1. Fu san ede wan piloot musu luku wan tu sani finifini fosi a frei wan opolani?

IBRI TRON fosi wan piloot o frei wan opolani, a musu luku wan tu sani finifini. A abi wan papira pe sowan 30 sani skrifi di a musu luku. Efu a no luku den sani disi finifini èn na opolani abi wan problema, dan na opolani kan fadon. Fu dati ede, awinsi omeni ondrofeni so wan piloot abi, toku a musu luku ala den sani disi ibri tron baka fosi a go frei.

2. San ibri Kresten musu ondrosuku?

² Neleki a piloot, wi srefi musu luku wan tu sani finifini fu sorgu taki wi bribi tranga awinsi sortu problema kon. Awinsi wi no dopu tumusi langa noso awinsi wi dopu bun langa kaba, toku wi alamala musu ondrosuku efu wi bribi tranga ete. Efu wi e denki nomo taki wi bribi tranga, wi kan drai baka gi Yehovah te tesi miti wi. Fu dati ede Bijbel e warskow wi: „A sma di denki taki a e tanapu, musu luku bun taki a no fadon.”—1 Kor. 10:12.

3. San den Kresten na ini Galasia ben musu du?

³ Den Kresten na ini Galasia ben musu tan ondrosuku efu a bribi fu den tranga èn den no ben musu frigiti fa a tru bribi meki den kon fri. Nanga yepi fu a frulusu-ofrandi, den sma di e bribi na ini Yesus kisi na okasi fu kon sabi Gado na wan spesrutu fasi. Den ben kan tron manpikin fu Gado! (Gal. 4:9) Son Kresten na ini den gemeente ben feni taki sma ben musu tan gi yesi na a Wèt fu Moses fu man plisi Gado. Ma den Kresten di no ben de Dyu no ben besnèi èn den no ben hori a Wèt noiti. Sobun, den Dyu Kresten nanga den Kresten di no ben de Dyu ben musu go na fesi na ini a tru anbegi. Den ben musu kon frustan taki anbegiman fu Gado no  ben abi fu hori densrefi na a Wèt fu Moses moro.

4, 5. (a) San Paulus memre den Galasiasma? (b) Fu san ede a brifi disi prenspari gi wi?

⁴ Na ini a brifi di na apostel Paulus skrifi gi den Galasiasma, a memre ala Kresten taki den no musu drai baka gi den sani di den leri fu Bijbel. Noiti wi musu drai go na den sani di wi libi na baka. Aladi a brifi ben skrifi gi den gemeente na ini Galasia, toku a kan gi wi alamala deki-ati fu tan dini Gado ala ten.

⁵ Wi alamala musu hori na prakseri fa a tru bribi meki wi kon fri èn fa wi tron Yehovah Kotoigi. Prakseri fu den tu aksi disi: Yu e memre sortu sani yu ben musu du fu man teki dopu? Yu e memre fa yu kon sabi Gado èn fa yu ben breiti di a kon sabi yu?

6. Sortu sani wi musu luku ten na ten?

⁶ Neigi sani de di wi du fu man teki dopu. (Luku a faki  „Sani di wi du fu teki dopu èn fu go na fesi.”) Te wi e prakseri den sani disi ten na ten, dan dati o tranga wi bribi èn a o yepi wi fu no drai go baka na grontapu sani. Neleki fa wan piloot e luku son sani fosi a frei na opolani, na so wi musu luku den neigi sani disi ten na ten fu man tan dini Gado nanga wi heri ati.

7. Na sortu leri wi musu hori wisrefi èn fu san ede?

⁷ Neleki fa wan piloot e luku son sani te a musu frei wan opolani, na so wi musu luku tu efu wi e go na fesi na ini a tru anbegi. Paulus ben skrifi gi Timoteyus: „Mi ben taigi yu san na a soifri leri. Tan waka baka na eksempre di e sori yu fa a leri disi musu de, aladi yu e tan sori a bribi èn a lobi di wan sma e kon abi te a de wán nanga Krestes Yesus” (2 Tim. 1:13). A „soifri leri” na ala den leri di skrifi na ini Gado Wortu (1 Tim. 6:3). Den leri disi e sori wi fa Yehovah wani wi fu libi. Meki wi luku den sani di wi ben musu du fu man teki dopu. Dan wi o si efu wi libi e kruderi trutru nanga a soifri leri.

8, 9. (a) Fu san ede wi musu du muiti fu tan studeri Bijbel èn fu kisi wan moro tranga bribi? (b) Tyari kon na krin fu san ede a prenspari fu tron lepi Kresten èn fu san ede wi musu go na fesi doronomo.

⁸ A fosi sani di wi du, na taki wi teki leri. Di wi du dati, wi kisi bribi. Ma wi no musu tapu fu du den sani disi. Wi musu tan teki leri èn wi bribi musu kon moro tranga (2 Tes. 1:3). Baka te wi teki dopu, wi musu tan du muiti fu tron wan moro bun mati fu Gado èn wi musu kisi wan moro tranga bribi.

⁹ Wi kan agersi disi nanga a gro di wan bon e gro. Wan bon kan kon bigi srefisrefi, spesrutu te a abi furu rutu noso te den rutu fu en go bun dipi na ini a gron. Fu eksempre, sonwan fu den moi sedrebon fu Libanon hei sowan 37 meter. Den kan kon bradi so te, taki yu kan tai wan titei fu 12 meter lontu a bonskin (Singi 5:15). Nofo tron wan bon e gro esi na a bigin. Den rutu e go moro dipi èn moro fara na ini a gron èn a bonskin e kon moro deki. Ma bakaten yu no man si krin moro taki a bon e gro. Na so a de tu te wi e go na fesi na ini a tru anbegi. Te wi e bigin studeri Bijbel, a kan taki wi musu tyari furu kenki kon. Bakaten wi e teki dopu. Den brada nanga sisa na ini a gemeente e si fa  wi e go na fesi. Kande wi e tron pionier srefi noso kande wi e kisi tra grani na ini a gemeente. Ma a kan taki bakaten sma no e si so krin moro taki wi e go na fesi. Awinsi disi de so, toku wi musu du muiti fu tan studeri Bijbel èn fu kisi wan moro tranga bribi. „Na so wi kan kon de leki wan bigisma di lepi dorodoro leki Krestes” (Ef. 4:13). Sobun, te wi e du muiti fu tron lepi Kresten, dan wi o de leki pransun di e gro kon tron bun bigi steifi bon.

10. Fu san ede lepi Kresten srefi musu tan gro?

¹⁰ Ma wi no musu tapu fu go na fesi. A sabi di wi abi fu Gado Wortu èn a bribi fu wi de leki rutu di e meki wi tanapu kánkan. Den rutu disi musu kon moro steifi (Odo 12:3). Furu brada nanga sisa e tan gro na a fasi disi. Wan brada di de wan owruman moro leki 30 yari kaba taki dati a e gro te now ete. A taki: „Mi e frustan Bijbel moro bun now. Ibri tron mi e feni tra fasi fa mi kan gebroiki den wèt nanga den tra sani di Bijbel e leri. Mi e kon si moro nanga moro tu o prenspari a preikiwroko de.”

11. Fa wi kan leri sabi Yehovah moro bun?

¹¹ Efu wi wani go na fesi na ini a tru anbegi, dan wi musu tron moro bun mati fu Yehovah. A wani wi fu firi taki a lobi wi èn taki a e broko en ede nanga wi. Na so wan pikin e firi te en papa noso mama e brasa en hori. Na so wi e firi tu te wi de nanga wan bun mati fu wi. Ma yu kan frustan taki a e teki ten fu kon sabi Yehovah èn fu lobi en. Sobun, efu yu wani leri sabi Yehovah, yu musu meki ten fu leisi en Wortu ibri dei. Boiti dati, yu musu leisi ibri nyun Waktitoren nanga Ontwaakt! èn den tra buku fu na organisâsi fu wi.

12. San wi musu du efu wi wani tan bun mati fu Yehovah?

¹² Yu kan tron wan moro bun mati fu Yehovah tu te yu e begi en nanga yu heri ati èn te yu abi bun mati. (Leisi Maleaki 3:16.) Yehovah „e yere den fayafaya begi” fu den mati fu en (1 Petr. 3:12). Neleki wan lobi-ati papa, Yehovah e poti prakseri te wi e begi en fu yepi wi. Dati meki wi musu „tan begi” (Rom. 12:12). Wi no kan de lepi Kresten efu Gado no e yepi wi. Efu wi e tapu fu begi, wi no o kisi a krakti di wi abi fanowdu. Na ogri grontapu disi kan meki wi lasi-ati noso  wi kan kisi tesi fu du wan sani di no bun. Ma solanga wi e aksi Yehovah fu yepi wi, a de klariklari fu du dati. Te yu e begi Yehovah, dan yu e taki nanga en soleki fa yu ben o taki nanga wan bun mati fu yu? Yu kan du muiti fu begi moro bun?—Yer. 16:19.

13. Fu san ede a prenspari fu go doronomo na den konmakandra, efu wi wani de bun mati fu Gado?

¹³ Yehovah lobi ala sma „di e kon kibri na en”. Sobun, awinsi wi sabi Yehovah kaba, toku wi musu go na den konmakandra doronomo fu de nanga den wan di sabi en tu (Nah. 1:7). Na ini wan grontapu di e meki sma lasi-ati, a de wan koni sani fu de makandra nanga brada nanga sisa di kan gi wi deki-ati. Fu san ede dati bun? We, na ini a gemeente yu abi sma di o gi yu deki-ati „fu abi lobi èn fu du bun wroko” (Hebr. 10:24, 25). Efu wi wani sori lobi gi makandra soleki fa Paulus skrifi gi den Hebrewsma, dan wi musu de na ini wan gemeente, noso wan grupu sma di e si makandra leki brada nanga sisa èn di e anbegi a srefi Gado. Efu wi wani sori a lobi disi, wi musu bumui nanga wi Kresten brada nanga sisa. Sobun, du muiti fu go na den konmakandra doronomo èn fu teki prati na den.

14. Fu san ede wi musu de klariklari fu sori berow èn fu tan tyari kenki kon na ini wi libi?

¹⁴ Fu man tron wan Kresten, wi ben abi fu sori berow tu èn wi ben musu drai wi libi noso tapu nanga a sondu libi fu wi. Ma wi musu de klariklari fu sori berow tu te wi du wan sondu èn wi musu tan tyari kenki kon na ini wi libi. Fu di wi na sondu libisma, meki makriki wi kan du sondu. Sondu de leki wan sneki di seti ensrefi fu dyompo beti wan sma na iniwan ten (Rom. 3:9, 10; 6:12-14). Sobun, wi musu de na ai èn wi no musu du neleki wi no abi swakifasi. Koloku taki Yehovah abi pasensi nanga wi, aladi wi e feti nanga den swakifasi fu wi èn aladi wi e du muiti fu tyari kenki kon (Fil. 2:12; 2 Petr. 3:9). Wan sani di e yepi wi fu du disi, na te wi e gebroiki wi ten nanga krakti gi Yehovah, na presi fu gebroiki den gi wisrefi nomo. Wan sisa skrifi: „Mi kweki na ini a tru bribi, ma toku mi ben abi wan heri tra denki fu Yehovah. Mi ben denki taki mi musu frede Yehovah trutru èn taki mi no ben o man plisi en noiti.” Bakaten a sisa disi en bribi kon swaki èn a meki wan tu fowtu na ini en libi. A taki: „A no fu di mi no ben lobi Yehovah meki mi ben de na ini so wan situwâsi, ma na fu di mi no ben sabi en trutru. Mi begi en fayafaya èn mi du dati furu tron. Ne mi bigin kenki.” A taki tu: „Mi kon si fa Yehovah ben e tiri mi leki wan papa. Safrisafri èn na wan switi fasi a ben e yepi mi nanga den problema fu mi èn a ben e sori mi san fu du.”

15. San Yesus nanga en Papa e si?

¹⁵ Gado engel ben taigi Petrus nanga den tra apostel taki den ben musu ’fruteri a bun nyunsu doronomo’ (Tori 5:19-21). Iya, wan tra sani di wi musu du, na fu teki prati na a preikiwroko ibri wiki. Yesus nanga en Papa e si fa wi e sori bribi èn fa wi e preiki (Openb. 2:19). Sobun, a preikiwroko musu de wan fu den moro prenspari sani na ini wi libi.

16. Fu san ede a bun fu prakseri a dei di yu gi yusrefi abra na Yehovah?

¹⁶ Prakseri tu di yu gi yusrefi abra na Yehovah. A moro prenspari sani di wi abi, na wi matifasi nanga Yehovah. A sabi den sma di de fu en. (Leisi Yesaya 44:5.) Prakseri fu a matifasi fu yu nanga  Yehovah èn aksi en na ini begi fu yepi yu fu tan wan mati fu en. Prakseri tu fu a prenspari dei di yu dopu. Di yu dopu yu sori ala sma taki yu gi yusrefi abra na Yehovah. Disi na a moro prenspari bosroiti di yu teki na ini yu heri libi.

17. Fu san ede a prenspari fu horidoro efu wi wani tan mati fu Yehovah?

¹⁷ Di Paulus skrifi den Galasiasma, a sori den o prenspari a de fu horidoro (Gal. 6:9). Disi prenspari tu gi Kresten na ini a ten disi. Yu o kisi tesi, ma Yehovah o yepi yu. Te yu e begi en doronomo fu a gi yu en santa yeye, a o yepi yu fu de koloku èn korostu, srefi efu den problema fu yu no lusu (Mat. 7:7-11). Prakseri a sani disi: Efu Yehovah e sorgu den fowru, yu no denki taki a o sorgu yu moro den? A sabi taki yu lobi en èn taki yu gi yu libi abra na en (Mat. 10:29-31). Fu dati ede, awinsi sortu problema yu kisi, no drai baka noiti. No gi abra noiti. Wi e kisi furu blesi fu di Yehovah sabi wi!

18. San ala sma di sabi Gado musu du now?

¹⁸ Sobun, san yu musu du efu yu dopu no so langa pasa? Tan du muiti fu sabi Yehovah moro bun èn fu tron wan lepi Kresten. Ma san yu musu du efu yu dopu someni yari kaba? Yu srefi musu leri sabi Yehovah moro bun èn tan go na fesi na ini a tru anbegi. Noiti no denki taki yu sabi Yehovah bunbun kaba èn taki yu no abi fu leri sabi en moro bun. Na presi fu dati, wi alamala musu prakseri ten na ten san wi du fu man teki dopu. Na so wi o tan krosibei fu Yehovah di de wi lobi-ati Papa, wi Mati èn wi Gado.—Leisi 2 Korentesma 13:5, 6.