe mi ben kan feni den, na ini bar, dansi-oso, nanga kerki srefi. Te karnafal ben de, dan mi ben e weri umasma krosi èn mi ben e waka e dansi na strati nanga den samba grupu. Mi ben pôpi srefisrefi.

Den mati fu mi ben de homo, huru-uma, nanga dyonki. Sonwan fu den gi mi deki-ati fu gebroiki koka, èn fosi yu denki misrefi tron wan dyonki. Son leisi wi ben e smoko heri neti. Tra leisi baka, mi ben wani de mi wawan èn mi ben e smoko hebi drugs a heri dei. Mi  ben kon mangri so te, taki sma bigin fruteri taki mi abi AIDS.

A FASI FA BIJBEL KENKI MI LIBI: Na a ten dati mi kon miti nanga Yehovah Kotoigi. Den sori switifasi gi mi. Wan fu den Bijbeltekst di den leisi gi mi na Romesma 10:13, pe skrifi: „Ibri sma di e kari a nen fu Yehovah o kisi frulusu.” Den wortu dati meki mi kon frustan o prenspari a de fu gebroiki a nen Yehovah. Furu leisi, baka te mi ben kaba smoko koka heri neti, mi ben e opo wan fensre fu luku go na hemel, dan mi ben e begi Yehovah nanga watra-ai fu yepi mi.

Mi mama ben e sari srefisrefi èn a ben e hati en fu si fa mi ben e pori mi libi nanga drugs. Fu di mi ben e broko mi ede nanga en meki mi bosroiti fu tapu nanga drugs. Syatu baka dati mi bigin studeri Bijbel nanga den Kotoigi. Den gi mi a dyaranti taki a studie ben o yepi mi trutru fu tapu nanga drugs, èn na dati pasa tu!

Di mi studeri Bijbel wan pisi ten, dan mi kon si taki mi ben musu kenki a fasi fa mi ben e libi. A ben muilek spesrutu fu tapu nanga a homo-sekslibi fu mi, fu di mi ben gwenti libi so langa ten kaba. Ma wán sani di yepi mi, na taki mi suku fu tapu nanga iniwan sani di no ben bun gi mi. Mi libi den mati di mi ben abi fosi èn mi no go moro na bar nanga dansi-oso.

Aladi a no ben makriki fu tyari den kenki disi kon, toku a ben de wan trowstu gi mi fu sabi taki Yehovah ben e broko en ede nanga mi èn taki a ben sabi sortu muiti mi ben e du (1 Yohanes 3:19, 20). Na a ten fu a yari 2002, mi tapu nanga a homo-sekslibi fu mi. A yari dati mi teki dopu tron wan Yehovah Kotoigi.

DEN WINI DI MI KISI: Mi mama ben breiti so te nanga den kenki di mi tyari kon, taki a bigin studeri Bijbel tu. A de wan sari sani taki syatu baka dati, brudu naki en. Toku a tan sori lobi gi Yehovah èn gi den tru tori fu Bijbel.

Na ini den aiti yari di pasa, mi gebroiki furu fu mi ten fu gi sma leri fu Bijbel. Mi no musu lei taki son leisi mi musu feti nanga den takru lostu di mi e kisi. Ma a e gi mi deki-ati fu sabi taki mi kan plisi Yehovah, te mi e weigri fu du den sani di mi e firi fu du.

Fu di mi kon moro krosibei na Yehovah èn fu di mi e libi na wan fasi di e plisi en, meki mi kisi moro lespeki gi misrefi. Tide na a dei, mi de koloku.

„Mi ben de wan sopi bari di noiti no e furu.”​—LUKA ŠUC

A GEBORE NA INI 1975

KONDRE: SLOFEINIA

FOSI: A BEN E DRINGI SOPI PASA MARKI

A LIBI FU MI FOSI: Mi gebore na ini Ljubljana, a mamafoto fu Slofeinia. Mi ben abi wan switi libi teleki mi papa kiri ensrefi, di mi ben abi fo yari. Di a sari sani disi pasa, mi mama ben musu wroko fu sorgu mi nanga mi bigi brada, tu yongu boi.

Di mi ben abi 15 yari, dan mi go tan nanga mi granmama. Mi ben lobi fu tan nanga en, fu di furu fu den mati fu mi ben e tan na ini a birti drape.  Boiti dati, mi ben mag du moro sani leki di mi ben e tan na mi mama. Di mi ben abi 16 yari, dan mi bigin moksi nanga sma di ben gwenti go dringi sopi na a kaba fu a wiki. Mi kweki mi wiwiri kon langa, mi bigin weri dyango krosi, èn bakaten mi bigin smoko.

Aladi mi pruberi difrenti sortu drugs, toku mi tan dringi sopi fu di na dati mi ben lobi. Fosi, mi ben dringi wan tu grasi win nomo, ma a no teki langa fosi mi bigin dringi moro leki wán batra ibri leisi. Mi ben kon sabi heri bun san mi ben musu du fu no meki sma si taki mi drungu. Nofo tron, na soso a smeri fu mi mofo ben e sori taki mi ben dringi sopi. Kande mi ben dringi wan tu liter win, biri, nanga wodka sosrefi, toku nowan sma ben sabi dati!

Te den mati fu mi ben drungu te wi ben e gowe libi wan dansi-oso, dan na mi di ben dringi kande tu tron so furu sopi leki den, ben e yepi den fu waka. Wan dei, mi yere fa wan fu den mati fu mi taki dati mi ben de wan sopi bari di noiti no e furu. Na so sma fu Slofeinia e kosi trawan te den feni taki den e dringi sopi moro ala tra sma. A sani di a ben taki hati mi trutru.

Mi bigin prakseri a fasi fa mi ben e libi. Mi bigin firi leki mi no ben warti notinoti. A ben gersi leki nowan sani di mi ben e du ben bun.

A FASI FA BIJBEL KENKI MI LIBI: Na a ten dati, mi kon si taki wan fu den boi fu mi klas ben kenki. A ben kon moro tiri. Fu di mi ben wani sabi fa dati du kon, meki mi aksi en fu go dringi wan sani nanga mi. Di wi ben e taki, dan a taigi mi taki a ben bigin studeri Bijbel nanga Yehovah Kotoigi. A fruteri mi wan tu fu den sani di a ben e leri, sani di mi no ben sabi srefisrefi, fu di mi no ben gwenti go na kerki. Mi bigin go na den konmakandra fu den Kotoigi èn mi bigin studeri Bijbel nanga den.

Di mi ben e studeri Bijbel, dan mi kon sabi furu tru tori di ben abi bigi krakti na mi tapu. Fu eksempre, mi leri taki wi e libi na a pisi ten di Bijbel e kari „den lasti dei” (2 Timoteyus 3:1-5). Mi leri tu taki heri esi Gado o puru ala ogri sma na grontapu èn taki a o gi den bun sma okasi fu libi fu têgo na ini Paradijs (Psalm 37:29). Mi ben e angri fu kenki mi libi, so taki mi ben kan tron wan fu den bun sma dati.

Mi bigin fruteri den mati fu mi den tru tori fu Bijbel di mi ben e leri. Furu fu den ben e spotu mi te mi ben e taki nanga den fu den tori dati. Ma toku dati yepi mi fu kon si taki den no ben de trutru mati. Mi kon si taki na den mati fu mi ben meki taki mi ben e dringi so furu sopi. Den ben e wakti a kaba fu a wiki nomo so taki den ben kan kon drungu baka.

Mi libi ala den mati dati èn mi bigin meki bun mati di ben de Yehovah Kotoigi. Te mi ben de nanga den mati dati, dan dati ben e gi mi deki-ati trutru. Den sma disi ben lobi Gado nanga den heri ati èn den ben e meki tranga muiti fu hori densrefi na den leri fu en. Safrisafri mi ben man tapu nanga a gwenti di mi ben abi fu dringi sopi pasa marki.

DEN WINI DI MI KISI: Mi e taki Yehovah tangi taki mi no abi sopi fanowdu moro fu kan firi koloku. Mi no sabi san ben o pasa nanga mi efu mi no ben kenki mi libi. Ma mi sabi seiker taki mi abi wan moro bun libi now.

Seibi yari kaba mi abi a grani fu wroko na a bijkantoro fu Yehovah Kotoigi na ini Slofeinia. Fu di mi sabi Yehovah èn fu di mi e dini en, meki mi abi wan koloku libi now.