1, 2. Na sortu difrenti fasi sma gro kon bigi èn na sortu difrenti fasi den kon na ini a tru anbegi?

YEHOVAH na a sma di seti na osofamiri-libi (Ef. 3:14, 15). Ma awinsi wi de fu a srefi famiri, toku wi abi difrenti fasi èn wi de na ini difrenti situwâsi. Kande yu libi nanga yu papa nanga mama teleki yu kon bigi. Ma son sma no abi papa nanga mama moro. Kande den papa nanga mama ben siki, den kisi mankeri noso wan tra ogri miti den. Trawan no sabi srefi suma na den mama nanga papa.

² Wi leki anbegiman fu Yehovah de leki wan famiri tu èn wi kon na ini a tru anbegi na difrenti fasi. Kande yu kweki na ini a tru anbegi èn yu papa nanga mama leri yu fu libi soleki fa Bijbel e taki (Deut. 6:6, 7). Noso kande yu na wan fu den dusundusun sma di kon sabi a tru anbegi fu di wan futuboi fu Yehovah preiki gi yu.—Rom. 10:13-15; 1 Tim. 2:3, 4.

3. San wi alamala abi?

³ Aladi wi de na ini difrenti situwâsi, toku wi alamala abi wan tu sani di de a srefi. Fu di Adam trangayesi Gado, meki wi alamala abi sondu èn wi e dede (Rom. 5:12). Ma toku ala tru anbegiman kan kari Yehovah „wi Tata”. Soleki fa skrifi na Yesaya 64:8, a pipel fu Gado ben e taki: „Yehovah, yu na wi  Tata.” Di Yesus ben leri den disipel fa fu begi, a ben taki tu: „Wi Tata na hemel, meki yu nen de santa.”—Mat. 6:9.

4, 5. Sortu sani o meki wi kon abi moro lobi gi wi hemel Tata Yehovah?

⁴ Wi hemel Tata e sorgu gi den anbegiman fu en èn a e kibri den. Soleki fa a psalm skrifiman e sori, dan Yehovah taki fu en tru anbegiman: „Fu di a lobi mi, meki mi o frulusu en tu. Mi o kibri en, fu di a kon sabi mi nen” (Ps. 91:14). Iya, fu di Yehovah lobi wi, meki a e frulusu en pipel fu den feanti fu den èn a e kibri den so taki nowan sma kan figi den puru krinkrin.

⁵ Meki wi poti prakseri na dri prenspari sani di o meki wi kon abi moro lobi gi wi hemel Tata Yehovah: (1) Wi Tata Yehovah e sorgu gi wi. (2) A e kibri wi. (3) A de wi moro bun Mati. Te wi e luku den sani disi, a bun fu denki dipi fu a matifasi di wi abi nanga Gado èn fu luku fa wi kan gi glori na en leki wi Tata. A o bun tu fu prakseri den blesi di Yehovah pramisi fu gi den sma di e kon krosibei na en.—Yak. 4:8.

6. San na wan fasi fa Yehovah e sori taki en na a sma di e gi wi „ibri bun presenti”?

⁶ A disipel Yakobus ben skrifi: „Ibri bun presenti nanga ibri kado di bun dorodoro e kon fu tapusei, bika a e saka kon fu a Tata fu den leti na hemel. A Tata e tan wán fasi nomo. A no e kenki soleki fa skaduw e kenki” (Yak. 1:17). Libi na wan moi kado di Yehovah gi wi (Ps. 36:9). Efu wi e gebroiki wi libi fu du a wani fu Gado, wi e kisi furu blesi now èn wi o kisi têgo libi na ini a nyun grontapu (Odo 10:22; 2 Petr. 3:13). Ma efu wi alamala abi sondu èn wi e dede, dan fa wi kan libi fu têgo?

7. Fa Gado seti sani fu meki wi kon bun baka nanga en?

⁷ Wi no man teri den bun sani di Yehovah e gi wi. Na bun-ati fu en meki a wani frulusu wi. Iya, wi alamala kisi sondu fu Adam (Rom. 3:23). Ma fu di Yehovah lobi wi, meki a seti sani fu meki wi kon bun baka nanga en. Na apostel Yohanes skrifi: „Disi na a fasi fa Gado sori taki a lobi wi: Gado ben seni en wan-enkri Manpikin kon na grontapu, so taki a kan yepi wi fu kisi libi. A lobi disi no wani taki dati na wi ben lobi Gado, ma taki en ben lobi wi èn a seni en Manpikin kon leki wan ofrandi di e tapu den sondu fu wi èn di e meki wi kon bun baka nanga Gado.”—1 Yoh. 4:9, 10.

8, 9. Fa Yehovah gi Abraham nanga Isak san den ben abi fanowdu? (Luku a prenki na a bigin fu na artikel.)

⁸ Sowan 1900 yari bifo Yesus kon na grontapu, wan sani pasa na ini a libi fu Abraham di sori fa Yehovah ben o gi têgo libi na ala sma di e gi yesi na en. Hebrewsma 11:17-19 e taki: „Na fu di Abraham ben abi bribi, meki yu kan taki dati a gi Isak leki ofrandi di Gado tesi en. A man disi di ben prisiri nanga san Gado ben pramisi en, ben pruberi fu gi en wan-enkri manpikin leki ofrandi, aladi Gado ben taigi en: ’„Den bakapikin” di mi pramisi yu, o komoto fu Isak.’ Ma a ben prakseri na ensrefi taki efu Isak ben o dede, dan Gado ben o man gi en wan opobaka. Na wan agersi fasi, Abraham kisi en manpikin baka fu dede.” Neleki fa Abraham ben de klariklari fu gi en manpikin Isak leki wan ofrandi, na so Yehovah ben de klariklari fu gi en Manpikin Yesus Krestes leki wan ofrandi fu frulusu libisma.—Leisi Yohanes 3:16, 36.

⁹ Yu kan frustan taki Isak ben breiti di a si taki a no ben abi fu dede. A no de fu  taki dati a ben de nanga tangi taki Gado sorgu gi wan tra ofrandi, wan manskapu di ben fasi na ini wan busibusi (Gen. 22:10-13). Dati meki Abraham kari a presi dati „Yehovah-Yire”. Na ini Hebrewtongo disi wani taki „Yehovah o gi wi san wi abi fanowdu”.—Gen. 22:14.

10, 11. Suma e teki fesi na ini ’a wroko fu fruteri sma fa den kan kon bun baka nanga Gado’ èn fa den e du a wroko disi?

¹⁰ Te wi e denki dipi fu ala den sani di Yehovah gi wi, dan wi e frustan taki sondro na ofrandi fu Yesus wi no ben o man tron mati fu Gado. Paulus ben skrifi: „Wi kon frustan taki wán sma dede gi ala sma, fu di ala sma ben dede. Sobun, a dede gi ala sma. Dati meki den sma di e libi, no musu libi gi densrefi moro, ma gi a sma di dede gi den èn di kisi wan opobaka.”—2 Kor. 5:14, 15.

¹¹ Den fosi Kresten ben lobi Gado èn den ben de nanga tangi taki den ben abi a bigi grani fu dini en. Dati meki den ben e ’wroko fayafaya fu fruteri sma fa den kan kon bun baka nanga en’. Fu di den ben e du a preikiwroko, meki reti-ati sma ben kan kon bun nanga Gado. Na so den ben tron mati fu Gado, èn te fu kaba den tron manpikin fu en na hemel. Na ini a ten disi salfu futuboi fu Yehovah e du a srefi wroko. Den e teki presi gi Gado nanga Krestes. Fu di den e preiki, meki reti-ati sma kan kon sabi Yehovah èn tron anbegiman fu en.—Leisi 2 Korentesma 5:18-20; Yoh. 6:44; Tori 13:48.

12, 13. Fa wi kan sori warderi gi den furu sani di Yehovah du gi wi?

¹² Ala Kresten di abi a howpu fu libi na grontapu de nanga tangi taki Yehovah e gi den san den abi fanowdu. Dati meki den e yepi den salfuwan fu preiki a bun nyunsu fu a Kownukondre. Te wi e du a preikiwroko, wi e gebroiki Bijbel di de wan tra moi kado di Gado gi wi (2 Tim. 3:16, 17). Te wi e gebroiki Gado Wortu na wan bun fasi na ini a preikiwroko, dan wi e gi trawan na okasi fu kisi têgo libi. Ma Yehovah gi wi wan tra sani tu di wi abi fanowdu fu man du a preikiwroko. A sani dati na a santa yeye (Sak. 4:6; Luk. 11:13). Na ini den yaribuku fu wi, wi kan leisi fu den moi bakapisi fu a wroko di wi e du. A de wan bigi grani fu du a wroko disi. Na so wi Tata di e gi wi san wi abi fanowdu, e kisi biginen!

¹³ Te yu e prakseri ala den sani di Gado gi wi, dan a bun fu aksi yusrefi: ’Mi e du ala san mi man na ini a preikiwroko fu sori Yehovah taki mi e warderi ala san a gi mi? Fa mi kan tron wan moro bun preikiman?’ Efu wi e warderi ala sani di Gado gi wi, dan wi o poti Kownukondre afersi na a fosi presi na ini wi libi. Te wi e du dati, dan Yehovah o gi wi ala san wi abi fanowdu (Mat. 6:25-33). Fu di Yehovah lobi wi, meki wi wani du ala san wi man fu plisi en èn fu meki en ati prisiri.—Odo 27:11.

14. Fa Yehovah frulusu en pipel?

¹⁴ A psalm skrifiman David ben singi: „Mi na wan mofina sma èn mi pôti. Yehovah srefi e poti prakseri na mi. Na yu e yepi mi èn yu na mi Frulusuman” (Ps. 40:17). Furu leisi Yehovah frulusu en pipel, spesrutu te den feanti fu den ben e frufolgu den hebi. Wi de nanga tangi taki ala ten Yehovah e gi wi san wi abi fanowdu fu man horidoro na ini den muilek ten dati.

15. Gi wan eksempre fu wan lobi-ati papa di kibri en pikin.

¹⁵ Wan papa di lobi en pikin no e sorgu  den nomo, ma a e kibri den tu. Efu ogri ben o miti den, a no ben o draidrai fu yepi den. Wan brada e memre fa en papa ben kibri en di a ben de wan pikin boi. Wan leisi baka preikiwroko, en nanga en papa ben musu abra wan kriki di den ben drai go na oso. Wan bigi alen ben fadon a mamanten dati èn a kriki ben span srefisrefi. A wan-enkri fasi fa den ben kan abra a kriki, na fu dyompo na tapu den bigi ston teleki den doro na abrasei. A brada go fosi èn en papa ben de na en baka. Ma na wan fu den ston a grati fadon go na ini a dipi kriki èn tu leisi a sungu go na ondro. A brada ben breiti taki esi-esi en papa grabu en hori na en skowru, puru en na ini a watra! Na so wi hemel Tata e yepi wi fu no sungu na ini na ogri grontapu fu Satan di de leki wan liba di abi bigi sula. Iya, Yehovah na a moro bun Frulusuman di wi kan abi.—Mat. 6:13; 1 Yoh. 5:19.

16, 17. Fa Yehovah yepi èn kibri den Israelsma di den Amalèksma kon feti nanga den?

¹⁶ Na wan lobi-ati fasi Yehovah kibri en pipel na ini a yari 1513 Fosi Krestes. Baka di a frulusu den Israelsma fu katibo na Egepte, a kibri den di den abra a Redi Se. Di den waka na ini a sabana go na Sinai-bergi, den doro na Rafidim.

¹⁷ Te wi e prakseri a profeititori fu Genesis 3:15 wi kan frustan taki Satan ben wani du ogri nanga den Israelsma nomonomo. Na a ten dati a ben gersi leki nowan sma ben de fu yepi den Israelsma. Fu dati ede a meki den Amalèksma di ben de feanti fu den Israelsma go feti nanga den (Num. 24:20). Ma Yehovah gebroiki Yosua, Moses, Aron nanga Hur fu kibri en pipel. Na a srefi ten di Yosua ben e feti nanga den Amalèksma, Moses, Aron nanga Hur ben e tanapu na tapu  wan bergi di ben de krosibei. Te Moses ben e opo en anu, den Israelsma ben e wini a feti. Di Moses anu ben kon weri, Aron nanga Hur ben e yepi en fu hori en anu na loktu. „Yosua feti èn a wini den Amalèksma nanga den mati fu den” (Eks. 17:8-13). Na so Yehovah yepi èn kibri en pipel. Baka dati Moses ben bow wan altari drape èn a kari en „Yehovah-Nisi”. Na ini Hebrewtongo disi wani taki „Yehovah na mi Frulusuman”.—Leisi Eksodes 17:14, 15.

18, 19. Fa Gado kibri den futuboi fu en na ini a ten disi?

¹⁸ Yehovah e kibri den sma di lobi en èn di e gi yesi na en. Te feanti wani du wi ogri, wi e suku yepi na Gado neleki den Israelsma di ben de na Rafidim. Nofo tron Yehovah e kibri wi leki grupu èn a e sorgu taki Satan no man du wi ogri. Prakseri omeni leisi Gado kibri wi Kresten brada nanga sisa di kisi frufolgu fu di den no ben wani teki prati na feti. Na disi pasa di den Nazi-srudati ben e tiri Doisrikondre nanga tra kondre. Te wi e leisi èn prakseri fu den ondrofenitori na ini den yaribuku fu wi, dan wi e si fa Gado kibri en pipel te den ben e kisi frufolgu. Disi o meki wi kisi moro frutrow na ini Yehovah, wi Frulusuman.—Ps. 91:2.

¹⁹ Nanga yepi fu en organisâsi èn den buku di wi e kisi, Yehovah e warskow wi doronomo gi sani di kan tyari takru bakapisi kon gi wi. Prakseri fa den rai fu en kibri wi gi ogri na ini den yari di pasa. Dei fu dei a grontapu disi e poti moro prakseri na seks, sopi nanga porno. Ma doronomo Yehovah warskow wi gi den sani disi èn a sori wi fa wi musu wai pasi gi sani di kan pori a matifasi di wi abi nanga en. Fu eksempre, wi hemel Tata warskow wi fu luku bun nanga takru mati tapu Internet. *—1 Kor. 15:33.

20. Fa wi e kisi kibri nanga rai na ini a Kresten gemeente?

²⁰ Fa wi kan sori taki wi na sma di „kisi leri fu Yehovah”? Wi kan sori disi te wi e gi yesi na den wèt fu en ala ten (Yes. 54:13). Wi e kisi kibri nanga rai na ini den gemeente fu wi. Drape den owruman e yepi wi èn den e gi wi rai fu Bijbel (Gal. 6:1). Yehovah e gebroiki den ’mansma disi di abi spesrutu koni’ fu yepi wi na wan lobi-ati fasi (Ef. 4:7, 8). San wi musu du te den owruman e gi wi rai? Wi musu de klariklari fu gi yesi na den. Te wi e du dati, dan Yehovah o blesi wi.—Hebr. 13:17.

21. (a) San wi musu du ala ten? (b) San wi o luku na ini a tra artikel?

²¹ Sobun, ala ten wi musu meki wi hemel Tata tiri wi nanga yepi fu en santa yeye. Wi musu denki dipi tu fu a libi fu en Manpikin Yesus Krestes èn wi musu meki muiti fu teki a bun eksempre fu en. Fu di Yesus gi yesi te na dede, meki Yehovah gi en wan bigi blesi (Fil. 2:5-11). Te wi e frutrow na tapu Yehovah nanga wi heri ati, dan wi o kisi blesi tu (Odo 3:5, 6). Meki wi frutrow na tapu Yehovah ala ten, fu di en na a moro bun sma di e gi wi san wi abi fanowdu èn di e kibri wi. A de wan bigi grani fu dini en èn a e gi wi furu prisiri! Ma fa Yehovah de a moro bun Mati fu wi? Wi sa piki na aksi disi na ini a tra artikel. Disi o yepi wi fu lobi en moro nanga moro.