Wan libi di no de fu soso​—Now èn fu têgo

YU KAN abi wan warti libi nownow kaba. Fa? Te yu e gi yesi na den bun gronprakseri di skrifi na ini Gado Wortu, Bijbel. Meki wi go ondrosuku wan tu fu den.

BIJBEL GRONPRAKSERI: Kownu Salomo ben skrifi: „A moro bun sani di libisma kan du . . . na fu nyan, dringi èn prisiri nanga a tranga wroko fu en.”​—PREIKIMAN 2:24.

Wi meki na so wan fasi taki wi e prisiri te wi e du bun wroko. Srefi na ini situwâsi di muilek srefisrefi, yu kan abi prisiri now na ini a libi, fu di yu e wroko fayafaya sondro fu bedrigi trawan.

BIJBEL GRONPRAKSERI: „Wan sma sa de moro koloku te a e gi sani, leki te a e kisi sani.”​—TORI FU DEN APOSTEL 20:35.

Furu sma kon si taki te den e du sani gi trawan, fu eksempre te den e gi den ten nanga den krakti fu yepi trawan di abi en muilek, dan dati e meki den de koloku èn a meki taki den libi warti moro. Salomo ben skrifi: „Tan du bun gi den wan di de na nowtu, te yu man du dati.”​—Odo 3:27.

Luku na eksempre fu Ralph. Baka di a go nanga pensyun, a go makandra nanga en wefi na ini a furuten Kresten diniwroko. Ibri mun den e preiki furu yuru fu di den e gi densrefi fu leri trawan san Bijbel e taki. Ralph e taki: „Te wi kon na oso na mofoneti, dan wi no weri wawan fu di wi owru kaba, ma fu di wi e gi ala wi krakti na ini a diniwroko  fu wi hemel Tata. Aladi wi weri, toku wi e firi bun fu di wi e du wan bun wroko!” Ralph nanga en wefi de koloku fu di a moro prenspari sani na ini den libi, na fu gi densrefi fu yepi trawan.

BIJBEL GRONPRAKSERI: „Wan trutru mati e sori lobi ala ten. En na wan brada di gebore fu te nowtu de.”​—ODO 17:17.

Te yu abi problema, dan a kan de moro makriki fu horidoro te yu no de yu wawan. Na Ingrisi skrifiman Francis Bacon, ben skrifi taki gi den sma di no abi bun mati, „a grontapu gersi wan sabana pe den lasi”. Te yu abi bun mati, èn te yu na wan bun mati tu, dan dati kan meki a libi moro makriki gi yu. Na so yu abi wan koloku libi.

BIJBEL GRONPRAKSERI: „Koloku fu den sma di sabi taki den de na nowtu na yeye fasi.”—MATEYUS 5:3.

Dyaso Yesus e taki fu wan tumusi prenspari markitiki di yu musu doro fu man si a kontru fu den pramisi fu Gado. Dati na taki yu musu frustan taki yu „de na nowtu na yeye fasi” noso taki yu abi Gado fanowdu, èn yu musu du wan sani fu sori dati tu. Tra fasi leki meti, wi meki na so wan fasi taki wi musu frustan fu san ede wi de na grontapu. Na Yehovah Gado wawan kan yepi wi fu frustan dati, èn a e gebroiki en Wortu, Bijbel fu yepi wi. Soleki fa wi ben si kaba na ini na artikel na fesi, dan Bijbel e tyari kon na krin san Gado abi na prakseri gi grontapu. A e fruteri wi fu san ede wi de na grontapu, fu san ede so furu sma e pina, èn san Gado e fruwakti fu wi. A de prenspari fu frustan den tru tori disi fu Bijbel efu wi wani taki wi libi warti èn efu wi wani de koloku. Den sma di e teki ten fu studeri Bijbel èn fu fiti den sani di den leri, de koloku. Fu san ede? Fu di na so fasi den e kon kisi wan bun matifasi nanga wi Mekiman, „a koloku Gado”, Yehovah.​—1 Timoteyus 1:11.

BIJBEL GRONPRAKSERI: ’Memre yu Mekiman, fosi den dei kon di lai nanga sari, noso fosi den yari doro pe yu o taki: „Mi no e prisiri nanga a libi.”’​—PREIKIMAN 12:1.

Kownu Salomo e gi a rai disi na yongusma di kande no e frustan taki rampu kan miti den te fu kaba na ini a libi. Ma a rai disi fiti gi wi alamala. Meki a de so taki a Mekiman na a moro prenspari sma na ini yu libi. Na a sani disi o meki yu libi warti trutru. Sorgu taki yu no kon abi a denki disi: „Meki wi nyan èn meki wi dringi, bika tamara wi o dede” (1 Korentesma 15:32). Te yu e poti Gado na a fosi presi ini yu libi, dan sani „o go bun” nanga yu, na so Preikiman 8:12 e taki.

 Wan yongu uma di nen Wendi, kon si taki den wortu disi tru. Di a ben yongu, dan en nanga en sisa leri fu taki Spanyorotongo so taki den ben man froisi go na Dominikan Republiek, pe moro preikiman fu a bun nyunsu fu Bijbel ben de fanowdu. „Wi tyari bigi kenki kon na ini wi libi fu man dini pe dati ben de fanowdu, ma a ten dati ben de wan tumusi moi ten. Mi no ben o wani du nowan tra sani, leki den sani di mi du na ini den siksi mun di wi ben de drape! Den blesi di wi kisi ben bigi moro leki den kenki di wi ben tyari kon.”

Wi libi o warti te wi e tai hori na Gado

Te yu e kon abi wan bun matifasi nanga Yehovah, dan dati kan meki yu libi warti trutru. Fa so? Boiti taki Satan meki Adam nanga Eva trangayesi Gado, a ben taki tu dati nowan sma ben o man tai hori na Gado te den kisi tesi (Yob 1:9-11; 2:4). Yu kan yepi fu buweisi taki Satan e lei! Fa yu kan du dati? Te yu e tai hori na Gado, te yu e tan gi yesi na den gronprakseri fu en, èn te yu e sori taki yu e si Yehovah leki a sma di abi a reti fu bosroiti gi wi san bun èn san ogri.​—Openbaring 4:11.

Te wi e du san reti, dan a kan taki wi e kisi problema. Den problema dati o meki taki wi libi no o warti moro? We, kon meki wi taki dati wan ogri feanti e fruteri lei fu wan lobi mati noso famiriman fu wi. Efu wi ben o opo taki gi a lobiwan fu wi di kisi porinen èn a feanti ben o meki wi kisi problema, dan dati ben o meki taki wi libi no warti moro? Nôno, kwetikweti! Wi ben o breiti fu horidoro te wi e kisi den problema dati, fu di wi sabi taki na fu krin a sma en nen. Na so a de tu te wi e tai hori na Gado. Te wi e tai hori na Gado aladi ogri sani e miti wi, dan dati e meki Gado en ati prisiri trutru.—Odo 27:11.

Wan warti libi fu têgo

Fu dati ede, du ala san yu man fu kon leri sabi Gado nanga den sani di a abi na prakseri. Yesus Krestes srefi ben taki: „Efu sma wani kisi têgo libi, dan den musu tan leri sabi yu, a wan-enkri tru Gado, èn a sma di yu seni kon, Yesus Krestes” (Yohanes 17:3). Te Gado o meki den sani kon tru di a ben abi na prakseri gi grontapu sensi a bigin, dan libisma di tan gi yesi na en o kisi „têgo libi” na ini wan paradijs na grontapu. Na a sani disi Yehovah ben wani gi libisma. Na a ten dati a libi o warti trutru èn wi o de koloku.​—Psalm 145:16.

Pe yu kan feni a sabi di Yesus ben taki fu en? Na ini Gado Wortu, Bijbel. Efu yu ben o wani kisi yepi nanga dati, dan skrifi go na den sma di tyari a tijdschrift disi kon na doro. Den o breiti fu seti sani so taki wan sma yepi yu fu kon sabi san Bijbel e leri trutru.