Wan brifi fu Australia

„Tideneti mi sa sidon leisi en na a faya”

TE SMA e taki fu den boitipresi fu Australia, dan wi e prakseri drei sabana, bun faya son, èn bun bigi opo presi. Ma toku, sowan 180.000 sma e libi na ini a kontren disi, èn dati na pikinmoro 1 procent fu ala den sma di e libi na ini Australia.

Mi papa nanga mama di de Yehovah Kotoigi, ben tyari mi go preiki na den boitipresi disi di mi ben yongu. Fu di a kontren dati bigi srefisrefi, èn fu di a moi, meki mi ben e prakseri en doronomo. Boiti dati, mi kon lobi den sma di e libi drape. Den sma dati tranga èn den abi switifasi. Now di mi abi mi eigi osofamiri, mi ben wani taki mi wefi nanga den tu pikin fu wi fu 10 yari nanga 12 yari, ben kon sabi fa a kontren dati de.

Wi e sreka sani fu go drape

A fosi sani di wi du, na taki wi sidon teri den kostu. O fara wi ben o man go nanga a moni di wi ben abi? O langa wi ben o man tan drape? Wan trowpaar nanga tu furuten preikiman fu a gemeente fu wi ben o go tu nanga wi. Wi meki mofo fu go na a pisi ten fu yuli nanga augustus, te den skoropikin abi fakansi. Baka dati, wi skrifi a bijkantoro fu Yehovah Kotoigi di de na ini a foto Sydney, na Australia, fu aksi den efu den ben kan gi wi wan kontren pe wi ben kan go preiki. Den aksi wi efu wi ben kan go na wan farawe kontren krosibei fu Goondiwindi, wan pikin foto di de sowan 400 kilometer moro fara fu Brisbane, a foto pe wi e libi.

Wi yere taki wan pikin gemeente fu Yehovah Kotoigi ben de na Goondiwindi. Dati ben de wan tra blesi. A ben o gi wi prisiri trutru fu miti Kresten brada nanga sisa fu wi te wi ben o go na den boitipresi. Wi seni boskopu gi a gemeente taki wi ben o kon drape. A fasi fa den piki, sori wi taki den ben breiti taki wi ben o go drape.

Syatu bifo wi ben o go drape, a grupu fu wi kon makandra fu taki fa wi ben kan prati a bun nyunsu fu Gado Kownukondre gi den sma di e libi na den boitipresi. Wan prenspari sani di wi ben wani du, na taki wi ben wani sori lespeki gi a kulturu nanga den gwenti fu iniwan fu den Aboriginsma di wi ben o miti drape. Fu eksempre, son lo e si a kontren fu den leki wan tanpresi di den musu prati nanga tra lo. Efu wan sma ben o go na ini a kontren dati sondro fu aksi primisi, dan a ben o de neleki a sma no e sori lespeki gi den.

Wi e go na den boitipresi

Te fu kaba, a bigi dei doro. Den tu wagi fu wi ben span nanga sma èn nanga tra sani, èn na so wi rèi go na den boiti presi. Di wi ben de na pasi, dan wi si gron pe sma ben e prani nyanyan, èn baka dati wi si weigron nanga wan tu bon na den tapu. Na a pisi ten fu yuli nanga augustus, a son e skèin moi na a loktu, èn furu wolku no de. Baka di wi ben de wan tu yuru na pasi, wi doro na Goondiwindi. Wi go tan na wan presi pe wi ben kan yuru bigi wagi di  ben de leki kamra, èn wi sribi na ini den wagi disi a neti dati.

A tra dei, namku sonde, a son ben e skèin èn a loktu ben smeri switi. Iya, a ben de wan moi dei fu go preiki. Nofo tron a weer na ini a kontren disi faya moro leki 40 graden celcius, na ini a pisi ten fu november te go miti maart! A fosi presi pe wi go, ben de wan dorpu pe Aboriginsma e tan, èn dati de sowan 30 kilometer moro fara fu a presi pe wi ben e tan. Den seni wi go na wan owru uma di nen Jenny. Na uma disi di ben abi weti wiwiri, ben e teki fesi na ini a dorpu dati. A arki bun di wi fruteri en wan tu sani fu Bijbel, èn a ben breiti di wi gi en a buku Teki leri fu a Bigi Leriman. * Baka dati, a gi wi primisi fu go na ini a dorpu fu go preiki gi den tra sma.

Den pikin fu a dorpu lon go taigi den tra sma fu a dorpu taki wi ben de drape. Ibri ososma di wi ben miti arki na wan lespeki fasi te wi ben e fruteri den a boskopu fu wi, èn den teki Bijbel publikâsi. Heri esi den publikâsi fu wi ben kaba, èn a ten ben doro gi wi fu drai go baka na foto fu go na a gemeente konmakandra. Fosi wi gowe, wi pramisi den sma fu a dorpu taki wi ben o kon baka fu taki nanga den wan di wi no ben miti.

A bakadina dati, a Kownukondre zaal ben lai nanga sma di ben breiti fu miti makandra, den ben e taki nanga makandra, èn di ben e meki mati. Den 25 Kotoigi fu a gemeente ben e preiki a bun nyunsu fu a Kownukondre na wan getrow fasi gi sowan 11.000 sma di e libi na difrenti presi fu a boitipresi di bigi sowan 30.000 fokanti kilometer. Wan Kotoigi di ben de nanga tangi ben taki: „Grantangi taki unu meki a muiti fu kon yepi wi.” Baka wan switi konmakandra, wi alamala go na wan presi fu nyan èn fu dringi wan sani. Fosi wi go sribi a neti dati, wi gi den awari [Trichosurus vulpecular; family: phalangeridae] di ben e waka lontu na a presi drape, wan tu sani fu nyan.

„Tideneti mi sa sidon leisi en na a faya”

Den tu dei baka dati, wi go nanga den tu wagi fu wi na den difrenti farawe presi di ben de krosibei fu a lanki na mindri Queensland nanga New South Wales. A moro bigi pisi fu a boitipresi abi pikinpikin drei eucalyptus bon, èn sosrefi bigi weigron pe skapu nanga tra meti ben e nyan grasi. Di wi ben de na pasi, dan wi si wan tu kanguru [Macropus] di ben e buweigi den yesi aladi den ben e arki wi. Fu farawe, wi ben kan si wan tu bigi fowru [Dromaius novaehollandiae] di ben e waka lontu na ini wan drei pisi kontren pe sma e kweki asi.

Tudewroko bakadina, wi miti nanga wan bigi ipi kaw di ben e waka safri na sei pasi. Langa ten kaba, sma e pai wrokoman fu tyari kaw fu a wan presi go na a trawan na ini a kontren disi, èn dati e pasa spesrutu na dreiten. A no teki langa baka dati, di wi miti wan fu den wrokoman disi di ben e sidon na tapu en asi. Baka di mi rèi poti a wagi na sei pasi, dan mi komoto na ini a wagi, èn mi gi a man odi. A man piki mi: „Bun dei.” Na owru man di ben de nanga a dagu fu en di ben yepi en fu luku den kaw, tan tanapu fu taki nanga mi.

Baka di wi taki pikinso fu a dreiten, dan mi bigin taki nanga en fu a Bijbel boskopu fu wi. A man taki: „We, a lasti leisi di mi yere wan sani fu Bijbel, na di mi ben pikin ete!” A man disi ben feni taki kerki fesiman e meki taki den sma na grontapu no e tyari densrefi na wan fasi di fiti. Ma toku, a ben abi furu lespeki gi Bijbel. Baka di wi ben abi wan switi takimakandra fu Bijbel, mi gi en a buku San Bijbel e leri wi trutru? * A man teki a buku hori steifi na ini en anu, ne a poti en na ini en empisaka, èn a taki: „Efu a buku disi e fruteri mi san Bijbel e leri wi, dan tideneti mi sa sidon leisi en na a faya.”

Wi e drai go baka na oso

A neti dati, wi fruteri wi Kresten brada nanga sisa na a Kownukondre zaal san wi ben ondrofeni. Den pramisi wi taki den o go baka na den sma di wi ben miti èn di ben wani sabi moro. Di a konmakandra kaba, a ben hebi fu taki adyosi. Wi trutru ben kon lobi den brada nanga sisa disi. Wi gi makandra furu deki-ati èn dati tranga a bribi fu wi.—Romesma 1:12.

A dei baka dati wi drai go baka na oso. Di wi ben e taki baka fu den sani di wi ondrofeni na den boitipresi, dan wi alamala agri taki Yehovah blesi a muiti fu wi trutru. Wi ben firi taki wi ben kon moro krosibei na Yehovah. Di wi doro na oso, mi aksi den pikin: „Pe unu wani go koiri tra leisi? Unu wani go na den bergi?” Den piki mi: „Nôno papa, meki wi go preiki baka na den boitipresi.” Mi wefi taki: „Iya, meki wi du dati. A ben de a moro switi fakansi di wi ben abi!”

[Futuwortu]