Bijbel e krutu a dòbel di sma e dòbel?

FELEM nanga telefisi show di furu sma sabi, e sori taki dòbel na wan sani di moi sma nanga gudusma e du fu abi prisiri. A no de fu taki dati nofo tron den sma di e luku den felem nanga show dati, sabi taki den sani disi a no trutru sani.

Ma na ini na aladei libi, boiti taki casino de, sma di e dòbel kan bai lòt tu, den kan poti moni tapu sport wega, èn den kan dòbel tapu Internet. A dòbel di sma e dòbel „na wan takru gwenti di sma na heri grontapu abi, èn neleki fa wan faya kan panya go na ala sei èn bron wan heri busi, na so moro nanga moro sma kon abi a takru gwenti disi”, na so wan buku e taki (Internet Gambling). Fu eksempre, now Poker kon tron wan sport tapu telefisi nanga Internet. Soleki fa wan koranti e taki, dan no so langa pasa di ondrosukuman luku omeni sma na ini Amerkankondre e plèi Poker, dan 18 mun baka dati den kon si taki a nomru kon de tu tron moro furu.

Dòbel na te sma e poti moni tapu wan sani, aladi den no sabi seiker efu den o wini. Furu sma feni taki solanga a moni na fu a sma di e dòbel èn solanga a no e tron wan takru gwenti, dan noti no fowtu na dòbel. Fu taki en leti, wan buku e taki dati dòbel „a no wan sondu boiti efu a e tapu wan sma fu tyari den frantwortu fu en na ini a libi” (New Catholic Encyclopedia). Ma nowan Bijbeltekst no kari di e horibaka gi a denki dati. We, dan fa wan Kresten musu si a tori disi? Bijbel e sori taki a no fowtu fu dòbel noso a e krutu a dòbel di sma e dòbel?

A tru taki den Santa Buku fu Bijbel no e taki fu a dòbel di sma e dòbel. Ma disi no wani taki dati Bijbel no e gi rai te a abi fu du nanga a tori disi. Bijbel no e gi wet gi ibri sani di sma e du noso gi ibri situwâsi di de. Ma Bijbel e gi wi a deki-ati fu „tan si krin san na a wani fu Yehovah” (Efeisesma 5:17). Soleki fa a Bijbel sabiman E. W. Bullinger e taki, dan a Griki wortu di vertaal nanga „tan si krin”, abi fu du nanga „a tyari di wan sma e tyari ala sani fu wan tori kon na wán, fu di a e kon kisi sabi fu a tori baka te a denki dipi fu en”. Sobun, wan Kresten kan tan si krin san na a wani fu Gado fu di a e tyari ala Bijbel gronprakseri kon na wán di abi fu du nanga dòbel, èn fu di a e denki dipi fu den sani dati. Te yu o leisi den Bijbeltekst di kari na ini a pisi di e kon, dan kande yu kan aksi yusrefi: ’Dòbel abi fu du nanga den Bijbeltekst disi? San na a wani fu Gado te a abi fu du nanga a tori disi, soleki fa Gado Wortu e sori?’

Sma e bribi taki den o abi koloku

Fu di dòbel abi fu du nanga a moni di sma e poti tapu wan sani aladi den no sabi seiker efu den o wini, meki den e bribi taki wan sortu krakti de di e meki taki den abi koloku. Fu eksempre, te sma e bai lòt, dan den e teki spesrutu nomru fu di den feni taki dati o meki den wini. Te sma e plèi matjok, dan den no mag taki son  wortu, fu di dati kan meki den lasi. Boiti dati, sma e blo pikinso winti na tapu dòbelston fosi den e trowe den. Fu san ede sma e du den sani disi? Fu di den e bribi nofo tron taki den sani dati o meki den abi a koloku taki den wini.

A de wan ogri sani te sma e poti den frutrow na tapu a koloku di den kan abi? Son sma fu owruten Israel ben feni taki a no fowtu fu du dati. Den ben bribi taki den ben o gudu te den abi koloku. Fa Yehovah Gado ben denki fu a tori? Nanga yepi fu en profeiti Yesaya, Gado taigi den: „Ma na unu gowe libi Yehovah. Na unu frigiti mi santa bergi. Na unu e seti wan tafra gi a gado fu Koloku èn na unu e kanti win gi a gado di e taki na fesi fa sani o waka” (Yesaya 65:11). Te wan sma e bribi na ini a koloku di a kan abi, dan Gado e si dati leki afkodrei èn dati no e kruderi nanga a tru anbegi. Wan sma di e bribi dati, e frutrow na tapu wan sortu krakti di no de trutru, na presi fu frutrow na tapu a tru Gado. Nowan reide de fu bribi taki Gado e si sani tra fasi.

A fasi fa sma e wini

Awansi sma e poti moni tapu wan sani na Internet, awansi den e bai wan lòt, den e poti moni tapu wan sport wega, noso awansi den e plèi na ini wan casino, nofo tron den no e denki pe a moni di den wani wini e komoto. Dòbel no de a srefi leki te sma ben o bai èn seri sani noso te den ben o du wan tra bisnis, fu di wan sma di e dòbel wani wini a moni di trawan lasi. * Wan organisâsi e taki: „Te wan sma bai wan lòt èn a wini bun furu moni, dan na a srefi ten milyunmilyun trawan lasi den moni!” (Canada’s Centre for Addiction and Mental Health) Sortu Bijbel gronprakseri kan yepi wan Kresten fu frustan fa Gado e denki fu a tori disi?

A lastiwan fu den Tin Komando di Gado gi den Israelsma, ben taki: „Yu no musu angri fu abi a wefi fu wan tra sma. Boiti dati, yu no musu angri fu abi en srafu, en umasrafu, en mankaw, en buriki, noso iniwan tra sani di de fu en” (Exodus 20:17). Te wan sma ben o angri fu abi wan sani fu wan trawan, awansi dati na den sani di a abi, den gudu fu en, noso a moni fu  en, dan disi ben de wan seryusu sondu. A ben o de neleki a ben o angri fu abi a wefi fu a tra sma. Hondrohondro yari baka dati, na apostel Paulus ben taki baka fu a komando disi di a taigi den Kresten: „No abi bigi-ai” (Romesma 7:7). A kan de so taki wan Kresten abi bigi-ai te a e suku fu wini a moni di wan tra sma lasi?

Skrifiman J. Phillip Vogel e taki: „Awansi den [sma di e dòbel] e agri noso den no e agri, fosi den e go na ini wan plèi den e winsi taki a moni di den poti, awansi na wan tu dala nomo, o tron wan bigi moni.” Den sortu sma disi e si kaba fa den kan meki en, noso fa den kan kon gudu esi-esi sondro fu wroko gi a moni. A de krin taki a sani disi de teige a rai fu Bijbel di e taki dati wan Kresten musu ’wroko tranga, èn a musu du bun wroko nanga en anu, so taki a kan prati wan sani nanga sma di de na nowtu’ (Efeisesma 4:28). Èn na apostel Paulus ben taki krin: „Efu wan sma no wani wroko, dan a no musu nyan tu.” A ben taki tu dati den musu „nyan a nyanyan di densrefi wroko fu en” (2 Tesalonikasma 3:10, 12). Ma wan sma kan si a dòbel di a e dòbel leki wan wroko?

Aladi sma kan gi furu fu den krakti te den e dòbel, toku a moni di den e kisi na moni di den wini, a no moni di den wroko fu en. Te sma e dòbel, dan den e poti moni tapu wan sani aladi den no sabi seiker efu den o wini, èn den e howpu taki wan leisi den o wini. Sobun, wan sma di e dòbel e suku fu kisi wan sani sondro fu wroko fu en. Na a tra sei, tru Kresten e kisi a rai fu wroko fu kisi moni, sondro fu bedrigi sma. A koni Kownu Salomo ben taki: „A moro bun sani di libisma kan du fu dati ede, na fu nyan, dringi èn prisiri nanga a tranga wroko fu en.” A taki tu: „Na a tru Gado e gi pasi taki den sani disi e pasa” (Preikiman 2:24). Iya, den futuboi fu Gado no e poti den frutrow na tapu sani di no kan èn den no e suku fasi fu kon abi moni esi-esi, ma den poti den frutrow na tapu Gado di o meki den de koloku èn di o blesi den.

„Wan trapu” di wi musu wai pasi gi

Srefi efu wan sma di e dòbel ben o wini, toku a no musu prakseri nomo fa a o breiti na a momenti dati, ma a musu prakseri tu sortu bakapisi a o abi bakaten. Odo 20:21 e taki: „Awinsi wan sma di abi bigi-ai, kisi den gudu fu en sondro muiti, toku a no o kisi blesi bakaten.” Furu sma di bai lòt èn di wini èn sosrefi tra sma di e dòbel, kon si taki den gudu di den wini no meki den de koloku trutru. Fu dati ede a moro bun fu gi yesi na a rai fu Bijbel di e taki dati wi no musu poti wi frutrow na tapu ’gudu di kan lasi gowe, ma wi musu frutrow na tapu Gado di e gi wi ala sani bogobogo, so taki wi kan abi prisiri’.​—1 Timoteyus 6:17.

Boiti taki sma di e dòbel kan wini noso den kan lasi, wan tra trapu de tu. Gado Wortu e taki: „Den sma di wani kon gudu nomonomo e kisi tesi èn den e go na ini wan trapu; den e kisi wan lo dondon èn takru lostu di e tyari den go pori krinkrin” (1 Timoteyus 6:9). Wan trapu meki fu kisi wan sani. Bun furu sma di bosroiti fu dòbel wan tu leisi nomo noso nanga pikinso moni nomo, fadon na ini wan trapu fu di den no man tapu moro nanga dòbel. A sani disi meki taki den lasi den wroko, den hati den firi fu den lobiwan fu den, èn den pori den osofamiri libi.

Baka di wi luku so furu Bijbeltekst di abi fu du nanga dòbel, dan yu e si krin san na a wani fu Gado ini a tori disi? Na apostel Paulus ben gi den Kresten brada nanga sisa fu en a deki-ati disi: „No libi moro leki fa a grontapu sistema disi wani taki un musu libi, ma un musu kenki fu di unu e teki wan nyun fasi fu denki, so taki unu kan kon sabi san na Gado en wani di bun, di e plisi en èn di de volmaakti” (Romesma 12:2). A no a fasi fa furu sma e denki fu wan tori musu tiri wan Kresten na ini en libi, ma na a wani fu Gado. Yehovah, di de „a koloku Gado”, wani taki wi abi wan koloku libi, sondro den takru bakapisi di sma e kisi te den e fadon na ini a trapu fu dòbel.​—1 Timoteyus 1:11.

[Futuwortu]

[Prenspari pisi na tapu bladzijde 14]

Futuboi fu Gado e wroko fu kisi moni, sondro fu bedrigi sma

[Faki na tapu bladzijde 13]

A span fu wini

A de so taki a dòbel di wan sma e dòbel kan kon tron wan takru gwenti? Datra Hans Breiter ben ondrosuku san sma di e dòbel ben taki fu a fasi fa den ben firi di den wini noso lasi. A datra disi kon si taki „te wan sma di e dòbel e wini moni, dan en edetonton e meki a firi a srefi fasi neleki fa wan sma e firi te a gebroiki côca”.

[Prenki na tapu bladzijde 13]

Te sma e dòbel, dan a moni fu suma den e howpu fu wini?