1, 2. (a) Sortu rai Yehovah meki Salomo gi den yonguwan? (b) Fu san ede a rai fu Salomo bun tu gi Kresten di pasa 50 yari kaba noso di moro owru?

NANGA yepi fu santa yeye Kownu Salomo taigi yongusma: „Memre yu Gran Mekiman na ini yu yongu yari, fosi den dei kon di lai nanga sari.” San na ’den dei di lai nanga sari’? Den wortu disi abi fu du nanga na owrudei fu wan sma. Fu sori sortu problema owrusma abi, Salomo gebroiki wortu di yu ben o poti na ini wan puwema. A e taki fu anu di e beifi, futu di e degedege, mofo di no abi tifi moro, ai di kon dungru, yesi di kon dofu, wiwiri di kon weti, nanga wan skin di fasi èn di kron. Sobun, a no musu fruwondru wi taki Salomo gi wi a rai fu memre wi Gran Mekiman te wi yongu ete.—Leisi Preikiman 12:1-5.

² Yu abi furu Kresten di pasa 50 yari kaba noso di moro owru èn di tranga ete. A kan taki den ede-wiwiri weti pikinso, ma kande den no abi den gosontu problema di Salomo e taki fu den. Sortu wini den owru Kresten disi kan kisi fu a rai di Salomo gi den yonguwan, di a taki: „Memre yu Gran Mekiman”? San a rai disi wani taki?

3. San a wani taki fu memre wi Gran Mekiman?

 ³ A kan taki wi e dini Yehovah furu yari kaba, ma toku a bun fu sidon denki wanwan leisi o bigi wi Mekiman de. Libi na wan kefalek moi kado. A fasi fa Yehovah meki sani, kefalek so te taki wi no man frustan ala sani fu en. A gi wi someni difrenti sani taki wi kan prisiri fu a libi na ala sortu fasi. Te wi e sidon prakseri den sani di Yehovah meki, dan dati e yepi wi fu no frigiti taki a lobi wi, taki a koni èn taki a abi furu makti (Ps. 143:5). Ma fu memre wi Gran Mekiman wani taki tu dati wi e sidon denki san na den sani di wi musu du gi en. Te wi e denki den sani disi, wi o de nanga tangi. Disi o meki taki wi wani du a diniwroko fu en fayafaya solanga wi de na libi.—Preik. 12:13.

4. San wan Kresten di abi furu ondrofeni kan aksi ensrefi èn fu san ede?

⁴ Kande yu no de so yongu moro èn yu abi furu ondrofeni na ini a libi. Sobun, aksi yusrefi: ’San mi wani du nanga mi libi now di mi abi krakti ete?’ Fu di yu na wan Kresten di abi furu ondrofeni, meki yu abi na okasi fu du sani di tra sma no man du. Yu kan leri yonguwan san yu leri fu Yehovah. Yu kan gi trawan deki-ati te yu e fruteri den san yu ondrofeni na ini a diniwroko fu Gado. Kownu David ben wani du dati tu. Dati meki a begi Gado: „Mi Gado, yu gi mi leri sensi di mi yongu . . . Awinsi mi kon owru èn awinsi ala mi ede-wiwiri kon weti, no gowe libi mi. Gi mi na okasi fosi fu fruteri den sma di musu kon ete fu a makti fu yu, iya, gi mi na okasi fosi fu fruteri ala den sma di musu kon ete, fu a bigi makti fu yu.”—Ps. 71:17, 18.

5. Fa Kresten brada nanga sisa di no de so yongu moro kan leri trawan san densrefi leri?

⁵ Baka ala den yari yu kon abi furu koni, ma fa yu kan gebroiki dati fu yepi trawan? Yu denki taki yu kan kari wan tu yongu Kresten kon na yu oso fu abi prisiriten di kan gi den deki-ati? Noso yu kan aksi den fu go nanga yu na ini a preikiwroko, so taki yu kan sori den o furu prisiri a e gi yu fu dini Yehovah. Na ini owruten, Elihu ben taki: „Meki den wan di owru moro mi taki. Na den wan di libi moro langa leki mi, musu gi koni rai” (Yob 32:7). Na apostel Paulus taigi lepi Kresten uma fu gi trawan deki-ati nanga den sani di den e taki èn nanga na eksempre fu den. A skrifi: „Den uma di owru kaba . . . musu de sma di e leri trawan bun sani.”—Tit. 2:3.

6. Fu san ede wi abi brada nanga sisa fanowdu di abi furu ondrofeni?

⁶ Efu yu na wan lepi Kresten, dan yu kan du furu fu yepi trawan. Denki fu den sani di yu sabi now, ma di yu no ben sabi sowan 30 noso 40 yari pasa. Yu sabi fa fu fiti den Bijbel rai na ini difrenti situwâsi fu a libi. Kande yu sabi fa fu doro sma ati nanga den tru tori fu Bijbel. Efu yu na wan owruman, dan yu sabi fa fu yepi brada di du wan seryusu sondu (Gal. 6:1). Kande yu sabi fa fu orga wroko di musu du na ini a gemeente èn na den bigi konmakandra noso kande yu sabi orga a wroko fu bow Kownukondre zaal. Noso a kan taki yu sabi fa fu taki nanga datra fu du wan oparâsi sondro fu gebroiki brudu. Srefi te yu no sabi a tru anbegi so langa ete, toku yu abi furu ondrofeni na ini a libi. Fu eksempre, efu yu kweki pikin, dan yu leri furu sani di abi fu du nanga a tori disi. Kresten di no de so yongu moro kan de wan moi deki-ati gi a pipel fu Yehovah fu di den sabi fa fu gi leri, fa fu gi rai èn fa fu tranga den Kresten brada nanga sisa fu den.—Leisi Yob 12:12.

7. Fa Kresten di no de so yongu moro kan gi leri na yonguwan?

⁷ Na sortu tra fasi yu kan gebroiki yu  koni fu yepi trawan? Kande yu kan sori yonguwan fa fu bigin wan Bijbelstudie noso fa fu hori wan. Efu yu na wan sisa, dan yu kan sori yongu mama fa den kan tan du den diniwroko, aladi den e sorgu den yongu pikin fu den. Efu yu na wan brada, dan yu kan leri yongu brada fa fu hori wan lezing nanga faya èn fa fu preiki a bun nyunsu moro bun. Yu kan sori den fa den kan gi owru brada nanga sisa deki-ati fu Bijbel te den e go luku den. Efu yu no tranga so leki fosi, dan yu abi moi okasi fu yepi yonguwan. Gado Wortu e taki: „Na a krakti fu yongu sma e meki taki den e kisi glori èn na a weti wiwiri fu owru sma e gi den grani.”—Odo 20:29.

8. San na apostel Paulus du di a kon moro owru?

⁸ Aladi na apostel Paulus ben kon moro owru, toku a tan du furu na ini a diniwroko fu Yehovah. Na a ten di a komoto na strafu-oso na Rome na ini a yari 61, a ben du furu kaba èn a ben kisi furu tesi leki zendeling. A ben kan teki safrisafri èn tan na ini Rome fu du a preikiwroko (2 Kor. 11:23-27). Wi kan de seiker taki den brada na ini a foto disi ben o breiti nanga a yepi fu Paulus. Ma a ben si taki moro yepi ben de fanowdu na ini den tra kondre. Dati meki a go doro nanga a zendeling wroko fu en èn a meki Timoteyus nanga Titus kon nanga en. A go na Efeise, baka dati a go na Kreita èn kande a go na Masedonia te fu kaba (1 Tim. 1:3; Tit. 1:5). Wi no sabi efu a go na Spanyorokondre, ma a ben wani go drape.—Rom. 15:24, 28.

9. O ten Petrus froisi go libi na wan kondre pe moro yepi ben de fanowdu? (Luku a prenki na a bigin fu na artikel.)

⁹ Kande na apostel Petrus ben pasa 50 yari kaba di a froisi go na wan presi pe moro yepi ben de fanowdu. Fu san ede wi kan taki dati? Efu a ben abi a srefi yari leki Yesus noso efu a ben owru pikinso moro en, dan a kan taki a ben abi sowan 50 yari di a miti den tra apostel na ini Yerusalem na ini a yari 49 (Tori 15:7). Wan pisi ten baka dati, Petrus go libi na Babilon èn a no de fu taki dati a preiki gi furu Dyu di ben e libi na ini a kontren dati (Gal. 2:9). Na drape a tan di a skrifi a fosi brifi fu en nanga yepi fu santa yeye, na a ten fu a yari 62 (1 Petr. 5:13). A no makriki fu froisi go libi na wan tra kondre. Ma aladi Petrus ben owru kaba, a no meki dati tapu en fu dini Yehovah nanga en heri ati.

10, 11. Fruteri wan ondrofenitori fu wan sma di no ben de so yongu moro di a froisi go dini na wan presi pe moro yepi de fanowdu.

¹⁰ Na ini a ten disi furu Kresten di pasa 50 yari kaba noso di moro owru, feni taki a situwâsi fu den kon kenki èn taki den man dini Yehovah na wan tra fasi. Sonwan fu den froisi go na presi pe moro yepi de fanowdu. Fu eksempre, Robert e skrifi: „Mi nanga mi wefi ben abi sowan 55 yari di wi kon si sortu nyun okasi wi ben abi fu du moro. A boi fu wi no ben libi na oso moro èn wi papa nanga mama no ben de na libi moro. Boiti dati, di den dede, den libi wan pikin moni gi wi na baka. Mi kon si tu taki efu wi ben o seri na oso fu wi, wi ben o man pai a paiman fu na oso èn wi ben o man sorgu wisrefi teleki mi kisi mi pensyun moni. Wi ben yere taki na ini Bolifia furu sma ben wani studeri Bijbel èn taki a libi drape no diri so. Sobun, wi bosroiti fu froisi go drape. A no ben makriki fu teki gwenti. Ala sani ben de tra fasi leki san wi ben gwenti di wi ben libi na Noord-Amerika. Ma wi kisi furu blesi fu a muiti di wi du.”

¹¹ Robert e taki moro fara: „Ala san wi e du now abi fu du nanga den wroko di de fu du na ini a gemeente. Wan tu fu den Bijbelstudenti fu wi teki dopu. Wi ben studeri tu nanga wan osofamiri di pôti èn di e libi na ini wan dorpu di de fara. Ma ibri wiki na osofamiri dati e meki furu muiti fu kon na  den konmakandra na ini a foto. Yu kan frustan taki wi ben breiti di wi si fa na osofamiri disi go na fesi èn taki a bigi boi fu den bigin pionier srefi.”

12, 13. Fruteri wan ondrofenitori fu wan Kresten di bigin dini Yehovah na wan tra fasi, baka di a go nanga pensyun.

¹² Den gemeente nanga grupu pe sma e taki wan tra tongo kan kisi furu wini fu na ondrofeni fu den brada nanga sisa di no de so yongu moro. Nofo tron a switi fu wroko tu nanga den sortu gemeente noso grupu dati. Fu eksempre, Brian e skrifi: „Di mi doro 65 yari mi ben abi fu go nanga pensyun soleki fa a gwenti de na ini Ingrisikondre. Ma mi nanga mi wefi ben feni taki a libi fu wi ben kon soi. Den pikin fu wi no ben libi na oso moro èn wanwan leisi nomo wi ben miti sma di ben wani studeri Bijbel. Ne mi miti wan yongu Sneisi man di ben e ondrosuku sani na wan universiteit dyaso. Di a kisi wan kari fu kon na den konmakandra fu wi, a kon èn mi bigin studeri Bijbel nanga en. Baka wan tu wiki a bigin kon nanga wan tra Sneisi man tu di ben wroko makandra nanga en. Tu wiki baka dati, a tyari wan tra man kon èn baka dati ete wan man. Ala nanga ala den ben de nanga den fo.

¹³ Ne wan di fu feifi Sneisi man aksi wan Bijbelstudie. Sobun, mi taki na misrefi: ’A no fu di mi abi 65 yari, meki mi musu teki pensyun fu a wroko fu Yehovah.’ Dati meki mi aksi mi wefi, di yongu tu yari moro mi, efu a ben wani leri Sneisitongo. Wi leri taki a tongo disi fu di wi arki lès di ben de na tapu cassette-lolo. Dati ben de tin yari pasa. Wi e firi yongu baka te wi e preiki gi sma di e taki wan tra tongo. Te nanga now wi studeri Bijbel nanga 112 Sneisi kaba! Furu fu den kon na den konmakandra. Wan fu den e dini now leki pionier na ini wi gemeente.”

14. San Kresten di no de so yongu moro no musu frigiti èn fa na eksempre fu Paulus kan gi den deki-ati?

¹⁴ Aladi furu Kresten di pasa 50 yari  kaba abi moi okasi fu du tra sani na ini a diniwroko fu Yehovah, toku a no alamala man du dati. Sonwan fu den no abi wan bun gosontu èn trawan musu sorgu gi den owru papa nanga mama noso gi pikin di de na oso ete. Ma no frigiti taki Yehovah e warderi ala sani di yu e du na ini a diniwroko fu en. Sobun, na presi fu sari fu di yu no man du son sani, yu kan prisiri nanga den sani yu man du. Luku na eksempre fu na apostel Paulus. Someni yari langa a ben de na strafu na ini en eigi oso èn a no ben man teki waka leki zendeling. Ma te sma ben e kon na en, a ben e taki nanga den fu Bijbel èn a ben e meki muiti fu tranga a bribi fu den.—Tori 28:16, 30, 31.

15. Fu san ede wi e warderi den owru Kresten?

¹⁵ Yehovah e warderi en tu te owru brada nanga sisa e pruberi fu du san den man na ini a diniwroko fu en. Aladi Salomo ben sori taki te wan sma e kon owru èn en gosontu e go na baka, toku Yehovah e warderi a muiti di owru brada nanga sisa e du fu prèise en (Luk. 21:2-4). Den gemeente e warderi a moi eksempre fu den brada nanga sisa disi di e dini Yehovah furu yari kaba.

16. Sortu grani na owru Ana no ben abi kande, ma san a ben man du fu anbegi Gado?

¹⁶ Bijbel e fruteri wi fu wan owru uma di nen Ana èn di ben tan dini Yehovah na en owrudei. Di Yesus gebore, Ana ben abi 84 yari èn en masra ben dede kaba. Kande a no ben libi langa nofo fu tron wan bakaman fu Yesus, fu salfu nanga santa yeye noso fu preiki a bun nyunsu fu a Kownukondre. Ma toku Ana ben e du san a man èn dati ben e gi en prisiri. „Ala ten a ben de na ini a tempel. Dei nanga neti a ben e go drape fu anbegi Gado” (Luk. 2:36, 37). Te a priester ben e bron switismeri na ini a tempel ibri mamanten nanga ibri neti, dan Ana ben e kon makandra nanga a pipel na ini a fesidyari. Drape a ben e begi na ini en ati kande sowan afu yuru langa. Di Ana si Yesus, di ben de wan beibi ete, a bigin fruteri ala sma taki na a pikin disi ben o tron a Mesias di ben o frulusu Yerusalem.—Luk. 2:38.

17. Fa wi kan yepi Kresten di owru noso di siki so taki den man horibaka gi a tru anbegi?

¹⁷ Na ini a ten disi wi musu luku fa wi kan yepi Kresten di owru noso di siki. Sonwan fu den ben sa wani de na den gemeente konmakandra noso na den bigi konmakandra, ma wanwan leisi nomo den man du dati. Na son presi, den gemeente seti wan sani gi den sortu owru brada nanga sisa disi, so taki den kan arki den konmakandra nanga yepi fu telefon. Na tra presi den no man du disi. Ma toku den Kresten di no man go na den konmakandra kan horibaka gi a tru anbegi. Fu eksempre, den begi fu den kan meki taki sani waka bun na ini a gemeente.—Leisi Psalm 92:13, 14.

18, 19. (a) Fu san ede a kan taki owru Kresten no sabi taki den e gi trawan furu deki-ati? (b) Na ini Bijbel skrifi: „Memre yu Gran Mekiman”. Suma musu teki a rai disi?

¹⁸ A kan taki owru Kresten no sabi taki den kan gi trawan furu deki-ati. Fu eksempre, aladi Ana tan go na a tempel someni yari langa, toku a kan taki a no ben sabi taki na eksempre fu en ben o gi trawan deki-ati hondrohondro yari baka dati. Bijbel e taki fu a lobi di Ana ben abi gi Yehovah. Wi de seiker taki brada nanga sisa noiti o frigiti a lobi di yu abi gi Gado. Dati meki wi no musu fruwondru taki Gado Wortu e taki: „Weti wiwiri na wan kroon di e moi na ede fu den wan di e waka a reti pasi.”—Odo 16:31.

¹⁹ Nowan fu wi man du ala san wi wani na ini a diniwroko fu Yehovah. Ma meki den wan fu wi di tranga ete teki a rai disi fu Bijbel: „Memre yu Gran Mekiman . . . fosi den dei kon di lai nanga sari.”—Preik. 12:1.