„Disi na a ten di mi feni bun spesrutu”
„Disi na a ten di mi feni bun spesrutu”
„Luku! Disi na a ten di mi feni bun spesrutu. Luku! Disi na a dei fu frulusu sma.” —2 KOR. 6:2.
1. Fu san ede wi musu sabi ala ten san na den moro prenspari sani di wi musu du?
„GI ALA sani wan ten de, iya, wan ten de gi ibri sani di sma e du na grontapu” (Preik. 3:1). Nanga den wortu disi Salomo ben wani tyari kon na krin o prenspari a de fu sabi san na a yoisti ten fu du sani di o tyari wini kon gi wi. Iya, wi musu sabi san na a yoisti ten fu du gronwroko, fu go na wan spesrutu presi, fu du bisnis, noso fu taki nanga trawan. Ma a de so tu taki ala ten wi musu sabi san na a moro prenspari wroko di wi musu du. Fu taki en leti, wi musu sabi krin san na den moro prenspari sani.
2. Fa wi du sabi taki Yesus ben frustan na ini sortu ten a ben e libi, di a ben e du a preikiwroko?
2 Di Yesus ben de na grontapu, a ben sabi soifri na ini sortu ten a ben e libi èn san a ben musu du. Fu di a ben frustan krin san ben de den moro prenspari sani gi en, meki a ben sabi taki a ten ben e doro di furu sma ben e fruwakti. Iya, furu fu den profeititori di abi fu du nanga a Mesias ben o kon tru (1 Petr. 1:11; Openb. 19:10). A ben musu meki sma kon sabi taki na en ben de a Mesias di Gado ben pramisi. A ben musu gi kotoigi finifini fu den tru tori fu a Kownukondre, èn a ben musu tyari den sma kon na wán di ben o tiri makandra nanga en na ini a Kownukondre. Boiti dati, a ben musu seti a Kresten gemeente di ben o du a preikiwroko èn di ben o meki disipel fu sma te na den moro farawe presi fu grontapu.—Mark. 1:15.
3. San Yesus du fu di a ben sabi na ini sortu ten a ben e libi?
3 Fu di Yesus ben sabi na ini sortu ten a ben e libi, meki a ben du a wani fu en Papa fayafaya. Yesus ben taigi den disipel fu en: „Fu tru, a kotiwroko bigi, ma furu wrokoman no de. Fu dati ede, begi a Masra fu a kotiwroko meki a seni wrokoman go du a kotiwroko fu en” (Luk. 10:2; Mal. 4:5, 6). Na a bigin, Yesus teki 12 fu den disipel, a taigi den krin san den ben musu du, èn a seni den fu go preiki. Bakaten, a seni ete 70 disipel. Den ben musu preiki a tumusi moi boskopu disi: „A kownukondre fu hemel kon krosibei kaba.” Ma luku san Bijbel e taki fu Yesus srefi: „Di Yesus kaba sori den twarfu disipel fu en san den ben musu du, dan a komopo drape fu gi leri èn fu preiki na ini den foto fu den.”—Mat. 10:5-7; 11:1; Luk. 10:1.
4. Na sortu fasi Paulus teki na eksempre fu Yesus Krestes?
4 Yesus na wan heri bun eksempre gi ala den bakaman fu en, fu di a ben e du a diniwroko fayafaya èn nanga en heri ati. Na fu a sani dati na apostel Paulus ben e taki, di a gi den Kresten brada nanga sisa fu en a rai disi: „Waka baka na eksempre fu mi, neleki fa mi e waka baka na eksempre fu Krestes” (1 Kor. 11:1). Na sortu fasi Paulus ben teki na eksempre fu Krestes? Wan prenspari fasi fa a ben e du dati, na taki a ben e preiki a bun nyunsu fayafaya. Na ini den brifi di Paulus ben skrifi gi den gemeente, wi kan leisi sani soleki „un no musu lesi te unu e du wroko”, „dini Yehovah leki srafu”, „ala ten abi furu fu du na ini a wroko fu Masra”, èn „awinsi san unu e du, du dati nanga un heri sili leki na gi Yehovah” (Rom. 12:11; 1 Kor. 15:58; Kol. 3:23). Paulus noiti no frigiti a dei di a ben miti nanga Masra Yesus Krestes di a ben de na pasi fu go na Damaskus. Noiti a no frigiti tu san Yesus ben taki, soleki fa a disipel Ananias ben musu fu fruteri en. Yesus ben taki: „Mi teki a man disi fu go fruteri den trakondre sma, den kownu, èn den manpikin fu Israel, fu a nen fu mi.”—Tori. 9:15; Rom. 1:1, 5; Gal. 1:16.
„A ten di mi feni bun spesrutu”
5. Fu san ede Paulus ben e du a diniwroko fu en fayafaya?
5 Te wi e leisi a buku Tori fu den Apostel, dan wi e si krin taki Paulus ben e du a diniwroko fu en fayafaya èn nanga deki-ati (Tori. 13:9, 10; 17:16, 17; 18:5). Paulus ben sabi taki a ben e libi na ini wan prenspari ten. A ben taki: „Luku! Disi na a ten di mi feni bun spesrutu. Luku! Disi na a dei fu frulusu sma” (2 Kor. 6:2). Na ini a yari 537 bifo Krestes, a ten ben doro taki den Dyu di ben de na ini Babilon, ben musu drai go baka na a kondre fu den (Yes. 49:8, 9). Ma fu sortu sani Paulus ben e taki dyaso? Den tra sani di Paulus ben taki sa yepi wi fu kon frustan san a ben abi na prakseri.
6, 7. Sortu bigi grani Gado gi salfu Kresten na ini a ten disi? Suma e wroko makandra nanga den salfuwan?
6 Na ini kapitel feifi fu a brifi fu en, Paulus ben taki fu wan bigi grani di en nanga den tra salfu Kresten ben kisi. (Leisi 2 Korentesma 5:18-20.) A ben tyari kon na krin taki Gado ben kari den fu du wan spesrutu wroko, namku fu du „a wroko fu fruteri sma fa den kan kon bun baka nanga [Gado]”, noso fu begi sma fu „kon bun baka nanga Gado”. Sobun, den ben musu yepi sma fu tron mati baka nanga Gado.
7 Fu di sma ben opo densrefi teige Gado na ini a dyari fu Eden, meki ala libisma lasi a matifasi di den ben abi nanga Yehovah (Rom. 3:10, 23). A sani dati meki taki libisma no sabi Gado moro, èn den no sabi tu san a abi na prakseri fu du. Leki bakapisi fu dati, libisma e pina èn den e dede. Paulus ben skrifi: „Wi sabi taki ala den sani di Gado meki, e tan geme èn te now ete den alamala abi pen” (Rom. 8:22). Ma Gado du san ben de fanowdu fu gi sma deki-ati, noso fu „begi” den fu meki sani bun baka nanga en. Na a diniwroko dati Paulus nanga den tra salfu Kresten ben musu du na ini a ten dati. A ’ten dati di Gado feni bun spesrutu’ ben kan tron wan „dei fu frulusu” gi furu sma di poti bribi na ini Yesus. Ala den salfu Kresten nanga den „tra skapu” di e wroko makandra nanga den, e tan gi sma a kari fu kisi wini fu a ’ten di Gado feni bun spesrutu’.—Yoh. 10:16.
8. Fu san ede a de wan tumusi moi sani taki sma e kisi a kari fu meki sani bun baka nanga Gado?
8 A kari di sma e kisi fu meki sani bun baka nanga Gado na wan tumusi moi sani, fu di a no Gado ben abi fowtu na ini a tori. Aladi na libisma pori a matifasi di den ben abi nanga Gado fu di den ben opo densrefi teige en na ini a dyari fu Eden, toku na Gado fosi seti sani so taki libisma kan kon bun baka nanga en (1 Yoh. 4:10, 19). San a du? Paulus taki: „Gado meki a libisma famiri kon bun baka nanga en nanga yepi fu Krestes, èn taki a no hori den sondu fu den na prakseri, èn a gi wi a boskopu di e sori sma fa den kan kon bun baka nanga en.”—2 Kor. 5:19; Yes. 55:6.
9. San Paulus du fu sori taki a ben de nanga tangi gi a sari-ati fu Gado?
9 Fu di Yehovah sorgu gi a frulusu-ofrandi, meki den wan di e sori bribi kan kisi pardon fu sondu, èn den kan kon kisi wan bun matifasi baka nanga Gado. Boiti dati, Gado seni den futuboi fu en fu gi sma na ala sei deki-ati fu meki sani bun baka nanga en, now di den abi a ten ete fu du dati. (Leisi 1 Timoteyus 2:3-6.) Fu di Paulus ben sabi san Gado abi na prakseri, èn fu di a ben sabi na ini sortu ten a ben e libi, meki a tan du muiti fayafaya fu du ’a wroko di a ben kisi fu fruteri sma fa den kan kon bun baka nanga Gado’. A wani fu Yehovah no kenki. Na wan agersi fasi, Yehovah e langa en anu ete gi sma na ini a ten disi fu yepi den. Den wortu fu Paulus, namku „disi na a ten di mi feni bun spesrutu” èn „disi na a dei fu frulusu sma” abi fu du nanga a ten disi tu. Yehovah na trutru wan Gado di abi sari-ati!—Ex. 34:6, 7.
’No meki a de fu soso’
10. San „a dei fu frulusu” ben wani taki gi salfu Kresten fu fosi èn fu a ten disi?
10 Den fosi sma di kisi wini fu a bun-ati fu Gado ben de den sma di „de wán nanga Krestes” (2 Kor. 5:17, 18). Gi den sma dati, „a dei fu frulusu” bigin na a ten fu a Pinksterfesa fu a yari 33. Sensi a ten dati, den sma dati kisi a frantwortu fu tyari ’a boskopu di e sori sma fa den kan kon bun baka nanga Gado’. Na ini a ten disi, den salfu Kresten di de ete na grontapu e du ’a wroko ete fu fruteri sma fa den kan kon bun baka nanga Gado’. Den sabi taki den fo engel di na apostel Yohanes ben si na ini wan fisyun „e hori den fo winti fu grontapu bun steifi, so taki nowan fu den winti ben kan wai kon na grontapu”. Sobun, wi e libi ete „na ini a dei fu frulusu”, èn na ini ’a ten di Gado feni bun spesrutu’ (Openb. 7:1-3). Fu dati ede, sensi a bigin fu a di fu 20 yarihondro, den salfuwan di de ete na grontapu e wroko fayafaya fu ’fruteri sma na ala sei fu grontapu fa den kan kon bun baka nanga Gado’.
11, 12. Fa den salfu Kresten di ben e libi na a bigin fu a di fu 20 yarihondro, sori taki den ben sabi na ini sortu ten den ben e libi? (Luku a prenki na tapu bladzijde 15.)
11 Fu eksempre, a buku Jehovah’s Getuigen — Verkondigers van Gods koninkrijk, e taki dati na a bigin fu a di fu 20 yarihondro „C. T. Russell nanga den kompe fu en ben abi na overtoigi taki den ben e libi na ini wan ten pe wan kotiwroko ben musu du, èn den ben bribi tu taki sma ben musu yere den tru tori fu Bijbel di ben o meki den kon fri”. San den du fu dati ede? Fu di den brada disi ben sabi taki den ben e libi na a ten pe wan kotiwroko ben musu du, iya a ’ten di Gado feni bun spesrutu’, meki den ben feni taki den ben musu du moro leki fu gi sma wan kari nomo fu kon na kerki. Na dati den kerki fesiman fu Krestenhèit e du langa ten kaba. Ma den salfu Kresten bigin suku tra fasi fa den ben kan preiki a bun nyunsu gi moro sma. Wan fu den koni sani di den du fu du a wroko fu den moro bun, na taki den gebroiki den nyun sani di sabiman ben meki.
12 Fu man panya a bun nyunsu fu a Kownukondre, a pikin grupu dati fu fayafaya preikiman gebroiki traktaat, pamflet, tijdschrift, nanga buku. Den ben skrifi lezing nanga artikel di tyari kon na doro na ini dusundusun koranti. Den ben hori radio programa fu Bijbel tori di sma ben kan yere na ini a heri kondre, èn na tra kondre sosrefi. Den ben meki felem nanga yepi fu prenki èn te a felem ben e drai, sma ben kan yere a boskopu di ben abi fu du nanga ibriwan fu den prenki. Na a ten dati, den bigi felem organisâsi no ben meki felem ete pe sma ben kan yere san ben e pasa na ini a felem. Sortu bun bakapisi den brada ben abi fu di den ben e wroko so fayafaya? Na ini a ten disi, sowan seibi milyun sma teki a kari fu „kon bun baka nanga Gado”, èn den e yepi tu fu gi sma a srefi kari dati. A no de fu taki dati den fositen futuboi fu Yehovah de wan bun eksempre gi wi fu di den ben de fayafaya, aladi den no ben abi den kefalek sani di wi abi na ini ten disi.
13. Sortu sani di Gado wani du, wi musu hori na prakseri?
13 Den wortu ’disi na a ten di Gado feni bun spesrutu’ abi fu du tu nanga a ten disi. Wi di ondrofeni a bun-ati fu Yehovah, de nanga tangi taki wi kisi a kari fu meki sani kon bun baka nanga en. Ma wi no musu denki taki wi de kaba. Na presi fu dati, wi musu gi yesi na den wortu disi di Paulus ben taki: „Wi e begi unu tu fu no meki a no-frudini bun-ati fu Gado de fu soso” (2 Kor. 6:1). Gado e sori bun-ati gi a libisma famiri, fu di a wani taki den „kon bun baka nanga en” nanga yepi fu Krestes.—2 Kor. 5:19.
14. San e pasa now na ini furu kondre?
14 Fu di Satan breni furu sma, meki den no abi wan bun matifasi ete nanga Gado, èn den no sabi taki den kan kisi wini fu a bun-ati fu Gado (2 Kor. 4:3, 4; 1 Yoh. 5:19). Ma fu di a situwâsi na grontapu e kon moro ogri, meki furu sma e gi yesi na a boskopu te den e kon sabi taki na ogri di sma e du, èn a pina di den e pina e kon fu di sma no abi wan bun matifasi nanga Gado. Srefi na ini kondre pe sma no ben e arki a boskopu fu wi, now furu fu den e gi yesi na a bun nyunsu èn den e du san den musu du fu kon bun baka nanga Gado. Wi e frustan taki now na a ten fu meki moro muiti fu gi sma a kari „fu kon bun baka nanga Gado”?
15. Na presi taki wi e preiki wan boskopu di e switi sma yesi, dan san wi wani sma na ala sei fu kon sabi?
15 A wroko di wi abi a no fu taigi sma nomo taki te den e suku yepi na Gado, dan a o yepi den nanga ala den problema fu den, èn taki den o firi moro bun. Na dati furu sma wani yere te den e go na kerki, èn den kerki de klariklari fu taigi sma san den wani yere, soso fu hari moro sma kon na a kerki fu den (2 Tim. 4:3, 4). Dati a no a marki fu a diniwroko fu wi. A bun nyunsu di wi e preiki, na taki Yehovah de klariklari fu gi wi pardon fu den sondu fu wi nanga yepi fu Krestes, èn a e du dati fu di a lobi wi. Na so sma kan kon bun baka nanga Gado (Rom. 5:10; 8:32). Ma ’a ten di Gado feni bun spesrutu’ o kon na wan kaba heri esi.
„De nanga faya nanga yepi fu a yeye”
16. Fa a du kon taki Paulus ben man du a diniwroko fu en nanga deki-ati èn nanga faya?
16 Fa wi kan kon de nanga faya gi a tru anbegi, èn san o yepi wi fu no lasi a faya dati? Kande son sma e syensyen noso kande a muilek gi den fu sori fa den e firi. Ma a bun fu hori na prakseri taki te wan sma de fayafaya, dan dati no wani taki nomo dati a e sori fa a e firi, noso taki a de nanga prisiri. A sani dati no abi fu du tu nanga a fasi fa a sma de. Paulus ben sori fa wi kan kon de fayafaya, di a gi en Kresten brada nanga sisa a rai disi: „De nanga faya nanga yepi fu a yeye” (Rom. 12:11). A yeye fu Yehovah ben de wan bigi yepi gi na apostel Paulus. Fu dati ede a ben man du a preikiwroko nanga deki-ati, èn a ben man horidoro na ini a wroko dati. Sensi a dei di Yesus kari en fu du a wroko, teleki a lasti leisi di a ben de na strafu-oso na ini Rome pe den kiri en, dan wan pisi ten fu sowan 30 yari ben pasa. Ma noiti Paulus lasi faya gi a diniwroko. Ala ten a ben e frutrow tapu Gado, di ben gi en krakti nanga yepi fu a yeye. Paulus ben taki: „Mi man du ala sani nanga yepi fu a sma di e gi mi krakti” (Fil. 4:13). A no de fu taki dati wi kan leri furu fu na eksempre fu en!
17. San kan yepi wi fu „de nanga faya nanga yepi fu a yeye”?
17 A wortu di vertaal nanga „de nanga faya”, trutru wani taki „a kuku di wan sani e kuku” (Kingdom Interlinear). Efu wi wani taki watra tan kuku na ini wan patu, dan a faya musu tan bron doronomo. Na so a de tu, taki efu wi wani „de nanga faya nanga yepi fu a yeye”, dan wi abi a yeye fu Gado fanowdu doronomo. Wi kan kisi a yeye fu Gado doronomo, te wi e gebroiki ala den sani di Yehovah seti so taki wi kan tranga a bribi fu wi. Dati wani taki dati wi musu si en leki wan seryusu sani fu anbegi Gado leki osofamiri èn makandra nanga a gemeente. Iya, wi musu studeri Bijbel doronomo, wi musu studeri doronomo nanga wi osofamiri, wi musu begi doronomo, èn wi musu kon makandra doronomo nanga wi Kresten brada nanga sisa. Dati o yepi wi fu „de nanga faya nanga yepi fu a yeye”.—Leisi Tori fu den Apostel 4:20; 18:25.
18. Na sortu sani wi leki dopu Kresten musu poti ala wi prakseri?
18 Wan sma di e du wan sani nanga en heri ati, e poti ala en prakseri na a sani di a e du, èn a no e pasa makriki taki sani e puru en prakseri, noso taki a e lasi-ati. Wi leki dopu Kresten wani du iniwan sani di Yehovah e aksi fu wi, neleki fa Yesus ben e du dati (Hebr. 10:7). Na ini a ten disi, Yehovah wani taki so furu sma leki a kan e meki sani bun baka nanga en. Fu dati ede, meki wi teki na eksempre fu Yesus nanga Paulus, èn meki wi de nanga faya gi a tumusi prenspari wroko di wi kisi fu du na ini a ten disi.
Yu e memre disi ete?
• San ben de a diniwroko di Paulus nanga den tra salfu Kresten ben kisi fu du?
• Fa den salfuwan di de ete na grontapu gebroiki ’a ten di Gado feni bun spesrutu’ na a yoisti fasi?
• Fa Kresten kan „de nanga faya nanga yepi fu a yeye”?
[Aksi fu a tori disi]
[Prenki na tapu bladzijde 12]
Noiti Paulus frigiti a dei di a miti Masra Yesus Krestes