María Isabel na wan fayafaya yongu preikiman na ini a foto San Bernardo na Chili, Zuid-Amerika. En nanga en famiri na Mapuche ingi. A heri osofamiri disi e du fayafaya muiti fu yepi seti wan nyun gemeente na ini a tongo fu den Mapuche sma, di den e kari Mapudungun-tongo tu.

Di den ben sabi taki a Memrefesa fu Krestes en dede ben o hori tu na ini Mapudungun-tongo èn taki 2000 papira ben o druk fu gi sma wan kari gi a Memrefesa, dan a sani disi meki María Isabel go denki fu a tori. San a ben o man du fu yepi prati den papira disi? A ben prakseri den ondrofenitori fu tra yongu Kotoigi di ben abi bun bakapisi di den preiki gi pikin nanga leriman na skoro. A ben taki nanga en papa nanga mama fu a tori, èn den bosroiti taki María Isabel ben o luku fa a ben o prati den papira na skoro. Fa a ben o du dati?

A fosi sani di María Isabel du na taki a aksi den sma na skoro primisi fu plak wan fu den papira na a bigi doro fu a skoro pe ala sma e kon na inisei. Den gi en primisi èn den prèise en taki a du a sani disi. Wan mamanten fosi den les bigin na skoro, a driktoro taki wan sani fu a kari disi so taki ala sma kan yere.

Baka dati, María Isabel aksi fu go na ala den klas. Di a kisi primisi fu den leriman, dan a aksi den studenti na ini ibri klas efu wan fu den na wan Mapuche-sma. María Isabel taki: „Mi ben denki taki kande 10 noso 15 studenti di de Mapuche-sma ben de na a heri skoro, ma moro furu ben de. Te fu kaba, mi prati 150 fu den papira!”

Wan uma di ben si a papira fu a kari na a doro fu a skoro, ben aksi nanga suma a musu taki fu kon sabi moro fu a tori. A ben fruwondru srefisrefi di den seni en go na wan meisje di abi tin yari! Nanga wan lafu na en fesi, María Isabel taki: „A ben fruwakti wan moro owru sma.” Di María Isabel gi na uma wan fu den papira èn a fruteri en syatu fu a tori, dan María Isabel aksi na uma pe a e tan so taki a ben kan go nanga en papa nanga mama fu fruteri na uma moro fu Gado Kownukondre. Den 20 preikiman di e preiki na ini a Mapudungun-tongo ben breiti srefisrefi di na uma disi makandra nanga 26 tra Mapuche sma kon na a Memrefesa. Now a grupu dati de wan gemeente e gro!

Awansi omeni yari yu abi, yu kan meki muiti tu fu kari den pikin na yu skoro noso sma na yu wrokope kon na a Memrefesa, wan publikitaki, noso wan distrikt kongres. Yu kan suku ondrofenitori na ini den publikâsi fu wi di kan yepi yu fu si fa yu kan du a sani disi bun. Sosrefi, begi Yehovah fu a gi yu en santa yeye di o yepi yu fu abi a deki-ati fu taki fu en (Luk. 11:13). Te yu o du dati, dan yusrefi o si taki a de wan prisiri sani èn a e gi furu deki-ati fu si den bun bakapisi fu di yu du muiti fu sreka sani bun.