Fa wi Papa na hemel de trutru?

FURU sma sabi a Wi Tata begi na ede, noso a begi di Yesus ben leri den disipel fu en (Mateyus 6:9-13). Ibri leisi te den e taki a begi dati, den e kari Gado „Wi Tata”. Ma omeni fu den sma dati kan taki dati den sabi Gado bun?

Fa a de nanga yu? Yu sabi Gado bun? Yu abi wan bun matifasi nanga en? Yu e taki nanga en èn yu e fruteri en den prisiri sani nanga sari sani di yu e ondrofeni? San a wani taki trutru dati wan sma sabi Gado?

En nen na Yehovah

Wan pikin boi kande no e kari en papa na en nen, ma a e taki „papa”, fu di na so a sabi en. Ma te a e gro kon bigi, a e kon sabi san na a nen fu en papa èn fa en papa de. Te a sabi den sani dati, dan a no de fu taki dati a breiti fu abi so wan papa. Fa a de nanga a Sma na hemel di gi wi libi? Yu sabi a nen fu en èn yu sabi san a nen dati wani taki?

Te furu sma e taki a Wi Tata begi, dan den e taki den wortu „Joe nem moe de santa”, ibri leisi. Ma toku den no o man piki yu kande te yu aksi den san na a nen fu Gado (Da Bijbel na ini Sranantongo). Den stari na hemel, den bigi bergi, nanga den moi sani na ini se, e sori krin taki Gado de trutru. Toku den sani dati no e taigi wi fa Gado nen. Fu kon sabi a nen dati, wi musu luku san Bijbel e taki. Bijbel e taki krin: „Joe nem wawan de Jehovah.”—Psalm 83:19, Da Bijbel na ini Sranantongo.

Gado wani taki wi musu sabi en na en nen, Yehovah. Fu san ede? Fu di en nen e sori suma a de. A nen dati wani taki „A e meki kon tron”. Sobun, a e tron iniwan sani di a musu tron fu du san a abi na prakseri. Luku na eksempre disi: Wan papa e kon de iniwan sani di en osofamiri abi fanowdu na wan spesrutu momenti. A e wroko fu sorgu gi en osofamiri, a e kon de leki wan raiman, noso a e kon de leki wan krutuman di e sorgu taki ala sani e waka na wan reti fasi. Boiti dati, a e kon de leki wan sma di e koti trobi na ini na osofamiri, a e kon de leki wan sma di e kibri en osofamiri, noso a e  kon de leki wan leriman. Na a srefi fasi, a nen Yehovah e gi wi a dyaranti taki awinsi san o pasa na ini a ten di e kon, Gado man du ala sani di de fanowdu so taki a blesi ala den sma di e dini en.

Meki wi go luku fa wi lobi-ati Gado e du san en nen wani taki, fu di a e tron difrenti sani. Dati o yepi yu fu frustan sortu Gado Yehovah de, èn yu o kon sabi san yu musu du fu kon krosibei na en.

„A Gado fu lobi èn fu vrede”

Na apostel Paulus ben kari wi Mekiman „a Gado fu lobi èn fu vrede” (2 Korentesma 13:11). Fu san ede? Yesus Krestes ben taki: „Gado ben lobi grontapu so te, taki a gi en wan-enkri Manpikin, so taki ala sma di e bribi na ini en no sa dede, ma sa kisi têgo libi” (Yohanes 3:16). Fu di Gado lobi libisma so te, meki a gi en lobi Manpikin leki wan lusu-paiman. Na so fasi den sma di e bribi na ini en o kisi têgo libi, sondro fu abi den problema di e kon leki bakapisi fu sondu. Fu dati ede Paulus ben taki tu: „A pai di sma e kisi gi sondu, na dede, ma a presenti di Gado e gi na têgo libi nanga yepi fu Krestes Yesus wi Masra” (Romesma 6:23). Disi musu meki taki wi kon lobi Gado èn taki wi kon krosibei na en, a no so?

Gado no e sori lobi wawan gi libisma leki grupu, ma a e sori lobi tu gi ibriwan fu den sma di e gi yesi na en. Moses ben taigi den Israelsma fu owruten di ben e trangayesi Gado nofo tron: „Fu san ede unu e du so nanga Yehovah? Unu na wan don pipel di no koni. A no en na un Tata di meki taki unu de na libi now? A no en meki unu èn a no en meki unu tanapu steifi?” (Deuteronomium 32:6) Yu e frustan o prenspari den wortu dati de? Leki wan lobi-ati Papa, Yehovah ben e broko en ede nanga en pipel, aladi a ben sabi taki den na sondusma. Boiti dati, a ben sorgu taki den kisi ala den sani di den abi fanowdu fu tan na libi, a ben hori den firi fu den na prakseri, èn a ben gi den san de fanowdu fu abi wan bun matifasi nanga en.

Wi alamala e kisi problema na ini a libi. Son leisi den problema dati e meki wi bruya èn den kan meki wi firi brokosaka srefi. Na den sortu momenti dati, wi abi wan sma fanowdu di e yepi wi fu abi wan yoisti denki fu a situwâsi fu wi èn fu den problema di wi abi. Suma kan yepi wi? Nanga yepi fu en Wortu, Bijbel, Yehovah e sori taki a de wan lobi-ati Raiman èn wan Sma di e broko en ede nanga wi. A Santa Buku dati e taki fu san ede wi e nyan so furu pina, èn a e sori wi tu san wi kan du na ini den situwâsi dati. Te wan manpikin fadon èn a kisi mankeri, dan na wan lobi-ati fasi en papa e yepi en. Na so Yehovah e sori lobi gi wi tu, fu di na wan agersi fasi a e bukundu fu gi wi a yepi di wi abi fanowdu. Iya, Yehovah man yepi den sma di e bribi na ini en èn a de klariklari fu yepi den tu.—Yesaya 59:1.

Gado sori lobi gi wi tu fu di a e arki den begi fu wi (Psalm 65:2). Fu san ede wi kan taki dati Gado sori lobi gi wi na a fasi dati? Na apostel Paulus e taki: „No broko un ede nanga nowan sani, ma begi Gado ala san unu wani, èn du dati fayafaya sosrefi, èn taki en tangi tu; èn a vrede fu Gado di bigi moro leki san libisma man frustan, sa kibri un ati èn un frustan nanga yepi fu Krestes Yesus” (Filipisma 4:6, 7). Te yu e begi Gado nanga yu heri ati èn te yu e teki den rai di a e gi na ini en Wortu, dan yu sosrefi kan abi „a vrede fu Gado di bigi moro leki san libisma man frustan”.

„Wan Gado di sabi ala sani”

Bijbel e taki dati Yehovah Gado de „volmaakti ini sabi”. Leki „wan Gado di sabi ala sani”, a e frustan libisma èn a sabi moro leki iniwan tra sma san den abi fanowdu (Yob 36:4; 1 Samuel 2:3). Nanga yepi fu en futuboi Moses, a ben taki dati „wan sma no e libi fu brede wawan, ma fu ibri wortu fu Yehovah en mofo”  (Deuteronomium 8:3; Mateyus 4:4). Disi wani taki dati efu wi wani de koloku trutru, wi abi moro fanowdu leki den gudu fu wi.

Wi Mekiman e gi wi prenspari rai èn a e tiri wi nanga yepi fu en Wortu, Bijbel. Te wi e studeri Bijbel èn te wi e teki den rai dati, dan wi o kisi wini „fu ibri wortu fu Yehovah en mofo”. Fu eksempre, wan Kresten uma di nen Zuzanna ben taki disi fu en osofamiri: „Wi ben kon abi wan moro bun trowlibi fu di wi ben e leisi Bijbel makandra, fu di wi ben e go makandra na den Kresten konmakandra, èn fu di wi ben e fruteri trawan den sani di wi leri. Fu di Gado e tiri wi leki osofamiri, meki wi abi den srefi marki na ini wi libi èn wi abi wan moro bun matifasi nanga makandra.”

Fa yu kan kisi wini fu a rai nanga a tiri di Gado e gi? Te yu e studeri Bijbel doronomo èn te yu e teki den rai fu Bijbel, dan yu kan kisi furu blesi fu Gado.—Hebrewsma 12:9.

A „Gado fu frulusu”

Na ini a ten disi furu sma e strei èn e feti nanga makandra. Sma no sabi san o pasa na ini a ten di e kon. Efu yu e libi na ini wan kondre pe feti de, dan kande yu e angri fu libi na ini vrede. Na ini furu tra kondre, sma e frede taki ogri kan miti den, na ekonomia e go na baka, èn sma e frede den ogri-ati sani di sma kan du fu gens tirimakti. Suma o frulusu wi fu ala den sani disi? Noiti ete bifo, a de so tranga fanowdu taki libisma kisi kibri nanga frulusu.

Bijbel e taki: „A nen fu Yehovah na wan tranga toren. Na drape a regtfardikiwan e lon go èn e kisi kibri” (Odo 18:10). Te wi sabi a nen fu Gado èn te wi e poti wi frutrow tapu en nen, dan dati o meki taki wi poti prakseri na den sani di a du kaba èn den sani di a o du na ini a ten di e kon fu frulusu den sma di e poti bribi na ini en. Yehovah Gado sori krin taki a kan frulusu en pipel. Fu eksempre, a ben frulusu Israel fu di a ben pori den fetiwagi nanga a srudati legre fu Farao. Yehovah sori taki en na a Gado fu getrowfasi, èn a Gado di e hori den mofinawan na prakseri. Boiti dati, a e angri tu fu du wan sani fu yepi den.—Exodus 15:1-4.

Efu wi wani libi fu têgo, dan wi musu abi bribi tu na ini Yehovah Gado leki wi Frulusuman. Kownu David fu owruten Israel, di ben kisi furu problema, ben sori taki a e bribi dati Yehovah na wi Frulusuman. A ben skrifi disi fu Yehovah: „Yu na mi Gado fu frulusu” (Psalm 25:5). Nanga overtoigi, na apostel Petrus ben taki: „Yehovah sabi fa fu frulusu sma di e dini en na wan getrow fasi te tesi miti den.”—2 Petrus 2:9.

Gado e pramisi wan sma di abi a frutrow taki a o yepi en, a sani disi: „Mi sa kibri en fu di a kon sabi mi nen” (Psalm 91:14). Na ini a ten disi, den futuboi fu Gado ondrofeni taki a e hori ensrefi na a pramisi disi. Henryk di e libi na ini Polen, dini Yehovah getrow 70 yari langa, aladi a ben kisi gens nanga frufolgu. Di Henryk ben abi 16 yari nomo, sma ben seni en papa go na a Auschwitz strafuman kampu. Henryk nanga en brada ben musu go na wan presi pe Nazisma e meki yonguwan tan, èn drape sma ben e dwengi den fu drai baka gi  den sani di den ben leri fu den papa nanga mama. Bakaten, a ben go fu a wán strafuman kampu na a trawan. Henryk e taki fu a ten dati: „Na ini ala den muilek situwâsi pe mi ben de na ini, noiti Yehovah libi mi. Ala ten Yehovah yepi mi fu tan gi yesi na en, aladi wan tu leisi mi ben de na ini situwâsi pe mi ben kan lasi mi libi.” Iya, Yehovah e yepi den futuboi fu en fu abi bribi èn a e gi den a krakti fu horidoro.

Heri esi, Gado sa frulusu ala den sma di e poti bribi na ini en èn di abi a frutrow taki A o frulusu den. Yehovah e taki: „Mi na Yehovah, èn boiti mi nowan tra frulusuman no de” (Yesaya 43:11). Na ini „a feti na tapu a bigi dei fu Gado na Almaktiwan”, Gado o pori ala ogrisma na grontapu èn a o frulusu den reti-atisma (Openbaring 16:14, 16; Odo 2:21, 22). Yehovah e gi wi a dyaranti disi: „Den safri-atisma srefi sa abi grontapu leki a gudu fu den, èn den sa prisiri srefisrefi fu di vrede sa de pasa marki.”—Psalm 37:11.

Fa fu tron „pikin fu Gado”

Na ini a ten fu a profeiti Maleaki, den Israelsma ben taki dati Yehovah na den Papa. Ma di den ben musu gi en grani èn sori lobi gi en, dan den ben tyari pori brede leki ofrandi, èn sosrefi breni nanga lan meti. Fu dati ede Yehovah aksi den: „Efu mi na wan papa, pe a grani gi mi de?”—Maleaki 1:6.

No meki a srefi fowtu leki den trangayesi Israelsma. Na presi fu dati, wi e gi yu deki-ati fu kon leri sabi Yehovah Gado èn fu kon krosibei na en. A disipel Yakobus ben gi wi a deki-ati disi: ’Kon krosibei na Gado, èn a sa kon krosibei na yu.’—Yakobus 4:8.

Te Yehovah na wi Papa, dan dati e tyari spesrutu frantwortu kon na wi tapu. Te yu e meki muiti fu gi Gado grani fu di yu e du ala san yu man na ini yu libi fu horibaka gi den wet fu en, dan noiti a o frigiti a muiti di yu meki. Na presi fu dati, a o yepi yu fu waka na tapu a reti pasi di o meki taki yu doro na ini a nyun grontapu di a pramisi. Drape „dede no sa de moro; nowan sari, noso krei, noso pen no sa de moro” (Openbaring 21:4). Na a ten dati, ala libisma di e gi yesi na en „o komoto na ini a katibo di e tyari pori kon, èn na so fasi den o tron pikin fu Gado èn den o kisi kefalek bigi fri”.—Romesma 8:21.

[Prenspari pisi na tapu bladzijde 5]

Gado wani taki wi musu sabi en na en nen, Yehovah, èn a nen dati wani taki „A e meki kon tron”

[Prenspari pisi na tapu bladzijde 6]

„Na ini ala den muilek situwâsi pe mi ben de na ini, noiti Yehovah libi mi.”—HENRYK

[Prenspari pisi na tapu bladzijde 7]

„Wi ben kon abi wan moro bun trowlibi fu di wi ben e leisi Bijbel makandra, fu di wi ben e go makandra na den Kresten konmakandra, èn fu di wi ben e fruteri trawan den sani di wi leri.”—ZUZANNA