„Gado o blesi unu gi den sani di unu du”

KOWNU Asa nanga en legre e saka den bergi fu Yudea esi-esi fu go na a lagipresi krosibei fu a se. Te den e doro na a bradi pisi fu a lagipresi, Asa e tan tanapu. A skreki fu a sani di a e si. A bigi legre fu Etiopia seti kampu moro fara na ini a lagipresi! A musu de taki den feanti abi wán milyun srudati, ma a legre fu Asa abi pikinso moro leki wan afu milyun srudati.

Asa o abi fu feti. San na a fosi sani di a e du? A e taigi den ofsiri fu en san den musu du? A e gi den srudati fu en deki-ati? A e seni brifi gi en famiri? Nôno. A fosi sani di Asa e du na ini a muilek situwâsi disi, na begi.

Fosi wi o go luku a begi fu Asa èn san ben pasa baka dati, meki wi luku sortu sma Asa ben de. San meki taki a aksi Gado fu yepi en? A ben kan fruwakti taki Gado ben o yepi en? San a tori disi e leri wi fu a fasi fa Yehovah e blesi den futuboi fu en di e du san bun?

SUMA BEN DE ASA?

Asa tron kownu na ini a yari 977 Fosi Krestes. Na a ten dati Israel nanga Yuda ben prati na ini tu kownukondre twenti yari kaba. Yuda ben kon pori srefisrefi, fu di den sma drape ben e anbegi falsi gado. Srefi den heihei man na ini a kondre ben e dini den falsi gado fu Kanan di sma ben e anbegi fu kisi furu pikin. Ma Bijbel e taki dati Asa „du ala sani di Yehovah en Gado ben wani. A du ala sani di Gado ben feni bun.” Asa ben „puru den altari pe sma ben e go anbegi den gado fu den trakondre sma. Boiti dati, a broko den hei presi puru pe sma ben e anbegi falsi gado. A broko den santa pilari puru èn a koti den santa postu trowe” (2 Kroniki 14:2, 3). Na ini Yuda yu ben abi man tu ’di ben teki en leki wroko fu abi seks’ nanga tra man na ini a tempel te den ben e anbegi den falsi gado. Asa ben puru den man disi na ini a kondre tu. Ma Asa no puru falsi anbegi nomo. A gi den sma deki-ati tu fu „anbegi Yehovah, a Gado fu den afo fu den” èn fu „hori den wèt nanga den komando fu en”.​—1 Kow. 15:12, 13; 2 Kron. 14:4.

Yehovah ben breiti nanga Asa fu di a ben de fayafaya gi a tru anbegi. Dati meki Yehovah blesi en, so taki furu yari langa feti no ben de na ini a kondre. Fu dati ede a kownu taki: „Wi suku yepi na Yehovah wi Gado . . . Wi suku yepi na Gado èn a meki ala sani waka bun gi wi.” Na ini a ten dati di feti no ben de, a pipel ben e meki den skotu fu den foto na ini Yuda kon moro tranga. Bijbel e taki: „Den bigin bow èn a wroko ben e go bun.”​—2 Kroniki 14:1, 6, 7.

ASA E GO NA FETI

Asa ben sabi taki Yehovah e blesi den wan di e du sani di e sori taki den abi bribi. Dati meki a begi Yehovah di a ben musu go feti nanga a moro bigi libisma legre di Bijbel e taki fu en. Na ini a begi fu en, Asa aksi Yehovah fu yepi en. A ben sabi taki efu a ben frutrow tapu Gado èn efu Gado ben e horibaka gi en, dan a no abi trobi o bigi èn o tranga a legre fu a feanti de. Asa ben sabi tu taki a feti disi ben kan gi Yehovah biginen noso porinen. Dati meki Asa begi: „Yehovah wi Gado, mi e begi yu, yepi wi fu di na ini yu wi poti bribi èn na ini yu nen wi hari kon feti nanga a bigi legre disi. Ke Yehovah, yu na wi Gado. Mi e begi yu fu no gi libisma okasi fu wini yu” (2 Kron. 14:11). A ben de  neleki a taki: ’Yehovah, nanga yu den Etiopiasma kon feti. No meki den swaki libisma disi wini yu pipel èn gi yu porinen.’ Gado piki a begi fu Asa. Bijbel e taki dati „Yehovah meki Asa nanga den srudati fu Yuda wini den Etiopiasma. Ne den Etiopiasma lowe gowe.”​—2 Kroniki 14:12.

Na ini a ten disi a pipel fu Yehovah musu feti nanga furu tranga feanti. Ma wi no e feti nanga trutru fetisani. Toku wi kan de seiker taki Yehovah o meki wi wini te wi tan dini en èn te wi e gi en nen grani. Ibriwan fu wi abi wan feti fu feti. Kande wi musu feti fu no teki a denki fu a grontapu disi, kande wi musu feti nanga den swakifasi fu wi, noso kande wi musu feti nanga iniwan sani di kan meki taki wi osofamiri no de mati fu Gado moro. Awinsi sortu tesi wi e kisi, a begi fu Asa kan gi wi deki-ati. Na Yehovah meki Asa wini a feti. Efu wi e frutrow na Yehovah tapu, a o yepi wi fu wini iniwan feti di wi musu feti. A tranga moro iniwan sma noso iniwan sani.

WAN DEKI-ATI NANGA WAN WARSKOW

Baka a feti, di Asa ben e drai kon na oso baka, a profeiti Asaria kon miti en. Ne a profeiti disi gi en wan deki-ati nanga wan warskow. A taki: „Asa nanga ala sma fu a lo fu Yuda èn fu a lo fu Benyamin, un arki mi! Yehovah o de nanga unu, solanga unu de nanga en. Efu unu suku en, a o meki unu feni en. Ma efu unu gowe libi en, a o gowe libi unu. . . . Un musu abi deki-ati. No lasi-ati, fu di Gado o blesi unu gi den sani di unu du.”​—2 Kron. 15:1, 2, 7.

Den wortu disi kan tranga a bribi fu wi. Den e sori taki Yehovah o de nanga wi solanga wi e tan dini en nanga wi heri ati. Te wi e begi en fu yepi wi, wi kan de seiker taki a o arki wi. Asaria taki: „Un musu abi deki-ati.” Nofo tron wi musu abi furu deki-ati fu man du san reti, ma nanga a yepi fu Yehovah wi o man du dati.

Asa en granmama Maka ben meki ’wan tegu popki fu anbegi a santa postu’. Dati meki Asa ben musu puru en leki heihei uma na ini kownu-oso. Wi kan frustan taki disi no ben makriki gi en. Toku a du a sani disi èn a bron a tegu popki fu en granmama (1 Kow. 15:13). Yehovah blesi Asa fu di a ben abi a deki-ati fu du san reti. Wi srefi musu du muiti fu gi yesi na Yehovah ala ten èn wi musu tan du san reti, awinsi wi famiri e dini Gado noso awinsi den no e du dati. Efu wi e gi yesi na Yehovah ala ten, a o blesi wi.

Wan fu den blesi di Asa kisi, na taki a si fa furu Israelsma fu a noordsei kownukondre kon na Yuda di den si taki Yehovah ben de nanga en. Furu fu den sma fu a noordsei kownukondre ben drai baka gi Yehovah. Ma den Israelsma di kon na Yuda ben lobi a tru anbegi so te, taki den bosroiti fu gowe libi den oso fu go libi makandra nanga den tra futuboi fu Yehovah. Bakaten Asa nanga ala sma na ini Yuda agri fu „meki wan frubontu nanga Yehovah, a Gado fu den afo fu den. Den pramisi en taki den ben o dini en nanga den heri ati èn nanga den heri libi”. San ben de a bakapisi? Gado „meki den feni en. Baka dati Yehovah tan meki sani waka bun gi den” (2 Kron. 15:9-15). Na ini a ten disi wi e prisiri tu fu si taki reti-ati sma e bosroiti fu anbegi Yehovah.

Di a profeiti Asaria ben taki nanga Asa, a gi wan warskow tu. A taki: „Efu unu gowe libi [Yehovah],  a o gowe libi unu.” Wi no wani du dati noiti. Efu wi ben o du dati, dan wi ben o abi soso takru bakapisi (2 Petr. 2:20-22). Bijbel no e taki fu san ede Yehovah gi Asa a warskow disi, ma san wi sabi, na taki a kownu no gi yesi na a warskow disi.

’YU DU WAN DON SANI’

Na ini a di fu dritenti na siksi yari di Asa ben e tiri leki kownu, Kownu Bayesa fu Israel go feti nanga Yuda. Bayesa meki den skotu fu a foto Rama kon moro tranga. A foto disi ben de leti na mindri Israel nanga Yuda èn a ben de aiti kilometer nomo fu Yerusalem. Kande Bayesa tranga den skotu fu a foto fu di a no ben wani taki a pipel fu en go na Yuda fu anbegi Yehovah èn fu dini Kownu Asa. Ma di Kownu Bayesa go feti nanga Yuda, Asa no aksi Gado fu yepi en, leki fa a ben du dati di den Etiopiasma kon feti nanga en. Na presi fu dati, a go suku yepi na libisma. A seni kado gi a kownu fu Siria èn a aksi en fu go feti nanga Israel. Baka di den Siriasma bigin feti nanga Israel, Bayesa tapu fu wroko na den skotu fu Rama.​—2 Kron. 16:1-5.

Fu di Yehovah no ben lobi san Asa du, meki a seni a profeiti Hanani fu taigi en dati. Asa ben sabi san Gado du di den Etiopiasma ben kon feti nanga den. Sobun, a ben musu fu sabi taki „den ai fu Yehovah e luku heri grontapu fu si san e pasa, so taki a kan sori a krakti fu en fu yepi den wan di e dini en nanga den heri ati”. A kan taki Asa kisi rai di no bun. Noso kande Asa ben denki taki en srefi ben kan wini disi leisi, fu di Bayesa en legre no ben bigi so. Awinsi fa a no fa, a leisi disi Asa ben e frutrow tapu libisma na presi fu frutrow tapu Yehovah. Dati meki Hanani taigi en: „Fu di yu du a don sani disi, meki tra kondre o opo kon feti nanga yu now.”​—2 Kroniki 16:7-9.

Di Asa yere san Hanani taki, en ati bron srefisrefi èn a poti Hanani na strafu-oso (2 Kron. 16:10). Kande Asa ben denki: ’Fa a kan gi mi piri-ai? Mi e dini Gado furu yari kaba!’ Noso kande Asa no ben e denki krin moro fu di a ben kon owru kaba. We, Bijbel no e taki fu san ede Asa du disi.

Di Asa ben e tiri 38 yari kaba, a kisi wan hebi siki na en futu. Bijbel e taki dati „srefi di a ben e siki, a no suku yepi na Yehovah, ma na den datra”. A sori leki Asa no ben de so wan bun mati fu Yehovah moro èn kande na so a tan teleki a dede sowan 41 yari baka di a tron kownu.​—2 Kron. 16:12-14.

Ma toku a sori leki den bun fasi fu Asa nanga a faya di a ben abi gi a tru anbegi ben de moro prenspari gi Yehovah leki den fowtu di a meki. Noiti a tapu fu dini Yehovah (1 Kow. 15:14). Sobun, san wi kan leri fu a libi fu Asa? Wi musu hori na prakseri ala ten fa Yehovah yepi wi na ini a ten di pasa, bika disi o meki taki wi o suku yepi na en baka, te tra tesi e miti wi. Boiti dati, wi no musu denki taki wi no abi Bijbel rai fanowdu, soso fu di wi e dini Gado someni yari kaba. Te wi e meki fowtu, Yehovah o gi wi piri-ai, awinsi o langa wi e dini en kaba. Sobun, wi musu abi sakafasi èn wi musu teki a piri-ai, so taki wi kan tron moro bun sma. A moro prenspari sani di wi kan leri, na taki wi hemel Tata o de nanga wi, solanga wi e dini en nanga wi heri ati. Iya, den ai fu Yehovah e luku heri grontapu, bika a e suku den sma di e dini en nanga den heri ati. A wani gebroiki en krakti fu yepi den. Na dati Yehovah ben du gi Asa èn na dati a kan du gi wi tu.

[Prenspari pisi na tapu bladzijde 9]

Yehovah e blesi den sma di e dini en nanga den heri ati

[Prenspari pisi na tapu bladzijde 10]

Wi musu abi deki-ati fu man du san reti