Abi bribi neleki den

A tan luku, èn a wakti

ELIA ben angri fu de en wawan so taki a ben kan begi en Tata di de na hemel. Ma no so langa pasa a bigi grupu sma di ben de lontu en, ben si fa a tru profeiti disi ben aksi Gado fu seni faya komoto fu hemel. A no de fu taki dati furu fu den sma disi ben e du muiti fu korikori Elia, soso fu meki taki a feni den bun. Toku Elia ben e suku fu kren go na tapu Karmelbergi pe a winti ben e wai bun tranga, fu di a ben wani de en wawan, so taki a ben kan begi Yehovah Gado. Ma fosi Elia ben kan du dati, a ben musu du wan wroko di no ben switi gi en. A ben abi fu go taki nanga Kownu Akab.

Den tu man disi no ben de a srefi kwetikweti. Akab ben e weri den kefalek diri kownu krosi, èn a ben de wan gridi man. Boiti dati, a ben fadon komoto na bribi èn a ben e du san tra sma ben e taigi en fu du. Ma Elia ben weri krosi leki wan profeiti. A krosi dati di no ben diri, ben meki kande fu a buba fu wan meti, noso fu wiwiri fu kameili noso krabita, èn a no ben lai pranpran. Boiti dati, Elia ben de wan deki-ati man, di ben e tyari ensrefi na wan reti fasi, èn di ben abi bribi. Na a kaba fu a dei di a wondru dati pasa, a ben de krin fu si fa den tu man disi ben de trutru. *

A dei dati Akab nanga den tra sma di ben e anbegi Bâal, kisi bigi syen. A ben kon na krin taki a heiden anbegi di Kownu Akab nanga en wefi Iseibel ben e gi den sma na ini a tin lo kownukondre Israel deki-ati fu teki dati abra, ben de falsi anbegi. Sma ben kon si taki Bâal a no wan trutru gado. Den profeiti fu Bâal ben e begi en fayafaya, den ben e dansi gi en, èn den kotikoti den skin srefi fu meki Bâal arki den. Toku a gado dati, di no abi libi, no ben man leti wan faya srefi. A no ben man tapu sma srefi fu no kiri den 450 profeiti fu en, di ben frudini en fu dede. Ma ete wan sani de di a falsi gado disi no ben man du, èn a sani disi di ben o kon na krin now. Dri yari langa den profeiti fu Bâal begi a gado fu den fu tyari wan kaba kon na a dreiten, di ben e meki sma pina na ini a kondre. Ma soleki fa a sori, dan Bâal no ben man yepi den. Heri esi, Yehovah srefi ben o sori taki en na a tru Gado, fu di a ben o tyari wan kaba kon na a dreiten.—1 Kownu 16:30–17:1; 18:1-40.

Ma o ten Yehovah ben o du dati? San Elia ben o du fosi a ten dati doro? San wi kan leri fu a man disi di ben e gi yesi na Gado dorodoro? Meki wi go ondrosuku a pisi tori disi di skrifi na 1 Kownu 18:41-46.

A ben e begi Gado doronomo

Elia go na Akab èn a taigi en: „Kren go na tapu a bergi, dan yu nyan èn dringi wan sani, bika mi e yere wan hebi alen e saka kon” (Vers 41). Na ogri-ati kownu disi ben leri wan sani fu den sani di pasa a dei dati? A tori no e taki efu a leri wan sani, ma a tori no e sori wi taki Akab abi berow. A tori no e taki tu dati Akab aksi Elia fu begi Yehovah gi en, so taki a kan kisi pardon. Ma a sani di Akab ben du nomo, na taki a „ben go nyan èn dringi” (Vers 42). Ma san Elia ben du?

„Elia, fu en sei, ben kren go na a ede fu Karmelbergi, èn a ben kindi nanga en fesi go na gron èn ben tan hori en fesi na mindri en kindi.” Na a ten di Akab go nyan en bere furu, Elia kisi na okasi fu go taki nanga en Tata na ini begi. A heri fasi fa Elia ben kindi na gron, fa a saka en ede so fara taki en fesi ben de na mindri en kindi, e sori taki a ben abi sakafasi. San a ben e du? We, a de krin fu frustan san a ben e du. Bijbel e fruteri wi na ini  Yakobus 5:18 taki Elia begi Gado fu meki alen fadon so taki a dreiten kon na wan kaba. A no de fu taki dati na a sani disi a ben e du di a ben de na tapu Karmelbergi.

Yehovah ben taki na fesi kaba: „Mi o meki alen fadon baka” (1 Kownu 18:1). Dati meki Elia begi en Tata na hemel fu En wani pasa soleki fa A ben taki. Pikinmoro wan dusun yari baka dati, Yesus leri den bakaman fu en tu fu begi taki Gado wani musu pasa.—Mateyus 6:9, 10.

Te wi luku na eksempre fu Elia, dan wi e leri furu sani di abi fu du nanga begi. A moro prenspari sani di Elia ben abi na prakseri, ben de taki a wani fu en Tata musu kon tru. Te wi e begi, dan a bun fu prakseri a pisi tori disi: „Awansi san wi e aksi akruderi a wani fu [Gado], a e yere wi” (1 Yohanes 5:14). Sobun, a no de fu taki dati wi musu sabi san Gado wani, efu wi wani taki a arki den begi fu wi. Wi e frustan tu fu san ede wi musu abi a gwenti fu studeri Bijbel ibri dei. A no de fu taki dati Elia ben wani taki a dreiten musu kon na wan kaba, fu di a ben e si fa a pipel na ini a kondre fu en ben e pina. En ati ben furu nanga tangi tu, baka di a si a wondru di Yehovah ben du a dei dati. Te wi e begi, dan a fiti taki wi e aksi fu meki sani waka bun gi trawan èn taki wi e gi Gado tangi nanga wi heri ati.—2 Korentesma 1:11; Filipisma 4:6.

A ben frutrow tapu Gado èn a ben de na ai

Elia ben sabi taki Yehovah ben o tyari wan kaba kon na a dreiten, ma a no ben sabi o ten Yehovah ben o du dati. We, dan san a profeiti du fosi a ten dati doro? Luku san vers 43 e taki: „Elia taigi en futuboi: ’Kren go pikinso moro na tapusei. Luku go na a sei fu a se.’ Sobun, a futuboi kren go na tapusei èn a luku go na a sei fu a se. Dan a taki: ’Mi no e si noti.’ Elia taigi en: ’Go luku baka.’ Na so a futuboi kren go na tapusei seibi tron.” Na eksempre fu Elia e leri wi tu prenspari sani. A fosi sani di wi kan leri na taki a profeiti ben de seiker taki Gado ben o du wan sani. A di fu tu sani, na taki Elia ben de na ai.

Elia ben sabi taki Yehovah ben o du wan sani heri esi, èn fu dati ede a seni a futuboi fu en go na wan hei presi fu pe a ben kan si bun fara. Drape a ben musu luku efu a ben e si iniwan sani na loktu di ben e sori taki alen ben o kon. Di a futuboi drai kon baka, a taigi Elia: „Mi no e si noti.” A loktu ben krin, èn soleki fa a sori, nowan wolku no ben de fu si. Ma a pisi tori disi e sori wi wan aparti sani tu. Yu sabi san na dati? We, kande yu e memre ete taki Elia ben taigi Kownu Akab: „Mi e yere wan hebi alen e saka kon.” Fa a profeiti ben kan taki so wan sani, efu a no ben e si nowan wolku di ben e sori taki alen ben o kon?

Elia ben sabi taki Yehovah pramisi fu meki alen fadon. Leki profeiti di ben e teki presi gi Yehovah, a ben de seiker taki a Gado fu en o du san A taki. Elia ben e frutrow so furu tapu a sani di Yehovah taki, dati a ben de leki a ben e yere a hebi alen kaba. Kande dati e meki wi prakseri a sani disi di Bijbel e taki fu Moses: „A ben tan tanapu kánkan leki a ben e si a Sma di wi no man si nanga ai.” Yu e si Gado leki wan trutru sma tu? A du furu sani di e sori wi krin fu san ede wi kan poti so wan tranga bribi na en èn na ini den pramisi fu en.—Hebrewsma 11:1, 27.

Meki wi go luku wan tra sani. Poti prakseri na a fasi fa Elia sori taki a ben de na ai. A seni a futuboi  fu en fu go luku efu wan sani ben e pasa. A no du dati wán noso tu tron nomo, ma a seni en seibi tron! Wi kan frustan taki a futuboi ben weri fu du a srefi sani disi someni leisi, ma Elia ben e tan wakti fu si a marki èn a no ben kon weri. Te fu kaba, di a futuboi drai kon baka fu a di fu seibi tron, a taigi Elia: „Luku! Mi e si wan pikin wolku di bigi leki na anu fu wan man, e opo komoto fu se” (Vers 44). Yu man si kaba fa a futuboi e langa en anu fu sori o pikin a wolku de di a si e wai kon fu a sei fu a Bigi Se? * Kande a futuboi no ben si a pikin wolku dati leki wan prenspari sani. Ma gi Elia a wolku dati ben de wan tumusi prenspari sani. Dati meki a taigi a futuboi fu en fu du a sani disi wantewante: „Go taigi Akab: ’Sreka den asiwagi! Saka komoto fu a bergi esi-esi, so taki na alen no wasi yu gowe!’”

Disi na ete wan fasi fa Elia gi wi wan tumusi moi eksempre. Neleki fa a ben de na ini a ten fu Elia, na so wi e libi na ini wan ten sosrefi pe Gado o du wan sani heri esi fu meki den sani di A abi na prakseri, kon tru. Na a ten dati Elia ben e wakti a kaba fu a dreiten. Anbegiman fu Gado na ini a ten disi e wakti a kaba fu a grontapu sistema disi di pori (1 Yohanes 2:17). Neleki Elia, wi musu tan na ai teleki Yehovah Gado du san a pramisi. Gado en eigi Manpikin, Yesus, ben gi den bakaman fu en a rai disi: „Tan na ai, bika unu no sabi sortu dei un Masra o kon” (Mateyus 24:42). Ma san Yesus ben wani taigi wi nanga dati? Yu denki taki na sori a ben wani sori wi taki den bakaman fu en no ben o sabi kwetikweti o ten a kaba ben o kon?  Nôno, bika a ben e fruteri sma furu sani di ben abi fu du nanga a fasi fa a situwâsi na grontapu ben o de na ini a ten fosi a kaba kon. Ibriwan fu wi kan kon sabi ala den difrenti sani di abi fu du nanga a marki „fu a kaba fu a grontapu sistema disi”.—Mateyus 24:3-7. *

Ibri pisi fu a marki disi e sori wi krin taki den sani di Yesus ben taki, de so trutru. Den buweisi disi nofo fu meki taki wi no draidrai, ma taki wi du wan sani wantewante? Wan pikin wolku nomo ben nofo fu meki Elia bribi taki Yehovah ben o du wan sani. A getrow profeiti ben lasi-ati?

Yehovah e frulusu sma èn a e blesi den

A tori e taki moro fara: „Baka wan pisi ten dungru wolku kon de na hemel èn a loktu kon blaka. Ne winti bigin wai èn wan hebi alen fadon. Akab rèi, teleki a doro na Yisreèl” (Vers 45). Wan lo sani bigin pasa esi-esi baka makandra. Na a ten di a futuboi fu Elia gi Akab a boskopu fu a profeiti, a pikin wolku kon tron wan bigi dungru wolku, di ben meki taki a heri loktu kon blaka. Wan tranga winti ben e wai. Te fu kaba, baka dri nanga afu yari, alen ben e fadon baka na tapu a gron na ini Israel. * A gron ben drei so te, taki a soigi na alen watra wantewante. Di na alen ben kon leki wan bigi sibibusi, dan Kisonliba kon lai nanga watra baka, èn na so fasi na alen wasi a brudu fu den profeiti fu Bâal gowe. Na wan agersi fasi den Israelsma di ben drai baka gi Gado ben e kisi na okasi tu fu wasi den takru flaka gowe di a Bâal anbegi ben tyari kon na tapu a kondre.

A no de tu taki dati Elia ben e howpu taki dati ben o pasa! San Akab ben o du? A ben o abi berow èn drai baka gi a pori Bâal anbegi? Den sani di pasa na a dei dati ben e sori krin fu san ede a ben o bun gi en fu kenki a fasi fa a ben e tyari ensrefi. A no de fu taki dati wi no kan sabi fa Akab ben e prakseri na a momenti dati. A tori e sori wi nomo taki a kownu „rèi, teleki a doro na Yisreèl”. Ma san a ben leri fu den sani disi? A ben o teki a fasti bosroiti fu kenki en libi? Den sani di pasa bakaten e sori taki disi no ben de so. Na a dei dati, ete wan tu sani ben o pasa nanga Akab èn nanga Elia.

A profeiti fu Yehovah teki a srefi pasi di Akab ben teki. A pasi ben langa, a presi ben nati, èn a ben dungru. Ma dan, wan tumusi aparti sani pasa.

„Ne Elia tai en krosi na en mindribere èn a bigin lon go na Yisreèl. Fu di Yehovah ben de nanga en, meki a ben kan lon so tranga, taki a doro drape fosi Akab” (Vers 46). A de krin taki ’Yehovah ben de nanga Elia’ èn A ben meki wan wondru pasa. Fu doro Yisreèl, Elia ben musu waka sowan 30 kilometer, èn a no ben yongu moro. * Denki a tori disi pikinso. A profeiti hari a langa krosi fu en kon na tapu, èn a tai en na en dyonku so taki a ben man lon moro bun. Dan a bigin lon a pasi di ben patyapatya, fu di na alen ben kon so hebi. Elia lon so tranga, taki a pasa a heri asiwagi fu a Kownu!

A no de fu taki dati disi ben de wan bigi blesi gi Elia! A musu fu de so taki Elia firi bun trutru di a si o furu krakti a kisi na a momenti dati èn omeni sani a ben man du. A kan taki a ben firi moro tranga srefi leki di a ben yongu. Kande a pisi tori disi e meki wi prakseri den profeititori di e gi wi a dyaranti taki ala getrowsma o abi wan bun gosontu èn taki den o firi krakti baka te den de na ini a Paradijs na grontapu (Yesaya 35:6; Lukas 23:43). Di Elia ben e lon a nati pasi, a ben sabi seiker taki en Tata, a wan-enkri tru Gado, Yehovah, ben breiti nanga en trutru!

Yehovah e angri fu blesi sma. A no sa de fu soso te wi e du muiti fu kisi den blesi dati tu. Neleki Elia, wi musu tan na ai, èn wi musu teki wi ten fu prakseri ala den buweisi di e sori taki heri esi Yehovah o du wan sani fu kenki a situwâsi na ini a tumusi prenspari ten disi di ogri srefisrefi. Neleki Elia, wi abi nofo buweisi di e sori wi taki wi kan poti wi frutrow dorodoro tapu den pramisi fu Yehovah, „a Gado fu waarheid”.—Psalm 31:5.

[Futuwortu]

[Faki/​Prenki na tapu bladzijde 19]

O langa a dreiten ben hori na ini a ten fu Elia?

Elia, a profeiti fu Yehovah, ben taigi Kownu Akab taki a dreiten di ben hori so langa kaba, ben o kon na wan kaba heri esi. Dati ben pasa „na ini a di fu dri yari”, èn soleki fa a sori, dati bigin tapu a dei di Elia taki fu a fosi leisi dati a dreiten ben o kon (1 Kownu 18:1). Syatu baka di Elia taki dati Yehovah ben o meki na alen fadon, dan dati pasa trutru. Fu dati ede, son sma kan denki taki a dreiten no hori dri yari langa, fu di a dreiten ben kon na wan kaba, fosi a di fu dri yari tapu. Ma Yesus nanga Yakobus e fruteri wi taki a dreiten ben hori „dri yari nanga siksi mun langa” (Lukas 4:25; Yakobus 5:17). A de so taki den tu sani disi di skrifi na ini Bijbel no e kruderi nanga makandra?

Nôno, kwetikweti. We, nofo tron a dreiten na ini Israel fu owruten ben e hori moi langa, son leisi a ben kan hori siksi mun langa srefi. A ben musu fu de so taki na a ten di Elia go na Akab fu taigi en taki alen no ben o fadon, dan a dreiten ben hori moro langa leki fa a ben de ibri yari, èn a ben meki den sma pina trutru. Fu taki en leti, a dreiten ben bigin sowan siksi mun na fesi kaba. Sobun, di Elia taki dati a dreiten ben o kon na wan kaba „na ini a di fu dri yari”, dan dati ben de dri yari baka di a ben taki fu a fosi leisi dati a dreiten ben o bigin. Na a ten dati a dreiten ben hori pikinmoro dri nanga afu yari kaba. A heri pisi ten fu den „dri yari nanga siksi mun” ben pasa, di a pipel ben kon makandra na tapu Karmelbergi fu luku san ben o pasa te Elia nanga den profeiti fu Bâal ben o tyari ofrandi.

We, poti prakseri now na a krakti di a boskopu fu Elia ben abi, di a go fu a fosi leisi na Akab. A pipel ben e bribi taki Bâal ben de „a sma di e rèi na tapu den wolku”, noso a gado di ben o tyari alen kon èn di ben o tyari wan kaba kon na a dreiten. Efu a dreiten ben e hori tumusi langa, dan sma ben o aksi densrefi: ’Pe Bâal de? O ten a sa tyari na alen kon?’ A ben musu fu de so taki den Bâal anbegiman skreki srefisrefi, di Elia taki dati nowan alen noso dow ben o fadon. Disi ben o tan de so teleki Elia ben o taki dati alen ben o fadon baka.—1 Kownu 17:1.

[Sma di abi a reti fu a prenki]

Pictorial Archive (Near Eastern History) Est.

[Prenki na tapu bladzijde 18]

Den begi fu Elia ben e sori taki a ben e angri fu si taki a wani fu Gado kon tru