1. San na wan tu wet di skrifi na ini Bijbel èn sortu wini wi e kisi fu di wi e gi yesi na den wet disi?

NA INI Bijbel Yehovah gi wi wet di e sori wi krin san wi musu èn san wi no musu du. Fu eksempre, a no wani taki wi e du hurudu nanga afkodrei, noso taki wi e fufuru noso e kon drungu (1 Kor. 6:9, 10). Boiti dati, Gado en Manpikin Yesus Krestes ben gi den bakaman fu en a komando disi: „Go na sma fu ala kondre èn meki den tron disipel. Dopu den na ini a nen fu a Tata, fu a Manpikin, èn fu a santa yeye. Leri den fu du ala san mi taigi unu fu du. Unu o si taki mi o de nanga unu ala dei te na a kaba fu grontapu” (Mat. 28:19, 20). Iya, den wet nanga den komando di Gado gi wi, e kibri wi trutru. Fu di wi e gi yesi na den wet disi, meki wi e kisi moro lespeki gi wisrefi, wi abi wan moro bun gosontu èn na osofamiri fu wi de moro koloku. Ma a moro prenspari sani na taki fu di wi e gi yesi na ala den komando fu Yehovah, soleki a komando fu preiki gi sma, meki a feni wi bun èn a e blesi wi.

2, 3. (a) Fu san ede Bijbel no abi wet gi ibri situwâsi na ini a libi? (b) Sortu aksi wi o go luku na ini na artikel disi? (Luku a prenki na a bigin fu na artikel.)

² Ma furu situwâsi de pe Gado Wortu no e sori krin san wi musu du. Fu eksempre, Bijbel no e taki finifini sortu krosi wan Kresten musu weri. Fa disi e sori taki Yehovah na wan koni Gado? We, sma na ini ala kondre abi difrenti sortu  gwenti èn den e weri difrenti sortu modo. Ma ala yari den gwenti nanga den modo disi e kenki. Efu Bijbel ben skrifi finifini sortu krosi sma musu weri noso fa den musu meki modo, dan den rai dati no ben o fiti moro gi a ten disi. Dati meki Gado Wortu no e taki finifini tu sortu wroko wan Kresten musu du, sortu datrayepi a musu teki èn na sortu fasi a musu meki prisiri. Sobun, ibri Kresten nanga osofamiri edeman mag teki den eigi bosroiti te a abi fu du nanga den sortu tori disi.

³ Ma disi wani taki dati a no abi trobi gi Yehovah san wi o du te wi musu teki wan prenspari bosroiti, spesrutu te a bosroiti di wi o teki kan kenki wi heri libi? A de so taki wi hemel Tata feni iniwan bosroiti di wi e teki bun, solanga wi no e trangayesi den wet fu en? Te Bijbel no e taki finifini san wi musu du na ini wan spesrutu situwâsi, dan fa wi o sabi sortu bosroiti Yehovah o feni bun?

4, 5. Sortu bakapisi den bosroiti fu wi kan abi gi wi èn gi trawan?

⁴ Son sma feni taki a no abi trobi sortu bosroiti wi e teki. Ma efu wi wani teki koni bosroiti di e prisiri na ati fu Yehovah, dan wi musu luku sortu wet nanga gronprakseri skrifi na ini Bijbel èn wi musu du san den e taki. Fu eksempre, efu wi wani taki Gado feni wi bun, dan wi musu gi yesi na den wet di a gi wi na ini a tori fu brudu (Gen. 9:4; Tori 15:28, 29). Begi o yepi wi fu teki bun bosroiti di e kruderi nanga den gronprakseri nanga wet di skrifi na ini Bijbel.

⁵ Te wi musu teki prenspari bosroiti, dan dati kan abi krakti tapu a libi fu wi leki Kresten. Wan don bosroiti kan pori a matifasi di wi abi nanga Yehovah, ma wan koni bosroiti kan meki a matifasi di wi abi nanga en kon moro bun. A kan abi takru bakapisi gi trawan tu te wi e teki don bosroiti, fu di a kan swaki a bribi fu den, a kan bruya den, noso a kan pori a wánfasi na ini a gemeente srefi. Sobun, a abi trobi sortu bosroiti wi e teki.​—Leisi Romesma 14:19; Galasiasma 6:7.

6. San o yepi wi fu teki wan bun bosroiti?

⁶ San wi musu du te wi e kon na ini situwâsi pe Bijbel no e taki krin fu a tori? Na ini den sortu situwâsi disi, a bun fu luku a tori moro fini. Èn te wi o teki wan bosroiti, dan wi no musu luku nomo san wi feni bun noso san wi lobi, ma wi musu luku tu san Yehovah feni bun.​—Leisi Psalm 37:5.

7. Te Bijbel no e taki krin san wi musu du, dan fa wi kan kon sabi san Yehovah e denki fu wan tori?

⁷ Kande yu e aksi yusrefi: ’Efu Bijbel no e taki finifini fu wan tori, dan fa wi kan sabi san Yehovah feni bun?’ Efeisesma 5:17 e taki: „Tan du muiti fu frustan san na a wani fu Yehovah.” Te Bijbel no e taki krin san wi musu du, dan fa wi kan kon sabi san na a wani fu Gado? Wi kan kon sabi disi te wi e begi èn te wi e meki a santa yeye fu en tiri wi.

8. Fa Yesus sori taki a ben frustan san Yehovah ben wani taki a du? Gi wan eksempre.

⁸ Luku fa Yesus ben kon frustan san en Papa ben wani taki a musu du. Tu leisi Bijbel e taki dati Yesus begi Gado fosi èn baka dati a gi wan bigi grupu sma nyanyan nanga yepi fu wan wondru (Mat. 14:17-20; 15:34-37). Toku di Didibri ben wani tesi en na ini a sabana, a  weigri fu meki ston tron brede, aladi angri ben kiri en. (Leisi Mateyus 4:2-4.) Yesus ben sabi fa en Papa ben e denki èn dati meki a ben frustan taki a no ben musu meki den ston tron brede. A ben sabi taki Gado no ben wani taki a gebroiki a makti fu en gi en eigi bun. Di Yesus weigri fu du disi, a sori taki a no ben tweifri taki Yehovah ben o yepi en èn taki a ben o sorgu gi en.

9, 10. San o yepi wi fu teki koni bosroiti? Gi wan eksempre.

⁹ Efu wi wani teki koni bosroiti neleki Yesus, dan wi musu frutrow na tapu Yehovah taki a o yepi wi. Wi musu du san skrifi na Odo 3:5-7: „Frutrow na tapu Yehovah nanga yu heri ati. No frutrow na tapu yu eigi frustan. Poti prakseri na en, awinsi sortu pasi yu e waka, dan na en o meki yu pasi kon reti. No denki taki yu koni. Abi lespeki gi Yehovah èn tapu fu du sani di no bun.” Te wi e studeri Bijbel fu kon sabi fa Yehovah e denki, dan wi o man si san a wani taki wi musu du na ini situwâsi pe Bijbel no e taki krin fu a tori. O moro wi e kon sabi fa Yehovah e denki, o moro wi o kon kisi „wan ati di safu” èn dati o yepi wi fu du san a taki.​—Esek. 11:19.

¹⁰ Luku wan eksempre: Kon meki wi taki dati wan uma di trow e go na wenkri fu bai sani. Ne a e si wan susu di a wani bai, ma a diri. San a o du? Kande a e aksi ensrefi: ’San mi masra ben o taki efu mi bai a diri susu disi?’ A kan taki a sabi kaba san en masra ben o taki, aladi a masra no de nanga en. Fa a du kon taki a sabi? Fu di a trow wan pisi ten kaba nanga en masra, meki a sabi fa a e denki fu a moni di den abi. Na so a de tu taki te wi sabi fa wi hemel Tata Yehovah e denki, dan safrisafri wi o kon frustan san a wani taki wi musu du na ini difrenti situwâsi.

11. San wi kan aksi wisrefi te wi e leisi noso e studeri Bijbel? (Luku a faki di nen „ Te yu e studeri Gado Wortu, dan aksi yusrefi”.)

¹¹ Efu wi wani kon sabi fa Yehovah e denki, dan wi musu studeri Bijbel èn dati musu de a moro prenspari sani gi wi. Te yu e leisi noso studeri Gado Wortu, dan aksi yusrefi: ’San disi e leri mi fu Yehovah, fu a fasi fa a e du sani èn fu a fasi fa a e denki?’ Wi musu denki neleki a psalm skrifiman David di ben singi: „Ke Yehovah, sori mi den pasi fu yu. Leri mi fa fu waka den pasi fu yu. Meki mi waka a reti pasi fu yu èn gi mi leri, bika yu na a Gado di e frulusu mi. Heri dei mi howpu na yu tapu” (Ps. 25:4, 5). Te yu e denki dipi fu wan tori na ini Bijbel, dan aksi yusrefi: ’Fa mi kan gebroiki en na ini mi libi? Pe mi kan gebroiki en? Mi kan gebroiki en na oso, na wrokope, na skoro noso na ini a preikiwroko?’ Te wi kon sabi pe wi kan fiti den Bijbel rai di wi leisi, dan a moro makriki fu kon si fa wi kan gebroiki den.

12. Fa den buku fu wi nanga den konmakandra kan yepi wi fu kon sabi fa Yehovah e denki fu difrenti tori?

¹² Wan tra fasi fa wi kan kon sabi fa Yehovah e denki, na te wi e poti prakseri na den rai di en organisâsi e gi wi. Fu eksempre, a Sranantongo Watchtower Library na tapu DVD nanga a buku Ondrosuku Bijbel moro fini​—Gi Yehovah Kotoigi, meki fu yepi wi fu kon sabi fa Yehovah e denki fu difrenti situwâsi pe wi musu teki wi eigi bosroiti. Wi e kisi furu wini tu te wi e arki bun na den konmakandra èn te wi e teki prati na den  konmakandra disi. Te wi e denki dipi fu san wi e leri drape, dan wi o kon si moro krin fa Yehovah e denki. Na so wi srefi o denki leki fa en e denki. Te wi gwenti gebroiki den sani di Yehovah seti gi wi fu leri sabi en, dan safrisafri wi o kon sabi fa a e denki fu wan tori. A bakapisi o de taki wi o man teki moro bun bosroiti èn wi lobi-ati Gado o blesi wi.

13. Gi wan eksempre di e sori taki te wi sabi fa Yehovah e denki fu wan tori, wi o man teki koni bosroiti.

¹³ Luku wan eksempre di o sori wi taki te wi sabi fa Yehovah e denki fu wan tori, wi o man teki koni bosroiti. Kon meki wi taki dati yu wani tron wan gewoon pionier. A kan taki yu seti yu libi na so wan fasi taki yu no abi tumusi furu sani. Ma kande yu e broko yu ede fu di yu no de seiker efu yu o de koloku trutru te yu no abi so furu sani. Èn yu sabi tu taki Bijbel no e taki dati wi musu pionier. Wi kan tan dini Yehovah leki wan preikiman. Ma Yesus e gi wi a dyaranti taki te wi de klariklari fu du ala san wi man gi a Kownukondre, dan wi o kisi furu blesi. (Leisi Lukas 18:29, 30.) Boiti dati, Bijbel e sori taki Yehovah e prisiri ’nanga den ofrandi di wi e tyari gi en fu di wisrefi wani’. A breiti tu te wi e du san wi man fu horibaka gi a tru anbegi (Ps. 119:108; 2 Kor. 9:7). Te wi e denki dipi fu den Bijbeltekst disi èn wi e begi Gado meki a yepi wi, dan wi o si moro krin fa Yehovah e denki. Disi o yepi wi fu teki wan bosroiti di bun gi wi, èn wi hemel Tata o blesi wi.

14. Fa yu kan kon sabi fa Yehovah e denki fu den krosi di yu lobi weri?

¹⁴ Luku wan tra eksempre. Kande son brada nanga sisa na ini a gemeente abi problema nanga den krosi di yu lobi weri. Ma yu sabi taki nowan Bijbeltekst de di e sori taki yu no mag weri den krosi dati. Ma fa Yehovah e si a tori? Na apostel Paulus ben gi Kresten a rai disi: „Umasma musu moi densrefi nanga krosi di fiti. Den musu du dati na wan lespeki fasi èn nanga krin frustan, ma te den e moi densrefi, dan a no musu de nomo taki den e brei den ede-wiwiri na ala sortu modo fasi, noso taki den e weri gowtu, peri noso diri krosi. Ma den musu moi densrefi soleki fa a fiti umasma di e taki dati den e anbegi  Gado. Den musu du bun sani” (1 Tim. 2:9, 10). A no de fu taki dati a rai disi de gi brada tu. Wi leki futuboi fu Yehovah no musu luku nomo san wi feni bun noso san wi lobi, ma wi musu hori na prakseri tu san trawan e denki fu den krosi di wi e weri noso fu a fasi fa wi e meki modo. Te wi abi sakafasi nanga lobi, wi o hori na prakseri san tra brada nanga sisa e denki. Disi o meki taki wi no o du wan sani di kan bruya den noso di kan meki den naki futu (1 Kor. 10:23, 24; Fil. 3:17). Te wi e hori na prakseri san Bijbel e taki fu a tori disi, dan dati kan yepi wi fu kon sabi fa Yehovah e denki fu a tori èn wi o man teki bosroiti di a feni bun.

15, 16. (a) Fa Yehovah e firi te wi e tan denki fu morsu sani di abi fu du nanga seks? (b) Te wi e luku na sortu fasi wi o meki prisiri, dan fa wi kan sabi san Yehovah feni bun? (c) Fa wi musu teki prenspari bosroiti?

¹⁵ Bijbel e sori taki Yehovah e sari te sma e du sani di no bun èn te ’den abi soso ogri prakseri na ini den ati’. (Leisi Genesis 6:5, 6.) Disi e sori taki a no bun fu prakseri fu morsu sani di abi fu du nanga seks. Te wi abi a gwenti fu du dati, dan a kan meki taki wi du wan seryusu sondu di Bijbel e krutu èn di Yehovah no feni bun. A disipel Yakobus ben skrifi: „A koni fu hemel de soifri, a lobi freide, a no e hori nomo na san a e prakseri, a de klariklari fu gi yesi, a de klariklari fu sori sari-ati èn fu du bun. A no lobi a wan sma moro a trawan èn a no e hoigri” (Yak. 3:17). Te wi e hori disi na prakseri, dan wi no o luku noso leisi sani di kan meki wi kisi prakseri di no fiti. Kresten di sabi fa Yehovah e denki, no abi fu aksi sortu buku bun fu leisi noso sortu felem bun fu luku. Den no abi fu aksi tu efu a bun fu prei game di e sori sani di Yehovah no lobi kwetikweti. Na ini Bijbel skrifi krin fa Yehovah e denki fu den sortu sani disi.

¹⁶ Na ini furu situwâsi, wi kan teki awinsi sortu bosroiti wi wani, solanga Yehovah feni dati bun. Ma son leisi te a abi fu du nanga prenspari bosroiti, dan a bun fu go suku rai na den owruman noso fu aksi wan lepi Kresten fu yepi yu (Tit. 2:3-5; Yak. 5:13-15). Ma hori na prakseri taki a no fiti fu aksi den fu teki bosroiti gi wi. Kresten musu leri fa fu gebroiki den frustan so taki den man si sani krin (Hebr. 5:14). Na apostel Paulus ben taki: „Ibri sma sa tyari en eigi lai.”​—Gal. 6:5.

17. Sortu wini wi e kisi te wi e teki bosroiti di Yehovah feni bun?

¹⁷ Efu wi e hori na prakseri fa Yehovah e denki fu den bosroiti di wi e teki, wi o kon moro krosibei na en (Yak. 4:8). Wi hemel Tata o feni wi bun, a o blesi wi èn a bribi fu wi o kon moro tranga. Sobun, meki Bijbel wet nanga gronprakseri yepi wi fu kon sabi fa Gado e denki fu wan tori. A tru taki ala ten wan nyun sani de fu leri fu Yehovah (Yob 26:14). Ma nownow kaba wi kan meki muiti fu kon abi koni nanga sabi èn fu leri fa fu si sani krin. Na so wi o man teki koni bosroiti (Odo 2:1-5). Wi leki sondu libisma e kenki wi denki ibri leisi baka, ma Yehovah no e kenki. Dati meki a psalm skrifiman ben taki: „San Yehovah taki, na dati a e du ala ten. Ala ten a e du san a abi na prakseri” (Ps. 33:11). Sobun, te a denki fu wi nanga den sani di wi e du e kruderi nanga a fasi fa wi koni Gado Yehovah e si sani, dan wi o man teki den moro bun bosroiti.