DEN ARTIKEL NA FESI sori fa difrenti sani kan meki en muilek gi wi fu horidoro. Te yu e feti nanga yu eigi problema, dan kande yu e aksi yusrefi fu san ede yu musu go doro nanga a libi noso efu wan sma de di e broko en ede nanga yu. Yu kan de seiker taki Gado e broko en ede nanga yu. A lobi yu.

A skrifiman fu Psalm 86 ben sori taki a ben e frutrow tapu Gado. A ben taki: „Te mi de na nowtu, dan na yu mi o kari, bika mi sabi taki yu o piki mi” (Psalm 86:7). Ma kande yu e aksi yusrefi: ’Fa Gado o piki mi „te mi de na nowtu”?’

Awansi Gado no e lusu yu problema wantewante, toku en Wortu, Bijbel e sori taki a kan trowstu yu. Bijbel e taki: „No broko un ede nanga nowan sani, ma begi Gado ala ten, begi en fayafaya èn taki en tangi tu. Na so a o kon sabi san unu wani aksi en, dan a freide fu Gado di bigi moro iniwan sani di libisma man frustan, o kibri un ati nanga un frustan” (Filipisma 4:6, 7). Grantangi prakseri fa den Bijbeltekst di e kon now e yepi wi fu bribi taki Gado e broko en ede trutru nanga wi.

„Gado no e frigiti nowan fu den [pikin fowru]. . . . Unu warti moro leki furu pikin fowru.” ​—Lukas 12:6, 7.

PRAKSERI A SANI DISI: Kande pikin fowru no prenspari gi furu sma, ma toku Gado e broko en ede nanga den. Gado e si ibri pikin fowru. Ibriwan fu den warti gi en. Gi Gado, libisma prenspari omeni tron moro pikin fowru. Libisma na den moro warti libisani di Gado meki na grontapu. A meki den „leki fa ensrefi de” èn den man sori den tumusi moi fasi fu en.​—Genesis 1:26, 27.

„Yehovah, yu ondrosuku mi èn yu sabi mi dorodoro. . . . Yu sabi fa mi e prakseri. . . . Luku mi finifini èn kon sabi den sani di e moro mi.”​—Psalm 139:1, 2, 23.

PRAKSERI A SANI DISI: Gado sabi yu heri bun. A sabi fa yu e firi dipi na ini yu ati èn sortu problema yu abi. Gado e broko en ede nanga yu èn a wani yepi yu, awansi trawan no e frustan san na a situwâsi fu yu. Disi e yepi wi fu no gi abra.

„Yehovah, tangitangi, arki a begi fu mi. Arki mi te mi e bari suku yepi na yu. . . . Poti yesi arki mi. Piki mi esi-esi na a dei di mi o kari yu. . . . A o arki a begi fu den wan di lasi ala den gudu fu den.”​—Psalm 102:1, 2, 17.

PRAKSERI A SANI DISI: Sensi a bigin di libisma bigin pina, a de neleki Yehovah teri ala den watra-ai di den krei (Psalm 56:8). A teri den di fu yu tu. Fu di Gado lobi wi, meki a e memre ala den tesi di e miti wi nanga ala den watra-ai di wi krei.

„Mi o meki yu kon tranga. Mi o yepi yu trutru. . . . Mi, Yehovah, na yu Gado . . . Mi na a sma di e taigi yu: ’No frede. Misrefi o yepi yu.’” ​—Yesaya 41:10, 13.

PRAKSERI A SANI DISI: Gado de klariklari fu yepi yu. Te yu no man moro a o gi yu krakti baka.

„Gado ben lobi grontapu so te, taki a gi en wan-enkri Manpikin, so taki ala sma di e bribi na ini en no sa dede, ma sa kisi têgo libi.”​—Yohanes 3:16.

PRAKSERI A SANI DISI: Gado lobi yu so te taki a ben de klariklari fu gi en Manpikin Yesus leki ofrandi fu a bun fu yu. Na ofrandi disi e gi yu a howpu fu libi wan koloku libi di o tyari wini kon gi yu fu têgo. *