„Tan na ai”​—Fu san ede dati de so prenspari?

„SAN o de a marki taki yu kon èn taki a kaba fu a grontapu disi de krosibei?” (Mat. 24:3) A piki di Yesus gi den disipel fu en, skrifi na Mateyus kapitel 24, Markus kapitel 13 nanga Lukas kapitel 21. Yesus fruteri den disipel fu en fu wan marki di ben o de krin fu si. A fruteri den finifini san ben o pasa na a ten dati, so taki a ben o makriki gi den disipel fu sabi taki a ten dati doro. Baka dati a taki: „Tan na ai.”​—Mat. 24:42.

Ma efu a marki ben o de so krin fu si, dan fu san ede Yesus taigi den fu „tan na ai”? Meki wi luku tu sani di ben kan meki taki a taki so wan sani. A fosiwan na taki son sani kan puru sma prakseri, so taki den no poti prakseri moro na a marki. A bribi fu den kan kon swaki èn a kan taki den no de na ai moro fu si a marki. A di fu tu sani na taki wan Kresten kan si wan tu fu den sani fu a marki, ma fu di sani e go bun na en lontu, a kan go denki taki a marki no abi noti fu du nanga en. So wan sma kan go denki taki a „bigi banawtu” di Yesus ben taki fu en na a kaba fu a profeititori disi, de fara ete èn a no de fanowdu ete fu „tan na ai”.​—Mat. 24:21.

„Den no ben poti prakseri”

Yesus taigi den bakaman fu en fu prakseri den sma fu a ten fu Noa. Sma ben musu fu si fa Noa ben e preiki, fa a ben e bow wan bun bigi ark èn fa sma ben e kon moro ogri na a ten dati. Ma toku furu fu den „no ben poti prakseri” (Mat. 24:37-39). Na so sma de na ini a ten disi te den e kisi warskow. Fu eksempre, furu fu den no e poti prakseri na den wèt di e taki o tranga sma kan rèi na strati. Nofo tron lanti musu poti drempel noso den hei pisi na tapu strati, soso fu dwengi sma fu no rèi so tranga. Na so a kan tu taki wan Kresten e si a marki fu den lasti dei, ma toku disi no abi krakti tapu a fasi fa a e libi. Na dati pasa nanga Arielle, wan tini meisje fu West Afrika.

Arielle ben lobi fu luku den handbal plèi fu umasma na telefisi. Di en skoro seti wan handbal grupu a bigin denki fu plèi tu. A no ben de na ai fu si taki disi ben kan pori a matifasi di a ben abi nanga Gado. Na so a go na ini a handbal grupu èn a tron a gowli fu den. San pasa baka dati? A fruteri: „Sonwan fu den meisje na ini a grupu ben e hori nanga boi di ben e smoko èn gebroiki drugs. Den ben e lafu mi fu di mi no ben de leki den. Mi no ben denki taki disi ben o abi krakti na mi tapu. Ma baka wan pisi ten, handbal ben kon moro prenspari gi mi leki a dini di mi ben e dini Gado. Soso handbal ben de na mi ede. Te mi ben e de na den Kresten konmakandra na ini a Kownukondre zaal, dan nofo tron mi ben de nanga mi prakseri na handbal. Srefi a fasi fa mi ben musu tyari misrefi leki Kresten ben e kenki. Mi no ben e plèi handbal moro fu di mi lobi en, ma now na soso wini mi ben musu wini. Mi ben e oefen hebi, soso fu di mi ben lobi fu wini. Disi ben kon tron wan hebi gi mi. Mi lasi wan tu mati srefi fu handbal ede.

 Ma pe mi kon si taki handbal na a moro prenspari sani gi mi, na di wan tra grupu di ben e plèi teige wi, kisi wan penalty wan leisi. Mi ben seti misrefi fu puru a bal. Fosi mi denki mi begi Yehovah fu yepi mi puru a bal! Ne mi kisi misrefi. Mi kon si fa handbal pori a matifasi fu mi nanga Yehovah. San mi du fu meki sani kon bun baka?

Wan pisi ten pasa, mi ben luku a DVD Jonge mensen vragen — Wat ga ik met mijn leven doen? * (Yongu sma e aksi​—San mi o du nanga mi libi?) Mi bosroiti fu luku en baka èn disi leisi mi ben o poti prakseri trutru, fu di mi ben de na ini a srefi situwâsi leki André, a yonkuman di ben e plèi na ini a felem. Mi prakseri seryusu fu a sani di na owruman taigi André. A taigi en fu leisi èn prakseri bun fu Filipisma 3:8. Na dati mi du tu. Ne mi kon si taki mi musu gowe libi a handbal grupu èn na dati mi du tu.

Baka dati furu sani kenki na ini mi libi! A gersi leki wan hebi komoto na mi tapu now, fu di mi no gridi moro fu wini. Mi de moro koloku now èn mi kon de bun nanga mi Kresten mati. Den sani di wi leki Kresten musu du kon moro prenspari gi mi now. Mi e poti moro prakseri na den konmakandra èn mi lobi fu go baka na den. Mi preikiwroko kon moro bun tu. Now mi e dini doronomo leki yepipionier.”

Efu wan sani de di e puru yu prakseri na a marki di Yesus gi, du muiti fu kenki sani wantewante neleki fa Arielle du. Kande yu kan du wan fu den sani di wi o kari now. Na ini na Index van Wachttoren-publicaties yu kan feni artikel di kan yepi yu. A de leki wan karta di kan yepi yu fu feni gudu di kibri, fu di yu kan feni bun rai na ini èn ondrofenitori fu sma di ben de na ini den srefi situwâsi leki den di fu yu. Yu kan kisi moro wini tu fu den Kresten konmakandra te yu e sreka bun na fesi èn te yu e skrifi den prenspari sani di yu e yere na tapu papira. Son sma feni en moro bun tu fu sidon na fesisei na ini a zaal, so taki den kan poti prakseri moro bun. Te den arkiman abi na okasi fu gi piki, pruberi fu gi piki na a bigin. Yu kan tan na ai tu te yu e luku fa den sani di e pasa na ini a ten disi e kruderi nanga a marki fu „den lasti dei”.​—2 Tim. 3:1-5; 2 Petr. 3:3, 4; Openb. 6:1-8.

„De srekasreka”

A marki fu den lasti dei de fu si „na heri grontapu” (Mat. 24:7, 14). Ala sortu takru siki, gronseki, angriten, nanga tra sani di Bijbel taki na fesi, e meki taki milyunmilyun sma e pina na ini a ten disi. Ma furu sma e libi tu na presi pe sani no de so muilek èn den abi wan switi libi. Kande yu e libi na so wan presi èn den sani fu a marki no pasa nanga yu. Ma disi musu meki yu denki taki a bigi banawtu de fara ete? A no ben o koni srefisrefi fu denki dati.

Prakseri san Yesus taki fu „takru siki di e kiri ipi-ipi sma nanga angriten” (Luk. 21:11). A no ben taki dati disi ben o de na ala presi na grontapu na a srefi ten. A no ben taki tu dati na ala presi na grontapu yu ben o abi den srefi sortu siki noso taki angriten ben o hebi a srefi. Na presi fu dati a taki dati den ben o de „na difrenti presi”. Sobun, wi no kan fruwakti taki den srefi sani o pasa na ala sei na a srefi ten. Boiti dati, di Yesus taki fu angriten a sori tu taki sonwan fu den bakaman fu en ben musu luku bun  taki den no nyan pasa marki. A taki: „Luku bun taki noiti unu nyan pasa marki, . . . so taki un ati kon hebi” (Luk. 21:34). Sobun, wi no musu denki taki ala Kresten o ondrofeni ibri sani fu a marki. Na presi fu dati Yesus taki: „Te unu e si den sani disi e pasa, dan un musu sabi taki a Kownukondre fu Gado de krosibei” (Luk. 21:31). Te wi e luku telefisi nanga Internet, dan wi kan si taki ala den sani di taki na fesi leki marki fu den lasti dei, na sani di e pasa nownow, awinsi den no e pasa nanga wi noso na ini wi kondre.

Hori na prakseri tu taki Yehovah poti a „dei nanga a yuru” kaba o ten a bigi banawtu o bigin (Mat. 24:36). Den sani di e pasa na grontapu no o kenki a „dei nanga a yuru” dati.

Yesus gi Kresten na ala sei a rai disi: „De srekasreka” (Mat. 24:44). Ala ten wi musu de srekasreka. A no de fu taki dati wi no kan du wi diniwroko heri dei langa ibri dei. Boiti dati, nowan fu wi kan sabi pe wi o de èn san wi o du na a momenti te a bigi banawtu e bigin. Kande sonwan fu wi o de na wrokope e wroko noso trawan o de na oso e wroko (Mat. 24:40, 41). Sobun, san wi kan du fu de srekasreka?

Emmanuel, Victorine, nanga den siksi umapikin fu den e libi na Afrika na wan presi pe furu fu den sani fu a marki no e pasa. Ma den bosroiti fu taki fu wan pisi fu Bijbel ibri dei, so taki den kan de srekasreka. Emmanuel taki: „A ben muilek fu feni wan ten pe wi alamala ben kan sidon taki. Te fu kaba wi bosroiti fu du dati fu 6.00 yuru mamanten te 6.30 mamanten. Baka a deitekst wi e luku wan tu paragraaf fu wan fu den buku di wi o luku na den gemeente konmakandra a wiki dati.” A sani disi yepi den fu tan na ai? Iya! Emmanuel na a fesiman fu den owruman na ini a gemeente. Nofo tron Victorine e du yepi pionierwroko èn a yepi furu sma fu teki a tru leri. Ala den umapikin fu den e du en bun tu na ini a gemeente.

Yesus gi wi a rai: „Tan luku, tan na ai” (Mark. 13:33). No meki nowan sani puru yu prakseri, so taki yu no tan na ai. Na presi fu dati, du neleki Arielle èn poti prakseri na den bun rai di wi e kisi na ini den buku fu wi èn na den gemeente konmakandra. Neleki na osofamiri fu Emmanuel, yu kan du wan sani ibri dei tu fu de srekasreka èn fu „tan na ai”.

[Futuwortu]

[Prenki na tapu bladzijde 4]

Emmanuel nanga en osofamiri e taki fu wan pisi fu Bijbel ibri dei, so taki den kan „de srekasreka”