„A SMA di no abi lobi, no sabi Gado, bika Gado na lobi,” na so Bijbel e taki (1 Yohanes 4:8, Nyun Testamenti). Fu dati ede, a kerki di bun musu leri sma fu lobi trawan.

A moi fu si taki furu kerki e du bun wroko, fu di den e sorgu gi sikisma, owrusma, nanga pôtisma. Den e gi den memre fu den a deki-ati fu fiti a rai fu na apostel Yohanes, di ben skrifi: „Efu wan sma si tak’ wan tra bribisma e pina, ma a no abi sari-ati nanga en aladi a abi nofo fu libi, dan fa a lobi fu Gado e tan ini en? Mi pikin, wi no mus taki nanga mofo wawan tak’ wi lobi trawan, ma wi mus du sani  tu di e sori dati trutru.”​—1 Yohanes 3:17, 18, Nyun Testamenti.

Ma san e pasa te kondre e feti nanga makandra? Gado gi a komando taki „yu mus lobi tra sma soleki fa yu lobi yusrefi”. A komando disi e fiti soso te vrede de? A de so taki sma no musu hori densrefi na a komando disi te wan politiekman noso wan kownu bosroiti fu go feti nanga wan tra kondre?​—Mateyus 22:39, Nyun Testamenti.

Yesus ben taki: „Nanga disi ala soema sa sabi dati oen de Mi discipel; efoe oen lobi makandra” (Yohanes 13:35, Da Bijbel na ini Sranantongo). Te yu o piki den aksi di e kon now, dan aksi yusrefi: ’Den memre fu a kerki disi ala ten e sori lobi gi ala sma, nanga den sani di den e taki èn nanga den sani di den e du?’

SAN BIJBEL E LERI: Yesus ben gi den disipel fu en a komando disi: „Mi e taigi unu di e arki Mi taki: Yu mus lobi yu feyanti. Du bun gi den sma di no man si un na ai.”​—Lukas 6:27, Nyun Testamenti.

Di den srudati ben kon grabu Yesus, dan na apostel Petrus hari en feti-owru fu feti gi Yesus. Ma Yesus ben taki: „Poti joe howroe baka na ini hem boeba; bikasi ala soema disi teki da howroe sa dede nanga da howroe.”​—Mateyus 26:52, Da Bijbel na ini Sranantongo.

Na apostel Yohanes ben skrifi: „Na so yu kan sabi suma na den pikin fu Gado èn suma na den pikin fu didibri. A sma di no e du san bun ini Gado ai, ma owktu a sma di no lobi en brada, no de fu Gado. Disi na a boskopu san un ben yere sensi na a bigin, tak’ wi mus lobi makandra. Un no mus de leki Kain, di ben de fu didibri èn a kiri en brada.”​—1 Yohanes 3:10-12, Nyun Testamenti.

NA AKSI: A kerki disi e gi den memre fu en deki-ati fu teki prati na orloku?

SAN BIJBEL E LERI: Baka di son sma ben si taki Yesus ben man du wondru, dan den ben wani taki a go na ini politiek. San Yesus du? „Yesus si tak’ den ben wani kon teki En nanga tranga fu poti En leki kownu, so A gwe libi den. A go baka na a bergi presi pe En wawan ben kan de.”​—Yohanes 6:15, Nyun Testamenti.

Di sma ben grabu Yesus èn den ben taki dati a e gi sma deki-ati fu opo densrefi teige tirimakti, aladi dati no ben tru, dan Yesus taki: „Mi kownoekondre no de foe da grontapoe disi; efoe Mi kownoekondre ben de foe da grontapoe disi, dan Mi dinari ben sa feti, so dati dem no ben sa gi Mi abra na dem Djoe; ma now Mi kownoekondre no de foe dja.”​—Yohanes 18:36, Da Bijbel na ini Sranantongo.

Di Yesus begi gi den disipel fu en, dan a taki: „Mi ben gi dem Joe woortoe; en grontapoe no ben lobi dem, bikasi dem no de foe  grontapoe, so leki Mi no de foe grontapoe.”​—Yohanes 17:14, Da Bijbel na ini Sranantongo.

NA AKSI: A kerki disi e teki na eksempre fu Yesus èn den e luku bun fu no abi noti fu du nanga politiek afersi, srefi efu dati wani taki dati den politiekman no o lobi den?

SAN BIJBEL E LERI: Di den fosi sma di no ben de Dyu èn di no ben besnèi, tron Kresten, dan na apostel Petrus ben taki: „Ala sma na a srefi gi Gado, èn tak’ A e teki ibri sma di e anbegi En èn di e du san bun ini En ai, awinsi fu sortu folku a kmopo.”​—Tori fu den Apostel 10:34, 35, Nyun Testamenti.

Yakobus ben skrifi den fosi Kresten taki: „Mi brada nanga sisa, efu un e bribi ini Yesus Kristus, wi Masra fu glori, dan un mus si ala sma a srefi fasi. Kon un taki wan guduman kon inisei te un de makandra fu dini Gado. A weri en moi krosi èn a abi wan gowtu linga na en finga. Ma dan wan pôtiman kon tu di weri syabi-syabi. A man nanga en moi krosi un e sori moro lespeki, èn un e taigi en tak’ a kan kon sidon dya na a bun presi. A pôtiman un e taigi fu a go tnapu na wan sei, noso fu a kon sidon na gron na un futusei. Efu un du dati, dan un no e si ala sma a srefi fasi, èn a prakseri di de na en baka no bun.”​—Yakobus 2:1-4, Nyun Testamenti.

NA AKSI: A kerki disi e leri taki ala sma de a srefi na ini Gado ai èn taki den memre fu en no musu desko nowan sma, soso fu di a sma de fu wan tra ras, fu di a pôti, noso fu di a gudu?