Dini Yehovah na wan seryusu fasi

„Tan prakseri . . . ala sani di seryusu.”​—FIL. 4:8.

1, 2. San meki taki furu sma na ini a grontapu disi e suku nomo fu abi prisiri? Sortu aksi e opo kon leki baka pisi fu dati?

NA INI a ten disi, a libi na grontapu muilek moro leki iniwan ten bifo, èn den moro sari sani e pasa. Gi sma di no abi wan matifasi nanga Gado, a no makriki srefisrefi fu libi na ini den ’muilek ten disi di tranga fu pasa’ (2 Tim. 3:1-5). Den sma disi no abi nowan sma fu yepi den nanga den problema fu den, èn nofo tron den no man lusu den problema dati dorodoro. Fu di furu fu den sma disi no wani broko den ede tumusi nanga a libi, meki son leisi den e suku nomo fu abi prisiri, soso fu frigiti den problema fu a libi.

² Fu di furu sma no man nanga den problema fu a libi, meki den e si en leki wan tumusi prenspari sani fu abi prisiri. Efu Kresten no e luku bun, dan makriki den ben kan kisi a srefi denki dati. Fa wi kan sorgu taki dati no e pasa? A sani disi wani taki dati noiti wi no mag abi prisiri? Fa wi kan tyari den frantwortu fu wi na wan seryusu fasi, aladi wi e prisiri na ini na anbegi fu wi? Fa Bijbel kan yepi wi fu poti den moro prenspari sani na a fosi presi na ini wi libi, sondro taki wi e tron sma di seryusu tumusi?

Wi musu de seryusu na ini a grontapu disi pe sma lobi meki prisiri

3, 4. Fa Bijbel e yepi wi fu frustan taki wi musu de seryusu?

³ A de krin taki furu sma na ini a grontapu disi e si en leki wan tumusi prenspari sani fu meki „prisiri” (2 Tim. 3:4). A suku di grontapusma e suku nomo fu abi prisiri, kan abi krakti na wi tapu, èn te fu kaba dati kan pori a matifasi di wi abi nanga Gado (Odo 21:17). Dati meki a fiti taki den brifi di na apostel Paulus ben skrifi gi Timoteyus nanga Titus, e sori taki wi musu de seryusu. Te wi e fiti a rai dati, dan dati o yepi wi fu no de leki den grontapusma di e suku nomo fu abi prisiri.​—Leisi 1 Timoteyus 2:1, 2; Titus 2:2-8.

⁴ Hondrohondro yari na fesi, Salomo ben skrifi fu san ede son leisi a moro bun fu poti prakseri na den moro prenspari sani na ini a libi, na presi fu abi prisiri (Preik. 3:4; 7:2-4). Iya, fu di a libi syatu, meki wi musu „du ala muiti” fu kisi frulusu (Luk. 13:24). Fu dati ede, wi musu tan poti prakseri na „ala sani di seryusu” (Fil. 4:8, 9). Dati wani taki dati wi musu poti bun prakseri na ala sani di abi fu du nanga a Kresten libi fu wi.

5. San na wán sani di wi musu si leki wan seryusu sani na ini wi libi?

⁵ Fu eksempre, neleki Yehovah nanga Yesus, Kresten e si en leki wan tumusi prenspari sani fu wroko tranga (Yoh. 5:17). Fu dati ede, sma gwenti prèise den fu di den e wroko tranga èn fu di den de fu frutrow. Spesrutu den osofamiri edeman e si en leki wan prenspari sani fu wroko tranga, so taki den kan sorgu na osofamiri fu den. Fu taki en leti, wan sma di no e sorgu en osofamiri, ’drai baka’ gi Yehovah!​—1 Tim. 5:8.

Anbegi Gado nanga prisiri aladi yu de seryusu

6. Fa wi du sabi taki wi musu si na anbegi fu Yehovah leki wan seryusu sani?

⁶ Ala ten Yehovah e si a tru anbegi leki wan prenspari sani. Fu eksempre, den Israelsma di ben de na ondro a Wet di Gado ben gi Moses, ben e ondrofeni tumusi takru bakapisi te den ben e drai baka gi Yehovah (Yos. 23:12, 13). Na  ini a fosi yarihondro, den bakaman fu Krestes ben musu du tranga muiti fu sorgu taki falsi leri nanga fowtu denki no ben e kon abi krakti tapu a tru anbegi (2 Yoh. 7-11; Openb. 2:14-16). Na ini a ten disi, tru Kresten e tan si na anbegi fu den leki wan seryusu sani.​—1 Tim. 6:20.

7. Fa Paulus ben sreka ensrefi gi a diniwroko fu en?

⁷ A preikiwroko fu wi e gi wi prisiri. Ma fu man tan abi prisiri na ini a preikiwroko, dan wi musu si en leki wan prenspari wroko, èn wi musu sreka wisrefi bun. Paulus ben taki fa a ben e poti prakseri na den sma di a ben e gi leri. A ben skrifi: „Mi tron ala sani gi ala sortu sma, so taki mi kan du iniwan sani di de fanowdu fu frulusu awinsi wan tu sma nomo. Ma mi e du ala sani fu a bun nyunsu ede, so taki mi kan prati en nanga trawan” (1 Kor. 9:22, 23). Paulus ben e prisiri fu yepi sma fu kon moro krosibei na Gado, èn a ben e denki seryusu fa a ben o gi den arkiman fu en den sani di den ben abi fanowdu. Na so a ben man gi den deki-ati fu anbegi Yehovah.

8. (a) Fa wi musu si den sma di wi e gi leri na ini a diniwroko fu wi? (b) Te wi e studeri Bijbel nanga sma, dan fa dati e yepi wi fu abi prisiri na ini a diniwroko fu wi?

⁸ O prenspari a diniwroko ben de gi Paulus? A ben de klariklari fu „dini” Yehovah èn sosrefi den wan di ben wani arki den tru tori fu Bijbel (Rom. 12:11; 1 Kor. 9:19). Te wi e hori wan Bijbelstudie, te wi e gi leri na Kresten konmakandra, noso te wi e hori na Osofamiri Anbegi, dan wi e frustan sortu frantwortu wi abi na den sma di wi e gi leri? Kande wi feni taki a hebi tumusi gi wi fu studeri Bijbel doronomo nanga wan sma. A tru taki nofo tron wi musu gebroiki wi ten fu yepi tra sma, aladi wi ben o wani gebroiki a ten dati gi tra sani. Soleki fa a sori, dan na dati Yesus wani leri wi te a e taki dati „wan sma sa de moro koloku te a e gi sani, leki te a e kisi sani” (Tori. 20:35). Te wi e yepi trawan fu feni a pasi di sa gi den frulusu, dan wi sa de koloku moro leki te wi e du iniwan tra sani.

9, 10. (a) Te wi de seryusu, dan dati wani taki dati wi no kan abi prisiriten nanga sma? Fruklari dati. (b) San o yepi owruman fu de wan deki-ati gi trawan èn fu tron sma di trawan lobi fu taki nanga den?

⁹ Te wi de seryusu, dan dati no wani taki dati wi no mag abi prisiriten nanga tra sma. Yesus ben de wan heri bun eksempre gi wi, fu di a no ben e gi sma leri nomo, ma a ben e abi prisiriten tu nanga sma èn a ben e tron bun mati fu den (Luk. 5:27-29; Yoh. 12:1, 2). Te wi de seryusu, dan dati no wani taki tu dati ala ten wi musu span wi fesi. Efu Yesus noiti no ben e sori switifasi gi trawan, dan sma no ben o lobi en. Srefi pikin ben e firi switi te den ben de makandra nanga en (Mark. 10:13-16). Fa wi kan teki na eksempre fu Yesus?

¹⁰ Wan brada ben taki fu wan owruman: „Ala ten a e pruberi fu du sani na wan bun fasi, ma noiti a e fruwakti tumusi furu fu trawan.” Sma kan taki dati fu yu? A fiti taki wi e fruwakti spesrutu sani fu trawan. Fu eksempre, te papa nanga mama e fruwakti fu den pikin fu den taki den e doro spesrutu marki, dan den pikin lobi en te den papa nanga mama e yepi den fu doro den marki dati. Owruman kan gi sma na ini a gemeente deki-ati tu fu go na fesi na ini a tru anbegi, èn den kan gi den spesrutu rai fa fu du dati. Boiti dati, te wan owruman no e denki tumusi furu fu ensrefi, dan a sa de wan deki-ati gi trawan, èn sma no o feni en muilek fu go taki nanga en (Rom. 12:3). Wan sisa ben taki: „Mi no lobi te wan owruman e teki ala sani leki wan lafutori. Ma efu ala ten a seryusu tumusi, dan a no o makriki fu taki nanga en.” Wan tra sisa ben taki dati a „frede fu taki nanga son owruman, fu di den seryusu tumusi”. Noiti owruman musu meki taki den Kresten brada nanga sisa fu den no e si en leki wan prisiri moro fu dini Yehovah, „a koloku Gado”.​—1 Tim. 1:11.

Suku fu kisi frantwortu na ini a gemeente

11. San a wani taki te wan brada e „suku fu” kisi frantwortu na ini a gemeente?

¹¹ Di Paulus ben gi den brada na ini a gemeente  deki-ati fu pruberi fu kisi moro frantwortu, dan a no ben wani gi sma deki-ati fu suku biginen. Na presi fu dati a ben skrifi: „Efu wan sma e suku fu tron wan opziener, dan a e suku fu du wan tumusi bun wroko” (1 Tim. 3:1, 4). Kresten brada di e „suku fu” kisi moro frantwortu, musu wroko tranga fu kweki den fasi di den sa abi fanowdu fu dini den Kresten brada nanga sisa fu den. Efu wan brada di dopu wán yari kaba, doro den markitiki fu Bijbel fu man dini leki dinari ini a diniwroko, dan den brada kan bosroiti fu poti en leki dinari ini a diniwroko. Den markitiki dati skrifi na 1 Timoteyus 3:8-13. Luku taki vers 8 e taki krin: „Dinari ini a diniwroko musu de seryusu tu.”

12, 13. San na wan tu fasi fa yongu brada kan suku fu kisi frantwortu na ini a gemeente?

¹² Yu na wan seryusu dopu brada di abi sowan 18 noso 19 yari? Difrenti fasi de fa yu kan suku fu kisi moro frantwortu na ini a gemeente. Wan sani di yu kan du, na fu du moro na ini a preikiwroko. Yu lobi wroko nanga yongu brada nanga owru brada na ini a preikiwroko? Yu e pruberi fu feni wan Bijbelstudie? Te yu e studeri Bijbel nanga wan sma na a fasi fa wi leri dati na den Kresten konmakandra, dan dati o yepi yu fu tron wan moro bun leriman. Boiti dati, yu sa leri fu firi gi sma di e kon sabi Yehovah moro bun. Te a sma di yu e studeri Bijbel nanga en e kon si taki a musu tyari kenki kon, dan yu o leri fa yu kan yepi en fu hori ensrefi na Bijbel gronprakseri. Yu o leri fu du dati nanga pasensi èn na wan lespeki fasi.

¹³ Yongu brada, unu kan gi unsrefi fu yepi den owruwan na ini a gemeente na iniwan fasi fa unu man. Yu kan poti prakseri tu na a Kownukondre zaal, iya, kande yu kan yepi fu sorgu taki a e tan krin. Te yu de klariklari fu yepi na iniwan fasi fa yu man, dan dati o sori taki yu e si a diniwroko fu yu leki wan seryusu sani. Neleki Timoteyus, yu kan leri fu dini yu Kresten brada nanga sisa nanga yu heri ati.​—Leisi Filipisma 2:19-22.

14. Fa den brada kan luku efu yongu brada „bun nofo” fu teki frantwortu na den tapu na ini a gemeente?

¹⁴ Owruman, un no musu draidrai fu gebroiki yongu brada di e meki muiti fu „wai pasi gi den lostu di yongu sma abi” èn di e suku ’fu de regtfardiki, fu abi bribi, fu sori lobi, fu abi vrede’, èn fu kweki tra bun fasi (2 Tim. 2:22). Te unu e gi den wroko fu du na ini a gemeente, dan unu kan kon sabi „efu den bun nofo fu” teki frantwortu na den tapu, so taki ’ala sma kan si taki den e go na fesi’.​—1 Tim. 3:10; 4:15.

Sori taki yu de seryusu na ini a gemeente èn na ini na osofamiri

15. Soleki fa 1 Timoteyus 5:1, 2 e sori, dan fa wi kan sori taki wi de seryusu te a abi fu du nanga a fasi fa wi e si trawan?

¹⁵ Wan tra fasi fa wi kan sori taki wi de seryusu, na te wi e sori lespeki gi wi Kresten brada nanga sisa. Na ini a brifi di Paulus ben seni gi Timoteyus, Paulus e sori o prenspari a de fu sori lespeki gi trawan. (Leisi 1 Timoteyus 5:1, 2.) Iya, Kresten brada musu luku bun spesrutu fa den e handri nanga sisa. A bun fu teki na eksempre fu Yob te wi e luku a fasi fa a ben sori lespeki gi umasma, spesrutu a wefi fu en. A ben e luku bun fu no luku wan tra uma nanga a firi fu abi seks nanga en (Yob 31:1). Te wi abi  lespeki gi wi Kresten brada nanga sisa, dan wi no sa du neleki wi abi lobifiri gi den, èn wi no sa du nowan enkri sani di sa meki taki den no e firi switi moro te den de makandra nanga wi. Te tu sma e hori nanga makandra fu di den e prakseri fu trow, dan a prenspari trutru taki den e sori lespeki gi makandra. Wan Kresten di de seryusu, noiti no musu prei nanga den firi fu wan trawan.​—Odo 12:22.

16. Fa a denki di grontapusma abi fu a frantwortu di wan masra nanga wan papa abi, de heri tra fasi leki san Bijbel e sori?

¹⁶ Wi musu luku bun tu taki wi e tan si den frantwortu di Gado gi wi na ini na osofamiri, leki seryusu sani. A grontapu fu Satan e si den frantwortu di masra nanga papa abi, leki soso sani. Den sani di de fu si èn fu yere tapu radio nanga telefisi, e prenki na osofamiri edeman leki wan soso sma di no warti fu kisi lespeki. Ma Bijbel e sori taki wan masra abi bigi frantwortu, èn a de na „ede fu en wefi”.​—Ef. 5:23; 1 Kor. 11:3.

17. Fruklari fa a prati di wi abi na a Osofamiri Anbegi kan sori taki wi e si den frantwortu fu wi leki seryusu sani.

¹⁷ Kande wan masra e sorgu gi en osofamiri. Ma efu a no e yepi en osofamiri fu kon abi wan moro bun matifasi nanga Gado, dan dati ben o sori taki a no sabi san na den moro prenspari sani, èn taki a no koni (Deut. 6:6, 7). Fu dati ede, 1 Timoteyus 3:4 e taki dati efu yu na edeman fu wan osofamiri èn yu e suku fu kon abi moro frantwortu na ini a gemeente, dan yu musu de wan man „di e tiri en osofamiri na wan bun fasi èn di abi pikin di e saka densrefi na en ondro na wan seryusu fasi”. Aksi yusrefi a sani disi: ’Mi gwenti fu poti ten na wan sei fu studeri makandra nanga mi osofamiri?’ A gersi leki son Kresten wefi musu begi a masra fu den fu teki fesi na ini na anbegi. Ibri masra musu poti seryusu prakseri na a fasi fa den e si a frantwortu disi. A no de fu taki dati wan Kresten wefi musu yepi tu fu sorgu taki na osofamiri fu en e kisi wini fu na Osofamiri Anbegi, èn a musu wroko makandra nanga en masra fu meki sani waka bun.

18. Fa yonguwan kan leri fu de seryusu?

¹⁸ Srefi yonguwan e kisi a rai fu poti prakseri na den moro prenspari sani fu a libi (Preik. 12:1). A bun te pikin-nengre e leri fu wroko tranga èn te den e du wroko na ini na oso, efu den bigi nofo fu du spesrutu sani (Kragi. 3:27). Di Kownu David ben de wan yongu boi, dan a leri fu de wan bun skapuman. A ben leri tu fu meki poku èn fu skrifi singi. Fu di a ben abi den koni dati, meki a ben man dini a tiriman fu Israel (1 Sam. 16:11, 12, 18-21). A no de fu taki dati di David ben yongu a ben sabi fa fu prei, ma a ben leri tra prenspari koni tu di a gebroiki bakaten fu gi Yehovah grani. Fu di a ben de wan bun skapuman, meki a ben man tiri a pipel fu Israel nanga pasensi. Efu yu na wan yonguwan, dan omeni bun sani yu e leri fu du? Yu e leri sani di o yepi yu fu dini yu Mekiman  èn fu sreka yusrefi gi frantwortu di yu kan kisi na ini a ten di e kon?

Tan abi wan yoisti denki fu yusrefi

19, 20. Fa yu wani denki fu yusrefi èn fu na anbegi fu yu?

¹⁹ Wi alamala kan du muiti fu abi wan yoisti denki fu wisrefi. Wi no wani kon abi a denki taki ’wi na a moro bun sma di de’ (Preik. 7:16). Te wi no de tumusi seryusu, dan a o moro makriki gi wi fu lusu kesekese na oso, na wi wrokope, noso te wi e handri nanga wi Kresten brada nanga sisa. Sma na ini na osofamiri musu luku bun taki den no e krutu makandra tumusi, fu di dati kan meki taki na osofamiri no e firi switi moro na oso. Na ini a gemeente, ala sma kan lafu èn prisiri nanga trawan, èn wi musu taki nanga makandra fu sani di fiti èn di e gi wi deki-ati.​—2 Kor. 13:10; Ef. 4:29.

²⁰ Wi e libi na ini wan grontapu di no abi warderi gi Yehovah èn gi den wet fu en. Ma tra fasi leki den sma dati, a pipel fu Yehovah e si en leki wan tumusi prenspari sani fu gi yesi na a Gado fu den, èn fu tai hori na en. A e gi prisiri trutru fu de wan memre fu so wan bigi grupu sma di e anbegi Yehovah na „wan seryusu fasi”! Meki wi alamala abi a fasti bosroiti fu si a libi nanga na anbegi fu wi leki wan seryusu sani.

San yu ben sa piki?

• Fu san ede wi no musu de leki grontapusma di e suku nomo fu abi prisiri?

• Fa wi kan prisiri na ini a diniwroko fu wi aladi wi de seryusu?

• Te wi e si en leki wan prenspari sani fu teki frantwortu na wi tapu, dan fa dati e sori taki wi de seryusu?

• Fruklari fu san ede a de tumusi prenspari taki wi e sori lespeki gi wi Kresten brada nanga sisa èn gi den memre fu wi osofamiri?

[Aksi fu a tori disi]

[Prenki na tapu bladzijde 12]

Wan masra musu sorgu gi en osofamiri, èn a musu yepi den tu fu kon abi wan moro bun matifasi nanga Gado