Leisiman e aksi

Gado e tyari rampu kon fu strafu sma?

Gado no e tyari rampu kon fu strafu sma di no du ogri. Noiti a ben du dati fositen èn noiti a o du dati na ini a ten di e kon. Fu san ede? Fu di „Gado na lobi”, na so Bijbel e taki na ini 1 Yohanes 4:8.

Ala sani di Gado e du, a e du nanga lobi. Fu di Gado na lobi, meki a no e du ogri nanga sma di no du noti, bika Bijbel e taki dati „efu yu abi lobi, dan yu no sa du tra sma ogri” (Romesma 13:10). Na ini Yob 34:12, Bijbel e taki: „A tru taki Gado srefi no e handri na wan ogri-ati fasi.”

A tru taki Bijbel ben taki na fesi fu den rampu di ben o pasa na ini a ten fu wi, soleki den „bigi gronseki” (Lukas 21:11). Ma a no Yehovah e meki den rampu dati pasa, neleki fa wan nyunsuman di taki na fesi fa a weer o de, no e meki wan bigi winti wai fu pori wan lo sani. We, efu a no Gado e tyari rampu kon fu pina sma, dan fa a du kon taki den rampu disi e pasa?

Bijbel e taki dati „heri grontapu de na ini a makti fu na ogriwan”, Satan Didibri (1 Yohanes 5:19). A ben de wan kiriman sensi na a bigin fu a libisma famiri teleki now (Yohanes 8:44). Gi Satan, a libi fu sma no warti notinoti èn a libi fu den no prenspari. Ala sani di a e du e sori taki a e prakseri ensrefi nomo, dati meki wi kan frustan taki a seti wan sistema na grontapu di e meki taki sma e denki densrefi nomo. Na ini a grontapu sistema disi, sma e du ala sani fu kisi wini gi densrefi nomo, èn disi e meki taki sma di no man yepi densrefi musu go libi na ini kontren pe ala sortu rampu kan pasa (Efeisesma 2:2; 1 Yohanes 2:16). Sobun, libisma di gridi, e meki sonwan fu den rampu disi miti trawan (Preikiman 8:9). Fa so?

Kande wi no fruwakti dati, ma libisma e meki wan tu fu den rampu disi pasa. Fu eksempre, ala sortu problema miti den sma di e libi na ini a foto New Orleans, na Amerkankondre, fu di bigi winti ben wai drape èn a foto ben kon sungu. Na ini Venezuela furu tokotoko ben saka komoto fu den bergi, èn a sani disi pori den oso fu sma di e libi drape. Den eksempre disi nanga tra eksempre, e sori taki den sani na ini a naturu, soleki winti nanga alen, kan tron rampu fu di libisma no abi nofo sabi fu a naturu. Boiti dati, libisma no abi nofo sabi fa fu bow sani bun, soleki pasi, oso, nanga broki, èn den no sabi fa fu seti sani bun. Moro fara, libisma no e gi yesi te den e kisi warskow fu rampu di kan pasa, èn lantiman de tu di e meki fowtu.

Luku wan rampu di ben pasa na ini Bijbel ten. Na ini a ten fu Yesus, 18 sma lasi libi, fu di wan toren ben fadon na den tapu (Lukas 13:4). A kan taki a rampu disi ben pasa fu di libisma meki fowtu, noso fu di ’ten nanga sani di e pasa sondro fu sma fruwakti dati’ miti den. A kan tu taki ala den tu sani disi meki taki a rampu disi pasa. Ma wán sani de seiker, namku taki Gado no ben meki a rampu disi pasa fu krutu sma.—Preikiman 9:11.

A de so taki Gado noiti no tyari wan rampu kon tapu sma? Nôno, Gado tyari rampu kon tapu sma, ma den rampu dati ben de tra fasi leki den sortu rampu di e pasa na ini a naturu noso den wan di e pasa leki bakapisi fu den sani di sma e du. Te Gado ben tyari rampu kon, dan a ben bosroiti suma ben o tan na libi èn suma ben o dede. Boiti dati, Gado ben abi reide fu san ede a tyari den rampu dati kon, ma den sortu rampu dati no ben pasa so furu. Tu eksempre fu dati na a Frudu di ben kon na heri grontapu na ini a ten fu a famiri-edeman Noa, èn a pori di Gado tyari kon tapu den foto Sodom nanga Gomora na ini a ten fu Lot (Genesis 6:7-9, 13; 18:20-32; 19:24). Den krutu dati di Gado ben tyari kon tapu sma, ben pori den ogrisma di no ben abi berow, ma den ben kibri den sma di ben de regtfardiki na ini Gado ai.

Fu taki en leti, Yehovah Gado man tyari wan kaba kon na ala pina di sma e ondrofeni leki bakapisi fu rampu. Boiti dati, Yehovah wani du dati èn a abi a makti fu du dati. Psalm 72:12 taki na fesi fu Yesus Krestes, a Kownu di Gado poti, taki: „A sa frulusu den mofinawan di e bari fu kisi yepi, sosrefi den sma di e kisi kwinsi èn ibri sma di no abi yepiman.”