Wan man fu Owstu-Asia na ini owruten Italiakondre

FA WAN man fu Owstu-Asia du doro te na ini na owruten Gran Kownukondre fu Rome, 2000 yari pasa? Na dati sabiman di e ondrosuku owruten sani ben e aksi densrefi di den feni wan moi sani na a zuidsei fu Italiakondre na ini 2009.

A presi pe den ben go ondrosuku sani, ben de wan owruten beripe fu den Romesma na Vagnari, di de 60 kilometer na a west-sei fu Bari. Den ben feni den bonyo fu 75 sma. Di den ben ondrosuku den bonyo, dan den kon si taki furu fu den sma ben gebore krosibei fu a presi drape. Ma den ondrosukuman ben fruwondru fu feni den bonyo fu wán man. Di den ondrosuku den bonyo fu a man disi, dan den kon si taki den afo fu en mama sei ben komoto fu Owstu-Asia. * A man disi ben de fu a fosi yarihondro noso fu a di fu tu yarihondro. Soleki fa wan raportu di e taki fu a sani disi e sori, dan „disi na a fosi leisi di sabiman feni den bonyo fu wan sma di ben de fu Owstu-Asia na ini a Gran Kownukondre Rome”. We, suma ben de a man disi?

A srefi raportu e taki: „Te yu ben o luku a sani disi, dan kande yu ben o denki wantewante taki a man disi ben de na ini a bisnis di sma fu China nanga Rome ben du fu seri zijde krosi. A bisnis disi ben e drai heri bun na ini a ten dati.” Sabiman e denki taki na ini a bisnis disi, nowan sma no ben e teki waka fu China go te na Italiakondre, di de 8000 kilometer fara. Ma na presi fu dati, den ben e seri den krosi disi gi sma fu tra presi, den sma disi ben seri den krosi baka gi tra sma, èn na so a ben go doro teleki den krosi disi ben doro na ini Italiakondre.

San wi e kon sabi fu a presi pe sabiman ben feni den bonyo? Na ini owruten, Vagnari ben de wan kontren di ben de fu a kèiser. Drape wrokoman ben e smèlter isri èn den ben e meki tegel fu klèidoti. Furu fu den wrokoman ben de srafu, èn soleki fa a sori dan a kan de so taki a man disi fu Owstu-Asia, ben de wan srafu. Fu taki en leti, a fasi fa a ben beri e sori taki a no ben de wan guduman. Den sani di a ben abi èn di sma ben beri makandra nanga en, ben de noti moro leki wán patu. Boiti dati, wan tra skin ben beri na tapu di fu en.

Fu san ede a sani disi moi fu sabi? A Kresten boskopu na ini a fosi yarihondro ben o panya go na den presi pe sma ben e teki waka go. Bijbel e taki dati baka a Pinksterfesa fu a yari 33, a bun nyunsu ben panya go bun fara, fu di den fisitiman na ini Yerusalem ben tyari a boskopu go na ala sei (Tori fu den Apostel 2:1-12, 37-41). We, wan sani de di den bonyo disi e sori, èn dati na taki na a ten dati son sma ben e teki waka fu Owstu-Asia go na a kontren fu Mindrikondre Se. *

[Futuwortu]

[Karta na tapu bladzijde 29]

(Efu yu wani si pe den sani disi skrifi, luku a tijdschrift)

ROME

Vagnari

Mindrikondre Se

OWSTU-ASIA

STILLE OCEAAN

[Prenki na tapu bladzijde 29]

Sma feni den bonyo fu wan man fu Owstu-Asia na ini wan owruten beripe fu den romesma

[Sma di abi a reti fu a prenki]

© Su concessione del Ministero per i Beni e le Attività Culturali - Direzione Regionale per i Beni Culturali e Paesaggistici della Puglia - Soprintendenza per i Beni Archeologici della Puglia