Yu ben sabi a sani disi?

San Yesus ben wani taki di a taigi sma fu waka a di fu tu kilometer?

▪ Na ini a prenspari taki di Yesus ben hori na tapu na Olèifbergi, a ben gi sma a rai disi: „Efu wan sma di abi makti, e dwengi yu fu waka wán kilometer nanga en, dan waka tu kilometer nanga en” (Mateyus 5:41). A kan taki den arkiman fu Yesus ben e frustan taki a ben e taki fu a dwengi di wan sma di abi makti ben kan dwengi borgu fu a kondre fu du wan wroko.

Na ini a fosi yarihondro, Israel ben de na ondro a makti fu den Romesma. Den no ben fisti fu dwengi libisma nanga meti fu wroko gi den, noso fu teki sani fu sma fu meki a wroko fu den go moro esi. Fu eksempre, den srudati fu Rome ben taigi Simon fu Sireine fu syow a pinapostu fu Yesus go na a presi pe den ben o kiri en (Mateyus 27:32). A fasi fa den ben e dwengi sma ben de wan hebi gi den Dyu. Den Dyu no ben lobi a sani dati èn den ben abi bita-ati gi den sma di ben e du so nanga den.

Wi no sabi te o fara den ben kan dwengi borgu fu tyari wan lai. Ma wi kan frustan taki den borgu no ben o wani tyari a lai go moro fara leki san sma ben taigi den. Sobun, di Yesus gi den bakaman fu en a rai fu waka a di fu tu kilometer, dan a ben e leri den taki te sma di abi makti ben e gi den wan wroko, dan den ben musu du dati sondro atibron.​—Markus 12:17.

Suma na Anas di kari na ini na den Evangelietori?

▪ Soleki fa Bijbel e sori, dan na a ten di sma ben tyari Yesus go na fesi krutu, sma ben e kari Anas (Ananus) „granpriester” (Lukas 3:2; Yohanes 18:13; Tori fu den apostel 4:6). A ben de a papa fu a wefi fu Kayafas, a granpriester fu Israel. Anas srefi ben de priester tu fu a yari 6 noso 7 baka Krestes, teleki a yari 15, di Valerius Gratus, wan tiriman di ben e wroko gi Rome, puru en leki priester. Aladi Anas no ben de granpriester moro, toku a tan abi bigi makti na ini Israel. Feifi manpikin fu en, sosrefi a masra fu en umapikin tron granpriester.

A heri pisi ten di Israel ben abi en eigi tirimakti, a granpriester ben e tan granpriester en heri libi langa (Numeri 35:25). Ma di Israel ben de na ondro a makti fu den tiriman noso den kownu fu Rome, dan den tiriman dati ben kan bosroiti suma den ben e poti noso puru leki granpriester. A historia skrifiman Flavius Josephus e skrifi taki Kwiriniyus, di Rome ben poti leki tiriman fu Siria, ben puru Yoasar leki granpriester na a ten fu a yari 6 noso 7 baka Krestes, èn a poti Anas na ini a presi fu en. Ma soleki fa a sori, den heiden tiriman disi ben e luku bun taki den sma di den ben e poti leki granpriester ben de fu a grupu fu priester.

Sma ben sabi a famiri fu Anas leki gridi sma di ben gudu srefisrefi. Soleki fa a sori, den ben kon gudu fu di den wawan ben e seri den sani di sma ben abi fanowdu fu tyari ofrandi na a tempel. Dati ben de sani soleki doifi, skapu, oli, nanga win. Josephus e skrifi taki Ananus (Ananias), a manpikin fu Anas ben abi „futuboi di ben de bigi ogriman di ben e dwengi sma fu gi a di fu tin pisi fu den gudu fu den fu horibaka gi den priester. Den ben fon den sma tu di ben e weigri fu gi sani.”