Lobi regtfardikifasi nanga yu heri ati

„Yu lobi retidu.”​—PS. 45:7.

1. San o yepi wi fu „libi na wan reti fasi”?

NANGA yepi fu a Wortu fu en nanga en santa yeye, Yehovah e yepi a pipel fu en fu „libi na wan reti fasi” (Ps. 23:3). Ma fu di wi abi sondu, meki wi e kisi a firi fu du san no bun. Dati meki wi musu du tranga muiti fu man du baka san reti. San o yepi wi fu abi bun bakapisi? Neleki Yesus, wi musu lobi fu du san reti.​—Leisi Psalm 45:7.

2. San a wani taki fu „libi na wan reti fasi”?

² San a wani taki fu „libi na wan reti fasi”? Na ini Hebrewtongo nanga Grikitongo, a wortu „retidu” wani taki dati wan sma e hori ensrefi finifini na bun markitiki. Fu taki en leti, a sma disi e handri na wan fasi di e kruderi nanga den regtfardiki markitiki fu Yehovah. Fu di Yehovah na „a tanpe fu retidu”, meki den anbegiman fu en de klariklari fu suku yepi na en fu kon sabi fa den kan libi na wan reti fasi.​—Yer. 50:7.

3. Fa wi kan kon sabi moro fu a regtfardikifasi fu Gado?

³ Ma soso te wi e du ala san wi man fu hori wisrefi na den regtfardiki markitiki fu Gado, dan a sa feni wi bun (Deut. 32:4). Dati wani taki dati wi musu studeri Bijbel fu kon sabi ala san wi man fu Yehovah Gado. O moro wi e kon sabi sani fu en, o moro wi sa kon krosibei na en, èn o moro wi sa lobi a retidu noso a regtfardikifasi fu en (Yak. 4:8). Wi musu meki Gado Wortu tiri wi tu te wi musu teki prenspari bosroiti na ini a libi.

Suku a regtfardikifasi fu Gado

4. San a wani taki fu suku a regtfardikifasi fu Gado?

⁴ Leisi Mateyus 6:33. Te wi e suku a regtfardikifasi fu Gado, dan dati no wani taki nomo dati wi e gebroiki wi ten fu preiki a bun nyunsu fu a Kownukondre. Efu wi wani taki Yehovah feni a santa diniwroko fu wi bun, dan wi musu tyari wisrefi ibri dei na wan fasi di e kruderi nanga den hei markitiki fu en. San ala sma di e suku a regtfardikifasi fu Yehovah musu du? Den musu ’tron nyun sma di de soleki fa Gado wani, nanga trutru regtfardikifasi èn loyaalfasi’.​—Ef. 4:24.

5. San o yepi wi fu no lasi-ati dorodoro?

⁵ Te wi e pruberi fu hori wisrefi na den regtfardiki markitiki fu Gado, dan den swakifasi fu wi kan meki wi lasi-ati son leisi. San kan yepi wi fu no lasi-ati dorodoro, èn fa wi kan leri fu lobi regtfardikifasi? (Odo 24:10) Wi musu begi Yehovah doronomo „nanga wan krin ati, nanga tranga frutrow èn nanga bribi” (Hebr. 10:19-22). Awansi wi na salfu Kresten, noso awansi wi abi a howpu fu libi na grontapu, wi e poti bribi na ini a frulusu-ofrandi fu Yesus Krestes èn na ini den sani di a du leki wi bigi Granpriester (Rom. 5:8; Hebr. 4:14-16). Na apostel Yohanes ben skrifi: „A brudu fu Yesus . . . e krin wi fu ala sondu” (1 Yoh. 1:6, 7). Bijbel e taki dati awinsi den sondu fu wi „redi leki redi krosi, den sa tron srefi leki weti skapu-wiwiri”. A no de fu taki dati disi na wan tumusi moi sani di Yehovah seti gi wi nanga yepi fu a frulusu ofrandi fu en lobi Manpikin!​—Yes. 1:18.

Weri ala den sani di Gado gi yu fu feti

6. Fu san ede a prenspari srefisrefi taki wi e weri den sani di Gado gi wi fu feti?

⁶ Ala ten wi musu weri „regtfardikifasi leki  wan sani di musu kibri a borsu”, fu di dati na wan fu den prenspari sani di Gado gi wi fu feti (Ef. 6:11, 14). Awansi wi gi wisrefi abra na Yehovah no so langa pasa, noso awansi wi e du santa diniwroko gi en bun langa kaba, toku a de tumusi prenspari taki wi e tan weri den sani di a gi wi fu feti. Fu san ede? Fu di Mikael nanga den engel fu en fringi Didibri nanga den ogri yeye fu en kon na grontapu (Openb. 12:7-12). Satan e atibron èn a sabi taki en ten kon syatu. Sobun, a e tesi a pipel fu Gado moro nanga moro. Wi e frustan o prenspari a de fu „weri regtfardikifasi leki wan sani di musu kibri a borsu”?

7. Fa wi o tyari wisrefi te wi e frustan taki wi musu „weri regtfardikifasi leki wan sani di musu kibri a borsu”?

⁷ Nofo tron wan srudati ben e weri wan sani na en borsu fu kibri en ati. Fu di wi abi sondu, meki wi ati kan bedrigi wi, èn a wani du ogri nomonomo (Yer. 17:9). Fu di na ati fu wi wani du ogri, meki a de tumusi prenspari taki wi e leri fu du san bun (Gen. 8:21). Te wi e frustan taki wi musu weri „regtfardikifasi leki wan sani di musu kibri a borsu”, dan wi no sa puru en fu wan pisi ten, soso fu kisi prisiri fu sani di Gado no feni bun kwetikweti. Wi no sa sidon prakseri tu fa a ben o de fu du ogri. Wi no sa gebroiki tumusi furu fu wi warti ten tu fu luku telefisi. Na presi fu dati, wi sa tan meki muiti fu du san Yehovah feni bun. Awansi wi ben o fadon fu di wi meki sondu firi basi wi wan pisi ten, toku Yehovah o yepi wi fu opo tanapu baka.​—Leisi Odo 24:16.

8. Fu san ede wi musu abi ’a bigi skelt, noso bribi’?

⁸ Wan tra sani di Gado gi wi fu feti, na ’a bigi skelt, noso bribi’. Bribi e yepi wi fu ’kiri a faya fu ala den peiri di na ogriwan e sutu kon na wi tapu’ (Ef. 6:16). Te wi e du dati, dan a bribi di wi abi na ini Yehovah, èn sosrefi a tranga lobi di wi abi gi en, o yepi wi fu du san reti èn fu tan na tapu a pasi di e tyari wi go na têgo libi. O moro wi e leri fu lobi Yehovah, o moro wi sa warderi a regtfardikifasi fu en. Ma fa a de nanga a konsensi fu wi? Fa a e yepi wi fu lobi regtfardikifasi?

Tan abi wan bun konsensi

9. Te wi e tan abi wan bun konsensi, dan fa dati e tyari wini kon gi wi?

⁹ Di wi teki dopu, dan wi begi Yehovah fu „wan bun konsensi” (1 Petr. 3:21). Fu di wi e poti bribi na ini a lusu-paiman, meki a brudu fu Yesus e tapu den sondu fu wi, èn na so wi abi wan bun nen na Gado. Ma fu man tan sma di abi wan bun nen na Gado, dan wi musu tan abi wan bun konsensi. Efu son leisi a konsensi fu wi e krutu wi èn e warskow wi, dan wi musu de nanga tangi taki a e wroko bun. Dati e sori taki a konsensi fu wi no dede te a abi fu du nanga den regtfardiki markitiki fu Yehovah (1 Tim. 4:2). Ma a konsensi fu wi kan yepi wi na ete wan fasi te wi wani leri fu lobi regtfardikifasi.

10, 11. (a) Fruteri wan ondrofenitori di e sori fu san ede wi musu arki a konsensi fu wi di e wroko na wan fasi di e kruderi nanga Bijbel. (b) Fu san ede wi sa prisiri srefisrefi te wi lobi regtfardikifasi?

¹⁰ Te wi e du san no bun, dan a kan taki wi  e kisi konsensi fonfon. Wan yonguwan ben tapu fu ’du san reti’. A bigin teki en leki wan gwenti fu luku porno èn a bigin smoko marwana. Te a ben de na den konmakandra, dan en konsensi ben e fon en, èn te a ben e teki prati na a preikiwroko, dan a ben e firi leki wan hoigriman. Fu dati ede a tapu fu teki prati na a Kresten diniwroko. A ben taki: „Mi no ben denki taki mi konsensi ben o tan fon mi fu di mi ben e libi na a fasi dati.” A ben taki moro fara: „Fo yari langa mi tan du den don sani dati.” Baka dati a bigin prakseri fu drai go baka na a tru anbegi. Aladi a ben e denki taki Yehovah no ben o arki a begi fu en, toku a begi en èn a aksi en pardon. A no ben teki tin miniti baka dati, di en mama kon luku en èn a gi en deki-ati fu go baka na den konmakandra. A go na a Kownukondre zaal èn a aksi wan owruman fu studeri nanga en. Baka wan pisi ten, a teki dopu, èn a de nanga tangi taki Yehovah kibri en libi.

¹¹ Yu no feni taki a e gi prisiri trutru fu du san reti? Te wi e leri fu lobi regtfardikifasi èn fu handri na a fasi dati moro nanga moro, dan wi sa kisi moro prisiri te wi e du san wi hemel Tata feni bun. Denki a tori! A dei e kon taki a konsensi fu ala sma sa meki den firi bun ala ten. Den o man sori den fasi fu Gado soifri tu. Sobun, meki wi kweki lobi gi regtfardikifasi dipi na ini wi ati, so taki Yehovah kan prisiri.​—Odo 23:15, 16.

12, 13. San wi kan du fu meki a konsensi fu wi wroko bun?

¹² San wi kan du fu meki wi konsensi wroko bun? Te wi e studeri Bijbel nanga den Bijbel publikâsi fu wi, dan a de prenspari fu hori na prakseri taki „na ati fu a reti-ati sma e prakseri dipi fu sani, so taki a kan gi piki” (Odo 15:28). Prakseri fa a sani disi e yepi wi te wi musu bosroiti sortu wroko wi o teki. Efu a de krin taki wan spesrutu wroko no e kruderi nanga Bijbel, dan furu fu wi no e draidrai fu gi yesi na a rai di a getrow èn koni srafu e gi wi. Ma te wi no sabi soifri efu wi mag teki wan spesrutu wroko, dan wi musu hori Bijbel gronprakseri na prakseri, èn wi musu begi Gado fu yepi wi fu hori wisrefi na den gronprakseri dati. * Dati na gronprakseri di e sori wi taki wi musu luku bun fu no trobi a konsensi fu trawan (1 Kor. 10:31-33). Wi musu poti prakseri spesrutu na gronprakseri di abi fu du nanga a matifasi di wi abi nanga Gado. Efu Yehovah na wan trutru sma gi wi, dan a fosi sani di wi sa aksi wisrefi na disi: ’Mi ben o meki Yehovah sari te mi ben o du a wroko?’​—Ps. 78:40, 41

¹³ Te wi e sreka wisrefi gi a Waktitoren-studie noso gi a Gemeente Bijbelstudie, dan wi musu hori na prakseri taki wi musu denki dipi fu den sani di wi e leri. A de so taki wi gwenti hari strepi esi-esi na ondro den piki, soso fu go na a tra paragraaf? A no de fu taki dati te wi e studeri den publikâsi na a fasi dati, dan dati no sa yepi wi fu kon abi lobi gi regtfardikifasi, noso fu kon abi wan konsensi  di e wroko bun. Efu wi wani lobi regtfardikifasi, dan wi musu studeri Gado Wortu fayafaya, èn wi musu denki dipi fu den sani di wi e leisi. Iya, efu wi wani leri fu lobi regtfardikifasi nanga wi heri ati, dan wi musu du tranga muiti!

Angri gi regtfardikifasi

14. Fa Yehovah Gado nanga Yesus Krestes wani taki wi musu si a diniwroko fu wi?

¹⁴ Yehovah Gado nanga Yesus Krestes wani taki wi musu de koloku te wi e du santa diniwroko gi en. San o yepi wi fu de koloku? We, wi musu lobi regtfardikifasi! Na ini a Bergitaki fu en, Yesus ben taki: „Koloku fu den sma di e angri trutru fu regtfardikifasi, bika den o kisi sani bogobogo” (Mat. 5:6). San den wortu disi e leri den sma di wani lobi regtfardikifasi?

15, 16. Na sortu fasi Gado sa yepi den sma di e angri gi regtfardikifasi?

¹⁵ A grontapu disi de na ini a makti fu na ogriwan (1 Yoh. 5:19). Awansi na ini sortu kondre wi de, te wi e opo wan koranti leisi, dan wi e si taki ogridu e pasa na grontapu moro leki iniwan ten bifo. Wan regtfardikisma no man frustan srefisrefi fu san ede libisma e handri so takru nanga makandra (Preik. 8:9). Leki sma di lobi Yehovah, wi sabi taki en wawan kan yepi sma di e angri fu leri regtfardikifasi. Heri esi Gado o pori ogrisma na grontapu, èn sma di lobi regtfardikifasi no sa de na ini banawtu moro fu di sma no e hori densrefi na den wet fu Gado èn e du ogri-ati sani (2 Petr. 2:7, 8). Dati sa de wan frulekti trutru!

¹⁶ Leki futuboi fu Yehovah èn bakaman fu Yesus Krestes, wi sabi taki ala den sma di e angri gi regtfardikifasi „o kisi sani bogobogo”. Den o kisi ala san den abi fanowdu nanga yepi fu den nyun hemel nanga a nyun grontapu di Gado seti, èn pe „regtfardikifasi o tan” (2 Petr. 3:13). Sobun, meki wi no lasi-ati, èn meki wi no fruwondru tumusi taki ogridu lai moro regtfardikifasi na ini a grontapu disi fu Satan (Preik. 5:8). Yehovah, a Moro Heiwan, sabi san e pasa èn heri esi a o frulusu den wan di lobi regtfardikifasi.

Kisi wini fu di yu lobi regtfardikifasi

17. San na wan tu fasi fa sma di lobi regtfardikifasi e kisi wini?

¹⁷ Psalm 146:8 e sori krin fa wi sa kisi wini na wan tumusi moi fasi, te wi e du san reti. A psalm skrifiman ben singi: „Yehovah lobi den reti-ati sma.” Denki a tori! A Moro Hei Tiriman lobi wi fu di wi lobi regtfardikifasi! Fu di Yehovah lobi wi, meki wi abi a frutrow taki a sa sorgu gi wi te wi e tan poti Kownukondre afersi na a fosi presi na ini wi libi. (Leisi Psalm 37:25; Odo 10:3.) Te fu kaba, heri grontapu sa lai soso nanga sma di lobi regtfardikifasi (Odo 13:22). Furu futuboi fu Gado di e libi na wan reti fasi, sa prisiri srefisrefi èn den sa libi fu têgo na ini wan moi paradijs na grontapu. Srefi na ini a ten disi, den wan di lobi a regtfardikifasi fu Gado e kisi wan korostu firi di e meki taki wánfasi de na ini den osofamiri, èn na ini den gemeente fu den.​—Fil. 4:6, 7.

18. Sortu bun sani wi kan du aladi wi e wakti a dei fu Yehovah?

¹⁸ Wi musu tan suku a regtfardikifasi fu Yehovah, aladi wi e wakti a bigi dei fu en (Sef. 2:2, 3). Fu dati ede, meki wi tan sori taki  wi lobi den regtfardiki fasi fu Yehovah Gado trutru. Dati wani taki dati wi musu tan ’weri regtfardikifasi leki wan sani di e kibri a borsu’, so taki wi kan kibri na ati fu wi. Wi musu tan abi wan bun konsensi tu, iya, wan konsensi di sa meki wi firi koloku èn di sa meki Gado ati prisiri.​—Odo 27:11.

19. Sortu fasti bosroiti wi musu abi, èn na sortu sani a tra artikel o poti prakseri?

¹⁹ „Den ai fu Yehovah e luku heri grontapu fu si san e pasa, so taki a kan sori a krakti fu en fu yepi den wan di e dini en nanga den heri ati” (2 Kron. 16:9). A no de fu taki dati den wortu disi e trowstu wi trutru aladi wi e du san bun. Iya, wi e tan du dati, awansi a libi e kon muilek moro nanga moro, awansi moro nanga moro sma e du ogri, èn awansi sma ati e kon moro takru! A tru taki den ipi-ipi sma di no sabi Gado, kande no sa frustan fu san ede wi e du san reti. Ma wi sa kisi furu wini te wi e tan hori wisrefi na den regtfardiki markitiki fu Yehovah (Yes. 48:17; 1 Petr. 4:4). Sobun, meki wi abi a fasti bosroiti fu du ala san wi man fu lobi regtfardikifasi nanga wi heri ati, èn fu du san reti, fu di dati sa gi wi prisiri. Ma te wi e dini Gado nanga wi heri ati, dan dati wani taki tu dati wi e tegu gi san ogri. A tra artikel sa sori wi san dati wani taki.

[Futuwortu]

San yu ben sa piki?

• Fu san ede wi musu abi warderi gi a lusu-paiman efu wi wani lobi regtfardikifasi?

• Fu san ede a de tumusi prenspari taki wi e weri „regtfardikifasi leki wan sani di musu kibri a borsu”?

• San wi kan du fu meki a konsensi fu wi wroko bun?

[Aksi fu a tori disi]

[Prenki na tapu bladzijde 26]

Te wi konsensi e wroko bun, dan a o yepi wi fu kon sabi sortu wroko bun fu teki