Fu san ede wi musu de biten?

A NO makriki ala ten fu de biten. Wan tu sani di kan tapu wi fu de biten, na te wi musu go na wan farawe presi, te furu wagi e tapu pasi gi wi, èn te wi abi furu fu du. Ma toku a de prenspari fu de biten. Fu eksempre, te wan sma na wrokope de biten, dan nofo tron trawan e si en leki wan sma di den kan frutrow èn di e si a wroko fu en leki wan seryusu sani. Ma te wan sma e kon lati, dan kande trawan o abi fu wakti en fu man du den eigi wroko, èn a wroko o du frafra. Wan skoropikin di e kon lati na skoro o misi son les, èn a no o wroko bun na skoro. Te wan sma di musu kisi datrayepi e kon lati, dan datra no o man yepi en bun.

Ma na son presi sma no e si en leki wan prenspari sani fu de biten. Te wi e libi na den presi dati, dan makriki wi ben kan teki en leki wan gwenti fu doro lati. Efu dati de so, dan a de tumusi prenspari taki wi e kon kisi na angri fu de biten. Te wi e frustan o prenspari a sani dati de, dan dati sa yepi wi fu de biten. Fu san ede wi musu de biten? Fa wi kan sorgu taki wi de biten? Sortu wini wi sa kisi te wi de biten?

Yehovah na wan Gado di e du sani na a yoisti ten

A moro prenspari reide fu san ede wi wani de biten, na fu di wi wani de leki a Gado di wi  e anbegi (Ef. 5:1). Yehovah e gi wi wan heri bun eksempre te a abi fu du nanga a tori disi. Yehovah noiti no lati. A e du sani soifri leki fa a ben seti na fesi, so taki a wani fu en kon tru. Fu eksempre, di Yehovah bosroiti taki a ben o pori na ogri grontapu nanga wan frudu, dan Yehovah taigi Noa: „Teki udu fu bon di e puru tara, èn meki wan ark gi yusrefi.” Di a ten ben e doro taki a ben o pori grontapu, dan Yehovah taigi Noa fu go na ini na ark èn a taki: „Ete seibi dei, dan mi o meki alen fadon kon na grontapu fotenti dei nanga fotenti neti, èn ala den libisani di mi meki, mi o figi puru na grontapu.” Èn na a yoisti ten, noso „seibi dei baka dati, den watra fu a bigi frudu saka kon na grontapu” (Gen. 6:14; 7:4, 10). Prakseri san ben kan pasa te Noa nanga en osofamiri no ben de na ini na ark biten. Den ben musu de biten, neleki a Gado di den ben e anbegi.

Sowan 450 yari baka a Frudu, Yehovah taigi a famiri-edeman Abraham taki a ben o kisi wan manpikin, èn a manpikin disi ben o tron na afo fu a pramisi Pikin (Gen. 17:15-17).  Gado ben taki dati Isak ben o gebore a „tra yari na so wan ten”. Na dati pasa trutru? Bijbel e taki: ’Na Abraham en owrudei, Sara kon de nanga bere. Na a ten di Gado ben taigi Abraham a sani dati, Sara kisi wan manpikin.’—Gen. 17:21; 21:2.

Bijbel lai nanga eksempre di e sori taki Gado e du sani na a yoisti ten (Yer. 25:11-13; Dan. 4:20-25; 9:25). Bijbel e taki dati wi musu tan fruwakti a krutudei fu Yehovah. Awansi a gersi leki a e teki langa fosi a dei dati kon, toku wi e kisi a dyaranti taki „a no o kon lati”.—Hab. 2:3.

Wi musu de biten te a abi fu du nanga na anbegi

Ala den mansma fu Israel ben musu de biten na den presi pe den ben o hori ’den fesa di ben musu hori gi Yehovah na spesrutu ten fu a yari’ (Lef. 23:2, 4). Gado ben bosroiti tu o ten sma ben musu tyari spesrutu ofrandi (Ex. 29:38, 39; Lef. 23:37, 38). A sani disi e sori taki Gado wani taki den futuboi fu en musu de biten te a abi fu du nanga na anbegi fu den, a no so?

Na ini a fosi yarihondro di na apostel Paulus ben taigi den Kresten fa den ben musu hori den Kresten konmakandra, dan a gi den a rai disi: „Meki ala sani pasa na wan fasi di fiti èn soleki fa sani seti” (1 Kor. 14:40). A rai disi ben e sori taki Kresten konmakandra ben musu bigin na wan spesrutu ten. Yehovah abi a srefi denki ete te a abi fu du nanga a tori disi (Mal. 3:6). Sobun, san wi kan du fu de biten na den Kresten konmakandra?

San wi kan du fu de biten?

Son sma kon si taki a e yepi te den e seti sani na fesi (Odo 21:5). Kon meki wi taki dati wi musu doro wan presi na wan spesrutu ten. A ben o bun fu gowe na wan ten di sa meki taki wi musu hasti wisrefi? A no ben o moro bun fu gowe moro fruku? Te wi e du dati, dan wi no sa doro lati, awansi ’sani e pasa di wi no fruwakti’, a o so? (Preik. 9:11) Wan yonguman di nen José, * e taki: „Wan sani di kan yepi iniwan sma fu doro biten na wan presi, na fu sabi o langa a e teki fu doro drape.”

Kande son sma musu seti sani fu komoto fruku na wroko, so taki den kan doro biten na den Kresten konmakandra. Na dati wan Kotoigi na ini Etiopia du di a kon si taki a ben o lati 45 miniti gi den gemeente konmakandra, fu di en wroko yuru ben kenki. A seti sani so taki wan tra wrokoman ben e kon na wroko moro fruku fu teki abra gi en, na den neti te a ben musu go na den konmakandra. Fu di a wrokoman dati ben du dati gi en, meki a Kotoigi du en wroko gi en wan neti, èn dati ben de wan pisi ten fu seibi yuru langa.

Efu wi abi yongu pikin, dan a moro muilek fu doro biten na den konmakandra. Nofo tron na a mama abi a frantwortu fu sreka den pikin, ma tra sma fu na osofamiri kan yepi tu, èn a fiti te den e du dati. Esperanza, wan mama na ini Meksikow, e sorgu aiti pikin en wawan. Den yari fu den pikin na feifi te go miti 23 yari. Esperanza e fruteri san en osofamiri e du fu de biten. A e taki: „Den bigi umapikin fu mi e yepi fu sreka den moro pikinwan. Na so mi kan klari a wroko di mi musu du na oso, èn mi man sreka misrefi fu komoto na oso na wan spesrutu ten te wi musu go na den konmakandra.” Na osofamiri disi abi wan spesrutu ten fu komoto na oso, èn ala sma e yepi makandra.

Yu sa kisi wini te yu e doro biten na den konmakandra

Te wi e poti prakseri na den blesi di wi e kisi te wi e doro biten na den Kresten konmakandra, dan dati kan gi wi moro deki-ati fu du ala san wi man fu de biten. Wan yongu uma di nen Sandra, kon abi a gwenti fu doro biten na den konmakandra. A e taki: „Mi lobi fu doro fruku na a Kownukondre zaal, fu di dati e gi mi okasi fu taki den brada nanga sisa odi, fu  taki nanga den, èn fu kon sabi den moro bun.” Te wi e doro fruku na a Kownukondre zaal, dan wi kan kisi wini fu den ondrofenitori fu den brada nanga sisa drape di e horidoro, èn di e dini Gado nanga den heri ati. Te wi de na den konmakandra èn te wi e taki sani di e tranga a bribi fu wi brada nanga sisa, dan dati sa gi den „deki-ati fu abi lobi èn fu du bun wroko”.—Hebr. 10:24, 25.

A singi èn a begi na a bigin fu ibri Kresten konmakandra, na prenspari pisi fu na anbegi fu wi (Ps. 149:1). Te wi e singi, dan wi e prèise Yehovah, èn den singi dati e memre wi sortu fasi wi musu kon abi. Den singi dati e gi wi deki-ati tu fu teki prati fayafaya na a diniwroko. Èn fa a de nanga a begi na a bigin fu a konmakandra? Na ini owruten, Yehovah ben e kari a tempel en „oso pe sma e kon begi” (Yes. 56:7). Na ini a ten disi, wi e kon makandra fu begi Gado. Na ini a fosi begi, a brada e aksi Yehovah fu tiri wi èn fu gi wi en santa yeye. Ma a begi dati e sreka wi ati nanga wi frustan tu fu teki a leri di wi sa kisi. Wi musu abi a fasti bosroiti fu doro biten na den konmakandra, so taki wi kan singi a fosi singi, èn kan arki a fosi begi.

Helen di abi 23 yari, ben fruteri fu san ede a e go biten na den konmakandra. A e taki: „Mi e si en leki wan fasi fa mi kan sori taki mi lobi Yehovah, fu di ala den sani di wi e leri drape e komoto fu en, sosrefi den singi, èn a fosi begi.” Wi musu abi a srefi denki dati, a no so? Iya, na so a de. Sobun, meki wi du muiti fu tron sma di de biten na ini ala sani di wi e du, spesrutu te a abi fu du nanga na anbegi fu a tru Gado.

[Futuwortu]

[Prenki na tapu bladzijde 26]

Sreka yusrefi bun na fesi

[Prenki na tapu bladzijde 26]

Sorgu taki yu abi ten ete te ’sani e pasa di yu no fruwakti’

[Prenki na tapu bladzijde 26]

Yu o kisi wini te yu e doro fruku na den konmakandra