Mi si san den tru tori fu Bijbel man du

Soleki fa Vito Fraese ben fruteri

KANDE noiti yu yere fu Trentinara. Disi na a nen fu wan pikin foto na a zuidsei fu Napels, na Italiakondre. Mi papa nanga mama, nanga mi brada Angelo gebore drape. Baka di Angelo gebore, dan mi papa nanga mama froisi go na Amerkankondre, èn den go tan na ini a foto Rochester, na New York, pe mi gebore na ini 1926. Na ini 1922, mi papa miti Yehovah Kotoigi fu a fosi leisi, èn na a ten dati sma ben sabi den leki Bijbel Ondrosukuman. Heri esi en nanga mi mama tron Bijbel Ondrosukuman.

Mi papa ben de wan tiri man di ben lobi sidon denki fu sani, ma a ben e mandi te sma no ben e handri na wan reti fasi. A no ben man frudrage taki den kerki fesiman no ben e gi sma leri fu Bijbel. Fu dati ede, a ben e teki ibri okasi fu fruteri trawan den tru tori fu Bijbel. Di a go nanga pensyun, dan a go na ini a furuten diniwroko èn a tan du a wroko disi teleki a ben doro 74 yari. A ben musu tapu nanga a furuten diniwroko fu di a ben kon siki èn fu di a no ben man nanga den kowru pisi ten fu a yari. Toku a ben tan preiki sowan 40 te go miti 60 yuru wan mun, èn a du dati teleki a ben pasa 90 yari. Na eksempre fu mi papa ben abi furu krakti na mi tapu. Aladi a ben e fruteri lafutori son leisi, toku a ben de wan seryusu man. A ben lobi taki: „Wi musu si a tru anbegi leki wan seryusu sani.”

Mi papa nanga mama ben du muiti fu leri ala den feifi pikin fu den a Wortu fu Gado. Mi teki dopu tapu 23 augustus 1943, èn na ini yuni 1944 mi tron wan pionier. Mi sisa Carmela ben e pionier na ini Geneva, na New York, makandra nanga en mati Fern di ben de nanga prisiri ala ten. A no ben teki langa di mi kon si taki Fern ben de na uma di mi ben wani leki mi wefi. Sobun, na ini augustus 1946 wi trow.

Wi e go du zendelingwroko

Den fosi tu presi pe wi ben musu go dini leki spesrutu pionier, ben de Geneva nanga Norwich, na ini New York. Na ini augustus 1948, wi kisi a grani fu go na a di fu 12 klas fu Gilead. Baka dati wi ben musu go dini na Napels na ini Italiakondre, makandra nanga wan tra zendeling trowpaar, namku Carl nanga Joanne Ridgeway. Na a ten dati, a libi ben muilek ete na ini Napels fu di na orloku ben pori furu sani na ini a foto. A ben muilek srefisrefi fu feni wan oso, èn fu dati ede wi ben e libi wan tu mun langa na ini wan pikin oso di ben abi tu kamra.

Mi leri taki Italiatongo na a fasi fa den sma fu Napels ben e taki en, fu di na so mi papa nanga mama ben e taki. Dati meki aladi sma ben kan yere taki mi na fu Amerkankondre, toku den ben man frustan na Italiatongo fu mi. Fern no ben man taki a tongo so bun. Ma mi kan taki dati baka wan pisi ten a bigin taki a tongo leti so bun leki mi, èn bakaten a ben e taki en moro bun leki mi.

Na a bigin, den wan-enkri sma di ben arki a boskopu, na wan famiri fu fo sma. Den sma disi ben e seri sikaret, aladi den no ben mag du dati. Ibri wrokodei te mamanten, wan sma fu a famiri  dati, namku Teresa ben e lai den someni saka fu en koto nanga sikaret èn na so a ben gersi leki a ben fatu. Ma te neti a ben mangri leki wan kowsubanti tiki. Dati ben de wan bigi kenki trutru. Den tru tori fu Bijbel kenki den sma disi dorodoro. Te fu kaba, sowan 16 sma fu a famiri disi tron Kotoigi. Now, pikinmoro 3700 Kotoigi de na ini a foto Napels.

Sma e gens a preikiwroko fu wi

Di wi ben de neigi mun nomo na ini Napels, dan lanti dwengi den fo fu wi fu gowe libi a foto. Wi go na Switserland pe wi tan wan mun èn wi ben musu aksi visum fu drai go baka na Italiakondre. Mi nanga Fern ben musu go dini na Turijn. Di wi doro drape, dan wi yuru wan kamra na wan uma èn wi ben mag gebroiki en wasi-oso nanga en kukru. Di a trowpaar Ridgeway doro na ini Turijn, dan wi yuru wan oso makandra nanga den. Bakaten, feifi zendeling trowpaar ben e tan na ini a srefi oso dati.

Di lanti seni wi komoto na ini Turijn na ini 1955, dan a fondamenti ben seti kaba gi fo nyun gemeente. Lepi brada ben de now di ben kan sorgu gi den gemeente disi. Den sma fu lanti ben taigi wi: „Wi sabi taki te unu Amerkan gowe, dan ala sani di unu du o lasi gowe.” Ma a fasi fa a wroko go na fesi bakaten e sori taki na Gado e meki a wroko gro. Nownowde, moro leki 4600 Kotoigi de na ini Turijn, èn a foto dati abi 56 gemeente.

Florence—wan tumusi moi foto

Bakaten wi ben musu go dini na Florence. Wi ben yere furu fu a foto disi, fu di mi sisa Carmela nanga en masra Merlin Hartzler ben e dini leki zendeling drape. Ma prakseri fa a ben de fu libi drape. Te yu ben e go na presi soleki Piazza della Signoria, Ponte Vecchio, Piazzale Michelangelo, nanga Palazzo Pitti, dan yu ben e si taki Florence na wan tumusi moi foto! A ben moi fu si fa son sma fu Florence ben e arki a bun nyunsu.

Wi ben e studeri nanga wan osofamiri èn a papa nanga mama teki dopu. Ma a papa ben e smoko. Na ini 1973, a tijdschrift De Wachttoren ben sori taki a gwenti di sma ben abi fu smoko no ben de wan bun gwenti fu di den sortu sma dati no ben de krin. Den moro bigi pikin ben begi a papa fu tapu nanga a gwenti dati. A pramisi den taki a ben o du dati, ma a no du san a ben taki. Wan neti, a wefi ben seni a twelengi di ben abi neigi yari, fu go sribi aladi a no ben begi nanga den. Bakaten a hati en taki a no ben  du dati èn a go na a kamra fu den. Den ben begi kaba gi densrefi. A mama aksi den: „San unu taki di unu ben e begi?” Den pikin piki en taki den ben begi: „Yehovah, grantangi yepi mi papa fu no smoko moro.” A wefi kari en masra èn a taki: „Kon arki san den pikin fu yu e begi.” Di a yere san den begi, dan wantronso a bigin krei èn a taki: „Mi no e smoko noiti moro!” A du san a pramisi, èn now moro leki 15 sma fu a famiri dati na Kotoigi.

Wi e go dini na ini Afrika

Na ini 1959 wi ben musu go dini na Mogadishu, na Somalia, èn wi go makandra nanga tu tra zendeling. Dati ben de Arturo Leveris nanga mi brada Angelo. Di wi doro drape, dan problema ben de na politiek sei. Lanti fu Italiakondre ben kisi a komando fu a Verenigde Naties fu horibaka gi Somalia, so taki a kondre dati ben kan kisi srefidensi. Ma a situwâsi ben e kon moro ogri. Sonwan fu den sma fu Italiakondre di wi ben e studeri nanga den, gowe libi a kondre, èn wi no ben man seti wan gemeente drape.

Na a ten dati, a zone-opziener aksi mi fu yepi en nanga a wroko fu en. Na so wi bigin go na den tra kondre na ini a kontren dati. Sonwan fu den sma di wi ben e studeri nanga den ben e go na fesi, ma den ben musu gowe libi a mamakondre fu den fu di den ben e kisi gens. Trawan fu den tan na ini a kondre, ma den nyan bun furu pina. Te nanga now wi ai e lon watra te wi e prakseri a lobi di den ben abi gi Yehovah èn den sani di den ondrofeni soso fu di den ben wani tan gi yesi na Gado.

Nofo tron a weer na ini Somalia nanga Eritrea ben faya srefisrefi. Ma sonwan fu den nyanyan di sma ben e bori drape ben e meki wi firi moro faya. A fosi leisi di wi nyan wan fu den nyanyan dati, wi ben de na wan Bijbelstudie fu wi. A dei dati mi wefi meki wi lafu fu di a taki dati a nyanyan ben faya so te, taki en heri yesi kon redi!

Di Angelo nanga Arturo ben musu go dini na wan tra presi, dan wi wawan tan na baka. A no ben makriki gi wi fu di wi no ben abi nowan sma fu gi wi deki-ati. Ma a situwâsi disi yepi wi fu kon moro krosibei na Yehovah èn fu poti moro frutrow na en tapu. Fu taki en leti, te wi ben e go luku den brada na ini kondre pe a wroko ben tapu, dan dati ben e gi wi deki-ati.

Difrenti problema ben de na ini Somalia. Fu di wi no ben abi wan ijskasi, meki wi ben e bai soso den sani di wi ben o nyan a dei dati, awansi dati ben de pisi sarki, noso froktu soleki manya, papaya, grapefruit, kronto, noso bakba. Freifrei nanga maskita ben lai drape. Son leisi te wi ben e hori Bijbelstudie, dan den ben e kon fruferi wi. Ma wi ben breiti taki wi ben abi  wan pikin bromfiets, so taki wi no ben abi fu waka omeni yuru langa na ini a faya son.

Wi e go baka na Italiakondre

Wi ben man go baka na Italiakondre fu de na a internationaal kongres di hori na ini Turijn na ini 1961. Wi go drape nanga wan sipi di ben e tyari bakba go na tra kondre, èn wi ben man du dati fu di mati fu wi ben de klariklari fu pai gi wi. Wi kon sabi taki wi ben musu go dini na wan tra presi. Na ini september 1962, wi drai go baka na Italiakondre, pe mi bigin dini leki kring-opziener. Wi bai wan pikin oto, di wi gebroiki feifi yari langa fu go luku den gemeente na ini tu kring.

Baka di wi ben horidoro na ini a faya weer fu Afrika, dan now wi ben musu horidoro na ini a kowru. A fosi kowru pisi ten fu a yari, wi ben go luku wan gemeente na a futu fu den Alpenbergi, èn wi ben e sribi na ini wan kamra di no ben abi nowan enkri sani fu hori wisrefi waran. A kamra disi ben de tapusei fu wan presi pe sma ben e kibri drei grasi gi kaw nanga tra meti. A ben kowru so te, taki wi go sribi nanga wi dyakti na wi skin. A neti dati, fo fowru nanga tu dagu drape dede fu di a ben kowru so!

Bakaten, mi bigin dini tu leki distrikt-opziener. Na ini den yari dati wi wroko a heri kontren fu Italiakondre. Wi go furu leisi na kontren soleki Calabrië nanga Sisilia, fu luku den brada nanga sisa drape. Wi gi den yonguwan deki-ati fu go na fesi na ini a tru anbegi, èn fu poti en leki marki fu tron gemeente opziener, opziener di e go luku den gemeente, noso leki sma di e dini na Bethel.

Wi leri furu fu bun mati di dini Yehovah nanga den heri ati. Wi warderi den fasi fu den, iya, wi warderi en taki den tan gi yesi na Yehovah, taki den de klariklari fu gi sani, taki den lobi den brada fu den, èn taki den de klariklari fu fiti densrefi èn fu gi densrefi fu a bun fu trawan. Wi go na trow di ben hori na ini a Kownukondre zaal. Na den trow dati, Kotoigi brada ben trow sma fu di den ben kisi primisi fu lanti fu du dati. Fosi, a sani dati no ben mag pasa srefisrefi na ini a kondre dati. Gemeente no ben e hori konmakandra moro na ini den kukru fu brada nanga sisa, èn den no ben e sidon moro na tapu planga soleki fa den ben gwenti du dati na ini Turijn. Na presi fu dati, furu gemeente e kon makandra na ini moi Kownukondre zaal di e gi Yehovah grani. Wi no e hori bigi konmakandra moro na presi di no bun nofo, ma wi e kon makandra na ini moi bigi Kongreshal. Èn a e gi wi prisiri trutru fu si taki wi abi 243.000 preikiman now. Di wi ben doro na ini Italiakondre, dan 490 preikiman nomo ben de.

Wi teki den yoisti bosroiti

Furu problema miti wi na ini a diniwroko, iya, wi ben e misi den famiriman fu wi, èn wi  ben e kon siki. Ibri leisi te Fern ben e si a se, dan a ben e misi den famiri fu en. A ben musu du dri seryusu oparâsi tu. Wan leisi di a ben de na pasi fu go studeri Bijbel nanga wan sma, dan wan sma di ben e gens Yehovah Kotoigi gi en mankeri nanga wan bigi forku di sma e gebroiki fu drai doti. A sani dati meki taki a doro na ati-oso.

Aladi wi ben e firi brokosaka son leisi, toku wi ’wakti tapu Yehovah’, soleki fa Kragisingi 3:24 e taigi wi. En na a Gado di e trowstu sma. Wan leisi di wi ben e firi brokosaka, dan Fern kisi wan moi brifi fu Brada Nathan Knorr. A skrifi taki a ben sabi heri bun taki umasma leki Fern di ben de fu a presi Pennsylvanisch Nederlands, na tranga uma di ben abi wan fasti overtoigi. A brada disi ben skrifi a sani dati fu di a ben gebore krosibei fu Bethlehem, na ini Pennsylvania, pe Fern ben bigin pionier. Èn a ben abi leti. Na ini den yari di pasa, wi kisi deki-ati na someni difrenti fasi èn fu someni difrenti sma.

Ala di wi ben kisi fu du nanga problema, toku wi pruberi fu tan fayafaya gi a diniwroko. Baka di wi dini moro leki 40 yari na ini a kringwroko nanga a distriktwroko, wi kisi wan nyun grani fu go luku èn fu go seti grupu nanga gemeente di e taki tra tongo boiti Italiatongo. Den grupu dati ben e preiki gi sma fu Bangladesh, China, Eritrea, Etiopia, Gana, India, Nigeria, den Filipijnen, Sri Lanka, nanga tra kondre. Wi si fa Gado Wortu kenki a libi fu furu sma di ondrofeni a sari-ati fu Yehovah. Wan buku srefi no ben o sari fu skrifi ala den tori dati.—Mika 7:18, 19.

Wi e begi Yehovah ibri dei fu tan gi wi a deki-ati nanga a krakti di wi abi fanowdu fu du a diniwroko fu wi. A prisiri di wi e kisi fu dini Masra, e gi wi krakti. A e meki wi ai skèin krin, èn a e gi wi na overtoigi taki wi teki den yoisti bosroiti na ini wi libi, aladi wi ben e yepi sma fu kon sabi den tru tori fu Bijbel.—Ef. 3:7; Kol. 1:29.

[Prenki/​Schema na tapu bladzijde 27-29 di e tyari sani kon na krin]

(Efu yu wani si pe den sani disi skrifi, luku a tijdschrift)

Mi papa nanga mama na ini Rochester, NY

1948

Na ini South Lansing gi a di fu 12 klas fu a Gileadskoro

1949

Mi nanga Fern, na a dei di wi ben o go na Italiakondre

Capri, Italiakondre

1952

Na ini Turijn nanga Napels makandra nanga tra zendeling

1963

Fern nanga wan tu Bijbelstudie

„Wi no musu lasi a faya di wi abi”