Leri den pikin fu yu

Yeremia no ben tapu fu du en wroko

A DE so taki yu e lasi-ati son leisi, èn taki yu wani gi abra?— * Furu e firi so. A yonkuman Yeremia ben wani du dati tu. Ma a no ben gi pasi taki den sani di trawan ben taki èn du, tapu en fu du en wroko. Meki wi go luku fu san ede Gado ben si Yeremia leki wan prenspari sma, aladi Yeremia ben wani tapu nanga a wroko di Gado ben gi en fu du.

Fosi Yeremia gebore, a tru Gado, Yehovah, ben bosroiti kaba taki a ben o tron wan profeiti di ben o warskow a pipel taki den no ben e plisi Gado. Yu sabi san Yeremia taigi Yehovah yari baka dati?— „Mi no sabi kwetikweti fa mi musu taki, bika mi na wan boi ete.”

San yu denki taki Yehovah taigi Yeremia?— Na wan switi fasi, a taigi Yeremia krin: „No taki: ’Mi na wan boi ete.’ Ma na ala den sma pe mi sa seni yu go, yu musu go; ala sani di mi sa komanderi yu, na dati yu musu taki. No frede.” Fu san ede a no ben musu frede? Fu di Yehovah ben taki: „Mi de nanga yu fu frulusu yu.”—Yeremia 1:4-8.

Ma neleki fa wi ben taki kaba, dan Yeremia lasi-ati bakaten, fu di sma ben spotu en taki a ben e dini Gado. A ben taki: ’Heri dei sma e lafu mi èn ala sma e spotu mi.’ Dati meki a bosroiti fu tapu nanga a wroko di Gado gi en fu du. A ben taki: „Mi no e go taki moro fu [Yehovah], èn mi no sa taki na ini en nen moro.” Ma a de so trutru taki Yeremia tapu nanga a wroko di a ben kisi fu du?

Yeremia ben taki: ’A boskopu fu Yehovah ben de leki wan faya di e bron na ini den bonyo fu mi; èn mi ben kon weri fu hori en gi misrefi’ (Yeremia 20:7-9). Aladi Yeremia ben frede son leisi, toku a lobi di a ben abi gi Yehovah meki taki a horidoro. Meki wi go luku fa Yeremia ben kisi kibri, fu di a no tapu fu tyari a boskopu fu Yehovah.

Yehovah taigi Yeremia fu warskow a pipel taki Yerusalem o kisi pori efu den no tapu fu du ogri. Di Yeremia warskow a pipel, dan den ati bigin bron nanga en èn den taki: „A man disi musu dede.” Ma Yeremia begi den fu „gi yesi na a  sten fu Yehovah”. Ne a taigi den: ’Un musu sabi taki efu unu kiri mi, dan unu e kiri wan man di no du nowan ogri bika na Gado seni mi fu kon taki nanga unu.’ Yu sabi san pasa baka dati?—

Bijbel e taki: „Den granman nanga a heri pipel taigi den priester nanga den profeiti: ’A man disi no musu kisi nowan dedestrafu, bika na ini a nen fu Yehovah wi Gado a taki nanga wi.’” Sobun, fu di Yeremia no gi pasi taki frede gi libisma tapu en fu tyari a boskopu fu Yehovah, meki Yehovah kibri en. Meki wi luku now san pasa nanga Uria, wan tra profeiti fu Yehovah di handri heri tra fasi leki Yeremia.

’Uria ben taki den srefi sani tu di Yeremia ben taki fu Yerusalem’, na so Bijbel e taki. Ma di Kownu Yoyakim ati bron nanga Uria, dan yu sabi san Uria du?— A kon frede, a no du moro san Gado ben wani, èn a lowe gowe na Egepte. Ne a kownu seni wan tu man go na Egepte fu suku Uria èn fu tyari en kon baka na Yerusalem. Di den du dati, dan yu sabi san na ogri kownu du?— A kiri Uria nanga wan feti-owru!—Yeremia 26:8-24.

Fu san ede yu denki taki Yehovah kibri Yeremia ma a no kibri Uria?— We, a kan taki Yeremia ben frede tu neleki Uria, ma Yeremia no tapu fu dini Yehovah èn a no lowe gowe. A no tapu nanga a wroko di Yehovah gi en fu du. San yu denki taki wi kan leri fu na eksempre fu Yeremia?— Wi e leri taki son leisi wi kan feni en muilek fu du san Gado taki, toku ala ten wi musu poti wi frutrow na en tapu èn wi musu gi yesi na en.

[Futuwortu]

Aksi:

○ Sortu wroko Yehovah ben gi Yeremia fu du?

○ Fu san ede Yeremia ben wani tapu nanga a wroko di Yehovah gi en fu du?

○ Fu san ede Yehovah kibri Yeremia ma a no kibri Uria?

○ San yu leri fu na eksempre fu Yeremia?