Yu ben sabi a sani disi?

Fu san ede Yesus meki a breniman si baka safrisafri?

Na Markus 8:22-26 wi e leisi fa Yesus dresi wan breniman fu Betsaida. Bijbel e sori taki Yesus poti spiti fosi na tapu na ai fu a man, èn baka dati a aksi en san a ben e si. A sani di a man piki Yesus e sori taki a ben bruya pkinso. A man ben taki: „Mi e si sma, fu di mi e si sani di gersi bon, ma den e waka lontu.” Baka dati, Yesus fasi den ai fu a man ete wan tron, èn a sani disi pasa: „A man ben kan si krin; a man kon betre èn a ben kan si ala sani bun.” Soleki fa a sori, dan Yesus meki a man si baka safrisafri. Fu san ede a du dati?

Bijbel no e taki krin fu san ede a du dati, ma wi ben kan si a tori na a fasi disi. Efu wan sma ben breni omeni yari langa noso en heri libi langa, dan a ben o de wan bigi kenki gi so wan sma te a ben o bigin si baka. Fu gi wan eksempre: Fosi, sma ben e gebroiki pikin asi fu wroko na ini mijn. Den asi disi ben kon gwenti a dungru so te, taki te den ben kon na dorosei, den ben abi pikinmoro wan heri dei fanowdu fu kon gwenti a leti. Gi wan breni sma, a ben o moro muilek fu kon gwenti a leti. Na ini a ten disi, datra ben man yepi wan tu brenisma, so taki den ben man si baka. Ma nofo tron den sma dati no ben man nanga den someni sani di den ben e si wantronso. Fu di den ben e si difrenti kloru, pikin sani, bigi sani, sani di ben krosibei, èn sani di ben de farawe, meki den ben e bruya, èn den no ben e frustan srefi san ben de den sani di den ben sabi kaba. Te fu kaba, wan sma safrisafri e kon frustan san na den sani di a e si.

A kan taki Yesus meki a breniman si baka safrisafri, fu di a ben e broko en ede nanga a man. Te fu kaba, a man „ben kan si ala sani bun”, èn a ben man frustan san ben de den sani di a ben e si.

Fu san ede a no ben makriki fu leisi wan bukulolo na ini a ten fu Yesus?

Nofo tron wan pisi papirus noso wan pisi metibuba di sma ben e gebroiki fu meki bukulolo, ben langa sowan 23 te go miti 28 centimeter, èn a ben bradi sowan 15 te go miti 23 centimeter. Sma ben e lijm wan tu fu den pisi disi kon na wán, noso den ben e nai den kon na wán nanga linnen titei. Son leisi, sma ben e gebroiki moro langa pisi. A Dede Se Lolo fu Yesaya ben meki fu 17 pisi metibuba, èn ala nanga ala, a pisi di bun ete langa sowan 7 meter. A kan taki a bukulolo fu Yesaya di Yesus ben gebroiki na ini a snoga na Nasaret, ben langa a srefi.—Lukas 4:16, 17.

Luku san Alan Millard e taki fu a tori disi na ini wan buku fu en: „Wan sma di ben e leisi a bukulolo, ben e hori a bukulolo èn a ben e lolo en opo nanga en kruktu-anu. Na a srefi ten, a ben e hori a tra sei fu a bukulolo nanga en reti-anu, èn a ben e lolo en tu aladi a ben e leisi den difrenti pisi fu a buku a wan baka a trawan. A no de fu taki dati Yesus ben lolo pikinmoro a heri bukulolo opo èn a lolo en tapu baka, fu man leisi Yesaya 61, a kapitel di a ben leisi na ini a snoga.”

Na a ten dati, a buku Yesaya no ben prati na ini kapitel nanga vers, soleki fa a de na ini a ten disi. Di sma langa a bukulolo fu Yesaya gi Yesus na ini a snoga na Nasaret, dan a ben musu suku a pisi di wi sabi now leki Yesaya 61:1, 2 na ini a Bijbel fu wi. A ben makriki gi Yesus fu „feni a presi” pe a pisi dati ben skrifi. Disi e sori o bun a ben sabi Gado Wortu.