De leki sma di e ’libi wan pisi ten nomo’ na ini wan ogri grontapu
De leki sma di e ’libi wan pisi ten nomo’ na ini wan ogri grontapu
„Ala den sma disi . . . fruteri ala sma taki den ben de trakondre sma èn taki den ben kon libi wan pisi ten nomo na ini a kondre.”—HEBR. 11:13.
1. San Yesus taki fu a fasi fa den bakaman fu en ben o si grontapu?
YESUS ben taki fu den disipel fu en: „Den de na grontapu.” Ma a ben taki tu: „Den no de wan pisi fu grontapu, neleki fa mi no de wan pisi fu grontapu” (Yoh. 17:11, 14). Nanga den wortu disi Yesus sori krin fa den tru bakaman fu en musu si „a grontapu disi” di abi Satan leki gado (2 Kor. 4:4). Aladi den ben o libi na ini na ogri grontapu disi, den no ben o de wan pisi fu en. Den ben o de leki ’trakondre sma di e libi wan syatu pisi ten nomo na ini a grontapu disi’.—1 Petr. 2:11.
Den ben e libi leki ’sma di kon libi fu wan syatu pisi ten nomo’
2, 3. Fu san ede wi kan taki dati Heinok, Noa, Abraham, nanga Sara ben e libi leki ’trakondre sma èn sma di e libi wan pisi ten nomo na ini wan kondre’?
2 Sensi owruten den futuboi fu Yehovah di tan gi yesi na en ben de tra fasi leki den sma fu grontapu di no e dini en. Fosi a bigi frudu, Heinok nanga Noa ben e „waka nanga a tru Gado” (Gen. 5:22-24; 6:9). Ala tu ben de deki-ati preikiman di ben e tyari krutuboskopu fu Yehovah gi den sma fu na ogri grontapu fu Satan. (Leisi 2 Petrus 2:5; Yudas 14, 15.) Fu di den ben e waka nanga Gado na ini wan ogri grontapu, meki Bijbel e taki dati Gado „ben prisiri” nanga Heinok èn dati Noa ’ben de sondro fowtu te yu ben e luku den sma fu en ten’.—Hebr. 11:5; Gen. 6:9.
3 Di Gado taigi Abraham nanga Sara fu go tan na ini tenti na ini wan tra kondre, den gi yesi na Gado èn den gowe libi a foto Ur fu den Kaldeyasma (Gen. 11:27, 28; 12:1). Na apostel Paulus skrifi: „Na fu di Abraham ben abi bribi, meki a gi yesi di Gado kari en fu go na wan presi di a ben o kisi leki gudu. Sobun, a gowe libi a kondre fu en, aladi a no ben sabi pe a ben e go. Na fu di a ben abi bribi, meki a ben e tan leki wan trakondre sma na ini a pramisi kondre. A ben tan na ini tenti nanga Isak èn nanga Yakob, di ben o kisi a srefi sani di Gado ben pramisi Abraham” (Hebr. 11:8, 9). Fu den sortu futuboi disi fu Yehovah di ben e gi yesi na en ala ten, Paulus taki: „Ala den sma disi dede sondro fu lasi den bribi, aladi den no si fa den pramisi disi kon tru, ma den ben si den fu farawe kaba èn den ben prisiri nanga dati. Den ben e fruteri ala sma taki den ben de trakondre sma èn taki den ben kon libi wan pisi ten nomo na ini a kondre.”—Hebr. 11:13.
Wan warskow gi den Israelsma
4. Sortu warskow den Israelsma kisi, fosi den go tan na ini a kondre fu den?
4 Den Israelsma di ben de bakapikin fu Abraham, ben kon furu èn te fu kaba den tron wan pipel di ben abi wèt èn wan kondre (Gen. 48:4; Deut. 6:1). Den no ben musu frigiti noiti taki a sma di ben abi a kondre ben de Yehovah (Lef. 25:23). Den ben de leki sma di yuru a kondre èn den ben abi fu gi yesi na Yehovah, a sma di ben abi a kondre. Boiti dati, den ben musu hori na prakseri taki „sma no e libi fu brede wawan”. Sobun, den no ben musu gi pasi taki gudu noso wan switi libi meki taki den frigiti Yehovah (Deut. 8:1-3). Fosi den Israelsma go tan na ini a kondre fu den, den kisi a warskow disi: „Yehovah un Gado o tyari unu go na ini a kondre di a pramisi fu gi un afo Abraham, Isak, nanga Yakob. A kondre abi bigi èn moi foto, ma a no unu bow den. A abi oso di abi furu bun sani na ini, ma a no unu poti den drape. Na ini a kondre watrabaki de tu, ma a no unu meki den. A abi droifidyari nanga olèifbon, ma a no unu prani den. Toku na unu o nyan den sani dati teleki un bere furu. Ma sorgu taki unu no frigiti Yehovah di tyari unu komoto fu Egepte pe unu ben de srafu.”—Deut. 6:10-12.
5. Fu san ede Yehovah drai baka gi Israel, èn sortu pipel a teki leki en pipel baka dati?
5 Yehovah ben abi leti fu gi den a warskow disi. Na ini a ten fu Nehemia wan grupu Leifisma ben memre nanga syen san ben pasa, baka di den Israelsma go tan na ini a Pramisi Kondre. Baka di den Israelsma go tan na ini moi oso èn den ben abi furu nyanyan nanga win, „den bigin nyan, den bere kon furu, den kon fatu èn den ben e prisiri srefisrefi”. Ne den bigin trangayesi Gado. Di Gado seni profeiti fu warskow den, den kiri den profeiti srefi. Dati meki Yehovah libi den gi den feanti fu den. (Leisi Nehemia 9:25-27; Hos. 13:6-9.) Bakaten di den Romesma ben e tiri, den Dyu di no ben abi bribi, kiri srefi a Mesias di Gado ben pramisi den! Dati meki Yehovah drai baka gi den krinkrin èn a teki tra sma leki en pipel. A pipel disi na a „Israel fu Gado”.—Mat. 21:43; Tori 7:51, 52; Gal. 6:16.
Kresten „no de wan pisi fu grontapu”
6, 7. (a) Fruklari san Yesus taki fu den bakaman fu en èn a grontapu disi. (b) Fu san ede tru Kresten no ben musu de wan pisi fu a grontapu fu Satan?
6 Soleki fa wi si na ini na artikel fosi a wan disi, Yesus Krestes di de na Edeman fu a Kresten gemeente, sori krin taki den bakaman fu en no ben o de wan pisi fu na ogri grontapu disi di de fu Satan. Syatu fosi Yesus dede, a taigi den disipel fu en: „Efu unu ben de wan pisi fu grontapu, dan grontapu ben o lobi unu, bika unu ben o de fu grontapu. Ma fu di unu no de wan pisi fu grontapu èn mi teki unu puru na grontapu, meki grontapu e teige unu.”—Yoh. 15:19.
7 Baka wan pisi ten a Kresten bribi panya na furu presi. Ma disi wani taki dati den ben o denki tra fasi fu grontapu now? Den ben o teki den gwenti fu grontapusma abra safrisafri, so taki den tron wan pisi fu grontapu baka wan pisi ten? Kwetikweti. Awinsi pe den ben e libi, den ben musu de tra fasi leki den sma fu a grontapu fu Satan. Sowan 30 yari baka di Krestes dede, na apostel Petrus skrifi wan brifi gi den Kresten di ben e tan na difrenti presi pe Rome ben e tiri. A skrifi: „Un lobiwan, unu di de trakondre sma èn di e libi wan syatu pisi ten nomo na ini a grontapu disi, mi e gi unu deki-ati fu tan kakafutu gi den takru lostu fu a sondu skin di e tan feti nanga unu. Tan tyari unsrefi na wan bun fasi na mindri den grontapusma.”—1 Petr. 1:1; 2:11, 12.
8. Sortu sani di wan historia sabiman taki e sori taki den fosi Kresten no ben de wan pisi fu grontapu?
8 Den Kresten ben e libi leki ’trakondre sma èn sma di e libi wan pisi ten nomo’ na difrenti presi pe Rome ben e tiri. Wan historia sabiman skrifi taki doronomo den ben e kisi hebi frufolgu. Sma ben taki dati den Kresten no ben e bribi na ini Gado, fu di den no ben e teki den gwenti abra di ben abi fu du nanga falsi bribi. Den Kresten no ben e bumui nanga den sma na den lontu te den ben e meki prisiri noso te den ben e hori den fesa fu den di ben abi fu du nanga falsi bribi noso hurudu. Dati meki sma ben e kari den Kresten „sma di abi bita-ati gi libisma”.
No gebroiki den sani fu grontapu dorodoro
9. Fa wi leki tru Kresten e sori taki wi a no „sma di abi bita-ati gi libisma”?
9 Fa sani de na ini a ten disi? Wi e si „na ogri grontapu disi” na a srefi fasi fa den fosi Kresten ben e si grontapu na a ten fu den (Gal. 1:4). Dati meki furu sma e denki ala sortu sani fu wi di no tru èn sonwan fu den no lobi wi srefisrefi. Ma wi a no „sma di abi bita-ati gi libisma”. Fu di wi lobi libisma, meki wi e du ala san wi man fu fruteri ibri sma ’a bun nyunsu fu a Kownukondre fu Gado’. Dati meki wi e go na den oso ibri tron baka (Mat. 22:39; 24:14). Wi e du disi fu di wi de seiker taki heri esi Yehovah Kownukondre di abi Krestes leki Kownu o tyari wan kaba kon na den tirimakti fu sondu libisma. Dan a o tyari wan nyun grontapu kon pe ala sani o pasa na wan reti fasi.—Dan. 2:44; 2 Petr. 3:13.
10, 11. (a) Fa wi e gebroiki den sani fu grontapu? (b) Fa Kresten di de na ai e sori taki den no e gebroiki den sani fu grontapu dorodoro?
10 Fu di wi leki futuboi fu Yehovah sabi taki a kaba fu a grontapu disi o kon seiker, meki wi e frustan taki now a no a ten fu pruberi fu libi wan switi libi na ini a grontapu disi di e dede gowe. Wi e hori den wortu fu na apostel Paulus bun na prakseri: „Brada, mi e taigi unu taki a ten di tan abra kon syatu. Meki den wan . . . di e bai sani, de leki sma di no abi noti, èn meki den wan di e gebroiki den sani fu grontapu, de leki sma di no e gebroiki den sani fu grontapu dorodoro. Bika sani na grontapu e kenki” (1 Kor. 7:29-31). Ma fa Kresten na ini a ten disi e gebroiki den sani fu grontapu? Den e gebroiki sani soleki computer nanga Internet fu panya Bijbel leri na heri grontapu na ini hondrohondro tongo. Boiti dati den e wroko na ini grontapu tu fu man kisi moni fu bai den sani di den abi fanowdu na ini a libi. Ma den no e gebroiki den sani fu grontapu dorodoro. Disi wani taki dati moni, den sani di den abi èn a wroko fu den no de den moro prenspari sani na ini den libi.—Leisi 1 Timoteyus 6:9, 10.
11 Kresten di de na ai e luku bun taki den no e gebroiki den sani fu grontapu dorodoro, sosrefi te a abi fu du nanga skoroleri. Furu sma na ini a ten disi e denki taki wan sma musu teki hei skoroleri fu kan feni wan bun wroko di e pai furu moni. Ma fu di wi de leki sma di e tan na wan presi fu wan pisi ten nomo, meki wi e denki tra fasi. Wi no e „suku bigi sani gi wisrefi” (Yer. 45:5; Rom. 12:16). Fu di wi na bakaman fu Yesus, meki wi e gi yesi na a warskow fu en: „Tan na ai èn luku bun taki unu no kisi bigi-ai na nowan fasi, bika srefi te wan sma abi furu gudu, toku den sani di a abi no kan gi en libi” (Luk. 12:15). Fu dati ede yongu Kresten e kisi a deki-ati fu du moro na ini a diniwroko. Den musu teki nofo skoroleri fu feni wan wroko di sa yepi den fu sorgu densrefi bakaten. Ma a moro prenspari sani gi den na fu sreka densrefi fu dini Yehovah ’nanga den heri ati, nanga den heri libi, nanga ala den krakti èn nanga den heri frustan’ (Luk. 10:27). Te den e du disi, den o kon „gudu na ini Gado ai”.—Luk. 12:21; leisi Mateyus 6:19-21.
No broko yu ede nanga den sani di yu abi fanowdu
12, 13. Te wi e gi yesi na a rai na ini Mateyus 6:31-33, dan fa wi de tra fasi leki den sma fu grontapu?
12 Den futuboi fu Yehovah de heri tra fasi leki den sma fu grontapu tu te a abi fu nanga a fasi fa den e denki fu gudu. Yesus ben taigi den bakaman fu en: „Noiti un musu broko un ede nanga sani èn un no musu taki: ’San wi o nyan?’ noso ’San wi o dringi?’ noso ’San wi o weri?’ Ala den sani disi na san den grontapusma e feti fu kisi. Ma un Tata na hemel sabi taki unu abi ala den sani disi fanowdu. Fu dati ede, tan suku fosi a Kownukondre nanga Gado en retidu, dan unu o kisi ala den tra sani tu” (Mat. 6:31-33). Furu fu wi brada nanga sisa ondrofeni fa wi hemel Tata sorgu gi den èn fa a sorgu taki den kisi den sani di den ben abi fanowdu.
13 „Wan sma e kisi furu wini te a e dini Gado fayafaya, ma dati o pasa soso te a breiti nanga san a abi” (1 Tim. 6:6). Sma na ini a grontapu disi e denki heri tra fasi fu san skrifi dyaso. Fu eksempre, te yongu sma e trow, furu fu den e denki taki den musu abi ala sani wantewante. Den musu abi wan oso di abi ala sani na ini, wan moi wagi èn den moro nyun sani soleki cèl, telefisi nanga DVD player, noso computer. Ma Kresten di e libi leki sma di kon tan na wan presi fu wan pisi ten nomo, e dwengi densrefi èn den no e suku fu abi moro sani leki san den man bai. A moi fu si taki furu fu den bosroiti fu no bai ala sortu sani di den no abi fanowdu trutru, so taki den kan gebroiki moro ten nanga krakti fu dini Yehovah leki fayafaya Kownukondre preikiman. Sonwan fu den e dini leki pionier, den e wroko na Bethel, den de kring-opziener, distrikt-opziener, noso zendeling. Wi alamala e warderi en trutru taki den sma disi di e dini Yehovah makandra nanga wi, e du den sani disi nanga den heri ati!
14. San wi kan leri fu na agersitori di Yesus fruteri fu a man di ben e sai siri?
14 Di Yesus ben e gi na agersitori fu a man di ben e sai siri, a taki dati „den broko-ede fu a grontapu disi nanga a bedrigifasi fu gudu” kan kiri Gado wortu di de na ini wi ati èn a kan meki taki wi no e meki froktu (Mat. 13:22). Disi no o pasa nanga wi te wi e libi na ini a grontapu disi leki sma di kon tan na wan presi fu wan pisi ten nomo èn te wi breiti nanga san wi abi. Na a fasi disi wi o man hori wi ai „krin”. Disi wani taki dati wi o poti ala wi prakseri na Gado Kownukondre èn a moro prenspari sani gi wi o de fu horibaka gi a Kownukondre disi.—Mat. 6:22.
„Grontapu e pasa gowe”
15. Sortu sani di na apostel Yohanes taki e sori fa tru Kresten musu libi na ini a grontapu disi?
15 Wan prenspari sani di e meki taki wi leki tru Kresten e si wisrefi leki ’trakondre sma èn leki sma di e libi wan pisi ten nomo’ na ini a grontapu disi, na taki wi sabi seiker taki a kaba fu a grontapu disi de krosibei (1 Petr. 2:11; 2 Petr. 3:7). Efu wi e denki na a fasi disi, dan dati o de fu si na den bosroiti di wi e teki na ini a libi, den sani di wi wani abi, èn den sani di wi wani du. Na apostel Yohanes gi den tra Kresten a rai fu no lobi grontapu noso den sani na ini grontapu, fu di „grontapu e pasa gowe nanga den lostu fu en, ma a sma di e du a wani fu Gado o tan fu têgo”.—1 Yoh. 2:15-17.
16. Fa wi kan sori taki Gado teki wi leki en pipel?
16 Yehovah ben taigi den Israelsma taki efu den ben o gi yesi na en, den ben o tron ’wan spesrutu gudu gi en na mindri ala tra pipel’ (Eks. 19:5). Te den Israelsma ben e dini Yehovah, na anbegi fu den èn a fasi fa den ben e libi ben de tra fasi leki di fu den tra pipel. Na so a de tu na ini a ten disi taki Yehovah teki sma leki en pipel èn den de tra fasi leki den sma fu Satan en grontapu. Bijbel e taigi wi dati wi musu ’kakafutu gi ogridu èn gi den lostu fu grontapu. Wi musu libi nanga krin frustan, wi musu de reti-ati sma èn wi musu dini Gado fayafaya na ini a ten disi. Wi musu libi na a fasi disi, aladi wi e wakti a prisiri sani di wi e howpu na tapu. Boiti dati, wi e wakti tu fu si fa a gran Gado nanga Krestes Yesus, wi Frulusuman, o sori densrefi nanga glori. Krestes gi ensrefi gi a bun fu wi fu kan frulusu wi fu wan libi di lai ala sortu kruktudu èn fu kan krin wan pipel gi ensrefi, wan pipel di ben o de spesrutu fu en èn di ben o de fayafaya fu du bun sani’ (Tit. 2:11-14). A „pipel” disi na den salfu Kresten èn den milyunmilyun „tra skapu” fu Yesus di e yepi den salfu Kresten èn di e horibaka gi den.—Yoh. 10:16.
17. Fu san ede a no o hati den salfuwan nanga den tra skapu noiti taki den libi leki sma di e tan fu wan pisi ten nomo na ini na ogri grontapu disi?
17 „A prisiri sani di [den salfuwan] e howpu na tapu”, na fu tiri nanga Krestes na hemel (Openb. 5:10). Den tra skapu abi a howpu fu libi fu têgo na grontapu. Te disi pasa trutru, den no o de moro leki sma di e tan fu wan pisi ten nomo na ini wan ogri grontapu. Den o abi moi oso nanga furu sani fu nyan èn dringi (Ps. 37:10, 11; Yes. 25:6; 65:21, 22). Den no o de leki den Israelsma fu di den no o frigiti noiti taki ala den sani dati kon fu Yehovah „a Gado fu heri grontapu” (Yes. 54:5). A no o hati den salfuwan nanga den tra skapu taki den libi leki sma di e tan fu wan pisi ten nomo na ini na ogri grontapu disi.
San yu ben sa piki?
• Fa futuboi fu Yehovah na ini owruten ben e libi leki sma di e tan fu wan pisi ten nomo na ini a grontapu fu a ten dati?
• Fa den fosi Kresten ben e tyari densrefi na ini a grontapu disi?
• Fa tru Kresten e sori taki den no e gebroiki den sani fu grontapu dorodoro?
• Fu san ede a no o hati wi noiti taki wi e libi leki sma di e tan fu wan pisi ten nomo na ini na ogri grontapu disi?
[Aksi fu a tori disi]
[Prenki na tapu bladzijde 18]
Den fosi Kresten no ben e teki prati na prisiri sani di ben abi fu du nanga ogridu èn nanga hurudu
