YU FENI en muilek son leisi fu gi yesi?— * Efu dati de so, dan yu no abi fu fruwondru. Ten na ten, ibriwan sma feni en muilek fu gi yesi. Yu sabi taki Yesus srefi ben musu leri fu gi yesi?

Yu sabi na suma ala yonguwan musu gi yesi?— Iya, den musu gi yesi na den papa nanga mama. „Gi yesi na un papa nanga mama soleki fa Masra wani”, na so Bijbel e taki (Efeisesma 6:1). Suma na Yesus en papa?— Dati na Yehovah Gado, èn Yehovah na wi Tata tu (Mateyus 6:9, 10). Ma efu yu ben piki taki Yosef ben de Yesus en papa èn taki Maria ben de en mama, dan a piki fu yu bun tu. Yu sabi fa Yosef nanga Maria tron papa nanga mama fu Yesus?—

Na engel Gabrièl ben taigi Maria taki a ben o kisi wan pikin aladi a no ben abi seks nanga wan man. Yehovah meki Maria kon de nanga bere fu di a du wan tumusi bigi wondru. Gabrièl ben taigi Maria: „Santa yeye sa kon na yu tapu, èn a krakti fu a Moro Heiwan sa tapu yu. Fu dati ede sma o kari a pikin di o gebore, a santawan èn a Manpikin fu Gado.”—Lukas 1:30-35.

Gado teki a libi fu en Manpikin na hemel èn a poti en na ini a bere fu Maria. Na so Yesus gro na ini Maria en bere neleki fa tra beibi e gro na ini den mama bere. Sowan neigi mun baka dati, Yesus gebore. Na a pisi ten dati, Yosef trow nanga Maria, èn ala sma ben denki taki Yosef na a trutru papa fu Yesus. Ma fu taki en leti, Yosef ben de en kweki-papa. Sobun, wi kan taki dati Yesus ben abi tu papa!

Di Yesus ben abi 12 yari, a du wan sani di sori o furu a lobi Yehovah, en Papa na hemel. Na a pisi ten dati, a famiri fu Yesus teki a langa waka go na Yerusalem fu de na a Paskafesa, soleki fa den ben gwenti du. Bakaten, di den ben de na pasi fu go na oso na Nasaret, dan Yosef nanga Maria no si taki Yesus no ben de nanga den. Yu e aksi yusrefi fa a du kon taki den frigiti en?—

We, na a pisi ten dati, Yosef nanga Maria ben abi tra pikin tu (Mateyus 13:55, 56). A kan tu taki den teki a waka disi makandra nanga famiriman fu den, soleki Yakobus, Yohanes, nanga den papa Sebedeyus èn den mama Salome. A kan taki Salome ben de a sisa fu Maria. Dati meki Maria ben kan denki taki Yesus ben de na den tra famiriman fu en.—Mateyus 27:56; Markus 15:40; Yohanes 19:25.

Di Yosef nanga Maria kon sabi taki Yesus no ben de na den famiriman fu den, dan den drai go baka esi-esi na Yerusalem. Den du ala muiti fu feni a manpikin fu den. Tapu a di fu dri dei, den feni en na ini a tempel. Maria taigi en: „Pikin, fu san ede yu du disi nanga wi? Mi nanga yu papa ben suku yu èn wi ben bruya srefisrefi.” Ma Yesus taigi den: „Fu san ede unu ben musu go suku mi? Unu no sabi  taki mi musu de na ini na oso fu mi Tata?”—Lukas 2:45-50.

Yu denki taki a ben fiti taki Yesus piki en mama na so wan fasi?— We, en papa nanga mama ben sabi taki a ben lobi fu go anbegi na a oso fu Gado (Psalm 122:1). Dati meki Yesus ben kan denki taki a tempel ben o de a fosi presi pe den ben o kon suku en. Bakaten, Maria tan denki a sani di Yesus taki.

Fa Yesus ben denki fu Yosef nanga Maria? Bijbel e taki: „A [Yesus] go nanga den na Nasaret, èn a tan saka ensrefi na den ondro” (Lukas 2:51, 52). San wi kan leri fu na eksempre fu Yesus?— Wi e leri taki wi tu musu gi yesi na wi papa nanga mama.

Ma a no ben makriki ala ten gi Yesus fu gi yesi, srefi na en Papa na hemel.

A neti bifo a dede, Yesus begi Yehovah fu kenki En prakseri fu wan sani di a ben wani taki Yesus musu du (Lukas 22:42). Ma Yesus gi yesi na Gado aladi a no ben makriki fu du dati. Bijbel e taki dati „den pina di miti en, ben leri en fu gi yesi” (Hebrewsma 5:8). Yu denki taki wi kan leri fu gi yesi tu, srefi te a muilek fu du dati?—