BIJBEL A NO WAN BUKU DI E TAKI FU SANI DI SABIMAN ONDROSUKU. TOKU A E TAKI FU SANI DI SABIMAN KON SABI BAKATEN. LUKU WAN TU EKSEMPRE.

Den stari nanga den planeiti abi wan bigin?

Fosi, prenspari sabiman ben e bribi tranga taki disi no de so. Ma now furu sabiman e bribi taki na universum abi wan bigin. Bijbel ben taki disi krin bun langa kaba.​—Genesis 1:1.

Sortu vorm grontapu abi?

Na ini owruten, furu sma ben e bribi taki grontapu plata. Sowan fo hondro yari Fosi Krestes, Griki sabiman ben taki dati kande grontapu lontu. Ma langa ten na fesi, sowan seibi hondro yari Fosi Krestes, Yesaya, wan man di skrifi Bijbel ben taki dati ’grontapu lontu’.​—Yesaya 40:22.

A de so taki den stari nanga planeiti kan pori gowe te fu kaba?

Aristoteles ben e leri taki na soso na grontapu sani e pori, ma den stari nanga den planeiti e tan a srefi èn noiti den kan pori. Hondrohondro yari langa sma ben e bribi a sani disi. Ma na ini den yari baka 1800, sabiman kon nanga a leri taki ala sani kan pori, a no abi trobi efu na hemel noso na grontapu den de. Wan fu den sabiman di yepi fu prati a leri disi na, Lord Kelvin. A ben sori san Bijbel e taki fu hemel nanga grontapu: „Den alamala o kon owru neleki wan krosi” (Psalm 102:25, 26). Kelvin ben e bribi taki awinsi den sani disi e pori, toku Gado kan sorgu taki grontapu no e pori gowe. Èn na dati Bijbel e leri tu.​—Preikiman 1:4.

San e hori den planeiti, soleki a grontapu fu wi, na loktu?

A Griki sabiman Aristoteles di ben e libi sowan dri hondro yari Fosi Krestes, ben e leri taki ala den planeiti na hemel de na ini wan bal di meki fu kristal. Ibriwan fu den kristal bal disi de na ini wan tra kristal bal, èn grontapu de na ini a mindriseiwan. Sowan 1700 yari Baka Krestes, sabiman bigin bribi taki den stari nanga planeiti e anga na noti. Ma na ini a buku Yob, di skrifi sowan 1400 yari Fosi Krestes, a ben skrifi kaba taki a Mekiman e „anga grontapu na noti”.​—Yob 26:7.

ALADI BIJBEL A NO WAN DATRA BUKU, TOKU A ABI RAI DI DATRA NO BEN SABI ETE.

Poti sikisma aparti

A Wet di Gado ben gi den Israelsma ben taki dati sma di abi gwasi ben musu tan aparti fu tra sma. Ma a no langa sabiman kon sabi a sani disi. Na sowan 700 yari pasa, fosi den bigin poti sikisma aparti, fu di na a ten dati wan lo takru siki ben e kiri ipi-ipi sma. Èn te nanga now den e si taki disi na wan bun sani fu du.​—Lefitikus kapitel 13 nanga 14.

Wasi yu anu baka te yu fasi wan dedeskin.

Sowan 150 yari pasa, datra ben abi a gwenti ete fu wroko tapu wan dedeskin èn baka dati den ben e du oparâsi tapu sikisma sondro taki den wasi den anu. A sani dati meki taki furu sma dede. Ma a Wet di Gado ben gi den Israelsma ben e taki dati ibri sma di fasi wan dedeskin no ben krin moro ini na anbegi fu en. A ben e taki srefi dati wan sma ben musu wasi ensrefi nanga watra fu kon krin baka. Den gwenti disi di den ben abi na ini na anbegi, ben e sorgu tu taki sma tan gosontu.​—Numeri 19:11, 19.

Libisma pupe.

Ibri yari moro leki afu milyun pikin e dede fu diaree. Moro furu disi e pasa fu di libisma pupe meki den kon siki. A Wet di Gado ben gi den Israelsma ben e sori den taki den ben musu beri a pupe fu den èn den no ben mag pupe pe tra sma e libi.​—Deuteronomium 23:13.

A ten te wan pikin ben musu besnèi.

A Wet fu Gado ben e sori taki wan boi ben musu besnèi na tapu a di fu aiti dei baka te a gebore (Lefitikus 12:3). Te wan pikin gebore, dan a kan lasi furu brudu efu yu koti en. Ma baka wán wiki, a sani dati e bigin kenki. Efu a kisi wan koti, dan a no e lasi tumusi furu brudu moro. Na ini Bijbel ten, kefalek datrayepi no ben de. Dati meki a ben de wan koni sani fu wakti baka wán wiki fosi den besnèi wan pikin.

Den firi fu wi kan abi krakti tapu a gosontu fu wi.

Datra nanga sabiman kon si taki te wan sma de nanga prisiri, te a de koloku, te a abi howpu èn te a de klariklari fu gi trawan pardon, dan dati bun gi a gosontu fu en. Bijbel e taki: „Wan ati di e prisiri, bun leki dresi, ma te wan sma e sari, dan dati e meki en bonyo kon drei.”​—Odo 17:22.