Bijbel e kenki sma libi

FA WAN mama di no ben abi masra èn di e libi na ini Rosiakondre, ben man tapu fu gebroiki drugs èn kon bun baka nanga den pikin fu en? Fa wan man di ben libi na strati na ini Kyoto, Yapan, ben man abi a krakti nanga a deki-ati fu wini den swakifasi fu en di meki taki a kon pôti? San meki taki wan man fu Australia di ben abi a wroko fu tyari ipi kaw go na tra presi, tapu nanga a dringi di a ben e dringi tumusi furu sopi? Luku san den sma disi e taki.

„Mi leri taki mi abi a frantwortu fu sorgu gi misrefi.”—NELLY BAYMATOVA

YARI: 45

KONDRE: ROSIAKONDRE

A BEN DE WAN SMA DI BEN E GEBROIKI DRUGS

A LIBI FU MI FOSI: Mi gro kon bigi na ini Vladikavkaz, a mamafoto fu a Republiek fu Noord Ossetia (now a nen Alania). A famiri fu mi ben gudu. Aladi mi ben abi furu gudu, toku mi no ben de koloku. Na a ten di mi ben abi 34 yari, mi ben broko trow tu leisi kaba. Tin yari langa kaba mi ben abi a gwenti fu gebroiki drugs, èn tu leisi mi ben go na wan spesrutu presi pe den e yepi sma fu tapu fu gebroiki drugs. Aladi mi ben abi tu pikin, toku na a ten dati mi no ben lobi den. Boiti dati, mi no ben abi wan bun matifasi nanga den mati fu mi èn nanga mi famiri.

Mi mama ben tron wan Kotoigi fu Yehovah, èn nofo tron mi ben e yere fa a ben e krei fu mi ede èn fa a ben e begi Yehovah fu yepi mi. Mi ben prakseri na misrefi: ’Fa mi mama kan denki so! Fa Yehovah kan yepi mi?’ Mi ben pruberi fu tapu fu gebroiki drugs. Ma misrefi no ben abi a krakti fu tapu nanga a gwenti disi. Wan leisi, mi ben pasa tu dei sondro fu gebroiki drugs. Ne mi ben feni taki mi ben musu komoto na ini na oso, èn fu dati ede mi dyompo komoto fu a fensre. A de wan sari sani taki mi ben de na a di fu tu sondro. Mi fadon èn mi broko mi anu nanga mi futu èn mi kisi mankeri na mi baka. Moro leki wán mun mi ben musu tan didon na bedi.

Na a ten dati di mi ben musu kon betre, mi mama ben sorgu mi, ma a no ben atibron na mi tapu fu a sani di mi ben du. A ben frustan taki mi no ben man hori misrefi èn taki mi no ben e denki krin. Ma toku a ben libi wan tu Ontwaakt! * sei mi bedi. Mi ben e leisi a wan baka a trawan, èn mi ben lobi den sani di skrifi na ini. Baka dati mi bosroiti fu studeri Bijbel nanga den Kotoigi.

A FASI FA BIJBEL KENKI MI LIBI: Wan sani di Bijbel leri mi, na taki mi musu tyari frantwortu. Na presi fu fruwakti taki mi mama sorgu gi mi, mi leri taki mi abi a frantwortu fu sorgu gi misrefi èn gi mi pikin. Baka so wan langa pisi ten di mi ben e du nomo san misrefi ben wani, a no ben makriki gi mi fu bigin wroko.

 A rai di skrifi na ini Deuteronomium 6:5-7 yepi mi trutru, fu di a tekst dati e taki dati papa nanga mama musu leri den pikin fu den sani di abi fu du nanga Gado. Mi ben frustan taki mi abi fu gi frantwortu na Gado fu a fasi fa mi ben e kweki den tu pikin fu mi. A sani dati gi mi a deki-ati fu bigin du sani makandra nanga den èn fu kon abi lobi gi den.

Mi ben de nanga furu tangi na ati taki Yehovah gi mi na okasi fu kon leri sabi den tru tori di abi fu du nanga en. Fu dati ede, mi gi mi libi abra na en èn mi teki dopu leki wan Kotoigi fu Yehovah.

DEN WINI DI MI KISI: Fu di mi leri fu hori misrefi fu no atibron, meki mi kon moro bun nanga mi mama. Mi kon bun tu nanga den pikin fu mi.

Fu di mi no lobi den sani kwetikweti di Gado no feni bun, meki furu fu den problema di mi ben kisi fu a fasi fa mi ben e libi fosi, no de moro. A e gi mi furu prisiri now fu yepi trawan fu kon leri sabi den tru tori fu wi lobi-ati Gado, Yehovah.

„Mi kisi frulusu trutru.”—MINORU TAKEDA

YARI: 54

KONDRE: YAPAN

A BEN DE WAN MAN DI BEN E LIBI NA STRATI

A LIBI FU MI FOSI: Mi gro kon bigi na ini a foto Yamaguchi, makandra nanga mi papa nanga mi granmama. Mi no ben sabi mi mama. Di mi ben abi 19 yari, mi granmama dede, èn mi tan libi nanga mi papa. Mi ben abi a wroko fu bori èn mi papa ben e du a srefi sortu wroko tu. Fu di wi ben wroko difrenti yuru, meki wi no ben si makandra furu. Mi ben kon abi a gwenti fu wroko bun langa èn fu dringi sopi nanga den mati fu mi.

Baka wan pisi ten, mi ben feni a wroko fu mi soi. Mi ben kisi trobi nanga mi basi èn mi bigin dringi moro sopi. Te fu kaba, di mi no ben doro 30 yari ete, mi bosroiti fu gowe libi oso èn fu go na difrenti presi. Di mi moni bigin kaba, mi bigin wroko na ini wan pachinko, noso wan wenkri pe sma ben e kon dòbel. Mi ben miti wan yongu uma èn wi trow. Ma baka soso tu nanga afu yari, wi prati.

Mi ben firi brokosaka srefisrefi, mi no ben wani du noti, èn te fu kaba mi kon abi bigi paiman na sma di ben leni trawan moni. Mi ben lon gowe gi den sma dati, èn mi ben libi nanga mi papa fu wan pisi ten na ini a foto pe mi gro kon bigi. Ma fu di mi ben lei gi en, meki wi no ben de bun moro nanga makandra. Mi ben teki moni fu en oso, èn fu wan pisi ten mi ben libi fu a moni di mi ben meki nanga a dòbel di mi ben e dòbel. Te fu kaba, mi ben kon pôti srefisrefi, èn mi ben libi na ini wan loko station fu wan pisi ten. Mi ben go na Hakata, baka dati mi go na Himeji, èn te fu kaba mi ben de na ini a foto Kyoto. Mi ben libi na strati fu wan tu yari.

A FASI FA BIJBEL KENKI MI LIBI: Na ini 1999, mi ben de na wan presi pe sma e go koiri, krosibei fu Kamogawa-liba na ini Kyoto, di tu uma waka kon miti mi. Wan fu den aksi mi: „Yu ben sa wani studeri Bijbel?” Mi ben wani dati. Lepi Kresten fu a gemeente fu Yehovah Kotoigi na ini a kontren drape, studeri Bijbel nanga mi èn den  yepi mi fu si o prenspari a de fu fiti den rai fu Bijbel na ini mi libi. Den ben gi mi a rai fu pruberi fu suku wan wroko nanga wan presi fu tan. Sobun, fu meki den ati sidon, mi go na wan tu presi fu suku wroko, ma na a bigin mi no ben meki tranga muiti fu feni wroko. Ma bakaten mi bigin begi fu kisi yepi èn mi du seryusu muiti fu feni wroko. Te fu kaba mi feni wan wroko.

Begi yepi mi tu fu pasa wan tumusi muilek tesi. Den sma di ben leni mi moni, èn di mi ben lowe gi, ben kon feni mi èn den ben de nomonomo taki mi musu pai den. A sani disi ben gi mi furu broko-ede. Ne di mi ben e leisi Bijbel ala dei, mi kon feni a tekst fu Yesaya 41:10. Na ini a vers dati, Gado e pramisi den futuboi fu en di e tan du en wani, a sani disi: „Mi o yepi yu trutru.” A pramisi dati gi mi krakti nanga deki-ati. Mi du tranga muiti èn te fu kaba mi pai den paiman fu mi. Na ini a yari 2000, mi ben doro den markitiki fu teki dopu leki wan Kotoigi fu Yehovah.

DEN WINI DI MI KISI: Den sani di mi leri fu Bijbel, gi mi deki-ati fu meki en bun baka nanga mi papa, èn a ben gi mi pardon fu a fasi fa mi ben handri fosi. A ben breiti srefisrefi taki mi leri fu libi soleki fa Bijbel e sori. Mi kisi frulusu trutru, fu di mi bigin libi soleki fa Bijbel e sori.

Boiti dati, mi man wroko so taki mi kan sorgu gi misrefi (Efeisesma 4:28; 2 Tesalonikasma 3:12). Mi feni trutru mati sosrefi na ini a Kresten gemeente (Markus 10:29, 30). Mi de nanga tangi na ati trutru gi den sani di Yehovah leri mi.

„A no ben makriki gi mi fu tyari kenki kon.”—DAVID HUDSON

YARI: 72

KONDRE: AUSTRALIA

A BEN DE WAN SMA DI BEN E DRINGI TUMUSI FURU SOPI

A LIBI FU MI FOSI: Mi ben de a di fu erfu pikin fu mi papa Willie nanga mi mama Lucy. Mi famiri ben e libi na wan presi pe Aboriginsma ben e libi. A presi disi nen Aurukun, èn a de farawe go na noordsei fu a kontren fu Queensland. Aurukun ben de na a moi presi krosibei fu Archer-liba èn dati ben de krosibei fu se. Mi papa nanga mama leri wi leki pikin fu onti èn fu fisi so taki wi ben abi sani fu nyan. Na a ten dati, wi leki Aboriginsma ben musu hori wisrefi na wan lantiwet di ben bosroiti gi wi san ben musu pasa nanga a moni fu wi. Wi ben musu libi soso na a presi di lanti ben gi wi fu tan.

Mi papa nanga mama du ala san den man fu leri mi bun fasi èn den leri ala den pikin fu den fu abi lespeki gi owrusma na ini a libimakandra. Boiti dati, den leri wi tu fu prati sani nanga trawan, awansi wi no ben abi furu. Fu dati ede, wi ben e si ala den owrusma leki wi mama nanga papa, noso leki wi tanta nanga omu.

 Mi papa dede di mi ben abi seibi yari, èn wi froisi go na wan dorpu pe soso Aboriginsma ben e libi. A dorpu disi ben de na Mapoon, di de sowan 150 kilometer go na a noordsei fu Aurukun. Di mi ben abi 12 yari, mi leri fa fu sorgu gi asi nanga kaw èn teleki mi ben de sowan 50 yari, mi ben wroko na furu presi fu tyari ipi kaw go fu a wan presi go na wan trawan. A libi dati ben hebi. Nofo tron mi ben e dringi tumusi furu sopi. Disi ben meki taki mi kisi furu ede-hati nanga problema.

Wan leisi di mi ben dringi tumusi furu sopi, mi slinger-slinger komoto na ini wan hotel go na dorosei pe wan wagi di ben e rèi tranga, naki mi. Na ini den tu yari baka dati, mi kisi datrayepi fu a mankeri di mi ben kisi, èn mi ben musu leri fu waka bun baka. Na so mi no ben man du a wroko moro di mi ben e du.

A FASI FA BIJBEL KENKI MI LIBI: Na ini a ten di mi ben e kisi datrayepi, wan uma di mi ben sabi, tyari wan tu Waktitoren nanga Ontwaakt! gi mi fu leisi. Ma mi no ben kisi so furu skoro, èn fu dati ede mi no ben man leisi bun. Wan dei, di a ben faya srefisrefi, wan man fu 83 yari kon na mi doro, èn mi kari en kon na inisei fu dringi pikinso kowru watra. A ben gi mi wan tu Bijbel publikâsi èn a aksi mi efu a kan kon baka na mi fu fruteri mi moro fu san skrifi na ini den publikâsi dati. Te fu kaba, wi bigin studeri Bijbel ibri wiki. Mi bigin si taki efu mi wani plisi Gado, dan mi ben musu tyari wan tu kenki kon na a fasi fa mi ben e tyari misrefi èn fa mi ben e libi.

A no ben makriki gi mi fu tyari kenki kon. Ma fu di mi mama ben leri mi fu abi lespeki gi owrusma, meki mi ben abi trutru lespeki gi na owru man di ben e studeri Bijbel nanga mi. Boiti dati, mi ben abi lespeki tu gi den sani fu Bijbel, di a ben yepi mi fu kon frustan moro bun. Aladi dati ben de so, toku mi ben e draidrai fu gi mi libi abra na Gado. Mi ben feni taki mi ben musu sabi ala sani di skrifi na ini Bijbel.

Bakaten, wan man nanga suma mi ben e wroko, yepi mi fu si taki a denki dati no bun. A man disi ben de wan Kotoigi fu Yehovah, èn a sori mi a deki-ati di skrifi na ini Kolosesma 1:9, 10. A pisi dati e taki dati ’moro nanga moro, wi musu kon sabi Gado finifini’. A man disi yepi mi fu frustan taki ala ten mi ben o leri nyun sani. Fu dati ede, mi no ben abi nowan reide fu meki a pikinso sabi di mi abi, tapu mi fu go na fesi.

Wan sani di mi ben feni moi srefisrefi, na di mi bigin abi demakandra nanga Yehovah Kotoigi. Mi ben si nanga mi eigi ai taki sma fu difrenti kulturu ben e anbegi Gado na ini wánfasi. A wánfasi dati gi mi na overtoigi taki mi feni a tru bribi. Fu dati ede, na ini 1985 mi teki dopu leki wan Kotoigi fu Yehovah.

DEN WINI DI MI KISI: Mi man leisi moro bun, èn now mi e yepi trawan ibri wiki fu leri leisi èn studeri Bijbel. Boiti dati, na uma di ben gi mi A Waktitoren nanga Ontwaakt! fu leisi, ben bigin studeri tu nanga den Kotoigi èn a teki dopu. Now en na mi lobi wefi. Mi nanga en, e kisi furu prisiri fu di wi e yepi trawan na den presi pe Aboriginsma e libi, fu kon leri sabi Yehovah Gado.

[Futuwortu]

[Prenspari pisi na tapu bladzijde 23]

Mi nanga mi wefi, e kisi furu prisiri fu di wi e yepi trawan na den presi pe Aboriginsma e libi, fu kon leri sabi Gado