FURU sma sabi a tori fu Yesus di den ben spikri na wan postu na mindri tu ogriman (Mat. 27:35-38). Ma son sma e bribi taki Bijbel e lei te a e taki dati bakaten den sreka a dedeskin fu Yesus èn den poti en na ini wan grebi.​—Mark. 15:42-46.

Son sma di e krutu den sani di skrifi na ini den Evangelietori, e tweifri efu den Romesma ben o gi primisi taki wan sma di den ben spikri na wan postu kisi wan bun beri èn taki den poti en na ini wan grebi. Den sma disi e bribi taki den ben e du tra fasi nanga den sortu sma dati. Ariel Sabar di e skrifi artikel gi wan tijdschrift, e fruteri fu san ede sma ben e denki so: „Den Romesma ben wani taki den sortu ogriman disi kisi syen” (Smithsonian). Èn dati meki den ben gwenti libi den dedeskin fu den ogrisma disi meki den anga na a postu so taki fowru nanga tra meti ben kan nyan den. Bakaten den ben e fringi san ben tan abra fu den dedeskin disi na wan presi pe den ben e fringi tra dedeskin.

Ma sabiman kon si taki sani ben waka tra fasi, te a abi fu du nanga a dedeskin fu son Dyu di ben kisi dedestrafu. Na ini 1968, den feni den bonyo fu wan man di ben kisi dedestrafu na ini a fosi yarihondro. Den feni den bonyo disi na ini wan Dyu famirigrebi, krosibei fu Yerusalem. Den bonyo disi ben de na ini wan stonkisi. A bonyo fu a bakafutu fu wan sma ben de tu na ini a kisi disi. A bonyo disi ben spikri na wan udu planga èn a spikri ben langa 11.5 centimeter. Sabar di wi ben taki fu en kaba e taki: „A bonyo disi ben de fu wan man di ben nen Yehochanan.” A e taki moro fara: „Disi e sori taki reide de fu bribi na Evangelietori di e taki dati Yesus beri na ini wan grebi.” A sani disi na wan bigi sani fu di „a bonyo fu Yehochanan en bakafutu ben de wan buweisi taki den Romesma na ini a ten fu Yesus ben e gi den Dyu primisi fu beri wan man di ben kisi dedestrafu, na ini wan grebi.”

Aladi a bonyo disi e sori taki den ben spikri a strafuman disi na en bakafutu, toku furu sma no e agri nanga makandra te a abi fu du nanga a fasi fa den ben spikri Yesus na a postu. Ma wán sani de seiker èn dati na taki den ben e beri son ogriman di ben kisi dedestrafu. A no ben de so taki den ben e fringi den na wan presi. A de krin taki wi kan bribi Bijbel te a e taki dati den poti a dedeskin fu Yesus na ini wan grebi. Den buweisi disi e sori taki Bijbel no e lei.

San moro prenspari, na taki Yehovah ben taki na fesi taki den ben o beri Yesus na ini a grebi fu wan guduman, èn nowan sma kan tapu pasi gi a Wortu fu Gado fu kon tru.​—Yes. 53:9; 55:11.