Wan profeititori di prenspari srefisrefi

„A bun nyunsu disi fu a kownukondre o preiki gi sma na heri grontapu, so taki sma fu ala kondre kan yere dati, èn dan a kaba o kon.”​—MATEYUS 24:14.

SABIMAN e agri taki a tekst disi prenspari srefisrefi. A tekst prenspari fu di a e taki fu wan wroko di o du na heri grontapu. Boiti dati, a de prenspari tu fu di a e sori san Kresten musu du. Iya, den musu du a preikiwroko fosi a tumusi prenspari sani pasa di Yesus kari „a kaba”.

A tekst disi di de wan profeititori e kon tru na ini a ten disi. A abi fu du nanga yu tu fu di a bun nyunsu na wan kari èn sosrefi wan warskow. A e gi yu na okasi fu bosroiti den tu sani disi: Yu kan saka yusrefi na ondro a Kownukondre fu Gado, noso yu kan opo yusrefi teige en. A bosroiti di yu o teki o abi krakti tapu yu eigi libi.

Luku den tekst na fesi. Wan tu dei fosi sma spikri Yesus na wan postu, den disipel kon na en èn den aksi en san ben o pasa na ini a ten di e kon. Den ben wani sabi fa a Kownukondre fu Gado ben o seti. Yesus ben taki furu leisi fu a Kownukondre dati. Den ben wani sabi tu fa sani ben o waka na „a kaba fu a grontapu sistema” noso soleki fa son Bijbelvertaling e taki „te grontapoe sa kaba”.​—Mateyus 24:3, Da Bijbel na ini Sranantongo.

Yesus taigi den taki na heri grontapu feti ben o de, angriten, siki di e kiri ipi-ipi sma, èn bigi gronseki. A ben taki tu dati kruktudu ben o kon de moro nanga moro, falsi kerki leriman ben o kori furu sma, èn sma ben o abi bita-ati gi tru Kresten èn den ben o frufolgu den. Ala den sani disi no ben de bun nyunsu.​—Mateyus 24:4-13; Lukas 21:11.

Ma bun nyunsu ben de tu. Baka dati, Yesus ben taki den wortu di skrifi na tapusei. Hondrohondro yari langa, sma ben denki dipi fu san den wortu dati wani taki. Boiti dati, den wortu dati gi sma howpu èn a gi den deki-ati fu du wan sani. Aladi sma e agri taki den wortu fu Yesus de prenspari, toku den no e agri nanga makandra san den wortu disi wani taki. San na a bun nyunsu disi trutru? San na a Kownukondre? O ten a profeititori disi o kon tru èn suma o meki a kon tru? San na a kaba? Meki wi go luku.

[Prenki na tapu bladzijde 2, 3]

 Wan kopi fu a Washington Manuskript di abi den fo evangelietori na ini. Mateyus 24:14 skrifi nanga fatu letter

[Sma di abi a reti fu a prenki]

From the book Facsimile of the Washington Manuscript of the Four Gospels in the Freer Collection 1912