1. Sortu bun nyunsu Paulus ben yere fu den Kresten fu Korente?

NA INI a yari 55, na apostel Paulus ben de na ini a foto Trowas èn a ben e denki den brada na ini a gemeente Korente. A ben yere taki den ben e meki trobi nanga makandra. Fu di a ben lobi den leki wan papa, meki a seni wan brifi gi den fu gi den rai (1 Kor. 1:11; 4:15). A ben seni en mati Titus go na den. Te Titus ben o drai kon baka fu Korente a ben o kon miti Paulus na Trowas fu fruteri en fa sani ben waka. Paulus e wakti wan tu mun kaba, ma a no e yere noti fu Titus. Toku a e broko en ede ete nanga a gemeente Korente. San Paulus ben o du now? A teki boto go na Masedonia èn a ben breiti srefisrefi di a miti Titus drape. Ne Titus fruteri en taki den brada fu Korente teki den rai di Paulus ben gi den na ini a brifi fu en èn taki den ben angri fu si en. A bun nyunsu dati gi Paulus „moro prisiri”.​—2 Kor. 2:12, 13; 7:5-9.

2. (a) San Paulus ben taki fu bribi nanga prisiri di a skrifi den Korentesma? (b) Sortu aksi wi o piki now?

² Syatu baka dati Paulus skrifi ete wan brifi gi den Korentesma. A taigi den: „A no de so taki wi na basi fu un bribi, ma wi e wroko makandra nanga unu, so taki unu kan de nanga prisiri. Bika na a bribi fu unu e meki taki unu e tanapu kánkan” (2 Kor. 1:24). Fu san ede Paulus ben taki dati? San owruman na ini a gemeente kan leri fu den wortu dati?

3. (a) San Paulus ben abi na prakseri di a taki: „Na a bribi fu unu e meki taki unu e tanapu kánkan”? (b) Fa owruman na ini a ten disi e teki na eksempre fu Paulus?

³ Paulus kari tu prenspari fasi di Kresten musu abi: bribi nanga prisiri. Di a ben e taki fu bribi, a skrifi: „A no de so taki wi na basi fu un bribi, . . . bika na  a bribi fu unu e meki taki unu e tanapu kánkan.” Nanga den wortu disi Paulus sori taki a ben sabi taki a no en, noso wan tra sma ben meki taki den brada na ini Korente tanapu kánkan. Na a bribi di den ben abi na ini Gado ben yepi den fu man du dati. Dati meki Paulus no ben abi fu basi a bribi fu den brada fu en èn a no ben wani du dati tu. A ben sabi taki den ben lobi Gado trutru èn taki den ben wani du san reti (2 Kor. 2:3). Na ini a ten disi owruman e teki na eksempre fu Paulus, fu di den e sori taki den e si den brada fu den leki sma di e dini Gado nanga wan krin ati (2 Tes. 3:4). Owruman no e meki ala sortu hebi wèt gi a gemeente. Na presi fu dati den e du san Bijbel e taki èn den e teki den rai fu na organisâsi fu Yehovah. Den owruman na ini a ten disi no e basi a bribi fu den brada fu den.​—1 Petr. 5:2, 3.

4. (a) Paulus ben taki: „Wi e wroko makandra nanga unu, so taki unu kan de nanga prisiri.” San den wortu disi wani taki? (b) Fa owruman na ini a ten disi kan teki na eksempre fu Paulus?

⁴ Paulus ben taki tu: „Wi e wroko makandra nanga unu, so taki unu kan de nanga prisiri.” Di a skrifi den wortu disi, dan a ben e taki fu ensrefi èn fu den sma di ben e wroko makandra nanga en fu yepi a gemeente Korente. Fa wi du sabi dati? We, na ini a srefi brifi disi Paulus e kari tu fu den sma dati. A skrifi: „Mi nanga Selfanus nanga Timoteyus ben preiki gi unu fu a Manpikin fu Gado, . . . Yesus” (2 Kor. 1:19). Ibri tron te Paulus ben e skrifi fu den sma di ben „e wroko makandra” nanga en, dan a ben e taki fu sma soleki Apolos, Akwila, Preska, Timoteyus, Titus nanga trawan, di ben e wroko skinskin nanga en fu du a preikiwroko (Rom. 16:3, 21; 1 Kor. 3:6-9; 2 Kor. 8:23). Sobun, di Paulus taki: „Wi e wroko makandra nanga unu, so taki unu kan de nanga prisiri”, dan a ben e gi den Korentesma a dyaranti taki en nanga trawan ben e wroko tranga fu yepi a gemeente fu dini Gado nanga prisiri. Kresten owruman na ini a ten disi wani du a srefi sani. Den wani du ala san den man fu yepi den brada fu den fu „dini Yehovah nanga prisiri”.​—Ps. 100:2; Fil. 1:25.

5. Sortu aksi den ben poti gi wan tu brada nanga sisa? San yu musu du te yu e luku a piki di den gi?

⁵ No so langa pasa wan grupu fayafaya preikiman di e libi na difrenti presi na grontapu ben musu piki na aksi disi: „Sortu sani di wan owruman taki noso du, meki taki yu kisi moro prisiri?” Te wi o luku now san den sma dati ben piki, dan aksi yusrefi fa yu ben o piki na aksi dati. Prakseri sosrefi san ibriwan fu wi kan du fu yepi den brada nanga sisa na ini wi gemeente fu abi prisiri. *

6, 7. (a) San na wan fasi fa owruman kan teki na eksempre fu Yesus, Paulus nanga tra futuboi fu Gado? (b) Fu san ede den brada nanga sisa fu wi e firi moro prisiri te wi e memre den nen?

⁶ Furu fu wi brada nanga sisa e taki dati den abi moro prisiri te owruman e broko den ede nanga den. Wan prenspari fasi fa owruman e du disi na te den e teki na eksempre fu David, Elihu, nanga Yesus. (Leisi 2 Samuel 9:6; Yob 33:1; Lukas 19:5.) Den futuboi disi fu Yehovah ben e broko den ede trutru nanga trawan. Te den ben e taki nanga wan sma, dan den ben e kari a sma dati na en nen. Paulus srefi ben frustan taki a prenspari fu no frigiti den nen fu en Kresten brada nanga  sisa. Na a kaba fu wan fu den brifi fu en a seni odi gi moro leki 25 brada nanga sisa di a kari na den nen. Wan fu den sma disi ben de a Kresten sisa Perses. Paulus ben taki fu en: „Taki wi lobiwan Perses odi.”​—Rom. 16:3-15.

⁷ Son owruman e frigiti sma nen makriki. Ma te den e du muiti fu memre sma nen, dan a de neleki den e taigi den brada nanga sisa fu den: ’Yu prenspari gi mi’ (Eks. 33:17). Te owruman e hori a Waktitoren-studie noso wan tra konmakandra èn den e memre den nen fu den sma di e gi piki, dan dati e meki tu taki den sma e firi prisiri.​—Luku Yohanes 10:3.

8. San na wan prenspari fasi fa Paulus ben teki na eksempre fu Yehovah nanga Yesus?

⁸ Paulus sori tu taki a ben broko en ede nanga trawan, fu di a ben e prèise den. Disi na ete wan prenspari fasi fu meki yu Kresten brada nanga sisa de nanga moro prisiri. Dati meki Paulus ben skrifi tu taki a de klariklari fu wroko, so taki den brada fu en kan abi prisiri. Paulus ben skrifi: „Mi e meki bigi srefisrefi fu unu” (2 Kor. 7:4). Den wortu disi ben musu fu naki na ati fu den brada na ini Korente. Paulus ben taki wan srefi sortu sani di a ben skrifi tra gemeente (Rom. 1:8; Fil. 1:3-5; 1 Tes. 1:8). Baka di Paulus kari Perses en nen na ini a brifi di a skrifi gi a gemeente na ini Rome, dan a taki fu en: „A wroko tranga gi masra” (Rom. 16:12). A no de fu taki dati den wortu dati gi a sisa deki-ati. Te Paulus ben prèise trawan, dan a ben teki na eksempre fu Yehovah nanga Yesus.​—Leisi Markus 1:9-11; Yohanes 1:47; Opb. 2:2, 13, 19.

9. Fu san ede sma na ini a gemeente de nanga moro prisiri te den e prèise makandra?

⁹ Owruman na ini a ten disi sabi taki a de fanowdu fu taigi den brada fu den taki den e warderi den (Odo 3:27; 15:23). Ibri leisi te wan owruman e du dati, dan a de leki a e taki: ’Mi e si fa yu e meki muiti èn mi breiti nanga yu.’ Owruman musu taigi den brada nanga sisa fu den taki den e warderi den, fu di den brada nanga sisa abi dati fanowdu. Wan sisa di pasa 50 yari kaba, taki dati sma na wrokope no abi a gwenti fu taigi en taki a e du en wroko bun. Den sma drape e strei nanga makandra èn den no e broko den ede nanga trawan. Sobun, te wan owruman e taigi en tangi fu wan sani di a du na ini a gemeente, dan a e breiti srefisrefi. A taki: „Mi e firi taki mi hemel Tata lobi mi.” Wan brada di e kweki tu pikin en wawan e firi so tu. No so langa pasa wan owruman taigi en fa a breiti nanga en. Fa a brada disi ben firi? A taki: „Den wortu fu na owruman gi mi deki-ati trutru.” Iya, te wan owruman e prèise en brada nanga sisa, dan a e meki den firi bun èn den e dini Gado nanga moro prisiri. Disi o tranga den fu tan waka na tapu a pasi fu libi èn fu no kon weri.​—Yes. 40:31.

10, 11. (a) Fa owruman kan teki na eksempre fu Nehemia? (b) San o yepi wan owruman fu gi en brada nanga sisa deki-ati te a e go luku den?

¹⁰ San na wan prenspari fasi fa owruman kan sori lobi gi den brada nanga sisa na ini a gemeente fu meki den abi prisiri? Den no musu draidrai fu yepi den wan di abi deki-ati fanowdu. (Leisi Tori fu den apostel 20:28.) Te owruman e du dati, dan den e teki na eksempre fu reti-ati futuboi fu Gado na ini Bijbel ten. Luku san a reti-ati fesiman Nehemia du di a si taki sonwan fu den brada fu en ben lasi-ati. Bijbel e taki dati a gi den deki-ati wantewante (Neh. 4:14). Owruman na ini a  ten disi musu du a srefi. Den e du san den man fu yepi den Kresten brada nanga sisa fu abi wan tranga bribi. Efu den wani gi den brada nanga sisa fu den deki-ati, den e go luku den te na oso, efu a kan. Na den okasi dati, den wani fruteri den „sani di abi fu du nanga Gado”, sani di o tranga a bribi fu den (Rom. 1:11). San o yepi owruman fu du dati?

¹¹ Fosi wan owruman go na wan sma en oso fu gi en deki-ati, dan a musu teki pikinso ten fu prakseri fu a sma dati. Sortu problema a brada noso sisa dati abi? San mi kan taki fu gi en deki-ati? Sortu Bijbeltekst noso eksempre fu wan sma na ini Bijbel e fiti a situwâsi fu en? Te wan owruman e teki ten fu denki den sani disi, dan a kan taki sani di o gi a sma deki-ati trutru. Te wan owruman e go luku den brada nanga sisa fu en fu gi den deki-ati, dan a e gi den na okasi fu taki fa den e firi èn a e arki den te den e taki (Yak. 1:19). Wan sisa ben taki: „A e trowstu mi te wan owruman e arki mi trutru.”​—Lukas 8:18.

12. Suma na ini a gemeente abi deki-ati fanowdu? Fu san ede?

¹² Suma musu kisi deki-ati fu den owruman? Paulus gi Kresten owruman a rai fu „poti prakseri . . . na ala den skapu”. Iya, ala sma na ini a gemeente musu kisi deki-ati, srefi den preikiman nanga pionier di e du a wroko fu Yehovah omeni yari kaba. Fu san ede den owruman musu gi den deki-ati? We, son leisi srefi den sma disi, di abi wan tranga bribi, e firi a hebi fu na ogri grontapu disi. Wan sani di ben miti Kownu David e sori fu san ede den brada nanga sisa disi abi yepi fanowdu.

13. (a) Sortu okasi Yisbi-Beinob si fu kiri David? (b) Fa Abisai ben man yepi David biten?

¹³ Syatu baka di David ben salfu leki kownu, a ben musu feti nanga Goliat, wan langa bigiskin man fu den Rafasma. David di ben abi deki-ati ben kiri a man disi (1 Sam. 17:4, 48-51; 1 Kron. 20:5, 8).  Ma wan tu yari baka dati, di Israel ben e feti nanga den Filisteasma, David kon miti baka nanga wan bigiskin man di nen Yisbi-Beinob. A ben de wan Rafasma tu (2 Samuel 21:16). Ma na ini a feti disi, a langa bigiskin man misi fu kiri David. Fa dati du kon? Disi no ben de fu di David no ben abi deki-ati moro, ma fu di „David kon weri” soleki fa Bijbel e taki. Di Yisbi-Beinob si taki David no ben abi so furu krakti moro, dan a „ben wani kiri David”. Ma fosi a bigiskin man disi kisi na okasi fu dyuku David kiri, dan ’wantewante Abisai, a manpikin fu Seruya, go yepi David èn a kiri a Filistea man disi’ (2 Sam. 21:15-17). Iya, David ben kan lasi en libi! A no de fu taki dati David ben breiti trutru taki Abisai ben de na ai fu sorgu taki ogri no miti en èn taki a yepi en wantewante. San a tori disi e leri wi?

14. (a) Fa wi o man wini bigi problema? (b) Fa owruman kan yepi trawan fu kisi krakti nanga prisiri baka? Gi wan eksempre.

¹⁴ Leki a pipel fu Yehovah na heri grontapu wi e tan du a preikiwroko fu wi, awinsi fa Satan nanga den bakaman fu en e gens wi. Neleki fa David ben musu feti nanga a bigiskin man Goliat èn a wini en, na so sonwan fu wi musu feti nanga bigi problema. Ma fu di wi e frutrow dorodoro tapu Yehovah, wi man wini den problema disi. Toku a e pasa son leisi taki wi e kon weri, so taki wi no abi nofo krakti fu feti nanga den hebi fu a grontapu disi. Te wi kon weri so, dan wi kan lasi-ati makriki fu di a hebi gi wi fu lusu den problema. Na den momenti dati a deki-ati di owruman e gi wi kan yepi wi fu kisi krakti nanga prisiri baka, soleki fa furu sma ondrofeni. Wan sisa di pasa 60 yari èn di e pionier e taki: „Wan pisi ten pasa, mi no ben firi bun èn a preikiwroko ben e meki mi kon weri. Ne wan owruman di ben si taki mi no ben abi krakti moro kon na mi. A taki nanga mi fu wan Bijbel tori di gi mi deki-ati. Mi fiti den rai di a gi mi èn mi kisi wini fu dati.” A sisa disi e taki moro fara: „Mi breiti taki a lobi-ati owruman disi si taki mi ben kon swaki èn taki a yepi mi!” Iya, a e gi wi deki-ati fu sabi taki wi abi lobi-ati owruman di e poti prakseri na wi èn di de klariklari fu yepi wi neleki fa Abisai fu owruten ben yepi David.

15, 16. (a) Fu san ede den brada nanga sisa ben lobi Paulus? (b) Fu san ede wi breiti nanga den lobi-ati owruman fu wi?

¹⁵ Owruman e wroko tranga. Son leisi owruman no man sribi bun te neti fu di den e broko den ede nanga den brada nanga sisa fu den. Kande den e wiki lati neti fu begi gi den, noso fu go yepi den (2 Kor. 11:27, 28). Toku owruman e tyari den frantwortu nanga den heri ati èn nanga prisiri, neleki Paulus di ben skrifi den Korentesma: „Nanga prisiri mi wani gi ala san mi abi èn mi wani gi misrefi dorodoro fu a bun fu unu” (2 Kor. 12:15). Iya, fu di Paulus ben lobi den brada nanga sisa fu en, a ben e du ala san a man fu gi den deki-ati (Leisi 2 Korentesma 2:4; Fil. 2:17; 1 Tes. 2:8). Na fu dati ede den brada ben lobi Paulus so!​—Tori 20:31-38.

¹⁶ Wi lobi den owruman fu wi èn wi e taki Yehovah tangi fu den brada disi di a poti fu sorgu wi. Te den e poti prakseri na wi, dan dati e gi wi moro prisiri. A e gi wi deki-ati te den e kon luku wi na oso. Boiti dati, wi breiti taki den de klariklari fu yepi wi te den problema fu a libi e moro wi. Iya, den Kresten owruman disi e wroko tranga fu yepi wi so taki wi kan de nanga prisiri.