SMA ben e si Petrus, Yakobus, nanga Yohanes „leki stonfutu fu a gemeente”. Na ini a yari 49, den brada disi gi Paulus nanga Barnabas wan wroko fu du te den ben o go na difrenti presi fu preiki gi den trakondre sma. Den taigi Paulus nanga Barnabas taki den no ben musu frigiti fu yepi den pôti Kresten brada nanga sisa fu den (Gal. 2:9, 10). Fa Paulus nanga Barnabas du disi?

Den brifi fu Paulus e sori taki a ben e hori den pôtiwan na prakseri. Fu eksempre, a ben skrifi gi den Kresten na ini Korente: „Now mi wani taki fu a moni di unu e piki gi den santawan. Unu kan du soleki fa mi ben taigi den gemeente na Galasia fu du. Ibri fosi dei fu a wiki, ibriwan fu unu musu poti san a man na wan sei, so taki moni no abi fu piki te mi doro. Un musu skrifi mi sortu man de fu frutrow, dan te mi doro drape mi o seni den man dati go na Yerusalem fu tyari a moni disi di unu gi nanga un heri ati.”​—1 Kor. 16:1-3.

Na ini a du fu tu brifi di Gado meki Paulus skrifi gi den Korentesma, Paulus taki baka fu san ede den ben musu piki moni. A ben taki dati na a fasi disi den ben kan ’gebroiki san den abi bogobogo fu yepi den wan di e mankeri sani’.​—2 Kor. 8:12-15.

Na ini a yari 56 di Paulus skrifi den Kresten na ini Rome, a wroko fu piki moni fu yepi den pôti brada nanga sisa pikinmoro ben kon na wan kaba. A taki: „Now mi o go na Yerusalem fu yepi den santawan. Den wan di de na Masedonia nanga Akaya ben prisiri fu prati den sani fu den nanga den pôti santawan di de na Yerusalem” (Rom. 15:25, 26). A no langa baka dati, Paulus ben man kaba a wroko disi di a ben kisi fu du, bika di a drai go baka na Yerusalem èn den srudati grabu en, a taigi Granman Feliks fu Rome: „Mi drai go baka na Yerusalem fu tyari moni gi mi pipel èn fu tyari offer gi Gado.”​—Tori 24:17, Nyun Testamenti.

A fasi fa den fosi yarihondro Kresten ben e denki fu a tori disi, de krin fu si te wi e luku san Paulus taki fu den Kresten fu Masedonia. A taki dati den Kresten dati ’begi den tangitangi efu den ben kan kisi a grani fu gi sani’. Paulus ben gi den Kresten fu Korente a deki-ati fu teki den Kresten fu Masedonia leki eksempre. A taki: „Meki ibri sma gi soleki fa a bosroiti na ini en ati. A no musu du dati nanga krutukrutu noso fu di sma dwengi en, bika Gado lobi a sma di e gi sani nanga prisiri.” San meki taki den gemeente ben lobi fu gi sani? Den no ben e du disi soso „fu gi den santawan ala san den abi fanowdu”. Ma den ben du en tu, so taki ’furu sma ben o taki Gado tangi’ (2 Kor. 8:4; 9:7, 12). Fu den srefi sani disi ede wi kan teki a gwenti tu fu gi sani. Wi kan de seiker taki Yehovah Gado o blesi wi te wi e yepi trawan nanga wi heri ati, sondro fu denki wisrefi nomo. Wi alamala sabi taki na a blesi fu Yehovah e meki sma kon gudu.​—Odo 10:22.

Soleki fa a ben de na ini a ten fu Paulus, na so furu sma na ini a ten disi e ’poti moni na wan sei’ fu poti dati na ini den kisi di nen „Gi a wroko di e du na heri grontapu” (1 Kor. 16:2). Ibri mun, gemeente e seni den moni disi go na a bijkantoro fu Yehovah Kotoigi na ini den eigi kondre. Yu kan seni sani tu tapu a tra nen di Yehovah Kotoigi e gebroiki na lanti. Efu yu wani sabi a nen di den e gebroiki na ini yu kondre, dan yu kan aksi dati na a bijkantoro di e luku a wroko na ini yu kondre. Yu kan feni na adres fu a bijkantoro dati tapu Internet na www.isa4310.com. Disi na den sani di yu kan seni fu horibaka gi a wroko na heri grontapu:

SANI DI DEN KAN GEBROIKI WANTEWANTE

• Disi na sani soleki moni, gowtu sani noso tra diri sani di yu abi.

• Te yu o seni den sani disi, yu musu skrifi wan brifi tu fu sori taki yu e gi a moni noso den diri sani disi fu horibaka gi a wroko di wi e du.

MONI DI SMA KAN KISI BAKA, TE DEN ABI DATI FANOWDU

• Sma kan seti sani, so taki na organisâsi kan gebroiki a moni fu den. Ma te den abi en fanowdu den o kisi a moni baka.

• Te wan sma o du disi, a musu skrifi na ini wan brifi taki a e gi na organisâsi a moni disi fu gebroiki solanga en srefi no abi en fanowdu.

SANI DI SMA KAN SETI FU HORIBAKA GI A WROKO

Boiti taki sma kan gi moni noso diri sani, tra fasi de tu fa den kan horibaka gi a Kownukondre wroko na heri grontapu. Ma efu yu wani horibaka gi a wroko na heri grontapu na wan tra fasi, a bun fu aksi a bijkantoro di e luku a wroko na ini a kondre fu yu, fa yu kan du dati na ini a kondre fu yu. Fu di den sani disi abi fu du nanga lantiwèt, meki a bun fu taki sosrefi nanga afkati noso belastingman fu den tori disi.

Verzekering: Wan sma kan poti en levensverzekering noso en pensyun-moni tapu a nen di Yehovah Kotoigi e gebroiki na lanti.

A moni di sma abi na bangi: Wan sma kan poti iniwan moni noso tra warti sani di a abi na bangi tapu a nen di Yehovah Kotoigi e gebroiki na lanti, so taki na organisâsi kan kisi dati bakaten noso te a sma dede. Disi musu pasa soleki fa den wèt fu a bangi e sori.

Gron nanga oso: Te sma abi gron nanga oso di den man seri, dan den kan poti dati tu tapu a nen di Yehovah Kotoigi e gebroiki na lanti. Den kan gi den sani dati wantewante, noso den kan bosroiti fu tan libi na ini na oso noso na tapu a gron dati teleki den dede. Baka dati, na organisâsi o kisi a gron noso na oso.

Testamenti nanga machtiging papira: Wan sma kan skrifi na ini en testamenti taki na organisâsi musu kisi a moni noso den gudu fu en baka te a dede. Te a wani du disi, a musu poti den sani dati tapu a nen di Yehovah Kotoigi e gebroiki na lanti èn a musu du en soleki fa lantiwèt e taki. A musu meki wan machtiging papira tu di e sori suma sa sorgu taki sani pasa soleki fa a wani.

Efu yu wani sabi moro fu den fasi fa sma kan horibaka gi a Kownukondre wroko, dan yu kan skrifi go na a adres fu a bijkantoro fu Yehovah Kotoigi, noso yu kan bèl go na a nomru di skrifi dyaso na ondrosei.