1. San kan meki taki wi no de nanga pasensi moro?

DI A Mesias Kownukondre seti na ini 1914, den lasti dei fu Satan en grontapu bigin. A yari dati wan feti broko na ini hemel èn Yesus trowe Didibri nanga den ogri yeye kon na ini a birti fu grontapu. (Leisi Openbaring 12:7-9.) Satan sabi taki „en ten syatu” (Openb. 12:12). Ma kande a gersi gi son sma leki a syatu ten disi e go nanga langa. Wi lasi pasensi aladi wi e wakti Yehovah fu tyari wan kaba kon na a grontapu fu Satan?

2. San wi o luku na ini na artikel disi?

² Te wi e lasi pasensi, dan dati kan abi takru bakapisi. A kan meki taki wi e du sani sondro fu denki fosi. Fa wi kan tan abi pasensi? Te wi o go luku den piki na tapu den aksi di e kon now, dan wi o si fa na artikel disi o yepi wi fu tan abi pasensi. (1) San wi kan leri fu na eksempre fu a profeiti Mika di ben de nanga pasensi? (2) San o sori taki wi no abi fu wakti moro? (3) Fa wi kan sori taki wi breiti taki Yehovah de nanga pasensi?

3. Fa a situwâsi ben de na ini Israel na a ten fu Mika?

³ Leisi Mika 7:2-6. Mika, a profeiti fu Yehovah, ben si taki dei fu dei sma na ini Israel ben e trangayesi Gado moro nanga moro. Na a ten di Kownu Akas ben e tiri den no ben wani gi yesi na Gado kwetikweti. Mika e agersi den trangayesi Israelsma nanga „wan makabusi” èn nanga „wan skotu fu makabon”. Neleki fa wan makabusi noso wan skotu fu makabon kan gi wan sma mankeri te a e waka pasa drape, na so den trangayesi Israelsma ben du ogri nanga trawan. So furu kruktudu ben de na ini a kondre, taki famiriman srefi ben tron feanti fu makandra. Fu di Mika ben sabi taki a no ben o man kenki a situwâsi, meki a begi Yehovah nanga en  heri ati. Baka dati a wakti Gado nanga pasensi fu kenki a situwâsi. Mika ben sabi seiker taki Yehovah ben o du wan sani na a ten di a poti.

4. Sortu tesi kan miti wi?

⁴ Neleki fa a ben de na ini a ten fu Mika, na so wi e libi tu na mindri sma di e prakseri densrefi nomo. Furu sma na ini a ten disi ’no de nanga tangi. Den no e tai hori na trawan. Den no lobi trawan’ (2 Tim. 3:2, 3). Son leisi a hebi gi wi te wi e si taki sma na wi wrokope, na skoro èn na ini a birti e denki densrefi nomo. Ma son futuboi fu Gado e kisi fu du nanga moro bigi problema srefi. Yesus ben taki dati famiriman ben o gens den bakaman fu en. Di a ben wani sori sortu bakapisi a boskopu fu en ben o abi, a taki wan srefi sortu sani leki san skrifi na ini Mika 7:6. A taki: „Mi kon fu tyari trobi na mindri wan man nanga en papa, na mindri wan umapikin nanga en mama, èn na mindri wan yongu wefi nanga a mama fu en masra. Iya, wan sma sa abi feanti na ini en eigi osofamiri” (Mat. 10:35, 36). A kan hebi srefisrefi te famiriman di no e dini Yehovah, e spotu wi noso e gens wi! Te wi e kisi fu du nanga den sortu tesi disi, dan wi no musu gi den na okasi fu meki wi lasi-ati. Meki wi tan dini Yehovah èn wakti en nanga pasensi teleki a lusu a problema. Efu wi e aksi en ibri tron baka fu yepi wi, dan a o gi wi a krakti nanga a koni fu horidoro.

5, 6. Fa Yehovah ben blesi Mika, ma san Mika no si?

⁵ Yehovah blesi Mika fu di a ben abi pasensi. Mika si fa Kownu Akas nanga na ogri-ati tiri fu en kon na wan kaba. A si tu fa Akas en manpikin Heskia bigin tiri. Heskia ben de wan bun kownu di seti a tru anbegi baka. Boiti dati, Mika si fa a profeititori di a skrifi fu Samaria kon tru di den Asiriasma teki a noordsei kownukondre fu Israel abra.—Mika 1:6.

⁶ Ma Mika no si fa ala den profeititori di Yehovah taigi en fu skrifi, kon tru. Mika ben skrifi fu eksempre: „Na ini den lasti dei a bergi fu na oso fu Yehovah o tanapu steifi. A o hei pasa den ede fu den bergi èn a o hei moro den pikin bergi. Na drape den pipel musu go. Iya, furu pipel o go drape èn den o taki: ’Kon meki wi go na a bergi fu Yehovah’” (Mika 4:1, 2). Mika dede langa ten fosi a profeititori disi kon tru. Ma toku a ben teki a fasti bosroiti fu tan dini Yehovah srefi te na dede, awinsi san sma na en lontu ben e du. Mika taki fu a tori disi: „Ibri pipel o tyari a nen fu en gado, èn den o du san a gado fu den wani. Ma fu ala ten wi o tyari a nen fu Yehovah wi Gado èn wi o du san a wani. Iya, fu têgo wi o du dati” (Mika 4:5). Mika ben man wakti nanga pasensi na ini muilek ten fu di a ben sabi seiker taki Yehovah ben o meki ala sani di A pramisi kon tru. A profeiti disi di no lasi bribi ben e frutrow na ini Yehovah.

7, 8. (a) Fu san ede wi kan frutrow na ini Yehovah? (b) San o meki taki a ten pasa esi-esi?

⁷ Wi e frutrow na ini Yehovah neleki Mika? Iya, wi kan frutrow na ini Yehovah fu di wi srefi si fa a profeititori fu Mika kon tru. „Na ini den lasti dei” milyunmilyun sma fu ala kondre, lo nanga tongo kon na „a bergi fu na oso fu Yehovah”. Awinsi den anbegiman disi komoto na kondre di e feti nanga makandra, toku den „naki den feti-owru kon tron plugu” èn den no wani „leri fu feti moro” (Mika 4:3). A de wan bigi grani fu de na mindri Yehovah en pipel di lobi freide.

⁸ Wi alamala wani taki Yehovah tyari wan kaba kon esi-esi na a ogri grontapu disi. Ma efu wi wani wakti nanga pasensi, dan wi musu leri fu si sani leki fa Yehovah e si den. A poti wan dei te „a o gi wan man a wroko fu krutu ala sma na grontapu”. A man dati na Yesus Krestes (Tori 17:31). Ma  fosi a ten dati doro, Gado e gi ala sortu sma na okasi fu „kon sabi a tru leri finifini”, fu du san den leri èn fu kisi frulusu. Hori na prakseri taki sma kan lasi den libi. (Leisi 1 Timoteyus 2:3, 4.) Te wi e meki muiti fu yepi trawan fu kon sabi Gado finifini, dan a ten di de ete fosi Yehovah krutu a grontapu disi o pasa esi-esi. Dyonsro, iya, wantronso srefi, ten no o de moro. Te a kaba kon, dan wi o breiti taki wi ben du a Kownukondre preikiwroko fayafaya.

9-11. A de so taki 1 Tesalonikasma 5:3 kon tru? Tyari disi kon na krin.

⁹ Leisi 1 Tesalonikasma 5:1-3. A no o teki langa moro fosi sma o taki: „Freide de èn ala sani e waka bun!” Efu wi no wani taki a sani disi di sma o meki bekènti kori wi, dan wi musu ’tan wikiwiki èn wi musu tan na ai’ (1 Tes. 5:6). Fu yepi wi fu tan na ai, meki wi go luku san o pasa, fosi sma meki a sani disi bekènti.

¹⁰ Baka ibriwan fu den tu grontapufeti, den kondre ben wani freide nomonomo. Baka a fosi grontapufeti, den seti a Volkenbond fu di den ben howpu taki na organisâsi disi ben o tyari freide kon. Baka a Di Fu Tu Grontapufeti, den Verenigde Naties kon pôpi fu di sma ben howpu taki na den ben o tyari freide kon na grontapu. Tiriman nanga kerki fesiman ben poti den frutrow na tapu den organisâsi disi fu meki freide de na mindri libisma. Fu eksempre, na ini 1986 den Verenigde Naties meki bekènti taki a yari dati ben o de na Internationaal Yari fu Freide èn na ala sei nyunsu ben e taki fu a tori. A yari dati tiriman fu furu kondre nanga kerki fesiman, kon makandra nanga na edeman fu Lomsu Kerki na ini Asisi, na Italiakondre, fu begi gi freide.

¹¹ Soleki fa wi si, dan sma ben meki bekènti taki 1986 ben o de a Yari fu Freide èn na tra momenti den ben meki den srefi sortu sani disi bekènti tu. Ma den sani disi no ben de a kontru fu a profeititori na ini 1 Tesalonikasma 5:3 pe skrifi taki „freide de èn [taki] ala sani e waka bun”. Fu san  ede? Fu di a pori di ben o kon wantronso, no pasa ete.

12. San wi sabi fu a ten te sma o meki bekènti taki „freide de èn [taki] ala sani e waka bun”?

¹² Suma o meki bekènti na ini a ten di e kon taki „freide de èn [taki] ala sani e waka bun”? San kerki fesiman fu den Kresten kerki èn fu tra kerki o du? San tiriman o abi fu du nanga a tori disi? Bijbel no e fruteri wi. Ma san wi sabi na taki awinsi fa sma o meki a sani disi bekènti noso awinsi o moi a gersi, freide no o de trutru. Na a ten dati Satan o de a tiriman fu na owru grontapu disi ete. A grontapu disi pori srefisrefi èn a no o kenki. A ben o de wan sari sani efu wan fu wi bribi den leitori disi di Satan e panya èn efu wi ben o teki a sei fu grontapu.

13. Fu san ede engel e hori den winti di o tyari pori kon?

¹³ Leisi Openbaring 7:1-4. Now wi e wakti fu 1 Tesalonikasma 5:3 kon tru èn na a srefi ten tranga engel e hori den winti di o tyari pori kon na ini a bigi banawtu. San den e wakti? Den e wakti teleki den salfu „srafu fu wi Gado” kisi a marki fu den fu a lasti leisi, soleki fa na apostel Yohanes e fruteri. * Te den salfuwan kisi a marki fu a lasti leisi, dan den engel o lusu den winti di o tyari pori kon. San o pasa baka dati?

14. San e sori taki Babilon a Bigiwan o kisi pori heri esi?

¹⁴ Babilon a Bigiwan, a grontapumakti fu falsi bribi, o kisi a strafu di a musu kisi. „Den pipel, den ipi-ipi sma èn den sma fu ala kondre nanga tongo” no o man yepi Babilon a Bigiwan. Nownow kaba wi e si difrenti sani di e sori taki a ten te a o kisi pori de krosibei (Openb. 16:12; 17:15-18; 18:7, 8, 21). Disi wi e si nownow kaba te wi e luku a nyunsu di e sori fa sma e krutu kerki nanga den kerki fesiman. Toku den tiriman fu Babilon a Bigiwan feni taki noti no o pasa nanga den. Ma na kori den e kori densrefi! Baka te sma meki bekènti taki „freide de èn [taki] ala sani e waka bun”, dan den politiek tiriman fu Satan grontapu o drai baka gi falsi kerki wantronso èn den o pori den. Noiti moro Babilon a Bigiwan o de! A no de fu taki, dati a bun fu wakti nanga pasensi teleki den sortu prenspari sani disi pasa.—Openb. 18:8, 10.

15. Fu san ede Yehovah sori pasensi?

¹⁵ Aladi sma e pori Yehovah nen, toku a e wakti nanga pasensi fosi a du wan sani. Yehovah no wani taki reti-ati sma kisi pori (2 Petr. 3:9, 10). Na so wi e si sani tu? Fosi a dei fu Yehovah kon, wi kan sori taki wi breiti taki a de nanga pasensi. Meki wi go luku fa wi kan du dati.

16, 17. (a) Fu san ede wi musu yepi den sma di no e kon na den konmakandra moro èn di no e preiki moro? (b) Fu san ede a prenspari taki den sma disi drai kon baka na Yehovah?

¹⁶ Yepi den sma di no e kon na den konmakandra moro èn di no e preiki moro. Yesus ben taki dati prisiri ben o de na hemel te a ben o feni awinsi wán lasi skapu (Mat. 18:14; Luk. 15:3-7). A de krin taki Yehovah e broko en ede trutru nanga ala den sma di sori lobi gi en nen, srefi efu den no e dini en nownowde. Te wi e yepi den sma disi fu drai kon baka na a gemeente, dan wi e meki taki Yehovah nanga den engel e prisiri.

¹⁷ Yu na wan fu den sma di no e dini Gado nownowde? Kande wan sma na ini a gemeente du wan hati sani nanga yu èn dati meki yu no e go na den konmakandra moro. Ma kande a sani disi pasa wan pisi ten kaba. Sobun, aksi yusrefi: ’Mi libi kon  moro bun now èn mi de moro koloku? Na Yehovah du mi wan hati sani noso na wan sondu libisma? Oiti Yehovah Gado du mi wan sani?’ Te yu luku en bun, dan ala ten Yehovah du bun gi wi. Srefi efu wi no e du san a e aksi fu wi, toku a e gi wi na okasi fu nyan bun fu den bun sani di a e gi wi (Yak. 1:16, 17). Dyonsro a dei fu Yehovah o kon. Now na a ten fu drai kon baka na wi lobi-ati hemel Tata èn na a gemeente, a wan-enkri presi pe wi kan feni kibri na ini den lasti dei disi.—Deut. 33:27; Hebr. 10:24, 25.

18. Fu san ede wi musu horibaka gi den wan di e teki fesi?

¹⁸ Horibaka nanga yu heri ati gi den wan di e teki fesi. Yehovah di de wan lobi-ati Skapuman e tiri wi èn a e kibri wi. A poti en Manpikin leki a Gran Skapuman fu na ipi fu en (1 Petr. 5:4). Owruman na ini moro leki 100.000 gemeente e teki den ten fu poti prakseri na ibri skapu fu Gado (Tori 20:28). Te wi e horibaka nanga wi heri ati gi den brada disi di e teki fesi, dan wi e sori taki wi breiti nanga ala den sani di Yehovah nanga Yesus du gi wi.

19. Fa wi kan kon krosibei na makandra?

¹⁹ Kon krosibei na makandra. San disi wani taki? Fositen, te wan legre di sabi feti bun ben e tuka nanga wan feanti, dan den srudati ben e go tanapu moro krosibei fu makandra. Na so fasi a feanti no ben man feni wan olo fu boro kon wini den. Satan e du ala muiti fu du ogri nanga Gado pipel. Now a no a ten fu feti nanga makandra. A de a ten fu kon moro krosibei na makandra, fu no poti prakseri na den pikinpikin fowtu fu trawan èn fu poti frutrow na ini Yehovah.

20. San wi musu du now?

²⁰ Sobun, meki wi alamala sorgu taki wi tan abi wan bun matifasi nanga Yehovah èn taki wi e wakti nanga pasensi. Meki wi hori pasensi, aladi wi e wakti a ten te sma o meki bekènti taki „freide de èn [taki] ala sani e waka bun”. Meki wi wakti a ten te den salfuwan o kisi a marki fu a lasti leisi. Baka dati den fo engel o lusu den winti di o tyari pori kon èn Babilon a Bigiwan o kisi pori. Aladi wi e wakti fu den prenspari sani disi pasa, wi musu teki a rai fu den brada di Yehovah poti fu teki fesi na ini na organisâsi fu en. Meki wi kon moro krosibei na makandra so taki Didibri nanga den ogri yeye no feni wan olo fu boro kon na wi mindri. Now na a ten fu poti prakseri na a deki-ati fu a psalm skrifiman: „Abi deki-ati èn no frede, un sma di e wakti Yehovah nanga pasensi.”—Ps. 31:24.