’A manpikin wani sma fu kon sabi a Tata’

„Nowan sma sabi a Tata, boiti a Manpikin nanga a sma di a Manpikin wani fu a kon sabi a Tata.”​—LUK. 10:22.

SAN YU BEN SA PIKI?

Fu san ede Yesus ben de a moro bun sma fu yepi trawan fu kon sabi a Tata?

Fa Yesus yepi sma fu kon sabi a Tata?

Fa yu kan meki sma kon sabi a Tata neleki fa Yesus du dati?

1, 2. Sortu aksi furu sma no man piki èn fu san ede?

’SUMA na Gado?’ Furu sma no man gi piki tapu na aksi disi. Fu eksempre, furu sma di e taki dati den na Kresten e bribi taki Gado na dri sma na ini wán, ma den e taki tu dati a leri disi na wan sani di nowan sma man frustan. Wan kerki fesiman skrifi na ini wan buku taki nowan sma man fruklari a leri fu a Dri-wánfasi, fu di a dangra tumusi fu frustan. Dan yu abi tra sma di e bribi na evolutieleri. Den e taki dati Gado no de èn dati ala den moi sani di wi e si na hemel nanga grontapu kon fu densrefi. Ma Charles Darwin, a man di panya a leri disi, no taki noiti taki Gado no de. A taki dati libisma no man frustan suma na Gado.

² Furu sma abi aksi di abi fu du nanga Gado, awinsi sortu sani den e bribi. Ma furu fu den no e suku piki tapu den aksi fu den moro, fu di den feni taki den no kisi bun piki. Fu tru, Satan „breni a frustan fu den sma di no e bribi” (2 Kor. 4:4). Dati meki furu sma e bruya èn den no sabi krin suma na a Tata, di de a Gado èn a Mekiman fu hemel nanga grontapu!​—Yes. 45:18.

3. (a) Suma meki wi kon sabi a Tata? (b) Sortu aksi o kisi piki na ini na artikel disi?

³ Ma toku a prenspari srefisrefi taki sma kon sabi suma na Gado trutru. Fu san ede? Fu di na soso den wan di e kari „a nen fu Yehovah” o kisi frulusu (Rom. 10:13). Fu ’kari Gado nen’, wani taki dati wi musu kon sabi sortu sma Yehovah de trutru. Yesus Krestes ben sori den disipel fu en a prenspari sani disi. A meki den kon sabi a Tata. (Leisi Lukas 10:22.) Fu san ede Yesus ben de a moro bun sma di ben kan yepi trawan fu kon  sabi a Tata? Fa Yesus yepi sma fu kon sabi a Tata? Fa wi kan meki sma kon sabi a Tata neleki fa Yesus du dati? Na artikel disi o gi piki tapu den aksi disi.

YESUS KRESTES, A MORO BUN SMA DI KAN YEPI TRAWAN FU KON SABI A TATA

4, 5. Fu san ede Yesus na a moro bun sma di kan yepi trawan fu kon sabi a Tata?

⁴ Yesus ben de a moro bun sma di ben kan yepi trawan fu kon sabi a Tata. Fu san ede? Fu di Yesus ben de wan yeye na hemel, fosi Gado meki iniwan tra libisani. A ben de „a wan-enkri Manpikin di Gado srefi meki” (Yoh. 1:14; 3:18). Na Yesus wawan ben de nanga en Tata fosi iniwan tra sani ben de èn en Tata ben kan poti ala prakseri na en. Dusundusun yari langa Yesus nanga en Tata ben abi takimakandra èn na so a ben kon sabi en Tata nanga den fasi fu En. Na so den ben e tron moro bun mati fu makandra, den ben e kisi moro lobi gi makandra èn den ben e firi gi makandra trutru (Yoh. 5:20; 14:31). Prakseri nomo o bun Yesus kon sabi en Tata!​—Leisi Kolosesma 1:15-17.

⁵ A Tata ben meki a Manpikin tyari boskopu gi en. Dati meki Bijbel e kari en „a Wortu fu Gado” (Openb. 19:13). Sobun, Yesus ben de a moro bun sma di ben kan yepi trawan fu kon sabi a Tata. Yohanes skrifi taki „a Wortu”, sobun Yesus, „de so krosibei fu a Tata” (Yoh. 1:1, 18). A kan taki dyaso Yohanes ben prakseri fu wan gwenti di sma ben abi te den ben o nyan nanga makandra. Den ben e poti den sma fu sidon krosibei fu makandra, so taki a ben makriki fu taki nanga makandra. Sobun, te wi e leisi taki a Manpikin „de so krosibei fu a Tata”, dan wi kan frustan taki den ben e taki nanga makandra fu ala sortu dipi tori.

6, 7. Fa a Manpikin nanga a Tata ben kon lobi makandra moro nanga moro?

⁶ Dei fu dei a Manpikin nanga a Tata ben kon lobi makandra moro nanga moro. „Ala dei [a Manpikin] ben e gi [Gado] bigi prisiri”. (Leisi Odo 8:22, 23, 30, 31.) Wi kan frustan fu dati ede taki a Tata nanga a Manpikin ben kon lobi makandra moro nanga moro, aladi den ben e wroko makandra. Na so a Manpikin ben e teki den fasi fu en Tata abra moro nanga moro. Di den tra libisani ben meki kaba, a Manpikin ben e si fa Yehovah ben e libi nanga ibriwan fu den èn a ben kon lobi èn lespeki en Tata moro nanga moro.

⁷ Srefi di Satan lei taki Yehovah no abi a reti fu tiri, a Manpikin ben man leri fa Yehovah sori lobi, retidu, koni, nanga makti na ini wan muilek situwâsi. Na so a Manpikin ben man leri san fu du te ensrefi ben o de na ini muilek situwâsi, te a ben o du en diniwroko na grontapu.​—Yoh. 5:19.

8. Fa den Bijbel tori fu Yesus en libi e leri wi furu fu a fasi fa a Tata de?

⁸ Fu di Yesus ben sabi Yehovah so bun, meki a ben man fruteri sma finifini fa a Tata de. Sobun, a moro bun fasi fa wi kan leri sabi a Tata, na fu luku san a Manpikin leri sma èn fa a tyari ensrefi. Prakseri fu eksempre san a wortu „lobi” wani taki trutru. Efu wi ben o leisi na ini wan wortubuku san a wortu disi wani taki, wi no ben o man frustan en so krin. Ma den Bijbel skrifiman skrifi wan lo moi tori fu Yesus en libi na grontapu èn fu a fasi fa Yesus sori taki a ben e broko en ede trutru nanga trawan. Te wi e leisi den tori disi, dan wi kan frustan moro bun san a wani taki te Bijbel e taki dati „Gado na lobi” (1 Yoh. 4:8, 16). Wi kan leri furu tu fu den tra fasi di Gado abi te wi e leisi  fa Yesus ben de nanga den disipel fu en di a ben de na grontapu.

FA YESUS YEPI SMA FU KON SABI EN TATA

9. (a) San na tu fasi fa Yesus sori sma fa en Tata de trutru? (b) Gi wan eksempre fu sori fa den sani di Yesus leri sma ben yepi den fu kon sabi en Tata.

⁹ Fa Yesus sori en disipel nanga den tra sma di ben o tron bakaman fu en bakaten, fa en Tata de trutru? Den sani di a ben e leri sma èn a fasi fa a ben e tyari ensrefi, na tu fasi fa a yepi sma fu kon sabi a Tata. Meki wi luku fosi den sani di Yesus leri sma. Den sani di Yesus leri sma ben e sori furu fu a fasi fa en Tata e denki, fa a e firi èn fa a e du sani. Fu eksempre, Yesus ben agersi en Tata nanga wan sma di abi wan ipi skapu di a lobi srefisrefi. Di wan fu den skapu lasi, a gowe go suku en. Yesus taki dati di a man feni a lasi skapu, a „prisiri moro nanga a skapu disi, leki nanga den neigitenti na neigi skapu di no ben lasi”. Fu san ede Yesus fruteri na agersitori disi? A taki: „Na so mi Tata na hemel no wani kwetikweti taki wan fu den pikinwan disi musu lasi libi” (Mat. 18:12-14). San na agersitori disi e leri yu fu Yehovah? Srefi efu yu e firi son leisi taki yu no warti noti èn taki ala sma frigiti yu, toku yu hemel Tata e poti prakseri na yu èn a e broko en ede nanga yu. Gi en, yu na wan fu „den pikinwan disi”.

10. Fa a fasi fa Yesus ben e tyari ensrefi e sori fa en Tata de?

¹⁰ A fasi fa Yesus ben e tyari ensrefi yepi sma tu fu kon sabi a Tata. Fu dati ede, di na apostel Filipus aksi Yesus: „Sori wi a Tata”, dan nanga reti Yesus ben kan taki: „A sma di si mi, si a Tata tu” (Yoh. 14:8, 9). Luku wan tu eksempre fa Yesus sori sma sortu fasi en Tata abi. Di wan gwasiman aksi Yesus fu dresi en, Yesus fasi a man disi di „ben abi gwasi na en heri skin”, dan a taigi en: „Mi wani. Kon krin.” Di Yesus dresi a gwasiman, a man ben man si krin taki na Yehovah gi Yesus a makti fu dresi en (Luk. 5:12, 13). Sosrefi na a ten di Lasarus dede, den disipel ben man si krin taki a Tata e firi gi sma, bika Yesus „soktu dipi èn a ben kon hebi gi en trutru”. Boiti dati, a „bigin krei”. Yesus ben sabi taki a ben o gi Lasarus wan opobaka, ma toku a ben e sari tu fu di a ben e frustan fa a famiri nanga den mati fu Lasarus ben e firi (Yoh. 11:32-35, 40-43). Kande yu srefi abi Bijbel tori fu Yesus di yu lobi èn di e sori yu taki a Tata abi sari-ati trutru.

11. (a) San wi e leri fu a Tata te wi e leisi a tori pe Yesus krin a tempel? (b) Fu san ede disi e gi wi trowstu?

¹¹ Ma te yu e leisi a tori pe Yesus krin a tempel, dan san yu e leri? Pruberi fu si na yu fesi san e pasa: Yesus teki wan tu titei, dan a meki wan wipi èn a yagi den sma di ben e seri kaw nanga skapu puru na ini a tempel. A trowe a moni fu den man di ben e kenki moni èn a drai den tafra fu den tapu  (Yoh. 2:13-17). A deki-ati sani disi di a du meki den disipel memre wan profeititori di Kownu David taki: „A lobi di mi abi gi yu oso, de leki wan faya di e bron na ini mi” (Ps. 69:9). Den sani di Yesus du e sori taki a ben e horibaka gi a tru anbegi nanga en heri ati. Te yu e leisi a tori disi, yu man si sortu fasi a Tata abi? A tori disi no e sori wi nomo taki Gado abi ala makti fu puru ogridu na grontapu, ma a e sori wi tu taki a wani puru ogridu trutru. Prakseri nomo fa Yehovah e firi te a e luku ala den ogri di e pasa na grontapu now! A fasi fa Yehovah nanga Yesus e denki fu den ogri di e pasa now, e gi wi furu trowstu te sma e du ogri nanga wi.

12, 13. Te yu e luku a fasi fa Yesus ben e libi nanga en disipel, dan san yu kan leri fu Yehovah?

¹² A fasi fa Yesus ben e libi nanga den disipel fu en e sori wi tu fa en Tata de. Den ben lobi haritaki nanga makandra suma fu den ben moro bigi (Mark. 9:33-35; 10:43; Luk. 9:46). Fu di Yesus ben tan so langa nanga en Tata, a ben sabi fa Yehovah e denki fu sma di abi heimemre (2 Sam. 22:28; Ps. 138:6). Boiti dati, Yesus ben si san Satan Didibri du fu di a ben abi heimemre. Satan di e denki ensrefi nomo, ben prakseri soso a biginen nanga a hei posisi di a ben wani. Yu kan frustan taki Yesus ben e sari di a si taki den disipel di ben e kisi leri fu en, ben abi a srefi maniri tu! Srefi den wan di a teki leki apostel ben abi heimemre! Te na a lasti dei di Yesus ben de na grontapu, den sori taki den ben abi heimemre (Luk. 22:24-27). Toku Yesus tan piri-ai gi den na wan lobi-ati fasi. Noiti a lasi a howpu taki den ben o kenki èn taki den ben o leri fu sori sakafasi neleki en.​—Fil. 2:5-8.

¹³ Yesus ben abi a pasensi fu leri den disipel taki son maniri no bun. Te yu e prakseri san Yesus taki èn du, yu man si sortu sma a Tata de? A Tata no e libi en pipel awinsi den e meki furu fowtu. Te wi kon sabi fa Yehovah de, dan dati o yepi wi fu sori berow èn fu aksi en pardon gi den fowtu di wi meki.

A MANPIKIN BEN DE KLARIKLARI FU SORI SMA FA EN TATA DE

14. Fa Yesus sori taki a ben de klariklari fu meki sma kon sabi fa en Tata de?

¹⁴ Furu tiriman no e meki a pipel sabi son sani, bika na so den man basi den moro bun. Ma Yesus no ben de so. A ben de klariklari fu leri sma sani fu en Tata. Dati meki a fruteri den ala san den ben musu sabi fu Yehovah. (Leisi Mateyus 11:27.) Boiti dati, Yesus gi den disipel fu en „frustan, so taki [den] kan kon sabi a tru Gado” Yehovah (1 Yoh. 5:20). Sobun, Yesus ben yepi den bakaman fu en fu frustan den sani di a ben e leri den fu a Tata. A no ben e leri den fromu sani soleki a Dri-wánfasi, so taki den no ben o man frustan krin suma na a Tata.

15. Fu san ede Yesus no fruteri den disipel ala sani fu en Tata?

¹⁵ A de so taki Yesus fruteri den ala sani di a ben sabi fu en Tata? Nôno. Yesus ben abi a koni fu si taki a no ben musu fruteri den disipel ala sani. (Leisi Yohanes 16:12.) Fu san ede? Fu di den disipel ’no ben o man tyari’ someni sabi na a ten dati. Dati meki Yesus taigi den taki den ben o kon sabi furu tra sani bakaten te „a yepiman”, sobun a santa yeye, ben o kon fu leri den ala sani di tru (Yoh. 16:7, 13). Koni papa nanga mama no e taigi den pikin ala sani wantewante. Den e wakti teleki den pikin owru nofo fu man frustan son sani. Na so Yesus wakti teleki den disipel ben lepi nofo fu frustan moro sani di abi fu nanga a Tata. Yesus ben abi switifasi èn a ben e hori na prakseri  taki den disipel no ben man frustan ala sani wantewante.

YEPI SMA FU KON SABI YEHOVAH NELEKI FA YESUS DU DATI

16, 17. Fu san ede yu man yepi trawan fu kon leri sabi Yehovah?

¹⁶ Te yu leri sabi wan sma bun èn yu lobi fa a de, dan yu wani fruteri trawan fu en, a no so? Di Yesus ben de na grontapu, a ben e fruteri sma fu en Tata (Yoh. 17:25, 26). Wi man fruteri sma fu Yehovah tu, neleki Yesus?

¹⁷ Soleki fa wi si kaba, dan Yesus ben sabi en Tata moro iniwan tra sma. Ma a ben wani meki tra sma sabi a Tata tu. Dati meki a leri sma son sani di a ben sabi fu a Tata. A gi den bakaman fu en a koni srefi fu man frustan moro dipi sani di abi fu du nanga a Tata. Furu sma na ini a ten disi no sabi a Tata, ma Yesus yepi wi fu kon sabi a Tata trutru. Wi de nanga tangi trutru taki den sani di Yesus leri sma èn a fasi fa a tyari ensrefi yepi wi fu kon sabi en Tata! A de wan grani gi wi taki wi leri sabi Yehovah (Yer. 9:24; 1 Kor. 1:31). Wi du furu muiti fu kon de wan mati fu Yehovah èn now a kon de moro krosibei fu wi (Yak. 4:8). Fu dati ede, wi man yepi trawan now fu kon leri sabi Yehovah. Fa wi kan yepi den?

18, 19. Na sortu fasi yu kan yepi sma fu kon sabi a Tata?

¹⁸ Wi musu du neleki Yesus. Den sani di wi e taki èn a fasi fa wi e tyari wisrefi kan yepi trawan fu kon sabi Yehovah. Hori na prakseri taki furu fu den sma di wi e miti na ini a preikiwroko no sabi suma na Gado. Kande den no sabi Gado fu di trawan leri den sani di no tru. Wi kan sori den na ini Bijbel san na Gado nen, san a abi na prakseri gi libisma, èn sortu fasi a abi. Boiti dati, son Bijbel tori e yepi wi fu frustan son fasi fu Gado moro bun. Te wi de na ini a gemeente wi kan fruteri trawan san wi leri, so taki den kan kisi deki-ati tu.

¹⁹ Te wi e du neleki Yesus, dan a fasi fa wi e tyari wisrefi kan yepi sma tu fu kon sabi a Tata. Te sma e si taki wi e sori lobi neleki Krestes, dan den srefi o wani tron mati fu Yesus nanga en Tata tu (Ef. 5:1, 2). Na apostel Paulus ben gi wi a deki-ati fu ’teki na eksempre fu en, neleki fa a ben e teki na eksempre fu Krestes’ (1 Kor. 11:1). A de wan bigi grani gi wi taki wi kan yepi sma fu leri sabi Yehovah nanga a fasi fa wi e tyari wisrefi! Iya, meki wi alamala teki na eksempre fu Yesus èn meki wi yepi sma fu kon sabi a Tata.

[Aksi fu a tori disi]