Abraham​—Wan man di ben abi sakafasi

Abraham e sidon na ini en tenti pe a e feni kowru na a moro faya pisi ten fu a dei. Te a e luku go na dorosei, dan farawe a e si dri mansma e waka kon. * Wantewante a e lon go miti den fisitiman, èn a e gi den deki-ati fu kon rostu pikinso na en oso. A e aksi den efu den wani „wan pisi brede”, èn baka dati a e meki sma sreka ala sortu nyanyan gi den, soleki waran brede, botro, merki, èn moi safu meti. A sani di Abraham du fu gi den fisitiman nyanyan, e sori taki a lobi fu gi sma wan switikon èn taki a abi trutru sakafasi soleki fa wi o si.​—Genesis 18:1-8.

SAN NA SAKAFASI? Sakafasi, na te wan sma no abi bigifasi èn te a no e denki tumusi fu ensrefi. Wan sma di abi sakafasi e frustan taki tra sma kan sabi sani di en no sabi (Filipisma 2:3). A sma dati e arki den rai fu trawan èn a de klariklari fu du iniwan sani gi trawan, awansi na sani di sma e si leki wan lagi wroko.

FA ABRAHAM BEN SORI SAKAFASI? Abraham ben lobi fu du sani gi trawan. Soleki fa wi si na a bigin fu na artikel, dan wantewante Abraham bigin sreka sani gi den dri fisitiman fu kan gi den san den ben abi fanowdu. En wefi Sara hasti ensrefi fu sreka wan nyanyan. Ma luku taki na Abraham ben du a moro bigi pisi fu a wroko, iya, na en lon go na den meti fu en fu luku sortuwan a wani srakti, èn na en poti ala den nyanyan sani gi den sma meki den nyan. Abraham no libi ala a wroko gi den futuboi fu en, ma a man disi di ben abi sakafasi, du iniwan sani di ben de fanowdu. A no ben feni taki a ben hei tumusi fu du den sani disi gi trawan.

Abraham ben arki den rai fu trawan tu. Bijbel e taki wan tu leisi nomo fu den  takimakandra di Abraham nanga Sara ben abi. Ma tu leisi Bijbel e sori taki Abraham ben arki Sara èn taki a du san Sara ben taigi en (Genesis 16:2; 21:8-14). Wan leisi, ’Abraham ben mandi’ nanga a rai di Sara ben gi en. Ma di Yehovah taigi Abraham taki Sara ben abi leti, dan Abraham sori sakafasi èn a teki a rai dati.

SAN WI E LERI FU DEN SANI DISI? Efu wi abi trutru sakafasi, dan wi o de klariklari fu yepi trawan. A o gi wi prisiri fu du ala sani di wi man fu meki a libi fu den kon moro makriki.

Wi e sori sakafasi tu te wi e arki te trawan e sori wi fa wi kan du wan sani. Na presi taki wi no e arki den, fu di wisrefi no ben prakseri a sani di den e taigi wi, dan a ben o de wan koni sani fu arki san den abi fu taki (Odo 15:22). Spesrutu den sma di abi moro frantwortu leki trawan o kisi wini te den abi den fasi dati. John, wan man di sabi heri bun fa fu teki fesi, e taki: „Mi kon si taki wan sma di man teki fesi na wan bun fasi, e gi sma okasi fu taki fri san den e denki. Wan sma musu abi sakafasi fu man si taki wan trawan di no abi so furu frantwortu leki en, man du sani moro bun leki en. Awinsi fa a no fa, nowan sma, iya, srefi nowan sma di e teki fesi, man taki dati na en wawan man gi bun rai.

Efu neleki Abraham, wi e arki san trawan abi fu taki èn efu wi e du iniwan wroko fu yepi trawan, dan Yehovah o feni wi bun. Fu taki en leti, „Gado e kakafutu gi den wan di abi heimemre, ma a e sori bun-ati gi den sma di abi sakafasi”.​—1 Petrus 5:5.

[Futuwortu]