1. Sortu kari Yesus ben gi fo fisiman, èn san den man disi du?

DEN disipel Petrus, Andreas, Yakobus nanga Yohanes ben abi wan fisi bisnis. Den ben musu fu fruwondru fu yere san Yesus ben aksi fu den: „Un tron bakaman fu mi, dan mi o meki unu tron fisiman di e fanga libisma.” * San den fo man disi ben o du? Bijbel e taki: „Wantewante den libi den fisinèt èn den go waka na en baka” (Mat. 4:18-22). A bosroiti disi kenki den heri libi. Now den no ben o fanga fisi moro, ma den ben o „kisi sma libilibi” (Luk. 5:10). Na ini a ten disi Yesus e kari reti-ati sma di lobi waarheid fu du a srefi sani (Mat. 28:19, 20). Yu teki a kari fu Yesus fu tron wan disipel èn preiki a bun nyunsu?

2. Fu san ede son sma e draidrai fu tron wan fisiman fu libisma, ma san kan yepi yu fu teki a bosroiti dati?

² Kande yu e studeri Bijbel wan pisi ten kaba èn yu tyari kenki kon na ini yu libi. Now yu musu bosroiti efu yu wani tron wan preikiman fu a bun nyunsu. No lasi-ati efu yu e tweifri fu teki a kari fu Yesus. A kan taki yu e draidrai fu di yu sabi taki disi na wan bosroiti di prenspari srefisrefi. A tru taki Bijbel e taki dati Petrus nanga den mati fu en libi den fisinèt „wantewante”. Ma den denki  bun fosi den teki a bosroiti disi. Moro leki siksi mun na fesi den ben leri sabi Yesus èn den ben bribi taki en na a Mesias (Yoh. 1:35-42). Kande yu srefi leri furu fu Yehovah nanga Yesus èn yu wani kon moro krosibei na Yehovah. Ma yu musu denki bun fosi yu teki a bosroiti fu tron wan preikiman. San yepi Petrus, Andreas nanga den tra disipel fu bosroiti san den ben o du?

3. San kan yepi yu fu tron wan bakaman fu Krestes di e du en wroko bun?

³ Den fosi disipel fu Yesus ben lobi a fisiwroko, den ben sabi du en bun, den ben abi deki-ati èn den ben man dwengi densrefi. Den srefi fasi disi yepi den fu tron bun fisiman di e fanga libisma. Na artikel disi o sori fa yu kan abi den fasi disi, so taki yu kan tron wan bakaman fu Krestes di e du en wroko bun.

4. Fu san ede Petrus ben e du a fisiwroko?

⁴ Nanga a fisiwroko Petrus ben man sorgu en osofamiri, ma a no fu dati ede wawan a ben e fanga fisi. Soleki fa a sori, dan Petrus ben lobi a fisiwroko tu (Yoh. 21:3, 9-15). Petrus ben leri tu fu lobi a preikiwroko. Èn nanga a yepi fu Yehovah, Petrus ben man du a preikiwroko heri bun.​—Tori 2:14, 41.

5. Soleki fa Lukas 5:8-11 e sori, dan fu san ede Petrus ben e frede, èn san wi kan du fu no frede moro?

⁵ Lobi gi Yehovah na a moro prenspari reide gi wi fu preiki a bun nyunsu. A lobi di wi abi gi Yehovah kan yepi wi fu fruteri trawan fu en, awinsi wi e firi leki wi no warti nofo fu du dati. Di Yesus kari Petrus fu tron wan fisiman di e fanga libisma, a taigi en: „No frede moro.”  (Leisi Lukas 5:8-11.) Petrus no ben frede san ben o pasa te a ben tron wan disipel. Ma a kon frede di a si o furu fisi Yesus ben meki den kisi. A ben sabi taki na wan wondru Yesus du èn a ben firi leki a no warti nofo fu wroko makandra nanga Yesus. Neleki Petrus a kan taki yu e frede tu. Kande yu e frede taki yu no o man du san wan disipel fu Krestes musu du. Efu dati de so, dan yu musu kon abi moro lobi gi Yehovah, gi Yesus, èn gi tra sma. A lobi dati o meki taki yu o wani teki a kari fu Yesus fu tron wan fisiman di e fanga libisma.​—Mat. 22:37, 39; Yoh. 14:15.

6. Sortu tra reide wi abi fu du a preikiwroko?

⁶ Luku ete wan tu reide fu san ede wi wani preiki. Wi wani gi yesi na a komando fu Yesus: ’Go èn meki sma tron disipel’ (Mat. 28:19, 20). Wi e preiki tu fu di furu sma e ’pina èn den e waka bruyabruya leki skapu di no abi skapuman’. Den abi a bun nyunsu fu a Kownukondre tranga fanowdu (Mat. 9:36). Yehovah wani taki ala sortu sma musu kon sabi a tru leri finifini, so taki den kan kisi frulusu.​—1 Tim. 2:4.

7. Fa Romesma 10:13-15 e sori o prenspari a preikiwroko de?

⁷ Te wi prakseri fa a preikiwroko kan yepi sma fu kisi frulusu, dan wi o wani du a wroko disi. Wan fisiman e seri den fisi di a fanga noso a e nyan den. Ma wi e „fanga” libisma, so taki den kan tan na libi.​—Leisi Romesma 10:13-15; 1 Tim. 4:16.

8-9. Sortu sani wan fisiman musu sabi, èn fu san ede?

⁸ Na ini a ten fu Yesus wan fisiman ben musu sabi sortu fisi a ben wani fanga (Lef. 11:9-12). A ben musu sabi tu pe a ben musu suku den fisi. Nofo tron fisi de na presi pe den lobi a watra èn pe den man feni nofo nyanyan. A prenspari tu taki wan fisiman sabi o ten a musu go fisi. Wan leisi wan Kotoigi di e tan na wan èilanti fu a Stille Oceaan ben kari wan zendeling fu go fisi nanga en. A zendeling taki: „Mi o miti yu tamara mamanten, neigi yuru.” Ne a brada piki en: „Yu no e frustan. Wi musu go na wan ten di bun fu kisi fisi, a no na wan ten di bun gi wi.”

⁹ Na a srefi fasi, den disipel fu Yesus di ben tron preikiman fu a bun nyunsu, ben go na den presi èn na a ten di den ben sabi taki den ben o feni sma. Fu eksempre, den disipel fu Yesus ben e preiki na a tempel èn na ini den snoga, na ibri oso èn na wowoyo (Tori 5:42; 17:17; 18:4). Wi musu sabi tu pe èn o ten wi kan feni den sma na ini a den kontren pe wi e preiki. Wi musu de klariklari fu seti wi libi na so wan fasi, taki wi o man preiki na den presi èn na a ten pe wi sabi taki wi o miti sma.​—1 Kor. 9:19-23.

10. Sortu wrokosani Yehovah en organisâsi gi wi?

¹⁰ Wan fisiman musu abi den yoisti wrokosani tu èn a musu sabi fa fu gebroiki den. Wi srefi musu abi den yoisti wrokosani fu kan preiki bun. Èn wi musu sabi fa fu gebroiki den sani dati. Yesus ben fruteri den disipel krin fa den ben musu du a preikiwroko. A taigi den san den no ben musu tyari, pe den ben musu preiki èn san den ben musu taki (Mat. 10:5-7; Luk. 10:1-11). Tide na a dei, Yehovah en organisâsi gi wi difrenti wrokosani (na ini a Teaching Toolbox) fu du wi  wroko bun. * Èn wi e kisi leri fa fu wroko nanga den sani disi. Dati meki wi no e frede te wi e preiki èn wi e tron bun leriman.​—2 Tim. 2:15.

11. Fu san ede fisiman di e fanga libisma musu abi deki-ati?

¹¹ Fisiman musu abi deki-ati. Son leisi sani e pasa di den no fruwakti. Nofo tron den e wroko na neti te a dungru èn wantronso bigi winti kan wai kon. Fisiman di e fanga libisma musu abi deki-ati tu. Te wi o bigin preiki èn wi e fruteri sma taki wi na Yehovah Kotoigi, dan famiriman kan gens wi, mati kan spotu wi èn sma di no o wani arki na boskopu fu wi. Den situwâsi disi kan de leki „bigi winti” tu. Ma disi no e fruwondru wi. Yesus ben taigi den bakaman fu en taki a ben o seni den go preiki na presi pe sma ben o gens den.​—Mat. 10:16.

12. Fa wi kan kisi moro deki-ati te wi luku san skrifi na Yosua 1:7-9?

¹² Fa yu kan kisi moro deki-ati? Yu musu bribi trutru taki na hemel Yesus e tiri a preikiwroko na grontapu te nanga now (Yoh. 16:33; Openb. 14:14-16). Yu musu bribi tu taki Yehovah o sorgu gi yu soleki fa a pramisi (Mat. 6:32-34). O moro yu bribi kon tranga, o moro deki-ati yu o abi. Fu di Petrus nanga den  mati fu en ben abi wan tranga bribi, meki den libi den fisi bisnis fu waka na Yesus baka. Yu srefi sori tu taki yu abi wan tranga bribi di yu taigi yu mati nanga famiriman taki yu bigin studeri Bijbel nanga den Yehovah Kotoigi èn taki yu e go na den konmakandra fu den! A no de fu taki dati yu tyari furu kenki kon na ini yu libi fu man libi soleki fa Yehovah wani. Yu ben musu abi bribi nanga deki-ati fu du dati tu. Te yu tan du muiti fu kisi moro deki-ati, yu kan de seiker taki ’Yehovah yu Gado o de nanga yu, awinsi pe yu e go’.​—Leisi Yosua 1:7-9.

13. Fa wi kan kisi moro deki-ati te wi e denki dipi èn te wi e begi?

¹³ Sortu tra sani wi kan du fu kisi moro deki-ati? Begi Yehovah fu gi yu moro deki-ati (Tori 4:29, 31). Yehovah o piki den begi fu yu èn noiti a no o gowe libi yu. Ala ten a de klariklari fu horibaka gi yu. Denki dipi fu sani di Yehovah du fu kibri trawan na ini owruten. Prakseri tu fa Yehovah yepi yu pasa muilek ten èn fa a gi yu a krakti fu tyari kenki kon na ini yu libi. Fu tru, a Sma di meki a pipel fu en pasa na ini a Redi Se kan yepi yu fu tron wan disipel fu Krestes (Eks. 14:13). Yu kan abi a srefi frutrow leki a psalm skrifiman di ben taki: „Yehovah de na mi sei. Mi no sa frede. San libisma kan du mi?”​—Ps. 118:6.

14. San den ondrofenitori fu Masae nanga Tomoyo e leri yu?

¹⁴ Wan tra sani di kan gi wi deki-ati, na te wi e si fa Yehovah yepi sma di e syensyen fu preiki sondro frede. Luku san ben pasa nanga wan sisa di nen Masae. A ben e syensyen èn a ben denki taki a no ben o man preiki noiti. A ben e frede fu taki nanga sma di a no sabi. Gi en, a sani dati ben de leki wan hei bergi di a no ben man kren. Dati meki a du muiti fu kon abi moro lobi gi Gado èn gi tra sma. A prakseri o prenspari a preikiwroko fu wi de na ini a ten disi èn a begi Yehovah fu gi en moro deki-ati fu du a preikiwroko. Bakaten a no ben e frede moro èn a ben e dini srefi leki wan gewoon pionier. Yehovah kan yepi nyun preikiman tu fu „abi deki-ati”. Luku na ondrofenitori fu sisa Tomoyo. Di a bigin preiki oso fu oso, a fosi sma di a miti bari gi en: „Mi no wani yere noti fu den Yehovah Kotoigi!” Ne a naki en doro tapu. Tomoyo no ben frede èn a taigi en preikiwroko patna: „Yu si san pasa? Sondro fu mi taki wan sani, a ben sabi kaba taki mi na wan Yehovah Kotoigi. Mi breiti yèrè!” Now Tomoyo na wan gewoon pionier.

15. Fa bun fisiman e sori taki den man dwengi densrefi, èn fu san ede a prenspari taki Kresten abi a fasi disi tu?

¹⁵ Wan bun fisiman musu man dwengi ensrefi tu. Wan sma di man dwengi ensrefi man du ala sani di a musu du. Fisiman musu dwengi densrefi fu opo frukufruku, den musu tan du a wroko teleki den kaba, èn den musu wroko go doro awinsi a weer no moi. Na a srefi fasi wi abi fu dwengi wisrefi tu fu man horidoro fu man klari a wroko fu wi.​—Mat. 10:22.

16. Fa wi kan leri fu dwengi wisrefi?

¹⁶ Nofo tron wi wani du soso den sani di makelek fu du. Ma son leisi den moro prenspari sani di wi musu du no makelek srefisrefi. Dati meki wan sma musu leri wi fa fu dwengi wisrefi, so taki wi kan du  den sani di muilek gi wi kande. Nanga yepi fu en santa yeye, Yehovah kan leri wi fu dwengi wisrefi.​—Gal. 5:22, 23.

17. Sortu sani di Paulus taki na 1 Korentesma 9:25-27 e sori taki a ben musu du muiti fu man dwengi ensrefi?

¹⁷ Na apostel Paulus ben man dwengi ensrefi. Ma en srefi taki dati a ben musu ’naki en skin nanga kofu’ fu man du san bun. (Leisi 1 Korentesma 9:25-27.) A ben gi trawan deki-ati fu dwengi densrefi tu, so taki den ben o du ala sani „na wan fasi di fiti èn soleki fa sani seti” (1 Kor. 14:40). Wi musu dwengi wisrefi tu fu man du a preikiwroko doronomo èn fu du ala tra sani di wan Kresten musu du.​—Tori 2:46.

18. San o meki taki Yehovah si wi leki bun preikiman?

¹⁸ Wan fisiman di sabi en wroko bun musu man fanga furu fisi. Ma dati no de so nanga a preikiwroko. Yehovah no e luku omeni sma wi e tyari kon na ini na organisâsi fu en (Luk. 8:11-15). Solanga wi e tan preiki a bun nyunsu èn wi e gi sma leri, Yehovah o si wi leki bun wrokoman. Fu san ede? Fu di wi e du san Yehovah nanga en Manpikin wani wi fu du.​—Mark. 13:10; Tori 5:28, 29.

19-20. Sortu spesrutu reide wi abi fu du a preikiwroko now?

¹⁹ Na ini son kondre sma mag du a fisiwroko soso wan tu mun na ini a yari. Na a kaba fu den mun disi den fisiman e du moro muiti kande fu fanga fisi. Na a srefi sani fisiman di e fanga libisma e du tu. Heri esi a grontapu disi o kon na wan kaba! Bijna wi no abi ten moro fu du a wroko disi di o meki sma kisi frulusu. No draidrai èn no denki taki ala sani ini yu libi musu go bun fosi yu kan bigin nanga a prenspari wroko disi.​—Preik. 11:4.

²⁰ Now na a ten fu kon abi moro lobi gi a preikiwroko, fu leri moro fu Bijbel, fu kon abi moro deki-ati, èn fu leri fa fu dwengi yusrefi. Wroko makandra nanga den moro leki aiti milyun sma di e preiki a bun nyunsu na heri grontapu, dan Yehovah o meki yu firi prisiri (Neh. 8:10). Tan preiki a bun nyunsu so furu leki yu man teleki Yehovah taki dati a wroko kaba. Na ini a tra artikel wi o taki fu dri sani di o yepi wi fu tan preiki a bun nyunsu fu a Kownukondre leki fisiman di e fanga libisma.