Tel Arad—Wan owruten foto di e gi kotoigi

Na ini wan drei sabana na ini a foto Tel Arad, na Israel, sabiman feni wan owruten foto, wan tempel, nanga furu owruten sani di ben abi skrifimarki na den tapu. Fu taki en leti, den sani disi, èn sosrefi tra sani di den sabiman feni, ben kibri na ondro bigi ipi santi hondrohondro yari langa.

NA INI a ten disi, a foto nen Arad, èn furu sma di e go drape feni taki a foto disi de leki furu fu den tra Israel foto. Sowan 27.000 sma e tan na ini a foto disi di de na ini a gran sabana fu Yudea, na a westsei fu a Dede Se. Ma Arad, na owruten foto fu Israel, ben de sowan 8 kilometer na a westsei fu Israel. Na drape sabiman safrisafri puru bigi ipi santi, teleki den feni wan lo brokopresi nanga sani di ben abi skrifimarki na den tapu.

Den skrifimarki disi ben de na tapu pisipisi broko prapi di sma ben e gebroiki fu skrifi sani na tapu. Na ini Bijbel ten, sma ben gwenti skrifi sani na tapu pisipisi broko prapi. Soleki fa sma e taki, dan noiti ete sabiman ben feni so furu pisipisi broko prapi na ini Israel, leki san den ben feni na Tel Arad. Ma o prenspari den sani de di den sabiman feni na a presi dati?

Den sani di sabiman feni na Tel Arad, na sani fu sensi a ten fu den Krutuman fu Israel, te go miti a ten di den Babilonsma teki Yuda abra na ini 607 bifo Krestes. Fu dati ede, den sani disi di sabiman feni e yepi sma fu kon si taki den sani di skrifi na ini Bijbel na tru tori. Den owruten sani dati e yepi wi tu fu kon frustan moro bun fa sma na ini owruten Israel ben e si a nen fu Gado.

Arad e horibaka gi Bijbel

A tru taki Bijbel no e taki furu fu Arad. Ma fosi, a prenspari foto disi ben de wan presi pe sma ben e du furu bisnis. Fu dati ede, a no e fruwondru wi taki den sani di sma ben skrifi fu owruten èn sosrefi den sani di sabiman feni na a owruten foto dati, ben abi en bun ten nanga en takru ten. Ibri tron baka, sma ben e teki na owruten foto disi abra, den ben e pori en, èn  den ben e bow en baka. Fu di sma ben e bow a foto disi ibri tron baka, meki wan bigi bergi kon de na a presi disi.

A fosi leisi di Bijbel e taki fu Arad, na te a e fruteri fu a lasti pisi fu den 40 yari di den Israelsma ben e pasa na ini a gran sabana. Syatu baka di Aron, Moses en brada, dede, a pipel fu Gado pasa krosibei fu a zuidsei lanki fu a Pramisi Kondre. Soleki fa a sori, dan a kownu fu Arad di ben de wan Kanansma, ben denki taki a ben o man teki den Israelsma abra makriki, èn a go feti nanga den. Fu di Yehovah Gado horibaka gi den Israelsma, meki den feti nanga deki-ati, den wini a kownu, èn den pori Arad krinkrin. Ma soleki fa a sori, dan wan tu sma fu a foto dati tan na libi.—Numeri 21:1-3.

Den Kanansma no draidrai fu bow a prenspari foto fu den baka. Di Yosua doro na a kontren disi wan tu yari baka dati, dan wan fu den sma di ben e gens en, na „a kownu fu Arad”. Yosua ben e teki a kontren abra komoto fu a noordsei, aladi safrisafri a ben e yagi den Kanansma puru na ini ’den bergi kontren èn na ini a kontren fu Negeb’ (Yosua 10:40; 12:14). Bakaten, den bakapikin fu Hobab go tan na ini a kontren fu Negeb. A man disi di ben de wan Kenietsma, horibaka gi den Israelsma di ben e pasa na ini a gran sabana.—Krutuman 1:16.

Den owruten sani di sabiman feni

Bijbel e taki fu moro sani di pasa bakaten, èn den brokopresi na Tel Arad e fruteri wi moro fu den tori dati. Fu eksempre, sabiman feni difrenti skotu na a presi drape. A kan taki wan tu fu den skotu disi de fu a ten fu Kownu Salomo di ben lobi bow bigi sani na ini a foto fu en (1 Kownu 9:15-19). Wan fu den sani di sabiman kon si di den diki a santi puru, na taki wan leisi, sma ben bron a heri foto, èn a sani disi ben pasa na a bigin fu a di fu tin yarihondro bifo Krestes. Disi ben de na a ten di Kownu Sisak fu Egepte ben teki wan tu fu den foto fu den Dyu abra, feifi yari nomo baka di Salomo dede. A sani disi de fu leisi na tapu wan skotu na ini Karnak, na a zuidsei fu Egepte. Tapu a skotu skrifi tu taki Arad ben de wan fu den foto di kisi pori krinkrin.—2 Kroniki 12:1-4.

Sabiman feni pikinmoro 200 pisipisi broko prapi. A sani di e hari wi prakseri, na taki furu fu den pisipisi broko prapi disi abi Hebrew nen na tapu di de fu feni tu na ini Bijbel. Wan tu fu den nen dati na Pasyur, Meremot, nanga den nen fu den manpikin fu Korak. Ma den pisipisi broko prapi di moro prenspari gi wi, na den wan di abi a nen fu Gado na tapu. A nen disi di abi fo Hebrew letter, namku יהוה (YHWH), na a nen fu na Almakti Gado. Nofo tron sma e kari den letter disi a Tetragrammaton. Bakaten, sma kon abi a kruktubribi taki te den e kari noso skrifi a nen disi, dan den no e sori lespeki gi Gado. Ma neleki furu tra sani di sabiman feni, na so den owruten sani di den feni na Tel Arad, e sori taki sma na ini Bijbel ten ben gwenti fu gebroiki a nen fu Gado na ini den aladei libi. Boiti dati, den ben e gebroiki en te den ben e gi odi, èn te den ben e winsi bun sani gi trawan. Fu eksempre, tapu wan fu den pisipisi prapi skrifi: „Gi mi masra Elyasib. Meki Yahweh [Yehovah] meki sani waka bun gi yu. . . . A e tan na ini a tempel fu Yahweh.”

Ma fa a de nanga a tempel di kari na a bigin? Sabiman kon abi difrenti denki fu wan brokopresi di den feni na Tel Arad. A brokopresi di ben de wan tempel fosi, ben abi wan altari, èn a ben de fu a pisi ten di den Dyu ben e tan drape. Aladi  a tempel disi ben pikin moro a tempel di Salomo ben bow na ini Yerusalem, toku furu sani fu den tu tempel disi de a srefi. Fu san ede sma ben bow a tempel na ini Arad, èn o ten den ben du dati? Gi san den ben e gebroiki a tempel disi? Sabiman no sabi soifri.

Yehovah ben taki krin taki a tempel na ini Yerusalem ben de a wan-enkri presi pe a ben wani sma fu go hori alayari fesa, èn pe den ben musu tyari ofrandi (Deuteronomium 12:5; 2 Kroniki 7:12). Sobun, di sma bow a tempel na ini Arad fu teki prati na a anbegi fu den, dan fu taki en leti, den pasa a Wet fu Gado. Kande a sani disi pasa na wan ten di den Israelsma ben e gebroiki tra altari èn ben e hori tra sortu seremonia, na presi taki den ben e anbegi a tru Gado (Esekièl 6:13). Efu dati de so, dan a kan taki a tempel disi pe sma ben e anbegi falsi gado, ben kisi pori na a ten di Heskia noso Yosia ben e puru falsi anbegi na ini a heri kondre. Dati na a pisi ten fu a di fu aiti nanga a di fu seibi yarihondro bifo Krestes.—2 Kroniki 31:1; 34:3-5, 33.

A de krin taki wi kan leri furu fu den wan-enkri sani di tan abra fu Arad fu owruten. Baka hondrohondro yari, sabiman feni owruten sani ondrogron di e sori taki den sani di skrifi na ini Bijbel na tru tori. Den owruten sani disi e sori tu taki falsi anbegi ben opo kon na ini Yerusalem, èn taki a ben kon na wan kaba. Wan tra sani di den owruten sani disi e sori, na taki sma ben gwenti fu gebroiki a nen fu Yehovah na wan lespeki fasi na ini den aladei libi.

[Karta/​Prenki na tapu bladzijde 23]

(Efu yu wani si pe den sani disi skrifi, luku a tijdschrift)

YERUSALEM

Dede Se

Arad

Tel Arad

[Sma di abi a reti fu a prenki]

Pictorial Archive (Near Eastern History) Est.

[Prenki na tapu bladzijde 24]

Wan tu sani di skrifi na tapu a skotu na ini Karnak, na Egepte

[Sma di abi a reti fu a prenki]

Pictorial Archive (Near Eastern History) Est.

[Prenki na tapu bladzijde 25]

Wan pisi fu san skrifi e taki: „Meki Yahweh [Yehovah] meki sani waka bun gi yu”

[Sma di abi a reti fu a prenki]

Photograph © Israel Museum, Jerusalem; courtesy of Israel Antiquities Authority

[Prenki na tapu bladzijde 25]

Wan pisi fu a tempel brokopresi na Tel Arad

[Prenki na tapu bladzijde 25]

A brokopresi fu Tel Arad te yu e luku en komoto fu na owstusei

[Sma di abi a reti fu a prenki na tapu bladzijde 25]

Todd Bolen/Bible Places.com