1, 2. (a) Fu san ede a prenspari taki ’wi de srekasreka ala ten fu begi’? (b) Sortu sani di abi fu du nanga begi wi musu aksi wisrefi?

TE WAN sma musu hori wakti te neti, dan musudei mamanten, te a dungru ete na a moro muilek ten fu tan na ai. Kande trawan di ben musu tan na ai heri neti o agri nanga dati. Wi e libi na ini wan ten di yu kan teki gersi nanga a moro dungru pisi fu a neti fu di a kaba fu Satan grontapu de krosibei èn wi leki Kresten musu meki ala muiti fu tan na ai (Rom. 13:12). Sobun, a no wan bun sani kwetikweti fu fadon na sribi na a yuru disi! A prenspari fu „de nanga krin frustan” èn fu gi yesi na a warskow fu Bijbel di e taki dati ’ala ten wi musu de srekasreka fu begi’.—1 Petr. 4:7.

² Now di a kaba fu Satan grontapu de so krosibei, a bun fu aksi wisrefi: ’Ala ten mi de srekasreka fu begi? Mi e begi na ala sortu fasi? Mi abi a gwenti fu begi gi trawan, noso mi e taki nomo fu san mi wani èn fu san mi abi fanowdu? O prenspari a de fu begi efu mi wani kisi frulusu?’

3. San na wan tu fasi fu begi?

³ Na ini a brifi di na apostel Paulus skrifi gi den Efeisesma, a taigi den fu „begi na ala sortu fasi” (Ef. 6:18). Nofo tron te wi e begi, wi e aksi Yehovah fu a yepi wi èn fu a gi wi san wi abi fanowdu noso fu lusu den problema fu wi. Gado na „a sma di e arki begi” èn fu di a lobi wi, meki a e arki wi te wi e aksi en fu yepi wi (Ps. 65:2). Ma te wi e begi, wi no musu taki nomo fu sani di wi wani. Wi musu prèise Yehovah tu, wi musu taki en tangi èn wi musu begi en fayafaya.

4. Fu san ede wi musu prèise Yehovah furu tron na ini den begi fu wi?

⁴ Difrenti sani de di musu meki wi prèise Yehovah na ini den begi fu wi. Fu eksempre, te wi e prakseri  „den bigi sani di a du” èn fa „a bigi srefisrefi”, dan wi wani prèise en. (Leisi Psalm 150:1-6.) Na ini den siksi vers disi fu Psalm 150 wi e kisi deki-ati 13 leisi fu prèise Yehovah. Wan tra psalm skrifiman di ben abi bigi lespeki gi Gado, ben singi: „Seibi tron wan dei mi prèise yu, fu di yu e koti krutu na wan reti fasi” (Ps. 119:164). Iya, Yehovah warti fu kisi prèise. Sobun, a de krin taki wi musu prèise en „seibi tron wan dei”, dati wani taki furu tron.

5. Te wi abi a gwenti fu taki Gado tangi na ini den begi fu wi, dan fa dati o kibri wi?

⁵ Fu taki Gado tangi na wan tra prenspari fasi fu begi. Paulus ben taigi den Kresten na ini Filipi: „No broko un ede nanga nowan sani, ma begi Gado ala ten, begi en fayafaya èn taki en tangi tu. Na so a o kon sabi san unu wani aksi en” (Fil. 4:6). Wi e libi na ini den lasti dei fu Satan grontapu èn furu sma na wi lontu ’no de nanga tangi’. Dati meki a prenspari fu taki Yehovah tangi nanga wi heri ati fu den blesi di a gi wi. Dati o yepi wi fu no kon de leki den grontapusma (2 Tim. 3:1, 2). Heri grontapu lai nanga sma di no de nanga tangi èn efu wi no luku bun, dan wi kan teki a fasi disi abra makriki. Te wi e taki Gado tangi na ini den begi fu wi, dan dati o meki wi firi koloku èn wi no o kon de leki den „sma di gwenti krutukrutu èn di e kragi fu a fasi fa a libi fu den e waka” (Yud. 16). Boiti dati, te osofamiri-edeman e begi makandra nanga na osofamiri fu den èn den e taki Gado tangi, dan dati o yepi a wefi nanga den pikin fu de nanga tangi tu.

6, 7. (a) San a wani taki fu begi Yehovah fayafaya? (b) Fu san wi kan begi Gado fayafaya?

⁶ Fu begi Gado fayafaya wani taki dati wi e begi en nanga wi heri ati. Fu san wi kan begi Gado fayafaya? Wi kan du disi te sma e frufolgu wi noso te wi abi wan siki di kan meki wi lasi libi. A no de fu taki dati wi o begi Gado fayafaya fu yepi wi te wi de na ini den situwâsi dati. Ma na den ten dati wawan wi musu begi Yehovah fayafaya?

⁷ Di Yesus leri den bakaman fu en fa den musu begi, dan luku san a taki fu Gado nen, En Kownukondre nanga En wani. (Leisi Mateyus 6:9, 10.) A grontapu disi ogri èn tirimakti no man gi sma san den abi fanowdu fu tan na libi. Sobun, wi musu begi taki a nen fu wi hemel Tata musu kon santa èn taki en Kownukondre musu puru a tiri fu Satan na grontapu. Now na a ten tu fu begi Yehovah fayafaya taki a wani fu en pasa na grontapu, soleki fa a e pasa na hemel. Dati meki wi musu tan na ai èn wi musu tan begi Gado na ala sortu fasi.

8, 9. Fu san ede wi no musu de gaw fu krutu Petrus nanga den tra apostel taki den fadon na sribi na ini a dyari fu Getseimanei?

⁸ Aladi na apostel Petrus ben gi Kresten deki-ati fu ’de srekasreka ala ten fu begi’, toku a pasa wán leisi taki en srefi no du dati. Petrus ben de wan fu den disipel di fadon na sribi di Yesus ben e begi na ini a dyari fu Getseimanei. Srefi di Yesus taigi den fu ’tan na ai èn fu begi doronomo’, toku den no du dati.—Leisi Mateyus 26:40-45.

⁹ Na presi fu krutu Petrus nanga den tra apostel taki den no tan na ai, wi musu hori na prakseri taki ala den sani di pasa a dei dati meki taki den ben weri. A dei dati den sreka sani gi a Paskafesa èn a neti dati den hori a fesa. Baka dati Yesus sori den fa den musu hori na Avondmaal fu Masra, noso a Memrefesa. Na so ala disipel fu en ben o sabi san den musu du te den hori a fesa disi (1 Kor. 11:23-25). Bijbel e taki dati „baka di den singi prèisesingi,  den go na dorosei na Olèif-bergi”. Fu doro drape den ben abi fu waka wan pisi na den smara strati fu Yerusalem (Mat. 26:30, 36). A kan taki mindrineti ben pasa wan pisi kaba. Efu wi ben de na ini a dyari fu Getseimanei a neti dati, dan kande wi srefi ben o fadon na sribi tu. Sobun, Yesus no bari den apostel fu di a ben sabi taki den ben weri. Ma na wan lobi-ati fasi a taigi den „taki na ati wani, ma a skin swaki”.

10, 11. (a) San Petrus leri fu a sani di pasa nanga en na ini a dyari fu Getseimanei? (b) San yu kan leri fu a sani di pasa nanga Petrus?

¹⁰ A neti dati di Petrus fadon na sribi na ini a dyari fu Getseimanei, a leri wan tumusi prenspari sani. Yesus ben taigi den disipel fu en: „Tideneti un alamala o fadon te unu si san pasa nanga mi.” Ma Petrus piki en: „Awansi ala den trawan o fadon te den si san pasa nanga yu, toku mi no sa fadon noiti!” Ne Yesus taigi Petrus taki a ben o taki dri leisi dati a no sabi Yesus. Fu di Petrus no ben wani bribi Yesus, meki a taigi en: „Awansi mi musu dede nanga yu, noiti mi no sa taki dati mi no sabi yu” (Mat. 26:31-35). Ma san Yesus taki, na dati pasa. A neti dati Petrus taki dri tron dati a no sabi Yesus. A sani di a du hati en so te, taki „a krei nanga bigi sari”.—Luk. 22:60-62.

¹¹ Wi kan de seiker taki a sani disi leri Petrus fu no frutrow tumusi na tapu ensrefi. Soleki fa a sori, dan begi yepi en na ini a tori disi. A moi fu si taki na Petrus gi Kresten a rai fu ’de srekasreka ala ten fu begi’. Wi e poti prakseri na a rai disi di skrifi na ini Bijbel? A de so taki wi e „begi doronomo” fu sori taki wi e frutrow na tapu Yehovah? (Ps. 85:8) Meki wi hori a rai fu na apostel Paulus na prakseri tu di a taki: „A sma di denki taki a e tanapu, musu luku bun taki a no fadon.”—1 Kor. 10:12.

12. Fu san ede Nehemia na wan bun eksempre gi wi?

¹² Luku a tori fu Nehemia. Na ini a di fu feifi yarihondro a ben abi a wroko fu kanti win gi Kownu Artakserkses fu Persia. Nehemia na wan bun eksempre fu di a ben abi a gwenti fu begi Gado nanga en heri ati. Wan tu dei langa a ’no nyan èn a begi Gado’ fu taigi en na ini sortu nowtu den Dyu na Yerusalem ben de (Neh. 1:4). Di Artakserkses aksi Nehemia fu san ede a ben de nanga wan sari fesi èn san a ben wani Kownu du gi en, dan ’wantewante Nehemia begi a Gado fu hemel’ (Neh. 2:2-4). San ben de a bakapisi? Yehovah piki  den begi fu en èn a drai a situwâsi na so wan fasi taki sani waka bun gi a pipel fu En (Neh. 2:5, 6). A musu fu de so taki disi tranga a bribi fu Nehemia.

13, 14. San wi musu du fu tan abi wan tranga bribi so taki Satan no man meki wi lasi-ati?

¹³ Te wi e begi ala ten soleki fa Nehemia ben e du, dan dati o yepi wi fu tan abi wan tranga bribi. Satan no e sari nowan sma èn nofo tron a e suku fu kisi wi te wi swaki. Fu eksempre, te wi siki noso te wi firi brokosaka, dan wi kan bigin denki taki a ten di wi e gebroiki fu go na ini a preikiwroko ibri mun a no wan bigi sani gi Gado. A kan taki sonwan fu wi e denki fu sani di kan meki wi lasi-ati, kande fu ogri di wi ben du fosi. Satan wani taki wi musu bribi taki wi no warti noti. Nofo tron a de so taki den sani di a e du nanga wi na fu meki wi lasi-ati èn fu swaki a bribi fu wi. Ma te wi ’de srekasreka ala ten fu begi’, dan dati kan meki a bribi fu wi kon moro tranga. Iya, ’wi bribi musu de leki wan bigi skelt. Nanga dati wi o man kiri a faya fu ala den peiri di na ogriwan e sutu kon na wi tapu.’—Ef. 6:16.

¹⁴ Efu wi ’de srekasreka ala ten fu begi’, dan wi no e skreki te sani miti wi wantronso, èn wi bribi no o kon swaki. Meki wi hori na eksempre fu Nehemia na prakseri te wi e kisi fu du nanga tesi èn nanga problema, èn meki wi begi Gado wantewante. Soso te Yehovah yepi wi, wi kan kakafutu gi tesi èn horidoro so taki wi no lasi bribi.

15. Sortu aksi wi musu poti gi wisrefi?

¹⁵ Yesus begi fayafaya gi Petrus taki a no lasi a bribi fu en (Luk. 22:32). Epafras, wan Kresten fu a fosi yarihondro, ben teki na eksempre fu Yesus èn a ben du ala san a  man fu begi gi den brada nanga sisa na Kolose. Paulus ben skrifi den brada nanga sisa disi: „Ala ten a e begi fayafaya gi unu, so taki te fu kaba unu kan de lepi sma di no e tweifri kwetikweti na den sani di Gado wani” (Kol. 4:12). Wi musu aksi wisrefi: ’Mi e begi fayafaya gi brada nanga sisa na heri grontapu? Omeni leisi mi e begi gi mi brada nanga sisa di pina fu di den kisi fu du nanga wan rampu? O ten ben de a lasti leisi di mi begi gi den brada di abi bigi frantwortu na ini na organisâsi fu Yehovah? Na ini a ten di pasa, mi begi gi sma na ini a gemeente di kisi fu du nanga problema?’

16. Yu denki taki a de prenspari fu begi gi trawan? Fu san ede yu e piki so?

¹⁶ Te wi e begi Yehovah Gado gi den brada nanga sisa fu wi, dan dati kan yepi den trutru. (Leisi 2 Korentesma 1:11.) Ma Yehovah no abi fu piki den begi fu den futuboi fu en, soso fu di furu fu den e begi en ibri tron baka fu a srefi sani. Toku a breiti te a e si taki den e broko den ede trutru nanga den brada nanga sisa fu den. A o piki den begi fu den soleki fa en wani. Dati meki wi musu si a grani nanga a frantwortu di wi abi fu begi gi trawan, leki wan seryusu sani. Te wi e teki na eksempre fu Epafras, dan wi o meki muiti fu begi gi wi Kresten brada nanga sisa fu di wi lobi den trutru èn fu di wi e broko wi ede nanga den. Te wi e du disi, dan wi o kisi moro prisiri na ini a libi, fu di „wan sma sa de moro koloku te a e gi sani, leki te a e kisi sani”.—Tori 20:35.

17, 18. Te wi ’de srekasreka ala ten fu begi’, dan fa dati o yepi wi?

¹⁷ Leti fosi Paulus taki dati „neti pasa moi fara kaba èn dyonsro dei o broko”, a skrifi: „Unu sabi na ini sortu ten wi e libi. Unu sabi taki a yuru doro kaba taki un musu wiki. Now a frulusu fu wi de moro krosibei leki di wi ben tron bribiman” (Rom. 13:11, 12). A grontapu di Gado pramisi wi de krosibei èn a frulusu fu wi de moro krosibei srefi leki san wi denki. Wi no musu fadon na sribi na agersi fasi èn noiti wi musu meki den sani na grontapu nyan wi ten so taki wi no abi ten moro fu taki nanga Yehovah na ini begi. Na presi fu dati ’wi musu de srekasreka ala ten fu begi’. Te wi e du disi, dan dati o yepi wi fu ’tyari wisrefi na wan santa fasi èn fu du sani di e sori taki wi e dini Gado fayafaya’, aladi wi e wakti a dei fu Yehovah (2 Petr. 3:11, 12). A fasi fa wi e tyari wisrefi o sori taki wi de na ai èn taki wi e bribi trutru taki a kaba fu na ogri grontapu disi de krosibei. Sobun, meki wi „begi doronomo” (1 Tes. 5:17). Meki wi teki na eksempre fu Yesus fu suku wan presi pe wi kan de wi wawan fu begi. Te wi e teki ten fu begi Yehovah, dan wi o kon moro krosibei na en (Yak. 4:7, 8). Disi o de wan bigi blesi.

¹⁸ Bijbel e taki: „Di Krestes ben e libi na grontapu, dan a ben e begi fayafaya èn nanga en heri ati a ben e suku yepi na a sma di ben man puru en na dede. A ben e bari tranga èn a ben e krei watra-ai. Na fu di a ben lespeki Gado, meki Gado arki den begi fu en” (Hebr. 5:7). Fu di Yesus ben begi Gado fayafaya, meki a ben man tan gi yesi na Gado te na a kaba fu en libi na grontapu. A bakapisi ben de taki Yehovah puru en lobi Manpikin na ini dede èn a gi en libi na ini hemel pe a no o man dede noiti moro. Wi srefi kan tan gi yesi na wi hemel Tata, awansi sortu tesi nanga problema o miti wi na ini a ten di e kon. Iya, wi kan kisi têgo libi. Ma dati wani taki dati wi ’musu de srekasreka ala ten fu begi’.