A libi na ini Bijbel ten​—Pokuman nanga den pokusani fu den

„Prèise [Gado] èn blo tutu gi en. Prèise en èn prei poku gi en nanga harpu èn nanga tra pokusani di gersi harpu. Prèise en nanga tyengretyengre èn dansi gi en. Prèise en nanga bigi harpu èn nanga froiti. Prèise en nanga gengen di e piki krin. Prèise en nanga gengen di e piki tranga.”​—PSALM 150:3-5.

LANGA ten kaba, poku nanga pokuman prenspari na ini na anbegi fu Yehovah Gado. Fu eksempre, di Yehovah ben meki den Israelsma pasa a Redi Se libilibi na wan wondru fasi, dan Miryam nanga den tra uma bigin singi èn dansi fu di den ben wini a strei. Den ben e prei tyengretyengre aladi den ben e dansi. A sani disi e sori o prenspari poku ben de gi den Israelsma. Wan syatu pisi ten na fesi, den ben lowe gi a legre fu den Egeptesma, ma toku furu fu den umasma ben abi den pokusani na den èn den ben de srekasreka fu prei den (Eksodes 15:20). Furu yari baka dati, Kownu David seti sani fu meki dusundusun pokuman prei poku te sma ben e go anbegi Gado na ini a tabernakel. Den tan du disi srefi na a ten di en manpikin Salomo ben bow a tempel.​—1 Kroniki 23:5.

Fu san den pokusani disi ben meki? Fa den ben tan? Sortu poku den ben e meki? O ten sma ben e gebroiki den?

Difrenti sortu pokusani

Den pokusani di Bijbel e taki fu den ben meki fu diri udu, metibuba, isri, nanga bonyo. Sonwan ben abi ivoor na tapu. Den titei fu den pokusani ben meki fu sani fu spesrutu bon, noso fu den inibere fu meti. Aladi pikinmoro nowan fu den fositen pokusani disi de fu feni moro na ini a ten disi, toku prenki fu den de ete.

Wi kan prati den pokusani fu Bijbel ten na ini dri prenspari grupu: pokusani di abi titei, soleki a harpu, a lier (1), nanga a luit (2); pokusani di  sma ben e bro, soleki a tutu noso syofar (3), a trompeti (4), nanga a froiti noso a peipi di furu sma ben lobi (5); pokusani di sma ben e naki noso seki, soleki a tyengretyengre (6), a sistrum (wan sortu sekiseki) (7), plata dyendyen (8), nanga tra sortu gengen (9). Pokuman ben e prei den pokusani disi te sma ben e singi puwema, te den ben e dansi fu meki prisiri, èn te den ben e singi (1 Samuel 18:6, 7). Ma san moro prenspari, na taki den ben e gebroiki den te den ben e anbegi a Gado di ben blesi den nanga a koni fu meki poku (1 Kroniki 15:16). Wi o luku ibri grupu fu den pokusani disi moro fini.

Pokusani di abi titei A harpu nanga a lier ben meki fu lekti udu, so taki den ben makriki fu tyari èn sma ben span titei na den tapu. David ben e prei wan sortu harpu fu kowru na ati fu Kownu Saul te sani ben e trobi en (1 Samuel 16:23). Wan grupu pokuman ben prei den pokusani disi di a tempel fu Salomo ben gi abra na Gado, ma sma ben e gebroiki den tu na tra okasi, soleki na den alayari fesa.​—2 Kroniki 5:12; 9:11.

A luit ben gersi a harpu, ma nofo tron a ben meki tra fasi. Furu fu den pokusani disi ben abi wan tu titei nomo di ben hari span na tapu wan udu kasi. Te sma ben e pingi den titei, dan dati ben e meki moi poku di ben gersi a poku di sma e meki nanga son gitara na ini a ten disi. Den titei ben meki fu sani di sma ben e teki fu spesrutu bon èn di den ben e drai kon na wán, noso den ben e meki den fu inibere fu meti.

Pokusani di sma ben e bro Bijbel e taki furu fu den pokusani disi. Wan fu den moro owruwan na a Dyu tutu, di sma sabi leki a syofar. A tutu disi ben de a tutu fu wan manskapu, èn den ben diki na inisei fu en puru. Te sma ben e bro a tutu disi, dan a ben e meki wan srapu babari. Den Israelsma ben e gebroiki a syofar fu kari fetiman kon na wán na ini feti èn fu sori a pipel taki den ben musu du wan spesrutu sani.​—Krutuman 3:27; 7:22.

Wan tra sortu pokusani di sma ben e bro, na a isri trompeti. Wan owruten dokumenti di sma feni na mindri den Dede Se Lolo, e sori taki pokuman ben kan meki ala sortu poku nanga a trompeti disi. Yehovah ben taigi Moses fu meki tu solfru trompeti di sma ben kan gebroiki na a tabernakel (Numeri 10:2-7). Bakaten, di Salomo ben gi a tempel fu en abra, dan den tra 120 trompeti di pokuman bro na a fesa disi, ben de wan kefalek moi sani fu yere (2 Kroniki 5:12, 13). Sma ben e meki difrenti sortu trompeti, langawan nanga  syatuwan. Sonwan fu den ben langa pikinmoro 91 centimeter, fu a neki te go miti a mofo fu en.

Wan pokusani di den Israelsma ben lobi bro, na a froiti. A poku di sma ben e meki nanga a froiti, ben meki sma firi bun te den ben kon makandra leki famiri, te den ben de na wan fesa, noso na trow-oso (1 Kownu 1:40; Yesaya 30:29). Sma ben kan yere a moi poku fu a froiti tu na beri, pe pokuman ben e prei beri singi gi den famiriman di ben de na row (luku bladzijde 14).​—Mateyus 9:23.

Pokusani di sma ben e naki noso seki Te den Israelsma ben e meki prisiri, den ben e gebroiki difrenti sortu pokusani di den ben kan naki na tapu. A moi poku di den ben e meki nanga den pokusani disi, ben abi bigi krakti tapu den firi fu den. A tyengretyengre ben meki fu metibuba di sma ben hari span na tapu wan lontu udu linga. Te a pokuman, noso a dansiman ben e naki nanga en anu na en tapu, dan a ben e piki leki wan dron. Te a pokuman ben e seki a tyengretyengre, dan a babari fu den pikin gengen ben de wan moi sani fu yere.

Wan tra pokusani di sma ben e seki, na a sistrum. A pokusani disi ben lontu pikinso èn a ben meki fu isri. Boiti taki a ben abi wan anu pe sma ben kan hori en, a ben abi wan tu isri tiki na mindrisei fu en èn pikin plata gengen ben fasi na den tiki dati. Te sma ben e seki a sistrum tranga, dan yu ben kan yere a tyengretyengre fu en.

Den plata geri kopro gengen ben e piki moro tranga srefi. Tu sortu ben de, wan bigiwan nanga wan pikinwan. Sma ben e naki den bigi plata gengen disi bun tranga na makandra. Den moro pikinwan ben e meki moi poku, èn sma ben e fasi den na tu finga fu prei den. Te sma ben e naki den gengen disi na makandra, dan yu ben kan yere fa isri ben e naki na tapu isri, ma den bigiwan ben e piki moro tranga leki den pikinwan.​—Psalm 150:5.

Den teki na eksempre fu den fositen anbegiman fu Gado

Na ini a ten disi, te Yehovah Kotoigi e kon makandra fu anbegi Yehovah, dan den e bigin èn e tapu den konmakandra fu den nanga poku èn nanga singi. Na den moro bigi konmakandra fu den, den sma di e prei den poku di de fu yere drape, e prei disiten pokusani di abi titei, pokusani di sma e bro, nanga pokusani di sma e naki noso seki.

Fu di den Kotoigi e prei poku èn e singi na a anbegi fu den, meki den e teki na eksempre fu den Israelsma fu owruten èn fu den Kresten fu a fosi yarihondro (Efeisesma 5:19). Neleki den futuboi fu Gado na ini Bijbel ten, Yehovah Kotoigi na ini a ten disi lobi fu moksi moi wortu nanga poku fu prèise Yehovah.

[Prenki na tapu bladzijde 23]

(Luku a tijdschrift)