Bedrigifasi​—Wan marki fu den lasti dei!

„Wi ben tai hori na unu èn wi ben du san reti. Unu no ben man feni fowtu na wi tapu.”​—1 TES. 2:10.

SUKU A PIKI TAPU DEN PRENSPARI AKSI DISI:

San wi kan leri fu den tori fu Delaila, Absalom, nanga Yudas Iskariot di bedrigi trawan?

Fa wi kan de leki Yonatan nanga Petrus di ben tai hori na den mati fu den ala ten?

Fa wi kan tai hori na wi trowpatna èn na Yehovah ala ten?

1-3. (a) San na wán sani di e sori krin taki wi e libi na ini den lasti dei? Fruklari disi. (b) Sortu dri aksi wi o luku na ini na artikel disi?

SORTU fasi Delaila, Absalom, nanga Yudas Iskariot ben abi? Den alamala bedrigi wan sma. Delaila bedrigi Krutuman Simson di ben lobi en. Absalom bedrigi en papa Kownu David èn Yudas bedrigi en Masra Krestes Yesus. Den ogri di den sma disi du hati furu trawan èn den tyari furu problema kon! Ma fu san ede wi musu poti prakseri na disi?

² Wan skrifiman taki dati bedrigifasi na wan fu den takru maniri di furu sma na ini a ten disi abi. Ma wi no musu fruwondru fu disi. Di Yesus ben taki a profeititori fu a marki fu „a kaba fu a grontapu”, a taki: „Furu sma . . . o tori makandra” (Mat. 24:3, 10). Te wan sma e „tori” wan trawan, dan disi wani taki dati a sma e drai baka gi a trawan fu kan gi en abra na wan feanti. A drai di sma e drai baka gi trawan e sori taki wi e libi na ini „den lasti dei” trutru, soleki fa Paulus ben taki na fesi. A ben taki dati sma „no o tai hori na trawan” èn taki „den o tori trawan” (2 Tim. 3:1, 2, 4). Son leisi sma e meki felem noso den e skrifi buku pe sma e bedrigi makandra. Den e du disi fu meki a tori kon moro span, noso den wani meki a gersi leki disi na wan fasi fa tu sma e sori taki den lobi makandra. Ma buku nanga felem no e sori fa sani de trutru. Na ini na aladei libi, bedrigifasi e tyari soso sari nanga pen kon. Iya, te wi e luku fa someni sma e bedrigi trawan èn fa den e drai baka gi makandra, wi e si krin taki wi e libi na ini den lasti dei!

³ San wi kan leri fu den Bijbel eksempre fu sma di bedrigi trawan? San wi kan leri fu den wan di tai hori na den mati fu den ala ten? Na suma wi musu tai hori ala ten, awinsi san e pasa? Meki wi go luku den piki fu den aksi disi.

 EKSEMPRE FU SMA DI BEDRIGI TRAWAN

4. Fa Delaila bedrigi Simson èn fu san ede disi ben de wan lagi sani fu du?

⁴ Meki wi luku fosi, a tori fu Delaila di ben lai triki èn di Krutuman Simson ben lobi. Simson ben o go feti nanga den Filisteasma fu yepi a pipel fu Gado. Delaila no ben lobi Simson trutru èn kande den feifi Filistea kownu di ben e wroko makandra, ben sabi dati. Fu di den ben wani kiri Simson, den taigi Delaila taki den o pai en furu moni efu a kon sabi san ben meki Simson kon tranga so. Ne Delaila, di ben gridi gi moni, teki a moni èn a agri fu du san den kownu aksi. Dri leisi a aksi Simson san meki a tranga so, ma Simson no taigi en. Delaila „tan takitaki na Simson yesi èn . . . a tan dwengidwengi Simson fu taigi en”. Te fu kaba „Simson kon fuga”. Dati meki a taigi en taki noiti a ben koti en wiwiri èn taki a ben o lasi en krakti efu sma ben o koti en wiwiri. * Di Delaila kon sabi disi, a meki sma koti Simson wiwiri di a ben e sribi na tapu en bowtu. Baka dati a gi en abra na den feanti meki den du nanga en san den wani (Krut. 16:4, 5, 15-21). Dati ben de wan lagi sani fu du! Gridi meki taki Delaila bedrigi wan sma di ben lobi en.

5. (a) Fa Absalom drai baka gi David èn san disi ben sori fu en? (b) Fa David ben feni en di Akitofel drai baka gi en?

⁵ Meki wi luku now a tori fu a bedrigiman Absalom. A ben gridi fu abi makti nanga biginen. Dati meki a ben wani tron kownu na presi fu en papa David. Sobun, Absalom bigin du sani „fu meki moro nanga moro Israelsma kon lobi en”. A ben du leki a lobi a pipel èn a ben pramisi den sani di a no ben o du. A ben e brasa èn bosi den sma fu sori den taki a lobi den èn taki a ben e broko en ede nanga den trutru (2 Sam. 15:2-6). Absalom ben man meki Akitofel, a bunbun mati fu David, drai baka gi David èn Akitofel teki a sei fu Absalom (2 Sam. 15:31). Na Psalm 3 nanga Psalm 55 David skrifi fa a hati en di den bedrigi en na so wan fasi. (Ps. 3:1-8; leisi Psalm 55:12-14.) A sani di Absalom ben wani du ben de wan ogri-ati sani trutru, fu di a ben wani puru a kownu di Yehovah ben poti. A fasi fa a bedrigi sma ben e sori krin taki a no ben feni taki Gado ben abi a reti fu taki suma ben o tron kownu (1 Kron. 28:5). Ma a no ben man teki a kownukondre abra èn David tan tiri a pipel leki a kownu di Yehovah ben poti.

6. (a) Fa Yudas tori Yesus? (b) Fa sma e gebroiki a nen Yudas na ini son tongo?

⁶ Prakseri now fa Yudas Iskariot tori Krestes. Na a lasti Paskafesa di Yesus hori nanga den 12 apostel fu en, Yesus taigi den: „Fu tru, mi e taigi unu: Wan fu unu o tori mi” (Mat. 26:21). Bakaten, na a srefi neti dati di den ben de na ini a dyari fu Getseimanei, Yesus taigi Petrus, Yakobus, nanga Yohanes: „Luku! A sma di o tori mi, doro kaba.” Na a momenti dati, Yudas kon na ini a dyari makandra nanga wan bigi grupu sma. „A waka langalanga go na Yesus èn a taki: ’Odi, Leriman!’ Dan a gi Yesus wan switi bosi” (Mat. 26:46-50; Luk. 22:47, 52). Yudas „tori wan bun sma” èn a gi Yesus Krestes abra na den feanti fu En. Fu san ede a gridi Yudas du disi? Fu 30 pisi solfru moni nomo! (Mat. 27:3-5) Na ini son tongo, te sma e taki dati wan sma na wan Yudas, dan ala sma e frustan wantewante taki den e taki fu wan bedrigiman, spesrutu fu wan sma di e tori en mati. *

7. San wi leri fu den tori fu (a) Absalom nanga Yudas (b) nanga Delaila?

⁷ San wi leri fu den eksempre disi? Absalom nanga Yudas dede na wan syen fasi fu di den bedrigi a salfuwan fu Yehovah (2 Sam. 18:9,  14-17; Tori 1:18-20). Te sma yere a nen Delaila, dan wantewante den e prakseri fa a ben du neleki a lobi Simson, aladi na bedrigi a ben e bedrigi en (Psalm 119:158). A prenspari srefisrefi fu luku taki wi no kon gridi gi moni, biginen, noso makti, bika dati ben o meki taki wi no de mati fu Yehovah moro! Den tori disi e sori wi krin o prenspari a de fu wai pasi gi iniwan sani di kan meki wi tron bedrigiman.

DE LEKI DEN WAN DI TAI HORI NA DEN MATI FU DEN

8, 9. (a) Fu san ede Yonatan pramisi fu horibaka gi David ala ten? (b) Fa wi kan de leki Yonatan?

⁸ Bijbel e taki fu furu sma tu di tai hori na den mati fu den. Meki wi luku tu fu den èn meki wi luku san wi kan leri fu den. A fosiwan ben de wan man di horibaka gi David ala ten. En nen ben de Yonatan, a fosi manpikin fu Kownu Saul. Soleki fa a gwenti ben de, dan na en ben o tron kownu fu Israel baka en papa. Ma Yehovah ben taki dati na David ben o tron kownu baka Saul. Yonatan agri nanga a bosroiti fu Yehovah èn a no kon dyarusu tapu David. Na presi fu dati, Bijbel e taki dati Yonatan „kon lobi David nanga en heri ati” èn a pramisi fu horibaka gi David ala ten. Boiti dati, a gi David en krosi, en feti-owru, en bo, nanga en leribuba fu gi en grani leki kownu (1 Sam. 18:1-4). Yonatan du ala san a man fu „gi David deki-ati” èn wan leisi a ben kan lasi en libi srefi fu di a opo taki gi David na fesi Saul. Fu di Yonatan ben tai hori na David, meki a taigi en: „Yu o tron kownu fu Israel èn mi o horibaka gi yu” (1 Sam. 20:30-34; 23:16, 17). Fu dati ede a no e fruwondru wi taki baka di Yonatan dede, David skrifi wan rowsingi pe a e taki fa a ben lobi Yonatan èn fa a ben e sari taki a dede.​—2 Sam. 1:17, 26.

⁹ Yonatan ben sabi gi suma a ben musu horibaka. A ben saka ensrefi dorodoro na ondro a Moro Hei Tiriman Yehovah, èn ala ten a horibaka gi David, a salfuwan fu Gado. Na so a musu de tu nanga wi na ini a ten disi. Awinsi wi no kisi frantwortu na ini a gemeente, toku wi musu de klariklari fu horibaka gi den brada di kisi a frantwortu fu teki fesi na ini a gemeente.​—1 Tes. 5:12, 13; Hebr. 13:17, 24.

10, 11. (a) Fu san ede Petrus tan horibaka gi Yesus? (b) Fa wi kan de leki Petrus èn san wi o du te wi de leki en?

¹⁰ Wan tra moi eksempre na a apostel Petrus di ben pramisi taki a ben o horibaka gi Yesus ala ten. Wan leisi Krestes fruteri wan agersitori fu sori den disipel o prenspari a de fu bribi na ini en skin nanga en brudu di a ben o gi leki srakti-ofrandi. Ma furu fu den disipel ben feni taki den sani di Yesus taki na ini na agersitori no fiti kwetikweti, èn dati meki den gowe libi Yesus (Yoh. 6:53-60, 66). Fu dati ede Yesus drai luku den 12 apostel fu en, dan a taki: „Unu no wani gowe tu?” Petrus piki en: „Masra, na suma wi musu go? Yu abi wortu di  e gi sma têgo libi. Wi e bribi èn wi kon sabi taki yu na a Santawan fu Gado” (Yoh. 6:67-69). Yu denki taki Petrus ben frustan krin san Yesus ben wani taki di a fruteri den taki a ben o gi en libi leki srakti-ofrandi? A no sori leki a ben e frustan ala sani. Ma toku Petrus bosroiti fu tan horibaka gi Yesus, a salfu Manpikin fu Gado.

¹¹ Petrus no ben denki taki Yesus no ben e si sani na wan yoisti fasi. A no ben denki taki bakaten Yesus ben o si taki a fowtu èn a ben o taki dati den sani di a taki, no tru. Ma Petrus ben abi sakafasi èn a ben frustan taki Yesus ben e taki „wortu di e gi sma têgo libi”. Na so wi musu de tu na ini a ten disi. Son leisi wi kan leisi wan sani na ini den buku di wi e kisi fu „a futuboi di de fu frutrow trutru”, ma wi no e frustan dati noso wi e si sani tra fasi. San wi e du dan? Wi no musu sidon wakti nomo èn denki taki wan dei wan kenki o kon di e kruderi nanga a denki fu wi. Ma wi musu du ala muiti fu frustan san skrifi drape.​—Leisi Lukas 12:42.

TAI HORI NA YU TROWPATNA ALA TEN

12, 13. (a) San kan meki taki wan sma bedrigi en trowpatna? (b) Fu san ede a no bun te wan sma e du sutadu, awinsi omeni yari a abi?

¹² A de wan tumusi ogri èn lagi sani fu bedrigi wan trawan, awinsi na sortu fasi dati e pasa. Noiti wi musu gi pasi taki bedrigifasi pori a freide nanga a wánfasi na ini Kresten osofamiri èn na ini a gemeente. Nanga disi na prakseri, meki wi luku fa wi kan abi a fasti bosroiti fu tai hori na wi trowpatna èn na wi Gado.

¹³ Sutadu na a moro ogri fasi fa wan sma kan bedrigi en trowpatna. Wan sma di du sutadu no tai hori na en trowpatna, ma a poti prakseri na wan tra sma èn a kon lobi a tra sma. Wantronso en trowpatna di a bedrigi de en wawan èn en heri libi drai tapu. Ma fa so wan sani kan pasa nanga tu sma di ben lobi makandra so te? Nofo tron a e bigin te trowpatna no e poti prakseri moro na den firi fu makandra. Professor Gabriella Turnaturi di ondrosuku difrenti libimakandra taki dati te trowpatna no e du ala san de fanowdu fu kon lobi makandra moro nanga moro, dan dati kan meki taki wan fu den waka gi en patna. Disi kan pasa nanga owru trowpaar srefi di trow wan langa pisi ten kaba. Fu eksempre, wan man fu 50 yari ben trow 25 yari kaba di a broko trow nanga en wefi, fu di a ben wani de nanga wan tra uma di a ben kon lobi. Son sma e meki a gersi leki disi a no wan seryusu sani, fu di den feni taki furu sma e du disi te den doro a yari dati. Ma awinsi wan sma abi a yari dati, toku a no kan du so wan sani. A no de wan bun sani te wan sma e waka gi en trowpatna. Na bedrigi a e bedrigi a trowpatna fu en. *

14. (a) Fa Yehovah feni en te wan sma gowe libi en trowpatna? (b) San Yesus taki fu sma di gowe libi den trowpatna?

¹⁴ Fa Yehovah feni en te wan sma gowe libi en trowpatna aladi Bijbel no e gi en pasi fu du dati? Wi Gado „no lobi brokotrow kwetikweti” èn a gi seryusu piri-ai na den wan di no e libi bun nanga den trowpatna èn di e gowe libi den. (Leisi Maleaki 2:13-16.) Neleki en Papa, Yesus no lobi en te trowpatna e bedrigi makandra. A ben sori sma taki den no kan drai baka gi den trowpatna noso gowe libi den, èn du leki noti no pasa.​—Leisi Mateyus 19:3-6, 9.

15. San trowpatna kan du fu tai hori na a makandra ala ten?

¹⁵ San trowpatna kan du fu tai hori na makandra ala ten? Gado Wortu taki: „Prisiri nanga a wefi [noso a masra] di yu teki sensi yu yongu yari.” A taki tu: „Nyan bun fu a libi nanga a wefi [noso a masra] di yu lobi” (Odo 5:18; Preik. 9:9). O moro den trowpatna e kon owru, o moro den musu du muiti fu  lobi makandra moro nanga moro. Den musu tan sorgu gi makandra èn tan hori den firi fu makandra na prakseri. Disi wani taki dati den musu sori switifasi gi makandra, den musu abi ten gi makandra, èn den musu tron moro bun mati fu makandra. Den musu du ala muiti fu abi wan bun trowlibi èn fu tron moro bun mati fu Yehovah. Dati meki trowpatna musu studeri Bijbel makandra, den musu abi a gwenti fu wroko makandra na ini a preikiwroko, èn den musu begi makandra fu aksi Yehovah meki a blesi den.

TAI HORI NA YEHOVAH ALA TEN

16, 17. (a) Sortu sani kan pasa na ini yu famiri èn na ini a gemeente di kan meki en muilek gi yu fu tan gi yesi na Gado? (b) Sortu eksempre e sori taki a e tyari wini kon te wi e gi yesi na a wèt fu Gado fu no bumui nanga famiriman di den puru fu a gemeente?

¹⁶ Son sma na ini a gemeente du seryusu sondu èn den kisi piri-ai „na wan seryusu fasi, so taki den kan abi wan tranga bribi” (Tit. 1:13). Trawan du sani di meki taki den brada ben musu puru den fu a gemeente. ’Den wan di leri wan sani fu a strafu’ di den kisi, ben kan kon bun baka nanga Gado (Hebr. 12:11). Ma fa a de te den puru wan famiriman noso wan mati fu wi fu a gemeente? A fasi fa wi e tyari wisrefi na ini so wan situwâsi o sori efu wi e horibaka gi a sma, noso gi Gado. Na Yehovah wi musu tai hori. A e luku efu wi o gi yesi na a wèt fu en fu no bumui nanga iniwan sma di den puru fu a gemeente.​—Leisi 1 Korentesma 5:11-13.

¹⁷ Luku wan eksempre di e sori sortu wini a e tyari kon te wan famiri e tai hori na Yehovah èn te den e gi yesi ala ten na en wèt fu no bumui nanga famiriman di puru fu a gemeente. Moro leki tin yari pasa den ben puru wan yonkuman fu a gemeente èn a heri pisi ten dati en papa, en mama, nanga den fo brada fu en ’no bumui’ nanga en. Son leisi a ben wani de makandra nanga den, ma ibriwan fu den famiriman fu en tan gi yesi na Gado. Den no ben e bumui nanga en. Baka di den teki en baka na ini a gemeente, a taki dati a ben misi en famiri, spesrutu na neti te en wawan ben de. Ma a taki tu dati efu en famiri ben bumui nanga en, awinsi na pikinso nomo, dan dati ben o bun gi en kaba èn a no ben o misi den so. Ma fu di nowan sma fu en famiri ben e bumui nanga en kwetikweti, meki a ben e angri fu de nanga den. Disi ben de wan fu den sani di meki taki a ben wani kon bun baka nanga Yehovah. Prakseri a tori disi efu a muilek gi yu son leisi fu gi yesi na Gado wèt fu no bumui nanga wan famiri fu yu di den puru fu a gemeente.

18. Now di wi luku den eksempre fu sma di bedrigi trawan èn sma di tai hori na trawan ala ten, dan san yu o du?

¹⁸ Wi e libi na ini wan grontapu pe sma gwenti bedrigi makandra èn den e drai baka gi makandra. Ma toku wi abi furu Kresten brada nanga sisa na wi lontu di de trutru mati èn di de bun eksempre gi wi. A fasi fa den e libi e sori taki den e tai hori na den brada nanga sisa fu den, den e du san reti, èn sma no man feni fowtu na den tapu (1 Tes. 2:10). Meki wi alamala du ala san wi man fu tai hori na Gado èn na makandra ala ten.

[Futuwortu]

[Aksi fu a tori disi]

[Prenki na tapu bladzijde 10]

Aladi trawan drai baka gi a salfu Manpikin fu Gado, toku Petrus tan horibaka gi en