NA INI december 2009 èn na ini yanuari 2010, tu fu den moro hei krutubangi na ini Rosiakondre bosroiti taki a bribi fu Yehovah Kotoigi e gi sma deki-ati fu opo densrefi teige lanti. A gersi leki san ben pasa fositen e pasa now baka. Na a ten fu a Sovyet-Unie, sma ben krutu dusundusun Kotoigi fu di den ben feni taki den ben de feanti fu a tirimakti, aladi dati no ben de tru. Den ben grabu den èn seni den go na strafu-oso, èn den dwengi den fu wroko na strafuman-kampu. Di a tirimakti dati fadon, dan a kon na krin taki Yehovah Kotoigi no du den ogri di sma taki dati den ben du. A nyun tirimakti meki den kisi a bun nen fu den baka. * Now a de so baka taki son sma wani pori a nen fu den Kotoigi.

Na a bigin fu 2009, lanti bigin gens Yehovah Kotoigi so taki den no ben de fri moro fu anbegi Gado. Na ini februari wawan den afkati di ben wani taki Yehovah Kotoigi kisi strafu, ben ondrosuku moro leki 500 afersi na ini a heri kondre. Fu san ede den ben du dati? Soleki fa den ben denki, den ben o feni buweisi taki den Kotoigi no ben hori densrefi na lantiwet. Na ini den mun baka dati, skowtu broko go na ini den Kownukondre zaal pe konmakandra ben hori èn na ini sma oso. Den teki publikâsi nanga sani fu sma. Lanti puru den afkati fu tra kondre di ben yepi den Kotoigi na ini den krutu-afersi, èn den tapu den fu kon baka na ini a kondre.

Tapu 5 oktober 2009, skowtu di e luku sortu sani mag kon  na ini a kondre, ben teki wan lai fu Bijbel publikâsi krosibei fu Sint Petersburg. Den publikâsi disi ben meki na ini Doisrikondre èn ben de gi furu gemeente na ini Rosiakondre. Wan spesrutu grupu skowtu di e luku taki sani di sma kan gebroiki fu du ogri no e kon na ini a kondre, ben ondrosuku a lai fu den Kotoigi. Fu san ede den du dati? Na ini wan spesrutu lanti papira ben skrifi taki a lai dati, ben „kan abi sani na ini di ben kan tyari dyugudyugu kon na mindri kerki”.

Den ogri disi di sma ben du nanga den Kotoigi, kon moro nanga moro. Den moro hei krutubangi fu Rosiakondre nanga na Altay Republiek (wan pisi fu Rosiakondre) ben bosroiti taki wan tu fu den publikâsi di Yehovah Kotoigi e gebroiki, sosrefi a wan di yu e leisi now, e gi sma deki-ati fu opo densrefi teige lanti. Yehovah Kotoigi tyari na afersi disi go na fesi krutubangi èn sma fu tra kondre no ben feni en bun san ben pasa nanga den Kotoigi. Ma dati no ben yepi! A krutubosroiti dati no kenki èn a de teige lantiwet fu tyari den Bijbel publikâsi dati kon na ini Rosiakondre èn fu prati den.

San de Kotoigi ben o du di sma suku fu pori den nen èn fu tapu a wroko fu den? San a krutubosroiti wani taki gi den sma fu Rosiakondre di de fri fu anbegi Gado na a fasi fa den wani?

Tapu freida 26 februari 2010, sowan 160.000 Yehovah Kotoigi na ini heri Rosiakondre bigin prati 12 milyun fu wan spesrutu traktaat di nen A kan pasa baka? Wan aksi gi den sma fu Rosiakondre. Fu eksempre, na ini a foto Usol’ye-Sibirskoye na Siberia, hondrohondro Kotoigi ben kon makandra na tapu strati na wan yuru fu 5.30 mamanten. Na den mindri yu ben abi sma tu di ben musu go na strafuman-kampu na Siberia na ini 1951, fu a bribi fu den ede. Den ben abi trutru deki-ati fu prati den 20.000 traktaat di den ben abi, aladi a ben kowru sowan -40 graden Celsius.

Fu meki sma kon sabi taki den ben o du wan spesrutu kotoigiwroko dri dei langa, Yehovah Kotoigi hori wan konmakandra nanga nyunsuman na ini Moskow, a mamafoto fu Rosiakondre. Wan fu den sma di ben kisi a kari fu kon taki drape, ben de Masra Lev Levinson, wan prenspari man fu na organisâsi di e feti gi den reti fu libisma. A ben taki syatu fa sma frufolgu èn du ogri nanga Yehovah Kotoigi na ini Nazi Doisrikondre nanga a Sovyet-Unie, sondro taki dati ben de fanowdu. A ben taki tu dati bakaten a tirimakti ben tyari kon na krin taki den Kotoigi no ben du den sani di sma taki dati den du. A man disi taki: „Presidenti Yeltsin ben taki dati ala  den kerki di ben kisi frufolgu na a ten fu a Sovyet-Unie, ben musu kisi den bun nen baka. Boiti dati, ala den gron nanga tra sani di den ben lasi den ben musu kisi baka. Yehovah Kotoigi no ben abi den sani dati na a ten fu a Sovyet-Unie, ma den kisi a bun nen fu den baka.”

Sma e suku baka fu pori a bun nen dati. Masra Levinson taki: „Na ini a srefi kondre pe sma ben taki dati den e sari taki den sani dati pasa, den sma disi e kisi frufolgu sondro taki buweisi de taki den du ogri.”

A spesrutu kotoigiwroko ben abi bun bakapisi? Masra Levinson e taki: „Di mi ben de na pasi fu kon dyaso na a konmakandra, dan mi ben si sma na ini a loko di ben sidon leisi a traktaat di Yehovah Kotoigi e prati na ini heri Rosiakondre. . . . Sma e sidon leisi a traktaat disi nanga ala den prakseri.” * Fu eksempre, luku den ondrofenitori di e kon now.

Wan owru uma na ini wan kontren na ini Centraal Rosiakondre pe furu sma abi a Moslim bribi, ben teki a traktaat èn a aksi san ben skrifi na ini a traktaat. Di den taigi en taki a ben taki fu den reti di libisma abi èn taki sma de fri fu du son sani na ini Rosiakondre, dan a taki: „Mi breiti taki wan sma e poti prakseri now na den afersi disi! Te a abi fu du nanga den sani disi, dan Rosiakondre e go baka na a ten fu a Sovyet-Unie. Mi e taki unu tangi trutru gi a bun wroko di unu e du!”

Wan uma na ini Chelyabinsk di ben kisi wan traktaat, ben taki: „Mi kisi wan fu den traktaat disi kaba èn mi leisi en. Mi de na un sei. Mi no sabi nowan tra kerki di orga sani so bun fu opo taki gi a bribi fu den. Mi lobi fa unu e weri krosi èn ala ten unu e sori switifasi. A de krin fu si taki unu abi wan tranga bribi. A fasi fa mi e si sani, dan Gado de nanga unu.”

 Wan man na ini Sint Petersburg ben kisi a traktaat kaba èn den ben aksi en efu a ben lobi san a ben leisi. A taki: „Iya, di mi ben leisi en mi skin gro èn mi krei srefi. Na a ten fu a Sovyet-Unie den ben poti mi granmama na strafu-oso èn a ben fruteri mi furu fu den sma di ben de nanga en drape. Furu fu den sma ben du ogri, èn sma ben de tu di no ben du noti ma di ben de na strafu fu a bribi fu den ede. Mi feni taki ala sma musu kon sabi san ben pasa. Sobun, unu e du a yoisti sani.”

Yehovah Kotoigi na ini Rosiakondre e warderi en taki na ini den 20 yari di pasa, den ben de fri fu anbegi Gado na a fasi fa den wani. Ma toku den sabi heri bun o makriki den kan lasi a fri dati. Wi no sabi efu a porinen di sma gi den Kotoigi e sori taki Rosiakondre e fadon go baka na ini a muilek ten di sma no ben de fri fu du ala sani.

Ma awansi san o pasa, Yehovah Kotoigi abi a fasti bosroiti fu tan du a wroko fu den fu preiki a boskopu fu Bijbel di e taki fu vrede nanga howpu. A spesrutu traktaat e taki fu a bosroiti disi di den abi: „A kwinsi di sma e kwinsi wi no o abi bun bakapisi. Wi no o tapu fu taki na wan fasi di fiti èn na wan lespeki fasi fu Yehovah Gado nanga en Wortu, Bijbel (1 Petrus 3:15). Wi no ben tapu fu du dati di bigi ogri ben miti wi na ini Nazi Doisrikondre, wi no ben tapu di sma na ini wi kondre ben e kwinsi wi, èn wi no o tapu now.​—Tori fu den Apostel 4:18-20.”