▪ Sma gwenti seti popki di e prenki den dri kownu, noso koniman di ben e go luku a nyunyun beibi Yesus di ben e didon na ini wan nyanyan baki. Den gwenti prei komedi prei di abi fu du nanga a tori dati. Oiti yu si den sani dati? A tori e taki dati Gado gebroiki wan stari fu tyari den man disi go na Betlehem, na wan presi pe meti ben e tan. Furu pikin sabi den dri kownu dati leki Melkior, Kaspar, nanga Baltasar. Ma a pôpi tori dati e kruderi nanga san Bijbel e taki? Nôno. Furu sani fu a tori dati no tru.

A fosi sani di wi musu aksi wisrefi, na: Suma ben de den man dati? A Grikitongo di Bijbel ben skrifi na ini, no e kari den man dati kownu noso koniman, ma lukuman. Soleki fa a sori, den ben abi a heiden gwenti fu koti luku nanga yepi fu den stari. Bijbel no e taki fa den man dati ben nen, noso omeni fu den ben de.

Wan tra sani di wi musu aksi wi srefi, na: O ten den man disi go luku Yesus? Den no go na a ten di Yesus ben de wan beibi na ini wan nyanyan baki. Fa wi du sabi dati? Na Evangelie skrifiman Mateyus e taki: „Den go na ini na oso èn den si a yongu pikin nanga en mama Maria” (Mateyus 2:11). Luku taki Yesus no ben de wan nyunyun beibi moro, ma a ben de wan „yongu pikin”. Maria nanga Yosef no ben e tan moro na wan presi pe meti ben e tan, ma na a ten dati, den ben e libi na ini wan oso.

Ete wan sani di wi musu aksi wisrefi, na: Suma seni a „stari” fu tyari den lukuman go na Yesus? Furu kerki fesiman na ini a ten disi e leri sma taki na Gado seni a „stari”. Ma a sani dati tru? Hori na prakseri taki a „stari” no tyari den lukuman go na Betlehem fosi, ma na Kownu Herodes na ini Yerusalem. Den fruteri a dyarusu èn makti kiriman dati taki Yesus ben gebore èn den taigi en sani di meki taki a kisi bita-ati gi a pikin di ben musu tron „kownu fu den Dyu” (Mateyus 2:2). Fu di Herodes ben abi triki, meki a taigi den fu kon baka na en fu fruteri en krin pe a pikin ben de. A taigi den taki a ben wani gi a pikin grani tu. Baka dati, a „stari” tyari den lukuman go na Yosef nanga Maria. A sani di den lukuman ben o du ben o tyari dede kon gi a yongu pikin efu Gado no ben kon na ini a tori. Koloku taki Gado du dati. Herodes ben atibron so te, taki di den lukuman no kon baka na en, a meki sma kiri ala pikin boi fu tu yari èn moro yongu, na ini Betlehem èn na ini a kontren drape.​—Mateyus 2:16.

Bakaten, Yehovah kari Yesus „mi Manpikin, a lobiwan di mi feni bun” (Mateyus 3:17). Hori na prakseri taki den man disi ben de heiden lukuman, noso sma di ben e du afkodrei, wan sani di a Wèt ben e krutu (Deuteronomium 18:10). Yu denki taki wan lobi-ati papa di e du san reti ben o teki den sma dati leki en boskopuman? Yu denki taki a ben o gebroiki wan stari fu tyari den go na Herodes, a moro ogri-ati èn makti kiriman na ini a kondre, fu tyari wan boskopu di ben o meki a dyarusu man dati kisi bita-ati? Yu denki taki bakaten, Gado ben o gebroiki a srefi stari dati èn den srefi lukuman fu tyari kon na krin pe a pôti boi fu En ben de?

Luku na agersitori disi: Wan srudati komandanti seni a moro bun srudati fu en fu go du wan wroko te na ini a kontren fu a feanti pe ogri ben kan miti en. Yu denki taki a ben o seni taigi den feanti pe den kan feni a srudati dati? Kwetikweti! Na so Yehovah seni en Manpikin kon tu na a ogri grontapu disi. Yu denki taki a ben o sori Kownu Herodes pe a Manpikin fu en ben de? Noiti a ben o du dati!

We, dan suma ben seni a „stari”, noso a sani di ben gersi wan stari? We, suma ben o wani kiri a yongu pikin Yesus, so taki a no ben o man gro kon bigi fu du a wroko di a ben kisi fu du na grontapu? Suma e suku fu kori sma, fu fruteri lei, fu du ogri, èn fu kiri sma na wan ogri-ati fasi? Yesus srefi ben taki suma na a „leiman èn a tata fu ala lei”, a sma di ’ben de wan kiriman di a bigin waka en eigi pasi’. Dati na Satan Didibri.​—Yohanes 8:44.