SON LEISI yu e firi leki George nanga Emily tu? Neleki a papa nanga a mama disi, furu sma e feni en muilek fu si taki den pikin abi wan problema noso taki den e sari. Papa nanga mama e pruberi fu kibri den pikin fu den. Ma den situwâsi di kari na tapusei, trutru e gi papa nanga mama na okasi fu leri den pikin wan prenspari sani. A sani dati abi fu du nanga a fasi fa den musu tyari frantwortu. A no de fu taki dati, san wan pikin fu 4 yari man leri, e difrenti fu san wan pikin fu 13 yari man leri.

Ma hori na prakseri taki yu no o man kibri yu pikin ala ten gi den problema fu a libi. Te fu kaba, wan pikin o gowe libi en papa nanga mama èn a o „tyari en eigi lai” noso frantwortu (Galasiasma 6:5; Genesis 2:24). Efu papa nanga mama trutru wani leri den pikin fu de sma di no e denki densrefi nomo, sma di e broko den ede nanga trawan, èn sma di man tyari frantwortu,  dan den musu meki den pikin sorgu gi densrefi. A sani dati no makriki!

Koloku taki papa nanga mama abi na moi eksempre fu Yesus di e sori fa a ben e handri nanga den disipel fu en. Yesus no ben abi pikin. Ma di a ben teki den disipel fu en èn a gi den leri, dan a du dati so taki den ben o man du a preikiwroko go doro, srefi baka te a no ben o de na grontapu moro (Mateyus 28:19, 20). A sani di Yesus du, na a srefi sani di ibri papa nanga mama wani du, èn dati na taki den wani kweki den pikin fu tron sma di man tyari frantwortu. Luku dri sani di papa nanga mama kan leri fu na eksempre fu Yesus.

Syatu bifo Yesus dede, a taigi den disipel fu en: „Mi gi unu na eksempre, so taki unu kan du tu san mi du gi unu” (Yohanes 13:15). Na a srefi fasi, papa nanga mama musu fruklari èn sori nanga yepi fu na eksempre fu den san a wani taki trutru fu tyari frantwortu.

Aksi yusrefi: ’Mi e taki bun fu den frantwortu di mi abi? Mi e taki fa a e gi mi prisiri fu wroko tranga gi trawan? Noso mi e kragi nofo tron èn mi e teki misrefi gersi nanga trawan di kande abi en moro makriki na ini a libi?’

A no de fu taki dati ala sma e meki fowtu. Wanwan leisi wi alamala e firi taki wi abi tumusi furu fu du. Ma na eksempre di yu e gi na a moro bun fasi fa yu kan yepi yu pikin fu si o prenspari èn o warti a de fu tyari frantwortu.

Yesus ben sabi taki a ben o teki ten fosi den disipel fu en ben o tyari densrefi na a fasi di a ben fruwakti fu den, èn fosi den ben o man tyari a frantwortu fu den bun. Wan leisi a ben taigi den: „Furu sani de di mi musu taigi unu ete, ma unu no man tyari den now” (Yohanes 16:12). Yesus no ben aksi den disipel fu en fu du sani wantewante sondro en. Na presi fu dati, a ben teki furu ten fu leri den furu sani. Soso di Yesus ben denki taki den disipel ben de srekasreka fu tyari den frantwortu, a seni den go den wawan.

Na a srefi fasi, papa nanga mama no musu fruwakti tumusi furu fu den pikin fu di den o denki taki den pikin musu tyari bigi frantwortu, sondro taki den pikin de klariklari fu du dati. Te den pikin e gro kon bigi, dan papa nanga mama o go luku sortu frantwortu nanga wroko fiti gi den pikin. Fu eksempre, papa nanga mama musu leri den pikin fu sorgu taki densrefi e tan krin, taki den e krin den kamra, taki den de biten, èn taki den e gebroiki moni na wan koni fasi. Te wan pikin e bigin go na skoro, dan papa nanga mama musu fruwakti fu a pikin taki a e si a skorowroko fu en leki wan prenspari frantwortu di ensrefi musu tyari.

Papa nanga mama no musu gi den pikin fu den frantwortu nomo. Den musu yepi den pikin tu fu tyari den frantwortu na wan bun fasi. George, a papa di wi ben taki fu en kaba, ben kon frustan taki Michael no ben wani piki den preisani fu en, fu di a ben si a wroko dati leki wan hebi wroko fu du. George e taki: „Na presi fu taigi Michael nomo fu piki den preisani fu en, mi ben pruberi fu leri en fa fu du a wroko dati na wan bun fasi.”

San a ben du? George e taki: „San mi ben du fosi, na fu poti wan spesrutu ten ibri neti te a ben musu piki den preisani fu en. Baka dati, mi ben yepi Michael fu piki den sani dati na ini ibri kamra. Mi ben meki a wroko disi tron wan sortu prei, fu di wi ben e strei suma ben o kaba a wroko moro gaw. Heri esi, a sani disi ben kon tron wan gwenti fosi a go sribi. Mi ben pramisi Michael taki efu a ben o du en wroko esi-esi, dan mi ben o leisi ete wan tori gi en fosi a go sribi. Ma efu a ben o draidrai nanga a wroko, dan mi no ben o leisi so wan langa tori gi en.”

Neleki fa a de nanga ibri bun leriman, na so Yesus ben sabi taki a moro bun fasi fu gi den disipel leri, na fu meki den du den sani dati. Fu eksempre, di Yesus ben feni taki den disipel fu en ben de srekasreka fu du a preikiwroko, dan a seni den „tu na tu meki den fosi go na ibri foto nanga ibri presi pe ensrefi ben o go tu” (Lukas 10:1). Ma a no ben seni den sondro fu taigi den san fu du. Bifo a seni den go, a taigi den krin san den ben musu du (Lukas 10:2-12). Di den disipel ben drai kon baka èn den fruteri en fu den bun bakapisi di den ben abi, dan Yesus prèise den èn a gi den deki-ati (Lukas 10:17-24). A ben taigi den taki a abi a frutrow taki den man tyari a frantwortu èn a taigi den taki a ben feni den bun.

San yu e du te den pikin fu yu abi wan muilek sani fu du? Yu e pruberi fu kibri yu pikin gi den sani di den e frede fu du? Yu e kibri den gi sani di kan meki den lasi-ati? A fosi sani di yu o wani du kande, na taki yu o wani go yepi yu pikin noso yu o teki a frantwortu dati na yu tapu.

Ma hori a sani disi na prakseri: Ibri leisi te yu e lon go yepi yu pikin na ini wan situwâsi, dan san dati e sori den? Yu e sori taki yu abi a frutrow taki den man du wan sani? Noso yu e sori den taki yu musu du ala sani gi den neleki den na pikin beibi ete di no man yepi densrefi?

Fu eksempre, san Emily, di wi ben kari na a bigin, ben du? Na presi fu go na ini a tori, a bosroiti fu meki Jenny srefi go taki nanga a skoromisi. Emily nanga Jenny skrifi wan tu aksi di Jenny ben kan poti. Baka dati, den taki nanga makandra o ten ben o de a moro bun ten fu taki nanga a skoromisi. Den ben oefen srefi fa a takimakandra ben kan waka. Emily e taki: „Jenny ben teki deki-ati èn a go taki nanga en skoromisi. A skoromisi ben prèise en taki Jenny go taki nanga en. Jenny ben breiti srefisrefi èn mi ben breiti tu.”

Efu yu e pruberi fu kibri yu pikin ala ten gi muilek situwâsi, dan fu taki en leti, yu e tapu en fu sabi san a musu du na ini muilek situwâsi di e opo kon na ini a libi. Na presi fu dati, gi yu pikin deki-ati fu di yu e kweki en so taki a man tyari frantwortu. Te yu e du dati, dan dati sa de wan fu den moro warti kado di yu kan gi en.