’Den musu kisi lespeki fu di den kakafutu fayafaya gi a tirimakti’

NA A pisi ten di Adolf Hitler ben e tiri Doisrikondre na so wan ogri-ati fasi, dan a kisi dusundusun brifi. Na ini 1945, baka di den Rosiasma teki a kontren lontu Berlijn abra, sma tyari furu fu den brifi disi go na Moskow, èn den kibri den drape. Historia sabiman Henrik Eberle ondrosuku dusundusun fu den brifi disi di Moskow ben kibri, fu di a ben wani kon sabi sortu sma ben skrifi Hitler èn fu san ede den ben du dati. Eberle skrifi den sani di a ben kon sabi na ini a buku fu en di nen Briefe an Hitler (Brifi gi Hitler).

„Leriman nanga studenti, non nanga priester, sma di no ben abi wroko nanga bigi bisnisman, komandanti nanga srudati, iya, ala den sma disi ben skrifi brifi seni go gi Hitler”, na so sabiman Eberle e taki. „Son sma ben e si en leki a Mesias di gebore baka, aladi tra sma ben feni taki a ben de wan tumusi ogri-ati man.” A de so taki Hitler ben kisi brifi fu kerki fesiman di ben de teige den ogri di den Nazi ben e du? A ben kisi wan tu fu den sortu brifi dati, ma den no ben furu.

Na mindri den brifi di Moskow ben kibri, Eberle ben feni brifi di Yehovah Kotoigi fu difrenti presi na ini Doisrikondre ben seni gi den Nazi fu sori taki den no ben e agri nanga den sani di den ben e du. Fu taki en leti, Kotoigi fu sowan 50 kondre, sosrefi fu Doisrikondre, ben seni sowan 20.000 brifi nanga telegram gi Hitler fu sori taki den de teige den ogri di a ben e du nanga Yehovah Kotoigi. Den Nazi ben grabu dusundusun Kotoigi, èn den kiri hondrohondro fu den, noso den dede leki bakapisi fu den ogri di den ben du nanga den. Sabiman Eberle e taki te fu kaba: „Te wi e luku den milyunmilyun sma di lasi den libi na a ten fu a Nazi tirimakti, dan a grupu Kotoigi disi ben pikin. Ma toku disi e sori taki leki grupu den kakafutu fayafaya gi a tirimakti, èn fu dati ede den musu kisi lespeki.”