Fa yu kan sorgu taki ’sani waka bun nanga yu’?

A NO de fu taki dati ala sma wani abi bun bakapisi na ini a libi. Son sma ben abi bun bakapisi nanga a wroko fu den, fu di den kon gudu èn fu di den kon abi biginen. Trawan ben dren fu abi bun bakapisi na ini a libi, ma sani no waka bun gi den.

Te wi wani taki sani waka bun gi wi, dan wi musu sabi san na den moro prenspari sani na ini a libi. Tu sani di prenspari tu, na a fasi fa yu e gebroiki yu ten nanga yu krakti, èn a muiti di yu e meki fu doro den marki di yu poti.

Furu Kresten kon si taki den de koloku trutru fu di den e teki prati doronomo na a preikiwroko. Fu di yonguwan nanga owruwan e gebroiki den libi fu du a furuten diniwroko, meki sani e waka bun nanga den. Toku son sma feni taki a preikiwroko no e gi den prisiri, èn fu dati ede den e suku fu doro tra marki na ini a libi. Na so a du kon taki a preikiwroko no de na a fosi presi moro na ini den libi. Fa a sani disi e pasa? San yu kan du fu tan poti prakseri na den sani di prenspari trutru? Èn fa yu kan sorgu taki ’sani e waka bun nanga yu’?​—Yos. 1:8.

Sani di skoro e orga nanga sani di yu lobi fu du

Kresten yonguwan noiti no musu meki taki a ten di den e gebroiki gi tra sani, e tapu den fu dini a tru Gado. Te yonguwan e hori a sani dati na prakseri, dan sani o waka bun nanga den. Boiti dati, den yonguwan disi warti fu kisi prèise.

Ma son Kresten yonguwan e gebroiki tumusi furu ten fu du tra sani di a skoro fu den e orga, èn fu du sani di den lobi. Kande den sani dati srefi a no takru sani fu du. Ma Kresten yonguwan musu aksi densrefi: ’O furu ten den sani dati o teki fu mi? Nanga sortu sma mi abi demakandra? Sortu denki den sma di mi e miti na den presi dati abi? Èn san ben kan tron a moro prenspari sani na ini mi libi?’ A no de fu taki dati yu sabi taki wan sma kan bigin poti so furu prakseri na den sani dati, taki te fu kaba a no abi so furu ten moro fu dini Yehovah nanga en heri ati. Sobun, yu kan si fu san ede a de fanowdu taki wi sabi san na den moro prenspari sani fu du na ini a libi.​—Ef. 5:15-17.

Luku a tori fu Wiktor. * A e fruteri: „Di mi ben abi 12 yari, mi bigin prei volleybal na ini wan team. Bakaten mi wini furu prijs. Mi ben abi na okasi fu tron wan pôpi sportman.” Bakaten Wiktor bigin broko en ede, fu di a sport ben meki taki a bribi fu en ben e kon swaki. Wan dei di a ben e pruberi fu leisi Bijbel, dan a fadon na sribi. A ben kon si tu taki a preikiwroko no ben e gi en so furu prisiri moro. „A sport ben e weri mi skin, èn heri esi mi ben kon si taki mi no ben de fayafaya moro na ini na anbegi fu mi. Mi ben sabi taki mi no ben e du ala san mi man du.”

Heiskoro-leri

Bijbel e sori taki wan Kresten abi a frantwortu fu sorgu gi en osofamiri, èn dati wani taki tu dati a musu gi den nyanyan, krosi nanga wan presi fu tan (1 Tim. 5:8). Ma wan sma musu teki heiskoro-leri fu man tyari den frantwortu dati?

A ben o bun fu luku sortu krakti heiskoro-leri kan abi tapu a matifasi di wi abi nanga Yehovah. Wi sa poti prakseri na wan eksempre na ini Bijbel.

 Baruk ben de a sekretarsi fu a profeiti Yeremia. Na presi taki Baruk ben tan poti prakseri na a grani di a ben abi fu dini Yehovah, a ben bigin suku fu kisi biginen. Yehovah si dati èn nanga yepi fu Yeremia a warskow en: „Yu e tan suku bigi sani gi yusrefi. No suku den moro.”​—Yer. 45:5.

San na den „bigi sani” di Baruk ben e suku? Kande a ben e suku fu kisi biginen na ini a Dyu sistema. Noso a kan taki a ben wani kon gudu. Awinsi fa a no fa, a no ben poti den moro prenspari sani na a fosi presi moro, namku den sani di ben kan yepi en fu tan krosibei na Yehovah (Fil. 1:10). Ma soleki fa a sori, Baruk gi yesi na a warskow di Yehovah ben gi en nanga yepi fu Yeremia, èn a sani dati meki taki a tan na libi.​—Yer. 43:6.

San wi kan leri fu a tori disi? A rai di Baruk ben kisi e sori taki wan sani no ben bun. A ben e suku bigi sani gi ensrefi. Kande yu abi wan wroko kaba èn yu man sorgu yusrefi. Fu san ede yu ben o gebroiki yu ten, yu moni, nanga yu krakti fu teki heiskoro-leri? Na fu di yu wani abi a firi taki yu doro wan spesrutu marki, noso fu di yu wani plisi yu papa nanga mama noso tra famiriman?

Luku na eksempre fu Grzegorz, wan brada di e meki computer programa. Den mati fu en na wroko gi en deki-ati fu studeri moro fara so taki a ben kan du a wroko fu en moro bun. A leri di a ben o teki ben o aksi furu fu en. Baka wan syatu pisi ten, a no ben abi furu ten moro gi na anbegi fu en. A e taki: „Mi no ben firi bun. Mi ben kisi konsensi fonfon fu di mi no ben man doro den marki di mi ben poti na ini na anbegi.”

Te wan sma e poti tumusi furu prakseri na a wroko fu en

Gado Wortu e gi tru Kresten deki-ati fu wroko tranga, èn fu du a wroko fu den na wan seryusu fasi. Na apostel Paulus ben skrifi: „Awinsi san unu e du, du dati nanga un heri sili leki na gi Yehovah, èn no gi libisma” (Kol. 3:22, 23). Ma aladi a bun te sma e wroko tranga, toku ete wan sani de fanowdu. Wi musu abi wan bun matifasi nanga wi Mekiman (Preik. 12:13). Efu wan Kresten e gebroiki tumusi furu ten gi a grontapuwroko fu en, dan a kan pasa makriki taki a no e poti so furu prakseri moro na a anbegi fu en.

Te wan Kresten e gebroiki tumusi furu ten gi a grontapuwroko fu en, dan dati kan meki taki a o weri tumusi fu tranga a bribi fu en, èn fu en osofamiri. Kownu Salomo ben taki dati te wan sma e „wroko bun tranga”, dan nofo tron a e „feti fu fanga a winti”. Efu wan Kresten e poti tumusi furu prakseri na a grontapuwroko fu en, dan dati kan gi en furu broko-ede. Kande so wan sma e wroko so tranga, taki te fu kaba a no abi krakti moro fu du iniwan tra sani. Efu dati pasa, dan a o man ’prisiri trutru nanga ala a tranga  wroko di a du’? (Preik. 3:12, 13; 4:6) A o man tan tyari den frantwortu fu en na ini na osofamiri, èn a o man teki prati na a diniwroko? Fu taki en leti, den sani disi moro prenspari.

Janusz, di e libi na a Owstusei fu Europa, bigin gebroiki furu fu en ten gi a bisnis di a ben abi fu moi sma dyari. A e taki: „Grontapusma ben e lobi fa mi ben e du a wroko fu mi fu di den ben feni taki mi ben e du a wroko bun. Ma a bribi fu mi ben e kon swaki, èn te fu kaba mi no ben e go moro na ini a preikiwroko. Fosi yu denki, mi no ben e go moro na den konmakandra. Mi ben e denki so furu fu misrefi, taki mi no teki a rai di den owruman ben gi mi, èn mi drifi gowe fu a gemeente.”

Yu kan sorgu taki sani waka bun nanga yu

Wi poti prakseri na dri sani di kan teki tumusi furu ten fu wan Kresten so taki a bribi fu  en e kon swaki. Yu e du wan fu den sani disi? Efu dati de so, dan den aksi, den Bijbeltekst, nanga den piki di e kon now kan yepi yu fu si efu trutru sani sa waka bun nanga yu.

Sani di skoro e orga èn sani di yu lobi fu du: O furu ten yu e gebroiki gi den sortu sani disi? Den sani disi e teki tumusi furu fu a ten di yu ben e gebroiki gi na anbegi fu yu? A de so taki a no e gi yu prisiri moro fu abi demakandra nanga yu Kresten brada nanga sisa? Efu dati de so, dan fu san ede yu no e teki na eksempre fu Kownu David di ben begi Yehovah: „Sori mi a pasi di mi musu waka.”​—Ps. 143:8.

Wan kring-opziener ben yepi Wiktor, di wi kari na a bigin. A kring-opziener ben taigi en: „Yu e taki so fayafaya fu a volleybal di yu e prei.” Wiktor taki: „A sani dati seki mi. Mi ben kon si taki mi go tumusi fara. Heri esi, mi tapu fu abi demakandra nanga den volleybal mati fu mi, èn mi bigin meki mati na ini a gemeente.” Now Wiktor e dini Yehovah fayafaya na ini a gemeente fu en. A e gi yonguwan a rai disi: „Aksi den mati fu yu, yu papa nanga mama, noso den owruman fu a gemeente efu den feni taki den sani di yu musu du gi skoro e yepi yu fu kon moro krosibei na Yehovah, noso efu den e meki yu drifi gowe fu en.”

Fu san ede yu no e sori den owruman fu yu gemeente taki yu wani go na fesi na ini a diniwroko fu Gado? Kande yu kan yepi den owruwan di de den wawan, noso di abi yepi fanowdu. Kande yu kan go na wenkri gi den, noso kande yu kan du wan tu wroko gi den na den oso. Awinsi omeni yari yu abi, yu kan du a furuten diniwroko, èn yu kan fruteri trawan fu san ede yu e prisiri.

Heiskoro-leri: Yesus ben warskow wi fu no ’suku wi eigi glori’ (Yoh. 7:18). Awinsi omeni skoroleri yu bosroiti fu teki, yu sorgu taki yu „sabi san na den moro prenspari sani”?​—Fil. 1:9, 10.

Grzegorz, a brada di e meki computer programa, tyari wan tu kenki kon na ini en libi. A ben taki: „Mi gi yesi na a rai di den owruman gi mi fu tyari wan tu kenki kon na ini mi libi. Mi ben kon si taki a no ben de fanowdu taki mi ben e studeri moro fara. A sani dati ben o teki tumusi furu fu mi ten nanga mi krakti.” Grzegorz bigin du moro na ini a gemeente. Te fu kaba, a klari a skoro di wi sabi now leki Bijbel skoro gi brada di no trow. Iya, a „gebroiki ibri okasi” fu kisi moro leri fu Gado.​—Ef. 5:16.

Grontapuwroko: A de so taki yu e gebroiki so furu ten gi a wroko fu yu, taki yu no abi ten moro gi na anbegi? Yu e teki nofo ten fu taki nanga yu osofamiri? Èn yu e du muiti fu hori den prati di yu abi na ini a gemeente na wan moro bun fasi? Yu e taki nanga trawan fu sani di e gi den deki-ati? Te yu e „lespeki a tru Gado èn te yu e hori den komando fu en”, dan Yehovah sa blesi yu èn yu o ’prisiri nanga a tranga wroko fu yu’.​—Preik. 2:24; 12:13.

Janusz, di wi ben kari kaba na ini na artikel, no ben abi bun bakapisi, fu di sani no ben waka so bun nanga a bisnis di a ben abi fu moi sma dyari. Fu di a no ben e meki moni, èn fu di a ben abi bigi paiman, meki a suku yepi na Yehovah. Janusz seti en libi baka, èn now a e dini leki gewoon pionier èn leki gemeente owruman. A e taki: „Te mi de tevrede nanga den moro prenspari sani di mi abi fanowdu, èn te mi e gebroiki mi krakti gi na anbegi fu mi, dan dati e gi mi wan korostu firi.”​—Fil. 4:6, 7.

Teki ten fu luku bun fu san ede yu e du spesrutu sani, èn fu si san na den moro prenspari sani gi yu. Te yu e dini Yehovah, dan sani sa waka bun gi yu, yu heri libi langa. Meki a sani dati de a moro prenspari sani gi yu.

Kande yu sa abi fu tyari wan tu kenki kon. Iya, kande yu musu tapu nanga wan tu sani di no de fanowdu, so taki yu kan „kon sabi san na Gado en wani di bun, di e plisi en èn di de volmaakti” (Rom. 12:2). Ma te yu e dini Yehovah nanga yu heri ati, dan ’sani sa waka bun nanga yu’.

[Futuwortu]

[Faki/​Prenki na tapu bladzijde 31]

Fa yu kan sorgu taki sani waka bun nanga yu?

Fu di so furu sani de di kan nyan yu ten, meki yu musu aksi yusrefi fa yu kan sorgu taki yu e tan si san na den moro prenspari sani. Teki ten fu luku fu san ede yu e du son sani, èn sortu sani prenspari trutru gi yu. Den aksi di e kon now kan yepi yu fu du dati:

SANI DI SKORO E ORGA NANGA SANI DI YU LOBI FU DU

▪ Sortu denki den sma abi di yu e miti na den sani di skoro e orga?

▪ O furu ten den sani disi e teki fu yu?

▪ A kan taki yu o bigin poti tumusi furu prakseri na den sani disi?

▪ Den sani disi e teki tumusi furu fu a ten di yu ben e gebroiki gi na anbegi fu yu?

▪ Nanga sortu sma yu abi demakandra?

▪ A e gi yu moro prisiri te yu de nanga den sma dati, leki te yu de nanga yu Kresten brada nanga sisa?

HEISKORO-LERI

▪ Efu yu man sorgu yusrefi kaba, dan fu san ede yu ben o gebroiki yu ten, yu moni, nanga yu krakti fu teki heiskoro-leri?

▪ A de fanowdu taki wan sma musu teki heiskoro-leri fu man sorgu ensrefi?

▪ A o tapu yu fu go doronomo na den gemeente konmakandra?

▪ Yu sabi „san na den moro prenspari sani”?

▪ A de so taki yu musu kon abi moro frutrow taki Yehovah man sorgu gi yu?

GRONTAPUWROKO

▪ A wroko di yu teki e meki taki yu man ’prisiri nanga a tranga wroko fu yu’?

▪ Te yu komoto fu wroko, dan yu abi nofo krakti fu man tyari den frantwortu di yu abi na ini na osofamiri èn fu teki prati na a diniwroko?

▪ Yu abi nofo ten so taki yu nanga yu osofamiri kan abi takimakandra?

▪ A de so taki yu e gebroiki so furu ten gi a wroko fu yu, taki yu no abi so furu ten moro gi na anbegi?

▪ A de so taki a wroko fu yu meki taki yu no e hori den prati di yu e kisi na ini a gemeente, so bun moro?

[Prenki na tapu bladzijde 30]

Yehovah ben warskow Baruk taki a no ben musu suku biginen