Now wi e libi na ini muilek ten

BIJBEL taki na fesi dati libisma ben o libi na ini „muilek ten . . . di tranga fu pasa”. Bijbel e kari a pisi ten disi „den lasti dei” (2 Timoteyus 3:1-5; 2 Petrus 3:3-7). Yesus Krestes ben taki fu a srefi pisi ten disi, di a ben gi piki tapu na aksi fu den disipel fu en di ben wani sabi moro fu „a kaba fu a grontapu sistema disi” (Mateyus 24:3). A de so trutru taki wi e libi now na ini den lasti dei? Teki den sani di Bijbel taki na fesi, gersi nanga den raportu di kon na doro no so langa pasa. Baka dati, luku gi yusrefi efu den sani di Bijbel e taki fu den lasti dei, tru.

Bijbel taki na fesi dati feti ben o de na heri grontapu—Lukas 21:10; Openbaring 6:4.

Raportu di kon na doro no so langa pasa, e taki: „Na ini den 100 yari di pasa bun furu sma dede na ini feti. A nomru dati de dri tron moro furu leki na ini den 1900 yari bifo dati, noso sensi a ten di Krestes gebore.”—Worldwatch Institute.

Bijbel taki na fesi dati angriten nanga siki ben o de—Lukas 21:11; Openbaring 6:5-8.

Raportu di kon na doro no so langa pasa, e taki: Na ini 2004 sowan 863 milyun sma na grontapu no ben abi nofo fu nyan fu man tan gosontu, èn dati na 7 milyun moro sma leki na ini 2003.—Voedsel- en Landbouworganisatie van de Verenigde Naties.

Sowan wán milyard sma e libi na ini pôti birti; 2,6 milyard sma e libi na presi pe doti lai èn presi di morsu; èn 1,1 milyard sma no abi bun watra fu dringi.—Worldwatch Institute.

Sowan 500 milyun sma abi malaria; 40 milyun sma abi HIV-AIDS; 1,6 milyun sma dede na ini 2005 fu di den ben abi tuberculose.—Wereldgezondheidsorganisatie.

Bijbel taki na fesi dati sma ben o pori grontapu—Openbaring 11:18.

Raportu di kon na doro no so langa pasa, e taki: „Leki bakapisi fu ala den sani di libisma du nanga grontapu, heri esi furu difrenti sortu meti nanga bon no o de moro.” „Moro furu fu den sani na grontapu di e meki taki libi de, soleki den sani na ini a gron nanga den sani di  e gro, no o de moro na grontapu te fu kaba.”—Millennium Ecosystem Assessment.

„A smoko di e komoto fu bigi fabriki, wagi noso tra sani, meki taki a weer kenki so furu taki bigi rampu kan pasa na grontapu.”—NASA, Goddard-Instituut voor Ruimtestudies.

Bijbel taki na fesi dati a bun nyunsu fu Gado Kownukondre ben o preiki na heri grontapu—Mateyus 24:14; Openbaring 14:6, 7.

Raportu di kon na doro no so langa pasa, e taki: Na ini 2007, a moro hei nomru fu Yehovah Kotoigi ben de 6.957.854, èn den ben preiki moro leki 1.4 milyard yuru. Den Kotoigi disi preiki a bun nyunsu fu Gado Kownukondre na ini 236 kondre.—Jaarboek van Jehovah’s Getuigen 2008.

Soleki fa wi si kaba, dan aladi Bijbel taki na fesi fu ala den ogri sani disi di ben o pasa, toku wi kan abi howpu. Yesus ben taki fu a „bun nyunsu” fu Gado Kownukondre. San na Gado Kownukondre? Fu san ede a e gi libisma a howpu taki sani o waka moro bun na ini a ten di e kon? Te yu sabi kaba san Gado Kownukondre o du, dan san yu o du?

[Prenspari pisi na tapu bladzijde 5]

Den sani di e pasa now na grontapu, na sani di Bijbel ben taki na fesi kaba