1. Gi wan eksempre di e sori fu san ede a prenspari fu sabi na ini sortu ten wi e libi èn san e pasa na wi lontu. (Luku a prenki na a bigin fu na artikel.)

FEIFI, fo, dri, tu, wán! Te wi e si a sani disi tapu na oloisi fu a bigi telefisi tapu a podium, dan wi sabi taki a yuru doro fu go sidon arki a poku di o prei fosi a kongres programa bigin. Now na a ten fu sidon arki den moi poku di a Waktitoren-orkest e prei, ma a moro prenspari sani na taki wi musu sreka wi frustan nanga wi ati gi den lezing di wi o yere. Ma now yu e si taki son sma e wakawaka lontu ete noso den e taki nanga den mati fu den, aladi a fesiman sidon tapu a podium kaba, a poku e prei èn ala sma go sidon. Kande den frigiti fu luku o lati a de èn den no si srefi taki a programa bigin. Nanga na eksempre disi wi wani sori taki wi e libi na ini wan ten pe a yuru e doro taki wan moro bigi sani o pasa. Dati meki wi musu de na ai. Ma san o pasa?

2. Fu san ede Yesus taigi den bakaman fu en fu „tan na ai”?

² Di Yesus Krestes taki fu „a kaba fu a grontapu disi”, a taigi den bakaman fu en: „Tan luku, tan na ai, bika unu no sabi  o ten den sani disi o pasa.” Baka dati a taigi den ete wan tu leisi: „Tan na ai.” (Mat. 24:3; leisi Markus 13:32-37.) Na ini a Bijbel buku Mateyus Yesus e warskow den bakaman fu en gi a srefi sani tu. A taigi den: „Fu dati ede, tan na ai, bika unu no sabi sortu dei un Masra o kon. . . . Un musu de srekasreka tu, bika a Manpikin fu libisma o kon na wan yuru di unu no ben prakseri.” Baka dati a taigi den ete wan leisi: „Fu dati ede, tan na ai bika unu no sabi a dei noso a yuru.”​—Mat. 24:42-44; 25:13.

3. Fu san ede wi e poti prakseri na a warskow fu Yesus?

³ Wi leki Yehovah Kotoigi e si a warskow fu Yesus leki wan seryusu sani. Wi sabi taki „a ten fu a kaba” doro moi fara kaba. Furu ten no de moro fosi a „bigi banawtu” bigin! (Dan. 12:4; Mat. 24:21) Wi e si taki bigi feti e feti, moro nanga moro sma e du hurudu nanga ogridu, kerki e bruya sma nanga den leri fu den èn gronseki e pasa na heri grontapu. Wi sabi tu taki na ala sei a pipel fu Yehovah e preiki a bun nyunsu fu a Kownukondre (Mat. 24:7, 11, 12, 14; Luk. 21:11). Now wi e angri fu si san Yesus o du gi wi te a kon èn fa a o meki a wani fu Gado kon tru.​—Mark. 13:26, 27.

4. (a) Fu san ede wi kan taki dati Yesus sabi now o ten Armagedon o bigin? (b) Wi no sabi o ten a bigi banawtu o bigin, ma san wi sabi seiker?

⁴ Wi sabi o lati ibri kongres programa e bigin. Ma awinsi omeni muiti wi e du, wi no o man taki sortu yari, sortu dei noso sortu yuru a bigi banawtu o bigin. Di Yesus ben de na grontapu, a taki: „Nowan sma sabi a dei nanga a yuru dati. Iya, srefi den engel fu hemel nanga a Manpikin no sabi, ma soso a Tata sabi” (Mat. 24:36). Ma fu di Krestes kisi a makti fu feti nanga na ogri grontapu fu Satan, meki wi kan taki dati a sabi now o ten Armagedon o kon (Openb. 19:11-16). Wi no sabi dati èn dati meki a prenspari taki wi de na ai teleki a bigi banawtu bigin. Ma Yehovah ben sabi ala ten kaba o ten a bigi banawtu o bigin. Na ensrefi poti a ten di a kaba o kon. A e teri den dei di libi ete fosi a bigi banawtu bigin. A dei disi „no o kon lati”! (Leisi Habakuk 2:1-3.) Fa wi kan de seiker fu disi?

5. Gi wan eksempre di e sori taki ala ten den profeititori fu Yehovah e kon tru na a yoisti ten.

⁵ Ala ten den profeititori fu Yehovah kon tru na a yoisti ten. Fu eksempre, luku a dei di a fri den Israelsma fu Egepte. Dati ben de 14 Nisan 1513 Fosi Krestes. Fu a dei dati Moses taki: „Na a kaba fu den fo hondro nanga dritenti yari, a heri pipel fu Yehovah komoto na ini Egepte leki wan legre na a srefi dei” (Eks. 12:40-42). Den 430 yari dati bigin na ini 1943 Fosi Krestes, di a frubontu di Yehovah meki nanga Abraham bigin wroko (Gal. 3:17, 18). Bakaten Yehovah taigi Abraham: „Sabi taki den bakapikin fu yu o libi na ini wan kondre di no de fu den. Den o tron srafu èn sma o pina den fo hondro yari langa” (Gen. 15:13; Tori 7:6). Den 400 yari disi di sma pina den, bigin na ini 1913 Fosi Krestes di Ismael ben e spotu Isak na a ten di Isak mama puru en na bobi. Den yari disi kon na wan kaba di den Israelsma komoto na Egepte na ini 1513 Fosi Krestes (Gen. 21:8-10; Gal. 4:22-29). Iya, 400 yari na fesi, Yehovah ben taki soifri o ten en pipel ben o kon fri.

6. Fu san ede wi kan de seiker taki Yehovah o frulusu en pipel?

 ⁶ Yosua, di ben de wan fu den sma di ben kon fri fu Egepte, ben taigi ala den Israelsma: „Unu sabi heri bun taki Yehovah un Gado du ala den bun sani di a ben pramisi unu. Ala den sani disi kon tru, soleki fa unu srefi si. Iya, a du ala den sani di a pramisi” (Yos. 23:2, 14). Wi kan de seiker taki Yehovah o meki wi pasa a bigi banawtu libilibi, soleki fa a pramisi. Ma efu wi no wani lasi libi te a grontapu disi o kisi pori, dan wi musu tan na ai.

7, 8. (a) Sortu wroko den waktiman fu owruten ben abi èn san wi kan leri fu disi? (b) Gi wan eksempre di e sori san kan pasa te waktiman e fadon na sribi.

⁷ Te wi e luku a wroko fu den waktiman fu owruten, dan wi e si o prenspari a de fu tan na ai. Fosi, furu bigi foto soleki Yerusalem ben abi hei skotu. Den ben meki den skotu so taki feanti no ben kan kon na ini a foto. Boiti dati den hei pisi fu a skotu ben e yepi den waktiman fu si san ben e pasa lontu a foto. Dei nanga neti waktiman ben de na tapu den skotu èn na den portu. Den ben musu warskow den sma fu a foto te feanti ben de na pasi e kon (Yes. 62:6). Sma ben kan lasi den libi efu den waktiman no ben tan na ai èn den no ben tan na den postu fu den.​—Esek. 33:6.

⁸ A Dyu historia skrifiman Josephus taki dati na ini a yari 70, den legre fu Rome ben man kon na ini Yerusalem fu di den waktiman di ben de na a Toren fu Antonia, wan pisi fu a skotu lontu a foto, ben fadon na sribi. Ne den Romesma broko kon na ini a foto na a sei dati, dan den lon go na a tempel èn den sutu faya gi en. Disi ben de a kaba fu a moro bigi banawtu di ben kon tapu Yerusalem nanga a Dyu pipel.

9. San furu tiriman na ini a ten disi no sabi?

⁹ Furu kondre na ini a ten disi, e sorgu tu taki srudati e hori wakti na den presi pe sma kan kon na ini a kondre èn den e gebroiki den moro kefalek alarm-sistema nanga camera. Ala den sani disi na fu sorgu taki feanti no kon na ini a kondre èn taki ogri no miti a pipel. Ma aladi sma e gebroiki den sani disi fu hori wakti gi a kondre, toku tiriman no sabi san Gado Kownukondre o du dyonsro èn den no man kibri a kondre fu den gi san o pasa. A Kownukondre disi di abi Krestes leki tiriman o kon feti nanga ala den tiriman fu grontapu (Yes. 9:6, 7; 56:10; Dan. 2:44). Ma te wi de na ai èn wi e tan dini Yehovah fayafaya, dan wi o de srekasreka gi a dei disi.​—Ps. 130:6.

10, 11. (a) Nanga san wi musu luku bun èn fu san ede? (b) Fu san ede yu e taki dati Didibri e kori sma fu no bribi Bijbel profeititori?

¹⁰ Te wan waktiman hori wakti heri neti, dan son leisi leti fosi a o kaba hori wakti, a e kon weri èn a wani fadon na sribi. Na so a de tu taki o moro wi e doro a kaba fu a grontapu disi, o moro a kan kon hebi gi wi fu tan na ai. Ma a ben o de wan sari sani efu wi ben o fadon na sribi nownow. Meki wi go luku dri sani di kan meki taki wi no de na ai moro èn wi e bigin dyonko.

¹¹ Didibri e kori sma fu no bribi san Gado taki. Syatu fosi Yesus dede, a ben warskow den bakaman fu en dri leisi gi a „tiriman fu a grontapu disi” (Yoh.  12:31; 14:30; 16:11). Yesus ben sabi taki Didibri ben o du ala san a man fu no meki sma si taki den profeititori fu Gado e sori taki wi e libi na ini wan prenspari ten èn taki a kaba fu grontapu de krosibei (Sef. 1:14). Satan e gebroiki falsi bribi fu breni a frustan fu sma. San yu e si te yu e taki nanga tra sma? Yu no e si taki Didibri „breni a frustan fu den sma di no e bribi”? Yu no e si taki den no e bribi taki a grontapu disi o kon na wan kaba èn taki Krestes de Kownu now fu Gado Kownukondre? (2 Kor. 4:3-6) Nofo tron sma e taki: „Mi no abi ten fu arki.” Furu tron den no wani arki te wi e pruberi fu taigi den san o pasa nanga a grontapu disi.

12. Fu san ede wi no musu meki Didibri kori wi?

¹² A fasi fa den sma e du di no wani arki, no musu meki yu lasi-ati noso meki taki yu no de na ai moro. Yu sabi san o pasa. Paulus ben taigi den Kresten brada nanga sisa fu en: „Unu sabi heri bun taki a dei fu Yehovah o kon.” Fa a dei disi o kon? Paulus taki dati a o kon „leki wan fufuruman na neti”. (Leisi 1 Tesalonikasma 5:1-6.) Yesus ben warskow wi: „De srekasreka tu, bika a Manpikin fu libisma e kon na wan yuru di unu no ben prakseri” (Luk. 12:39, 40). Dyonsro Satan o kori bun furu sma fu denki taki ’freide de èn taki ala sani e waka bun’. A o meki den denki taki den no abi fu broko den ede nanga noti fu di ala sani e go bun. Fa a de nanga wi? Wi no wani taki a dei dati pe sma o kisi krutu, ’kon na wi tapu leki fa deiten e kon miti fufuruman wantronso’. Dati meki wi no musu fadon na sribi, ma wi musu „tan wikiwiki”. Sobun, leisi Gado Wortu ibri dei èn denki dipi fu san Yehovah e taigi wi.

13. Fa a yeye fu grontapu abi krakti tapu libisma èn san wi musu du fu disi no pasa nanga wi?

¹³ A yeye fu grontapu kan meki wi fadon na sribi. Furu sma e poti so furu prakseri na a aladei libi fu den taki den no e frustan „taki den abi Gado fanowdu” (Mat. 5:3). Den e gebroiki ala den ten nanga krakti fu feti baka grontapu gudu. Na so den e poti prakseri nomo na ’a lostu fu a skin, nanga a lostu fu  den ai’ (1 Yoh. 2:16). Boiti dati, a grontapu disi e gi sma na okasi fu meki prisiri na ala sortu fasi èn disi e meki taki ibri yari sma e kon lobi prisiri moro nanga moro (2 Tim. 3:4). Dati meki Paulus ben taigi Kresten taki den no ben musu ’sidon prakseri na fesi fa den ben o du den sani di a sondu skin wani’, noso den ben o fadon na sribi.​—Rom. 13:11-14.

14. Sortu warskow wi e kisi na Lukas 21:34, 35?

¹⁴ Na presi fu meki a yeye fu grontapu abi krakti na wi tapu, wi wani taki a yeye fu Gado e tiri wi libi. Nanga a yeye disi, Yehovah e meki wi kon frustan krin san o pasa na ini a ten di e kon ^[1] (1 Kor. 2:12). Ma wi musu de na ai, fu di wi sabi taki srefi den aladei sani fu a libi kan meki wan sma fadon na sribi so taki a no e si moro taki a diniwroko fu Gado na a moro prenspari sani. (Leisi Lukas 21:34, 35.) Kande tra sma e spotu wi fu di wi e tan na ai, ma dati no musu meki wi frigiti na ini sortu prenspari ten wi e libi (2 Petr. 3:3-7). Wi musu tan abi a gwenti fu go na den konmakandra pe wi kan de nanga wi brada nanga sisa èn pe a yeye fu Gado de.

15. San pasa nanga Petrus, Yakobus nanga Yohanes èn fa disi kan pasa nanga wi tu?

¹⁵ A sondu skin fu wi kan meki taki wi no de na ai moro. Yesus ben sabi taki sondu libisma abi swakifasi èn den e misi son leisi. Luku san pasa a neti fosi sma ben o kiri Yesus. Fu kan horidoro te na a kaba, a ben musu aksi en hemel Tata fu gi en a krakti. Yesus aksi Petrus, Yakobus nanga Yohanes fu „tan na ai”, aladi a ben e begi. Ma den no ben frustan o seryusu a situwâsi ben de. Na presi taki den tan na ai gi a Masra fu den, den fadon na sribi fu di den skin ben swaki. Ma aladi Yesus ben weri tu, toku a ben de na ai èn a begi en Tata fayafaya. Na dati den mati fu en ben musu du tu.​—Mark. 14:32-41.

16. San wi musu du fu „tan na ai”, soleki fa Yesus e taki na Lukas 21:36?

¹⁶ Efu wi wani „tan na ai”, dan a no sari nomo fu wani du bun. Wan tu dei, fosi Yesus go begi na ini a dyari fu Getseimanei, a taigi den srefi bakaman disi fu en fu begi Yehovah fayafaya. (Leisi Lukas 21:36.) Sobun, efu wi no wani fadon na sribi, dan wi srefi musu tan na ai èn begi fayafaya.​—1 Petr. 4:7.

17. Fa wi kan sorgu taki wi de klariklari gi san o pasa dyonsro?

¹⁷ Yesus ben taki dati a kaba „o kon na wan yuru di [wi] no ben prakseri”. Sobun, now a no a ten fu fadon na sribi èn fu feti baka a gudu libi di Satan nanga en grontapu wani taki wi musu abi, ma di no e tyari koloku kon trutru (Mat. 24:44). Na ini Bijbel, Gado nanga Krestes e taigi wi san wi o kisi na ini a ten di e kon èn san wi musu du fu tan na ai. Wi musu sorgu taki wi bribi no e kon swaki, wi musu tan abi wan bun matifasi nanga Yehovah èn wi musu tan poti a Kownukondre na a fosi presi. Wi no musu frigiti tu taki wi e libi na ini wan ten pe bigi sani o pasa. Te wi no e frigiti disi, dan wi o de klariklari gi san o pasa dyonsro (Openb. 22:20). Wi o man kibri wi libi, te wi e du ala den sani disi.